Monday, September 29

البحث العلمي عند الاخوان


قبل ما أدخل في الموضوع.. عايزة أقول وحشتوني وحشتوني وحشتوني يا أصدقاء التدوين الغالين. آسفة على الغياب الطويل.. وأشكر كل من سأل عني اثناء غيابي

بصوا بقى.. من حريق لحريق يا قلبي لازم تحزن.. ومن انهيار لانهيار (والانهيار عندنا أشكال وألوان ما تتعدش) يا قلبي لازم تحزن.. من كتر المصايب مش عارفة أبدأ منين الصراحة.. لكن أعتقد ان الأولوية هي للمصايب المستخبية اللي بتتم من غير ما حد يحس ومن غير تسليط الضوء عليها في الوقت المناسب قبل وقوع المزيد من الكوارث

عايزة أحذر الجميع من محاولة الاخوان المستميتة للسيطرة على القطاع الطبي في مصر.. طبعا كلنا عارف ان كليات الطب ونقابة الأطباء أصبحوا مرتعا للجماعة المحظورة لممارسة نشاطها ونشر سمومها في المجتمع ككل. الدكتور بما يحمله من احترام وتوقير من قبل المجتمع لعلمه ومهنته الانسانية، بيكون قدوة لناس كتير.. خاصة البسطاء ومن لم ينالوا القسط الكافي من التعليم.. عشان كدة كانت كليات الطب من أول الكليات اللي نابها م الحب جانب في خريطة الانتشار الاخواني وفي قلب خطتهم للامساك بعنق المجتمع

مش عايزة أعيد وأزيد في كلام معروف عن تحرك الاخوان بين الاطباء وفرض سيطرتهم على النقابة.. إللي انتهى بالمهزلة والفضيحة التي لم ترى مصر مثلها في تاريخها الطبي من أيام الفراعنة -مخترعي الطب- وحتى أن دنس شرف المهنة الانسانية الجليلة نقيب الأطباء بقراره الطائفي بحظر نقل الأعضاء البشرية بين المسلمين والمسيحيين

كل ده -بالرغم من فداحته- كوم، وتأميم مناهج كلية الطب لصالح الاخوان المتأسلمين كوم تاني. يعني لما نصحى في يوم نلاقي عصابة الجماعة هي اللي بتحط المناهج المقررة على طلبة الطب يبقى ما ينفعش نسكت لغاية لما المصيبة تقع واحنا مش دريانين

كل ما تتكلم مع أخ صايع من عصابة المحظورة يقولك بكل انشكاح، " احنا معانا دكاترة ومهندسين واساتذة جامعة لمؤاخذة".. كأن يعني دا معناه انه خد عضوية الروتاري يا خي! طب دا هيفيده هو في إيه يعني مش عارفة؟ هيحسن حاله مثلا؟ ما هو هيفضل صايع ومتخلف

ما علينا.. المهم اني كذا مرة أقولهم الموضوع مالوش دعوة بالمهن، المهنة مش هي اللي بتدي القيمة لصاحبها، انما الشخص هو اللي بيدي قيمة للمنصب اللي هو فيه. فين بقى أبحاث العلماء الجهابذ الاخوانجية اللي هتطلعنا الفضاء في ركاب الصين كدة عن قريب؟ ولا حاجة.. ولا أي شيء له أي قيمة تذكر.. مش فالحين غير في الفتي والنصب على البسطاء والسذج

خد عندك عينة من بحوثهم المكوكية الطبية الفقهية السياسية التكتيكية المهلبية الاخوانجية.. بيقولك إيه يا سيدي؟.. قال "رسالة ماجستير: لا يجوز فرض الفحص الطبي قبل الزواج".. شوفتوا الحلاوة؟ مش بقولكم مهلبية ياخواتي

الباحث -اسم النبي حارسه- ساب كل المشاكل اللي في الدنيا والمصايب اللي المصريين غرقانين فيها من ساسهم لراسهم وراح اختار يعمل البحث بتاعه عن عدم جواز فرض الفحوصات الطبية قبل الجواز عشان يا عيني التحاليل غالية!! شوفتوا الابحاث العلمية يا بشر؟ مش تقولي اللي هاريين نفسهم عايزين يكتشفوا علاج للأمراض المزمنة واللي ضيعوا عمرهم في البحث الاجتماعي والاقتصادي.. هو دا اللي هيحل مشاكل مصر يا جدعان.. ليه تدفع أكتر لما ممكن تدفع أقل؟.. شيل العروسة يا عريس بأمراضها يلا بالشفى.. وانتي يا عروسة خدي العريس عمياني كدة ع البركة.. مش بيقولك الجواز زي البطيخة.. والامراض كمان زي البطيخة.. والأطفال يدفعوا التمن ومالوا؟ قدر الله وما شاء فعل يعني.. خلينا ماشيين ع البركة كدة عشان البركة تعم علينا والفيروسات برضه تسترزق

طبعا الأخ الباحث أول واحد البركة حلت عليه.. البحث متمول تمويل متين ونزل في كتاب طباعة فاخرة كمان.. بركاتك يا محظورة!.. ولسة.. ممكن يعملوا منه كتيبات تتوزع مجانا قدام الجوامع بعد صلاة الجمعة.. وأهو الغلابة يوفروا القرشين اللي كانوا هيروحوا للمعمل ويدعوا للأخ الباحث.. وكله بالعلم يا هندسة.. شغل على مية بيضا.. رسالة ماجيستير مش أي كلام.. يعني تقنع التخين

يا انجازاتك العلمية والبحثية يا مصر! ولسة ياما هنشوف بلاوي على ايد اللي ما يتسموش

المهم بقى ان اللي يقرا الموضوع كما ورد على موقع الجماعة يكتشف انه اتكتب بعناية بحيث ان اللي يقرا أي حاجة بعد العنوان ما يفهمش حاجة.. ازاي؟ اقولك

أولا اللي مكتوب في نص الموضوع يتناقض تماما مع العنوان ومقدمة الموضوع
العنوان بيقول "لا يجوز فرض الفحص الطبي قبل الزواج".. والمقدمة بتقول "أكدت دراسة فقهية حديثة عدمَ جواز إجبار الحكومة أو ولي الأمر أي شخص على إجراء الفحص الطبي قبل الزواج من أي مرض، موضحةً أن ذلك افتئاتٌ على الحرية الشخصية، ويسبِّب عدة مشاكل مادية ونفسية تتمثَّل في التكاليف المالية، وكذا خوف المقبلين على الزواج من نتائج الفحوصات وعواقبها على حياتهم؛ مما يدفعهم إلى اجتناب الزواج أو التحايل عليه بالزواج السري أو بشراء الشهادات الطبية التي تثبت سلامة الشخص من العيوب الوراثية أو الصحية بالمال؛ مما يفتح بابًا للمخالفات الأخلاقية التي يرفضها الشرع، ومن ثم تكون هذه الفحوصات اختيارية وليس إجبارية.

طيب انزل شوية بقى، هتلاقي الأخ الباحث بيقولك ان الفحوصات دي خير وبركة ويا ريت تتعمل.. مش كدة وبس، دا الدين الاسلامي بيشجعها ويحث عليها

"وأجازت الدراسة التي جاءت تحت عنوان "الفحص الطبي قبل الزواج والأحكام الفقهية المتعلقة به" إجراء الفحص الطبي قبل الزوج، مع اشتراط الوسيلة الآمنة المباحة؛ وذلك اعتمادًا على التكييف الفقهي والشرعي؛ لأن إجراء الفحص يحقِّق مصالحَ شرعيةً راجحةً، ويدرأ مفسدةً متوقعةً، وليس في هذا مضادٌّ لقضاء الله وقدره.

وينفع الفحص الطبي قبل الزوج، خاصةً في العائلات التي لها تاريخ وراثي لبعض الأمراض ويتوقع الإصابة بها يقينًا أو غالبًا، والمتوقع كالواقع، والشرع يحتاط لما يكثر وقوعه احتياطًا لما تحقق وقوعه.

وأشارت الدراسة إلى أن الفحص الطبي لا يتعارض مع مقاصد الشريعة الإسلامية ولا مع الزواج؛ لأن الزواج من الأصحَّاء يدوم ويستمر أكثر من زواج المرضى، والشرع أوصى باختيار الأصلح والأحسن لتحقيق مقصود الزواج والمحافظة على النسل، خاصةً أن النسل الصحيح لا المريض هو مقصود الشريعة.

وأكد الباحث أن الحكم بالجواز جاء متوافقًا مع القواعد الشرعية الأصولية والفقهية؛ لأنه إن أمكن رفع وإزالة الضرر قبل وقوعه تجنُّبًا للمفاسد فهذا أولى من إزالته بعد الوقوع، خاصةً أن الفحص الطبي قبل الزواج يُعد من العلاجات الوقائية، وقد أمر الشرع الحنيف بالوقاية من الأمراض، وفيه رعايةٌ لمصالح المسلمين، وحرصٌ على أرواحهم ونسلهم.


واستدلَّ الباحث بفتوى المجلس الأوروبي للإفتاء بالجواز في بيانه الصادر في 27 فبراير 2005م.

الله الله الله.. استنوا بقى.. يعني إيه الكلام ده؟ أمال العنوان لزمته إيه؟ والمقدمة اللوزعية دي هدفها إيه؟ والاعتراض أصلا على إيه؟ حد فاهم حاجة؟

اقرا بقى آخر فقرة في الموضوع تحت عنوان "تدريس الفقه للأطباء" عشان تفهم

"وأوصت الدراسة بتضمين مقرّرات ومناهج كليات الطب بالجامعات مادة "قضايا فقهية معاصرة"؛ تهتم بقضايا الطب وعلاقتها بالشريعة الإسلامية؛ حتى يكون الطبيب على علم بأمور دينه ورأي الدين في المستجدات في علم الطب

هو دا يا حبيبي الهدف من البحث.. لا تقولي فحوصات ولا تحاليل ولا معامل ولا عينات.. الحكاية م الآخر فرض وصاية واللبيب بالأشارة يفهم.. عايزين يتدخلوا كمان في المناهج اللي بتتم تدريسها جوة كليات الطب.. حد يقولي إيه علاقة الطب بالشريعة الاسلامية؟.. عايزين يعملوا فلتر يعني م الآخر عشان نتخلف في الطب ونمرض ومانلاقيش حد يعالجنا.. ف الآخر ما نلاقيش غير الدجالين والمعالجين بالرقية الشرعية وبول الإبل.. عايزين يتحكموا في صحتنا ويدمروا التعليم والبحث العلمي عشان يخنقونا أكتر وأكتر ونتخلف وننعزل عن العالم

يا رب نفوق قبل فوات الآوان