فنجري البق

وتستمر مغامرات اللي بالي بالك ف الشارع المصري بفشل ساحق! عصابة عاكف وشركاه قررت انها تعمل شبورة مظاهرات علشان تستغل الوضع في غزة في تهييج الرأي العام. وكالعادة طلعت منهم أوت.. لانهم مكنوش متخيلين ان النظام المصري هيساعد الفلسطينيين في غزة بالشكل اللي كلنا شفناه ده
وواضح ان البعدا مابيتعلموش ولا بيتكسفوش على دمهم. يعني مش يلموا نفسهم ويقولوا يا حيطة داريني بعد الفضيحة بتاعة البرطمان الأوروبي؟ لأ.. دول راحوا سايقين فيها. وتمادوا كمان في رفض الموقف المصري من البرلمان الأوروبي. والكلكيعة البرطمانية بتاعتهم قعدوا يجعروا ف الجلسات ويعترضوا على أي حد يفتح بقه

عضوين من الكلكيعة البرطمانية قاعدين يغلوا ف نفسهم ولا قاسم السماوي

أنا الصراحة جالي انتعاش الاسبوع اللي فات وأنا شايفاهم بيتغسلوا من كل الجرايد وكل الصحافيين الوطنيين, بتوع المعارضة قبل بتوع الصحف الرسمية. يا شماتة أبلة ظاظا فيكو ياللي ماتتسموش! تستاهلوا. يلا خلوا ريحتكو تطلع علشان نخلص من كتمتكم على نفسنا والصداع اللي انتم عاملينهولنا ع الفاضي
الا عمرنا ما شفنا منكم غير كلام وبس. دوشة دوشة وزعيق وصويت ونواح وولولة زي الولايا.. وعلى طول مش عاجبكم حاجة. طب ورونا أمارة للفتونة دي؟ هو الموضوع خدوهم بالصوت يعني؟

المهم يا سادة يا كرام, لما اسرائيل فرضت الحصار على قطاع غزة, الغربان اياهم قالولك لازم طبعا نولعها حريقة
ماشي.. وماله؟.. كويس.. هات الولاعة يا عم.. يلا بقى على اسرائيل
قالك لأ.. اسرئيل دا إيه؟.. مين جاب سيرة اسرائيل؟
طب نروح على غزة يعني؟.. قصدكو نعمل حريقة تنور الضلمة بعد الصهاينة ما قطعوا عليهم الكهربا؟
قالك لأ برضه.. لا هنور غزة, ولا هنولع ف الصهاينة
الله؟؟ أمال عايزين إيه يا بعدا؟
قالك نولع ف مصر طبعا
لييييييييييييه؟ هي مصر مالها؟ عملت إيه مصر؟ ما التحذير بتاع الحصار وقطع الكهربا دا اسرائيل اعلنته رسمي من شهرين. وقالت ان مفيش تراجع عنه طول ما الصواريخ الصفيح بتاعة حماس نازلة عليهم. وحماس هي اللي أصرت تفضل تفرقع الصواريخ اللي عمرها ما عورت صباع واحد اسرائيلي دي. وف اليوم المشئوم دا رموا على اسرائيل 7 صواريخ حتة واحدة, وهما عارفين اللي هيحصل. مصر مالها ومال الموضوع بقى؟
قالك ما هو لازم مصر تبقى هي السبب وخلاص.. يعني معقول نسيب فرصة زي دي من غير ما نستغلها؟
يا نهاركم اسود! طب يعني هتعترضوا على إيه؟
قالك أهم حاجة نستغل كره الشعب المصري للحكومة, وكرهه لاسرائيل, وتعاطفه مع الفلسطينيين علشان نبان ف الصورة. قال يعني احنا اللي بنساعد الفلسطينيين وبنحارب اسرائيل. ونطلع مصر دولة عميلة ومتعاونة مع الصهاينة على تجويع الفلسطينيين
هههههههه.. إيه كلام المجانين ده؟ طب إزاي يخش العقل يعني؟ دا إحنا واقعين مع اسرائيل وقعة كحلي ومنشفين دماغنا على الآخر. دا حتى البرلمان الأوروبي قلبنا عليه الترابيزة وقاطعناه. وبوش زيارته فشلت واتبهدل واتهزأ في مصر, دونا عن الدول اللي زارها ف المنطقة كلها, اللي خدته بالحضن وغرقته احتفالات وهدايا.. إيشي دهب, وإشي ياقوت, وإشي مرجان.. بركاتك يا عم بوش. يبقى ازاي يعني تطلع مصر هي اللي عميلة وشريرة ومطنشة؟
برضه مفيش فايدة.. اللي ف دماغهم ف دماغهم. قاللك أهو احنا نقول كدة وخلاص. هو حد هيدور ورانا؟ يا عم احنا نطلع بالشويتين بتوعنا دول, وكلام من اللي يقطع القلب, على شوية دين, وأهي تمشي الحكاية زي الفل

ف الآخر عملوا اللي ف دماغهم. راحوا طالعين في ميت مظاهرة مع بعض (اصحوا للون بقى, ما هو تنظيم سري) وراحوا رافعين المصاحف, وهاتك يا هتافات.. إشي شتيمة ف العرب, على شتيمة ف الحكومة, على تكبير, على أوامر بفتح المعبر اللي كان بيتفتح فعلا وهما فاتحين الجعورة ولا داريانين.. ونسيوا بقى اسرائيل, والغارات اللي بتعملها ف عز ما هما بيصوتوا.. لأ, وأحلى هتاف عاجبني أوي بتاع "سلحونا ودربونا وعلى غزة ودونا" هههههههه
ما تتفضلوا ياخويا منك ليه! ما هو المعبر مفتوح أهه.. روحوا ورونا نفسكوا.. يلا حاربوا يا حلوين وانصروا أهلكم ف فلسطين. مستنيين إيه؟ خدوا جيش صامدون بتاعكو وهوونا يلا.. اعملوا حاجة مفيدة بدل الصويت والردح والكلام الفارغ.. ما يلا! اتلحلحوا. هرررررررر. يا لهوي ع اللزقة! يا لهوي ع التلامة! يا لهوي على منظركم اللي يكسف

والنبي عايزة أعرف مال المصحف ومال المظاهرات يا كباتن. يعني لو حد فيكم كدة يشرحلنا الموضوع. أكون شاكرة أفضاله. يعني إحنا كلنا مؤمنين الحمد لله. والمصريين كلهم, مسلمين ومسيحيين طول عمرهم واقفين واقفة مجدعة مع اخواتهم ف فلسطين. المصحف بقى ماله ومال الموضوع؟ يعني دا كتاب مقدس. رايحين تبهدلوه ف المظاهرات وشغل الجلا جلا والتلت ورقات بتاعتكم ليه؟ مش دا حرام؟
إيه الرمز يعني؟ علشان الناس تعرف ان المظاهرة عاملينها الاخوان؟ طب ما هما هيعرفوا من الهتافات الفارغة بتاعتكم. وبعدين شكلكو بيفصح عن نفسه يعني, أشهر من النار على علم!.. عايزين تقولوا إيه يعني من حركة رفع المصحف دي؟ ان اللي ف غزة مسلمين؟ طيب ما غزة فيها مسيحيين برضه! ولا ناويين تكفروهم هما كمان؟ ولا حماس هي كمان ناوية تخليهم مواطنين درجة عاشرة؟
بجد مش فاهمة قصدكو إيه؟ يعني مثلا لو الفلسطينيين دول مكنش فيهم مسلمين, مكنتوش اهتميتوا بيهم؟ يولعوا يعني ساعتها؟ ولا تكونوا فاكرين ان إحنا اللي مش مسلمين علشان مش رافعين المصاحف ف الشارع؟

عيب أوي الحركات العرة دي يا كباتن! عييييييييييييييب. اختشوا. بلاش استغلال الدين ف السياسة بالشكل المهين ده. يعني انتوا هينوا نفسكم زي ما انتم عايزين. لكن كلام ربنا طلعوه برة الموضوع.

وبعدين هو حزب الكرامة أحسن منكو؟ ما حمدين صباحي راح غزة! أمال الحج مهدي عاكف قاعد ليه؟ بيدفا تحت البطانية؟ بس كان باين عليه في غاية النشاط والحيوية ما شاء الله وهو عمال يشتم ف البلد ف المؤتمر الصحفي بتاع التضامن مع غزة! خير يعني ماحدش بيشوفه ليه؟
دوشتونا بس ع الفاضي. وهاتك يا شعللة ويا شتيمة ف موقف مصر. قرفتونا على البلوجات يا فنجرية البق. وآخر حاجة واحدة من الأخوات قاعدة تلف على البلوجات تكتب "غزة حررت مصر"! إيه الهبل ده؟ ههههههههه

العاكف على شتيمة مصر.. قمة الحماس ف الردح والشتايم.. وطظ يا عم ف مصر

مصر طول عمرها شرف للعرب. طول عمرها أكتر دولة بتدعم القضية الفلسطينية. طول عمرنا حاطين اللاجيئين العرب ف عنينا وبنعاملهم أحسن معاملة. أنا لسة فاكرة أيام غزو الكويت, لما المدارس المصرية فتحت أبوابها للطلبة الكوايتة, ودخلوا قعدوا جنبنا ف الفصول اللي كانت سايعانا بالعافية. وكنا مبسوطين ومرحبين ومتعاطفين. واحنا برضه اللي دلوقتي بنضم العراقيين والفلسطينيين. مفيش حد يقدر يزايد على مصر. مفيش حد يقدر يزايد على الشعب المصري الأصيل الجميل المضياف. مفيش حد يقدر يزايد على تعاطف المصريين الفطري مع جيرانهم العرب, بحكم الدم قبل أي اعتبارات تانية. مش بفنجرة البق هتعملوا نفسكوا أبطال. مش بالصوت العالي هتسرقوا اللي الشعب كله بيعمله بتلقائية ومن غير انتظار مقابل. مش بالتخوين واتهام بلدكم بالعمالة هتبقوا مسلمين

اتقوا الله يا اخوان.. اتقوا الله في بلدكم. اتقوا الله ولا تجعلوا مصالحكم الشخصية تعميكم أكثر من ذلك. اذا كنتم تريدوننا أن نصدق اقوالكم, فالأجدر بكم ان تثبتوا ذلك بالفعل.. الأجدر بكم أن تهبوا لمساندة وطنكم الذي يرفع رأس كل العرب. الأجدر بكم ان ترجعوا للحق, وأن تعترفوا ان التضحيات التي تقوم بها مصر الآن لا يمكن لأي دولة أخرى أن تقوم بها. نحن أكثر بلد ضحى بدمه وماله في الحروب مع إسرائيل. نحن البلد العربي الوحيد الذي يتحدى اسرائيل ويصمد أمام ضغوطها ومخططاتها. أم ترى كل ما تريدونه هو سقوط بلدكم, حتى لو كان ذلك على أيدي الصهاينة؟

انتم تعلمون الضريبة التي تدفعها وستدفعها مصر بسبب تحديها القوي للارادة الاسرائيلية. اسرائيل ممكن ان تتدخل عسكريا في أي لحظة بحجة عدم احترام مصر لاتفاقية المعابر. الجندي الاسرائيلي ممكن يدخل بيوتكم غدا أو بعد غد. فافيقوا من غفلتكم. وهبوا لتوحيد جبهة وطنكم وحماية اهلكم قبل فوات الأوان

يا عالم اصحوا .. فوقوا .. اقروا .. فكروا .. الاخوان مش فارقة معاهم مصر ولا فارق معاهم فلسطين .. كل همهم يوصلوا للحكم, حتى لو في ظل احتلال اسرائيلي, ولا تفرق معاهم. وحماس واخدة الشعب الفلسطيني رهينة علشان تتغلب على فتح. الشعوب هيا اللي بتدفع التمن ف الآخر. 150 صاروخ ضربتهم حماس على اسرائيل اصابوا 2 مدنيين! وف المقابل كام واحد فلسطيني مات؟ كام واحد فلسطيني اتشرد؟ كام واحد فلسطيني اتصاب؟

اسرائيل بتخطط جديا انها ترمي مسئولية قطاع غزة على مصر! يعني عايزين يصفوا القضية الفلسطينية. مش هيتبقى من فلسطين غير رام الله! حد متخيل؟ خشوا شوفوا الخطط الاسرائيلية المنشورة ف الجرايد بتاعة الصهاينة .. اقروا اللي بيقولوه وشارحينه بالخرايط .. يا ناس بلدنا بتضيع مننا وأحنا عاملين زي العيال اللي بيجروا ورا عربيات الرش!! يا ناس خافوا على بلدكم شوية. لو كانت هزيمة العدو بالكلام والشعارات كان زمان اسرائيل دي مالهاش وجود من زمان! يا سلام, دا إحنا أحسن ناس كلمنجية.. هو احنا فالحين غير ف الكلام؟ والكلام الفارغ تحديدا.. بس يا ريت! مكنش حد غلب

لو عايزين نهزم اعداءنا بجد, يبقى لازم نكون إيد واحدة, وندي اللي بيفرقونا وبيهدونا بالشلوت. لازم نتعلم ونعرف, ننتج ونطور, نقف على رجلينا ونقضي على مشكلة الفقر اللي ناحلة وبرنا. لازم نتوحد في موقفنا ضد عدونا الخارجي, عدونا الحقيقي.. مش نتخانق مع بعض زي العيال! لازم نبطل نتخدع في أي حد يخش علينا بالحنجل والمنجل علشان يسلك مصالحه. يا ناس احنا مالناش غير مصر, ومصر مالهاش غيرنا. لو طعناها ف ضهرها, نبقى بنطعن نفسنا. بصوا حواليكو.. وفتحوا عنيكو قبل ما ييجي علينا الدور

شوية لينكات ع الماشي.. ممكن تفوق اللي عنده غيبوبة .. مقالات من الصحف الاسرائيلية
ثبوت البديل المصري

أولمرت يمتدح نفسه بعد سقوط حدود غزة

زراعة الحرب

هروبا من غزة أم ترحيل اختياري

غزة:غياب الدولة, و القيادة, والقوة, والعقل (اقرا آخر فقرتين كويس

فض الاشتباك الحقيقي مع غزة

من الذي يسيطر الآن؟

ما الذي تريده القاهرة؟ (ملي عنيك

اتفرج على مشروع نقل غزة داخل مصر (بالخرايط

وأخيرا, أوامر مشعل لعاكف باشعال المظاهرات في مصر.. إللي عمرهم ما ضربوا بمبة ف اسرائيل

الفتنة المحلية

قررررب قرررررررب قرررررررررررب.. شوف فخر الصناعة المحلية.. الفلاية الاخوانجية.. اللي تطلع فاسد العقيدة من وسط مية

قررب قررب وأتفرج.. شوف الحاوي بتاع الجلا جلا.. فرصة عظيمة للي عايز يتعلم الحنجلة, وأصول الشعللة

قررب وشوف كمان.. البغبغان أبو نص لسان.. تعالوا واسمعوا يا جدعان.. قبل ما يروح المرستان

يلا كله يقرب ويتفرج ببلاش.. على التعلب الغشاش.. اللي قاعد يخططلك وانت ماتدراش.. وعايز بلدك يحتلوها الأوباش

يلا يلا يا جدعاااان.. العرض الآن.. وكله على عينك يا تاجر.. عايز تتفرج بس ولا ناوي تعافر؟ وتقف في وش اللي بيلعبوا بيك الكورة وانت غافل.. وعمال تسقفلهم من غير ما تجادل

قررررررررررب وفتح عنيك.. شوف العميان اللي حواليك.. واللي بيخربوا ف أراضيك.. وعاملين قال إن قلبهم عليك

قررب وأفهم يا محتاس.. ما خلاص الفاس وقعت ف الراس.. انتوا لسة قاعدين تتفرجوا يا ناس؟.. كفاية بقي, ورونا شوية اخلاص

يلا يا جدعان صح النوم.. معدش ييجي منه بعد اليوم.. بكرة يقطعوا رقبينا بسيفهم المسموم.. ويقولوا دول شوية كفرة ملهمشي لزوم

قررربوا يا جدعان.. قربوا كمان وكمان.. قربكم من بعض هو الأمان.. ماتسمعوش كلام اللي بايعين الأوطان.. وواكلينها والعة من زمان

قربوا وقولوا كلمتكم.. دي بلدكم, وكل المصريين قرايبكم.. مسيحي مجدع, علماني وطني, بهائي طيب, وشوشهم هيا وشوشكم.. ماتخلوش حد ف لحظة ضعف يخدعكم.. يهد اللي بينكم ويفرقكم.. وبالكره والحقد يملا قلوبكم.. ويرمي رمل الصحرا في عيونكم.. لا تعرفوا عدوكم من حبيبكم

قربوا وابنوا المستقبل لولادكم.. إبني وإبني, بنتي وبنتك, أمانة ف رقبتكم.. لازم تفضل مصر عمار علشانهم.. ويفضل الخير والحب يدفي قلوبهم

قربوا بدل ما ييجي اليوم الشوم.. ويتلم علينا الغربان والبوم.. يقولوا للولد "أبوك عقيدته فاسدة.. يلا يا مسلم ورينا الهمة.. هاتلنا راسه على طبق فضة.. نعملك أمير وتخش الجنة".. يجي الواد شايل راس أبوه.. ياخدوه بالحضن ويبوسوه.. وف آخر العالم يرموه.. ويجندوه ويسلحوه.. يصبح قاتل يقتل أخوه.. وعلى البشرية يطلقوه

قرررررب قررررب فتح عينك.. شوف الدم اللي بيني وبينك.. دمنا اللي سال على أرض سينا.. اللي ترابها الغالي يشهد علينا.. اننا طول عمرنا واحد.. مسلم, مسيحي, ربنا واحد.. ربي ربك, دمي دمك, بلدي بلدك, واسمي علي اسمك.. مصري ومصرية

خلصت الأغنية

السقوط ف البرطمان الأوروبي

يا حلاوة يا ولاد! دا البرلمان الأوروبي طلع جامد أوي, وقلبه على حقوق الانسان أوي! إيه الاهتمام المفاجيء دا بمصر؟ اللهم أجعله خير. هو البرطمان فاضي قالوا يملوه بأي حاجة ولا إيه؟

بصوا بقى على بلاطة كدة.. أنا أشتم وأهزأ وأنتقد في حقوق الانسان في بلدي زي ما أنا عايزة. لكن لمؤاخذة مش مستنية سي البرطمان الأوروبي يحارب مكاني علشان حقوق الانسان في بلدي. معلش دي طلعت أوت. الظاهر نسيوا يألوظوا غطى البرطمان كويس.. منعطلكوش يا أمامير.. انتوا نسيتوا ان اللي كشف الانتهاكات دي وعرضها على الرأي العام هما المواطنين المصريين؟ انتوا لمؤاخذة جايين تاخدوا الكورة من رجلينا وأحنا منفردين قدام الشبكة علشان تجيبوا جون ع الماشي؟ انتوا مش عارفين ان المدونين المصريين هما اللي تعبوا وطلعت عينهم علشان يثبتوا انتهاكات حقوق الانسان اللي انتوا بسلامتكم جايين تتكلموا عنها دلوقتي؟

إيه؟ انتوا كنتوا نايمين ولا إيه؟ ولا الأعضاء بتوع البرلمان الأوروبي بسلامته برضوا بيروحوا علشان يناموا ف المجلس؟ هو جرى إيه ف الدنيا يا ولاد؟ إلا ما سمعنالهم حس لما كان مفيش حاجة اسمها حقوق انسان في مصر من أصله! إلا ما كلفوا خاطرهم يقولوا كلمة واحدة توحد ربنا وهما شايفين انتهاكات حقوق الانسان عيني عينك.. إلا ما شفناهم مرة بيدينوا أي ظلم عندنا؟

إيه اللي اتغير بقى؟ هو بعد ما بقى عندنا منظمات حقوق انسان, ومركز قومي لحقوق الانسان, وجمعيات مجتمع مدني بتشتغل في مجال تحسين حقوق الانسان, جايين دلوقتي محموءين أوي؟ كنتوا فين قبل كدة يا حلوين؟ مساء الفل يا برطمان. سلامات يا برطمان. ولله وفضحت نفسك يا برطمان! وفضحت ناس تانية معاك ف السكة

معلش يا جماعة.. دخلت ف الموضوع دوغري من غير مقدمات.. بس أصلها حاجة تحرق الدم. الواحد مش عارف يلاقيها منين ولا منين.. من البرطمان الأوروبي, ولا من الصهاينة, ولا من اللي بالي بالك

الموضوع وما فيه إن البشوات بتوع البرلمان الأوروبي قال إذ فجأتن اكتشفوا ان وضع حقوق الانسان في مصر مش ولابد. فراحوا امبارح عاملين قرار يدين وضع حقوق الانسان في مصر, وعرضوه للتصويت انهاردة.. قوم خير يا ولاد, الجلسة حضرها 59 عضو من 785! 52 منهم صوتوا لتأييد القرار, و7 خلوا عند أهلهم دم وامتنعوا عن التصويت! يعني مفيش ولا نفر واحد قال لأ. شوفتوا الديموقراطية حلوة إزاي؟

أنا طبعا برج من نافوخي كان هيطير! إيه التوقيت الغريب ده؟ إشمعزا يعني؟ ماحنا بقالنا ميت سنة بنلالي ومحدش سأل فينا! وكان الوضع أنيل بكتير من دلوقتي. يعني أول مرة نشوف ضابط بيتحاكم بتهمة تعذيب مواطن. لأ والمعجزة إنه طلع مدان وفعلا اتحكم عليه بالسجن! طيب لما كان موضوع التعذيب دا شيء مسلم بيه ف الاقسام, الباشا البرطمان كان فين؟ قبل ما المدونين المصريين يصوروا الانتهاكات اللي بتحصل ويكتبوا عنها ويعملوا حملات ضد التعذيب والتمييز على أساس ديني وحقوق المرأة وكل دا, كانوا البهوات فين؟ ما طول عمرهم عارفين اللي بيحصل. وطول عمرهم ودن من طين وودن من عجين. وكل تقارير حقوق الانسان كانت بتقول نفس الكلام. والمراقبين الدوليين برضه بيقولوا حقوق الانسان ف مصر زي الزفت. إيه اللي جد؟

اللي جد ان اسرائيل غضبانة على مصر.. خلينا نتكلم على بلاطة.. أصل السكوت والتلميحات معدتش تنفع. اشمعنى يعنى الصدفة الرهيبة ان الكونجرس لسة مطلع قرار ضد مصر, وقرر عقوبة مصر بخصم 100 مليون دولار من المعونة الأمريكية المخصصة ليها. والنبي محدش جاهل يطلع يقوللي وإيه يعني؟ علشان انا اتخنقت من الناس اللي عمالة تفتي وتفش غلها وخلاص. المعونة دي (حوالي 2 مليار دولار) بتدفعها أمريكا لمصر ضمن برنامج معونات موجه لكل دول العالم التالت. يعني مش علشان سواد عيوننا ولا علشان نسمع الكلام ولا الهجص دا. بدليل انهم كل سنة بيخصموا منها وبرضه مبنسمعش الكلام

المعونة دي معظمها عسكري. بنصرف منه ع الجيش. والباقي مش بيدخل جيب الحكومة زي ما ناس بتقول وهما مش فاهمين حاجة. هي امريكا بريالة علشان تروح ترمي فلوسها ف الأرض؟ الفلوس دي بتتصرف في مشاريع تنموية تحت إشراف خبراء من عندهم. ومرتبات الخبراء دول بتندفع من المعونة على فكرة.. يعني جزء كبير منها بيرجعلهم تاني. طيب يعني إيه الكلام دا؟ يعني الفلوس دي بتاعة الشعب المصري, كشعب من شعوب العالم التالت. المعونة مش صدقة, دي جزء من فلسفة السياسة الامريكية وليها نص ف القانون الامريكي. المهم ان اسرائيل لوحدها بتاخد تلت ميزانية المعونة المخصصة لدول العالم التالت كله. مع انها مش عالم تالت ولا حاجة.

المهم اسرائيل مع ذلك واخدة على خاطر أمها من الادارة الامريكية علشان منفضينلهم ف كام موضوع كانوا طلبين مساعدتهم فيهم, علشان عم بوش عايز يمشي من غير مشاكل. راحوا بشغل السوس بتاعهم قلبين عليه الكونجرس, وبالمرة قالوا اللي مايجيش من أمريكا ييجي من غيرها. عملوا حملة شعواء على مصر بيتهمونا فيها بتهريب سلاح لغزة. قالوا مصر متواطئة مع المهربين وسايباهم يعدوا الحدود. قلنالهم ما المعاهدة مخليانا ملتزمين بعدد جنود قليل بيحرسوا المنطقة دي, تعالوا نغير البند دا ف المعاهدة ونزود الجنود علشان نعرف نحرس الحدود كويس. قالوا لأ مش هتزودوا ودي مشكلتكوا انتوا, اتصرفوا. قلنالهم اخبطوا راسكوا ف الحيط احنا الحل اللي عندنا قلناه وانتوا اللي مش موافقين

راحوا قالولك بسك عليه.. قام اللوبي الصهيوني اللي ف الكونجرس قعد يلف على الأعضاء ويلم ف توقيعات على قرار معاقبة مصر لانها مش بتبذل مجهود كافي في حراسة حدودها مع اسرائيل وبتهرب سلاح لغزة.

نفس السيناريو دا حصل ف البرلمان الاوروبي. اللوبي الصهيوني قالك نتلكك لهم بحروق الانسان. ويلا يا عم امضي يا سيدي, شالوم يا خبيبي, مصل موس يخترم خكوك انسان, وهوب طلع القرار. يا حليلة! هي بقت كوسة دولية كدة؟ طيب سلامات يا بتوع حروق الانسان. معلش عنكوا انتوا والنبي.. احنا نقدر نقوم بالواجب وزيادة. دي حكومتنا واحنا نعرف نطلع عينها كويس. مش لازمنا خدماتكوا

الحكومة اتشمللت الحمد لله واديتهم على دماغهم. البرلمان بتاعنا قطع العلاقات مع البرلمان الاوروبي والبرلمان الأورومتوسطي. ودي خطوة ممتازة. أول مرة ناخد موقف حازم وقوي كدة! بجد فرحت وانا بسمع القرار ده. لكن يا فرحة ما تمت, خدها الغراب وطار.. لأ, غراب إيه؟ ما أنا قولت نظام السيكو سيكو معدشي ينفع. لازم نقول للأعور "أنت أعور" ف عينه. تخيلوا مين اعترض على القرار؟ الكلكيعة البرطمانية للاخوان الاوروصهيوكونجرسيين! البهوات بتوع الاخوان مش راضيين نقطع العلاقات مع البرطمان الأوروبي! البهوات اللي قوموا الدنيا على رجل علشان شوية شخبطة تافهة ف جرنال عرة بيوزع خمسين نسخة بالكتير ف الدنمارك!! مش عاجبهم ان مصر تقطع العلاقات مع البرطمان الاوروبي اللي بينفذ كلام الصهاينة! وقال إيه, أصل حقوق الانسان دي "حاجة عالمية"!!! على قلبهم زي العسل طبعا! مش مهم البلد تتحرق.. المهم ينتقموا من الحكومة اللي بتحاكم الناس اللي بيغسلوا الفلوس اللي جايالهم من برة محاكمات عسكرية. اصلهم فاكرين ان البرطمان الاوروبي هيفرج عن رجالتهم! ولا يكونوا فاكرين ان اسرائيل هتدفعلهم مكافأة تعوضهم عن الفلوس اللي راحت عليهم! ولا يكونوا فاكرين ان اسرائيل لما تضربنا, بعد الشر, مش هتلمس بيوتهم. يا نهار ندالة! إيه الفضايح دي؟

قال الاخوان بقوا بيحترموا حقوق الانسان.. ياخي هأأووو! دا انتوا مش مؤمنين بالمساواة بين المسلم والمسيحي, ولا بين الراجل والست المسلمين حتى! دا انتوا بتقولوا مفيش قبطي ولا مرأة يمسكوا مناصب قيادية ف الدولة! أصلها كانت بلد أبوكوا! حقوق انسان إيه ياللي الخليج بيصرف عليكوا؟ حقوق انسان إيه يا بتوع الست تقعد ف البيت؟ حقوق انسان إيه ياللي الانسان عندكوا ملوش غير تعريف واحد: "راجل مسلم سني اخواني" وبس! أهي دي أسخف نكتة قلتوها. بس كويس انكوا اتكشفتوا على حقيقتكم. بانوا يا إخوانجية على أصلكوا بانوا. دلوقتي عرفت ولاءكم لمين

انصحكم بحموم الانسان.. يمكن تنضفوا شوية

يا صباح الوحدة الوطنية

كل سنة وكل أصدقائي الأقباط بخير.. لأ وكمان كل سنة ومصر كلها بخير. فاليوم هو مولد سيدنا عيسى عليه السلام, كما قالت الكاتبة الرائعة ليلى تكلا. كان نفسي أقول كلام مبهج بالمناسبة السعيدة دي. لكن أنا حاسة إن الكلام اللي هأقوله أهم, وممكن يكون هو أحسن كلام يتقال ف الوقت ده.. الوقت اللي بقت فيه وحدتنا الوطنية مهددة بسبب عدد قليل من الناس اللي للأسف صوتهم علي.. أعلى من أصوات الأغلبية المحبة والمعتدلة. أنا بالبوست دا بتطهر من ذنب غيري من المصريين المسلمين, اللي بيسيئوا لينا كلنا وللإسلام بتعصبهم وطائفيتهم. مش معنى كدا إن مفيش لوم بيقع على الجانب الآخر, على المصريين المسيحيين, اللي فيهم برضه نفس المشكلة. لكن أنا هتكلم عن الجانب اللي يخصني.. وأملي إن هديتي لكل المصريين ف العيد تكون نواة صغيرة للتصدي للطائفية في بلادنا

انتوا عارفين المشكلة ف ايه؟ المشكلة إن الناس حاسه ان مالهاش قيمة. هيا دي المشكلة. التعصب مالوش مكان في المجتمعات المنتجة الناجحة والمتعلمة تعليم سليم

علشان مخرجش بره الموضوع, عايزة أقول إن فيه حاجات كتير أوي حصلت عندنا وهي اللي خلت احساس ناس كتير بقيمتهم يتضاءل، وممكن يتلاشئ كمان. تهميش دور الناس في المشاركة السياسية، إهانة المواطن في المواصلات والمصالح الحكومية، الفقر والجهل، البطالة، المحسوبية والكوسة، تهميش دور المرأة، انعدام جودة التعليم، سوء استخدام السلطة والفساد. كل ده يخلي الناس تحس ان وجودهم مالوش قيمة. بيفقدوا احساسهم بالمشاركة وإن ليهم دور فاعل في الحياة. (طبعا ضيفوا لده احساس الهزيمة في 1967 اللي للأسف لسه عامللنا عقدة)

من هنا بدأ الناس يدوروا على حاجة تحسسهم انهم مهمين، وان وجودهم بيخدم هدف. تصادف ده مع إن فيه جيران لينا في المنطقة اغتنوا من الدهب الاسود اللي اكتشفوه هناك. وتصادف ده برضه مع صراع طاحن بين القوتين العظمتين أمريكا والاتحاد السوفيتي. وتصادف برضه مع توجه جديد في السياسة المصرية الداخلية

المهم، في حالة الضعف اللي كنا فيها، ومازلنا بنحاول نطلع منها، جيراننا الأغنيا كانوا عايزين تنمية وعمار وتعليم, قاموا خدولهم شوية من عندنا. أمريكا كانت عايزة تضرب الاتحاد السوفيتي وتوقفه عند حده عشان خوفها من خطر الشيوعية. فخدوا من عندنا ومن جيراننا شوية ناس كمان عشان يحاربوا السوفييت ويطلعوهم من أفغانستان. اليسار المصري كان ابتدا يقوى وكان فيه تيار شيوعي فاعل في مصر، ودول كانوا مضايقين النظام الحاكم وقتها شوية. فقالوا نجيبلهم اللي يقدر عليهم، طلعولهم الإسلاميين علشان يكفروهم ويقضوا على وجودهم

معايا ولا تهتوا مني؟

المهم كل ده عمل نشاط في صفوف الإسلاميين وقتها. نرجع لجيرانا بتوع الدهب الإسود بقى.. النظام الملكي بتاع جيراننا هيفضل ازاي بعد مالشعب هناك يبقى غني ويتعلم ويشوف بلد فقيرة زي مصر عندها رئيس منتخب (المفروض يعني)؟ ممكن أوي الشعب ده يعمل تغيير سياسي ويشيل العيلة المالكة دي. طيب يعملوا ايه؟ قالولك الدين بيقول طاعة ولي الأمر. الديمقراطية دي اختراع غربي, تبع الشيوعين الكفرة اللي فيه ناس من عندنا راحو يجاهدوهم في أفغانستان. وبعدين احنا عندنا أماكن مقدسة، لازم نحافظ على استقرار البلد علشانها. واحنا اللي ماشيين بشرع ربنا، حد يقدر يجيب نظام سياسة أحسن من شرع ربنا؟ وقام الملك بتاعهم كمان قالك يغير اسمه عشان ملك دي برضه مستفزة شوية. قالك اسمي نفسي خادم الأماكن المقدسة دي

طلعت بقى حملة شعواء لإحياء عصر الخلافة. مع ان العائلة المالكة دي مالهاش دعوة بالخلافة. بس قالك أهو أي حاجة غير الجمهورية والانتخابات. هوووب جابوا كل الكتب القديمة ودفعوا فلوس كتيرا أوي للشيوخ اللي يقدروا يقنعوا الناس بالكلام ده. وفيه ناس من الأزهر عندنا راحوا في بعثات هناك علشان أكل العيش، لكن هناك أقنعوهم بنظرة تانية للدين، من خلالها الدين يقدر يتحكم في حياة الناس. مفيش خلاص موضوع الدين في القلب وبيني وبين ربنا. لأ, لازم تورينا إنك مؤمن بجد. لازم نشوف أمارة. يعني انتا يا فلان قريت التفاسير دي ودي ودي؟ شفت بقى إنك ماكنتش عارف ربنا ولا حاجة؟ احنا بقى يا حبيبي نقولك ربنا عايز ايه

بس يا عم.. وهاتك يا غسيل مخ من اللي قلبك يحبه. هوووب الازهر حاله اتقلب. بعد ما كان بيطلع مظاهرات سياسية (اللي هي بتاعة يحيا الهلال مع الصليب اللي بتشوفيها في الأفلام القديمة دي) وبيوعي الناس بأهمية التحضر والتقدم.. وبعد ما رموز الأزهر كانوا بيقودوا حركة التنوير في مصر.. بقوا خير اللهم إجعله خير يقولولك ارضاع الكبير, ويمنعوا كتب، ويحاكموا الناس بالحسبة زي محاكم التفتيش بتاعة القرون الوسطى

والناس اللي زي العسل، ولاد البلد الجدعان، اللي راحوا يعمروا المخروبة بتاعة جيراننا علشان حوجة لقمة العيش، اتغسل مخهم هما كمان. كان الواحد منهم ميعرفش زميله اللي قاعد جنبه في مصر ديانته إيه. ومكانتشي تفرق معاه. كان كفاية إنهم كلهم مصريين وجدعان، وقلبهم على بعض. رجعوا الجدعان شايلين المراوح والمكوة الكهربا، ولازم مصحف طبعا، لكن للأسف مصحف تاني غير اللي كانوا يعرفوه

المصحف اللي كانوا عارفينه في مصر كان بيحببهم في كل خلق الله. كان بيقولهم ان البشر كلهم واحد, مهما كانت الاختلافات بينهم. لكن لما قعدوا سنين في مجتمع بيفتش على هدوم الناس قبل ضمايرهم، نسيوا أصحابهم الجدعان. ماهو أصل مفيش هناك غير لون واحد ودين واحد وعيلة مالكة واحدة. مفيش حاجة اسمها اختلاف. حتى الستات ميتعرفوش من بعض, كلهم خيم سودة

واللي كانوا حبايب النظام ضد المعارضة اليسارية والشيوعية قلبوا عليه لما راح يصالح اللي احتلوا أرضه، وقتلوا الراجل اللي طلع القيادات بتوعهم من المعتقلات. بعد كده قالولك وماله لما احنا كمان نحكم. يا سلام! ده احنا ناس بتوع ربنا

طيب الدستور والديمقراطية والمساواة؟

طبعا الاجابة معروفة: هوه فيه دستور بعد كلام ربنا يا كفرة؟

طب اشمعني انتوا اللي تحكموا؟

عشان احنا في بلد معظم الناس اللي فيها مسلمين. مش الدستور بتاعكم بيقول الإسلام الدين الرسمي للدولة؟

أيوه بس انتوا مش عاجبكم الدستور ده. هتمشوا على كلامه ليه؟

الضرورات تبيح المحظورات يا أخي! وبعدين دا انت المفروض تشكرنا. دا احنا هندخلكم الجنة. مش احسن ماتفضلوا في الضلال المبين اللي انتوا فيه؟

ضلال مبين؟! طيب ومشاكل البلد؟ الفقر والبطالة والعشوائيات والمرور والمجاري؟

الإسلام هو الحل

طبعها لازم الدخلة تكون شيك. لازم الناس متحسش اننا طمعانين في حكم وللا كلام من ده. لازم الناس هم نفسهم اللي يقولونا لو سمحتم تعالوا احكمونا

طيب ازاي؟ دا انتوا مش هتسمحوا لحد مسيحي انه يشارك في الحكم. وكمان عايزين ترجعوا عصر الخلافة. يعني اللي مش مسلمين هيدفعولكم جزية! مين هيوافق على كده؟

يا أخي الكترة تغلب الشجاعة. لو معانا الأغلبية محدش هيقدر يمنعنا

طيب ازاي الأغلبية هيوافقوا علي كده؟

والله احنا مش مستعجلين.. يعني واحدة واحدة كده هنقنعهم ان ديننا ده احسن دين، وان الناس اللي مش على ديننا دول في ضلال ومصيرهم جهنم وبئس المصير. ومش ممكن واحد يحكمنا يكون في ضلال

بس دول بينهم عشرة وتاريخ ومودة واخوات في وطن واحد! ازاي تقنعوهم بالكلام ده؟

بسيطة.. احنا بعد ما ننشر الدعوة بالكلام ده، نخليهم يقعوا في بعض. نقول اشاعة هنا، نرمي كلام هنا, نعمل مشكلة هنا، نقوم ناس عليهم هنا.. الخ الخ

أيوه بس ده حرام! دا كده البلد تخرب، والشعب الواحد يبقى مقسوم فريقين! هتحكموا البلد ازاي وهي بايظة كده؟

احنا بقى هنبني البيت من جديد. وبعدين في سبيل عودة الدولة الإسلامية مفيش حاجة اسمها حرام. واللي مش هيعجبه حكم ربنا يرحل

يرحل؟! يانهار اسود! يسيب بلده اللي جدود جدوده عاشوا فيها عشان انتوا تبرطعوا فيها زي مانتوا عايزين؟

أيوه. احنا لينا حق تاريخي يا أخي. البلد دي ضمن فتوحات المسلمين. كون بقى الخلافة سقطت في عصر من العصور، ده ميغيرش الواقع. يعني لو مكانتش الخلافة سقطت كانوا هيعملوا ايه؟

انتوا هتعملوا بقى زي الصهاينة اللي عايزين أرض الميعاد باعتبارهم شعب الله المختار. ده بعدكم. احنا مصريين. شاربين من مية النيل. كلنا ولاد بلد. وكلنا إيد واحدة.

ده كان زمان يا حبيبي. بكره تشوف ان الناس دول ممكن يغيروا جلدهم زي التعابين. احنا مش بنلعب يا بابا. احنا عارفين بنعمل ايه. وعارفين الناس دي دماغها عاملها ازاي. فيه حد مش عايز يبقى أحسن واحد في الدنيا؟ فيه حد مبيحبش يفتكر انه أفضل من التانيين؟ فيه حد يقدر يقاوم انه هو بس اللي معاه الحق والباقيين على باطل؟ فيه حد ممكن يرفض إنه يأمن لنفسه مكان في الجنة وهو على الأرض؟ الناس اللي بتتكلم عليهم دول ممكن يبيعوا أي حاجة عشان يعيشوا في الوهم الجميل ده. ناس محبطة ويائسة وحالها كرب. هيقعدوا بقى يفكروا في أخوة ووحدة والنيل رواه والخير جواه؟ احنا عارفين نقطة الضعف فين، ولازم نستغل الفرصة. هم بقى لو شطار يطلعونا غلطانين. تراهن يا كابتن يا بتاع الوحدة اننا هنكسب؟

أنا عن نفسي بقى، فانتازيا، بقول الله لا يكسبهم. لكن معرفش ليه فيه ناس غيري كتير خايفين يقولوها صريحة كده. ماهو مينفعش نفضل مطنشين وكل إسفين وأخوه عمال يندق بيننا. حتى لو فيه ناس من جواها مش موافقة على اللي بيحصل، دا مش كفاية. فين كلمة الحق؟ فين الجهاد اللي بجد عشان أهل البلد دي, اللي بنوا زمان أول حضارة في التاريخ, يفضلوا يبنوها سوا ويحبوها سوا، لانها بجد تستاهل. والله ما تستاهل اللي بيحصل فيها ده! ولو تعبت شوية، أو ضعفت شوية، نستحملها.. علشان مالناش غيرها وواجب علينا نساعدها سوا لما تكون محتاجالنا.. مش نقعد نتخانق مين فينا اللي أحسن وللا مين اللي غلط في حق التاني زي العيال.

عارفين مسرحية العيال كبرت؟ أهو أنا نفسي نعمل اللي العيال عملوه. لما البيت كان هيتهد نسيوا الخلافات اللي بينهم، وبقوا ايد واحدة عشان يحافظوا على شمل عيلتهم. بس للأسف فيه ناس عندنا محصلتش حتى العيال!

أنا شخصيا شايفة إن أي تقليل من حق المسيحيين هو تقليل من حقي أنا كمان. مش معنى إني مسلمة يبقى أنسى أصلي وفصلي. أنا اللي بيحمعني بماريا صاحبتي أكتر مليون ألف مرة من اللي بيجمعني بأي واحدة مسلمة في باكستان. يعني هي بلدها (االلي هي ف الأصل جزء من الهند) اتقسمت بسبب التعصب، أقوم أنا بقى أسأف وأقول برافوووو. إيه قوة الإيمان دي؟!

لو حد أهان مصري مسيحي يبقى بيهيني أنا شخصيا. ولو هو مصري يبقى بيهين نفسه. احنا كلنا جدودنا كانوا مسيحيين. ازاي أنا أهين معتقدات جدودي اللي هما سبب وجودي في الحياة؟
عارفين زي ايه بالظبط؟ زي الناس اللي النهاردة بينتقدوا الستات اللي مش محجبات، وبيتقال عليهم متبرجات وكاسيات عاريات وكلام كده. مش معنى إني أتحجبت أقوم أغلّط اللي ميعملش زيي. أنا لو قلت الكلام ده أبقى بشتم أمي وجدتي. كام واحدة من اللي بيقولوا الكلام دا كانت جدتها محجبة؟ ازاي تقبل انها تحكم على سلوك جدتها بالشكل ده؟ لأ وكمان بقى المفروض إن جدي الشيخ الله يرحمه كان ديوث، علشان محجبش مراته ولا واحدة من بناته، اللي أمي واحدة منهم! دا إيه الجمال ده؟! ايه التربية والأخلاق الرفيعة دي؟

يا ريت الناس اللي بتكرر كلام سمعته، تفكر ولو كام دقيقة هم بيهينوا مين بالظبط. هو يعني الاحتلال مقدرش علينا, نقوم احنا بقى نعمل اللي الاحتلال مقدرشي عليه؟ ده مش غسيل مخ لا مؤاخذة. دول رموا حاجات مش نضيفة في دماغنا.. ده لو لسه عندنا دماغ يعني.

اللي مزهقش من كل الرغي ده يا ريت يشوف البوست ده عند مصرية.

هذا البوست مأخوذ من تعليقي على بوست في مدونة إيمي وكوكا