طباخ السم

طبعا كلكم سمعتم عن الفيلم الهولندي اللي صدر امبارح واللي إعلامنا العربي المغوار وصفه بانه مسيء للإسلام

وأنا آسفة اني أصدم مشاعر ناس كتير وأقوم بعرض الفيلم على مدونتي

اتفرجوا على الفيلم أرجوكم.. , و ادعو القراء من المسلمين لمشاهدته أكتر من مرة , كاملا, قبل قراءة تعليقي عليه

الفيلم من جزئين ومدته 15 دقيقة
تحذير: الفيلم يحتوي على مشاهد غير مناسبة للأطفال وذوي القلوب الضعيفة






شوفتوا الفيلم؟ هل تعتقدوا انه فعلا بيسيء للإسلام؟ هل تعتقدوا انه المفروض يتمنع في البلاد العربية؟ هل تعتقدوا ان المفروض العالم كله يشوفه ماعدا احنا؟ هل تعتقدوا انه موجه للغرب مش لينا؟

معلش.. أنا طول عمري صريحة وعمري ما كدبت لا على نفسي ولا على غيري

الفيلم دا مش مسيء للإسلام.. الفيلم دا مسيء للمسلمين.. عشان كدة هما مش عايزين يشوفوه.. عشان كدة هما مقاطعينه, زي ما هيقاطعوا هولندا بعد الدنمارك, وزي ما هيطلعوا في مظاهرات تندد بالفيلم من غير ما يشوفوه, وزي ما هيطالبوا بمقاطعة بضائع هولندا رغم ان الحكومة الهولندية أعلنت رسميا عدم رضاها عن الفيلم وحاولت منعه من الظهور, وزي ما هيقولوا "الموت لصانع الفيلم عدو الإسلام".. هو دا اللي المسلمين بيعملوه

عايزين رأيي؟ مفيش حد أساء للإسلام أكتر من المسلمين.. اشربوا.. دوقوا اللي عملتوه في دينكم.. شوفوا الاهانة اللي اهانتوها للرسول وللقرآن.. شوفوا وجوهكم الحقيقية.. وبقول الكلام دا للجميع.. بقوله حتى للمسلمين اللي مش راضيين عن الأفعال والأقوال اللي شافوها في الفيلم, لانهم للأسف متواطئين.. مفيش فينا حد بريء... كلنا أيادينا عليها دم .. دم ناس كتير.. قتلناهم بصمتنا واصرارنا على اننا نغمي عنينا وندفن رؤوسنا في الرمل.. قتلنا الإسلام.. أيوة قتلنا الإسلام لما سمحنا لجماعات متطرفة تتحكم فيه وتفرض هي الحلال والحرام.. هما اللي بيفتوا باسم الدين, وبيتكلموا باسم الدين, وبيقتلوا باسم الدين

احنا لو عندنا ذرة عقل, المفروض نعمل ألف فيلم زي الفيلم ده عندنا.. المفروض نتكلم ونقول ان احنا كمان مستنكرين كل اللي بيحصل باسم ديننا.. نقولها بصوت عالي ومانخافش.. نقول مش دا الإسلام.. نقول احنا كمان ضحايا للتطرف والارهاب.. نقول اننا اكتر ناس بندفع تمن اللي المتأسلمين بيعملوه باسم الدين.. نقول ان البلاد الاسلامية تخلفت وتجرعت ذل الديكتاتورية والفقر والجهل والمرض بسببهم.. نقول اننا عايزين نطهر بلادنا من الوباء ده, اللي للأسف صدرناه للعالم بدل ما نصدرله أي شيء مفيد.. نقول ان العيب علينا وفينا واحنا اللي لازم نبدأ باظهار وجه الاسلام الحقيقي لو بنحترمه ولو عايزين العالم يحترمه

انما للأسف.. عمرنا ما هنعمل كدة.. عارفين ليه؟ لان التطرف والتعصب بقوا في دمنا.. دخل تحت الجلد واتسرب للدم.. بقينا فاشيين.. اطبعنا بطباع المتأسلمين اللي ربناهم في حضننا.. وبنعمل اللي هما يقولولنا عليه.. مش بنعمل حاجة غير المنع والشجب والتهديد والترهيب ونقل مشاعر الكره والتعصب والتطرف.. نمنع الفيلم ونطلع نشتم اللي عملوه من غير ما نشوفه حتى.. نقاطع بلد بحالها عشان واحد هولندي عمل فيلم! نقول ان هولندا كلها عدوة الإسلام.. ونخوفها ونتوعدها بالويل.. ويطلعوا الارهابيين يكملوا الشغل ويهددوها بعمليات على أرضها لانها بلد كلها كفر وضلال.. واحنا نقول الله أكبر.. ونقاطع ونجاهد في معركة وهمية ضد جريمة من صنعنا احنا

اوعوا تفتكروا ان اللي رسم الصور اللي بنقول عليها مسيئة للرسول دي رسمها من خياله.. لأ.. الراجل نقل من الصورة اللي احنا صنعناها.. الرسوم مش مسيئة للرسول.. محدش شاف الرسول عشان يرسمه.. اللي رسم مش هو اللي مسك القلم ومشاه على الورقة.. اللي رسمت هي ايدينا احنا.. اللي غذى الخيال هو افعالنا احنا.. اللي حط التفاصيل هي الصورة اللي بيعسكها المسلمين عن دينهم.. واللي رسم بقى, سواءا دنماركي أو هولندي أو كوري أو امريكاني, كان كل دوره انه يوصل النقط ببعض.. زي كلنا واحنا صغيرين لما اتعلمنا الرسم باننا نوصل النقط.. كنا بنبقى عارفين الصورة هيكون شكلها ازاي من قبل ما نرسمها.. لكن بعد ما نخلص نروح نجري نفرج الصورة لاهالينا واحنا فاكرين اننا انجزنا عمل فني

اوعوا تفتكروا ان حكومة هولندا رفضت الفيلم عشان هما مقتنعين انه اساءة للاسلام. او ان دا اخلاقيا لا يصح وانه بيحترموا مشاعر المسلمين.. لأ.. الناس دي ناس عاقلة.. عارفين ان المسلمين حاليا عبارة عن همج وارهابيين.. قالوا يأمنوا نفسهم.. خايفين من العمليات الارهابية اللي ممكن تحصل عندهم.. احنا مجرد فزاعة مش أكتر.. كل هدف العالم دلوقتي انه يأمن شرنا.. زي اللي عندهم جرب

أوعوا تفتكتروا ان حد بيحترمنا.. أوعوا تنسوا اننا فعلا بقينا شوية همج وارهابيين.. أوعوا تقولوا ان الراجل دا غلطان عشان شايف وجه واحد للاسلام.. هو فين الوجه التاني؟ فين الاسلام المعتدل؟ فين الاصوات المعتدلة؟

زعلانين عشان ربط بين القرآن وبين افعال الارهابيين؟ واحد جاي يقتلني, هأقعد أنا أفكر في دوافعه وهل دا الدين الصح ولا لأ؟ وهما الارهابيين مش كلامهم نصه آيات من القرآن؟ عايزين الغرب يفسر القرآن احسن من المسلمين؟

شوفتوا الشيوخ اللي بيمسكوا السيوف جوا الجوامع؟ مش دول الشيوخ اللي المفروض أكتر ناس عارفيين الدين واللي المفروض احنا بناخد الدين منهم ولاغيين عقولنا لحسن نكفر؟

يا ريت أي حد ما شافش الفيلم ما يعلقش

يا ريت أي حد ما قراش تعليقي بعد ما شاف الفيلم ما يعلقش

يا ريت اللي عايز يزايد عليا وخلاص عشان يقول انه مؤمن أكتر مني ما يعلقش

انتوا مش عليكوا ندر يا جماعة

أنا مش عايزة أي تعليقات ع الموضوع ده

أنا عايزة كل واحد يروح يبص لنفسه في المراية

يبص بجد.. ولو لدقيقة واحدة

واذا عرف يواجه نفسه, يبقى يقاطع ويشجب ويستنكر ويطلعني كافرة كمان لو عايز


لو عايزين ندافع عن الاسلام, ندافع عنه من المسلمين الأول وبعدين نتكلم


ملحوظة.. بما أن الفيلم بالانجليزية ولا ولن يوجد منه نسخة عربية.. وجب التنويه عن أن صناع الفيلم يوضحون في نهايته أن الهدف هو صد غزو الأسلمة
"Islamization"
وليس الاسلام

البليد لما يذاكر, يقرا الكتاب م الآخر

معلش يا جماعة, أنا عارفة ان فيه ناس كتير متحمسة لموضوع الاضراب بتاع 6 أبريل ده. وأكيد انتوا عارفين اني كاتبة ثورية والمفروض أكون أول واحدة أشجع الناس لما يفوقوا ويقرروا يعملوا اضراب. بس الصراحة الموضوع دا يثير الضحك والشفقة أكثر من انه يدعو للتفاؤل أوالمشاركة

أوعوا حد يزعل مني.. أنا مش بقول لحد ما يضربش.. إللي مقتنع بالفكرة يشارك على بركة الله. بس أنا جاتلي عشرميت دعوة عشان أشارك في الإضراب, وكل مرة أقرا الموضوع أضحك وأضرب كف بكف. مش مصدقة ان الناس عندنا لسة مش عارفة تميز بين الجد والهزل. الفكرة من حيث المبدأ عظيمة ومعنديش أي اعتراض عليها, لكنها بتفكرني بحركة سابقة كانت حصلت من حوالي سنتين في نفس الوقت تقريبا.. فاكرينها؟.. بتاعة "خليك بالبيت" اللي كانت متبنياها جريدة الكرامة وعاملالها اعلانات قاااااااااااااد كدة. ورغم كل ده فشلت فشل ذريع. مش بس عشان ما حدش قعد ف البيت غير 20 واحد, تقريبا هما الناس اللي خططوا للموضوع, لكن عشان الفكرة نفسها كانت تضحك ومالهاش معنى. حتى اللي ظهروا في الاعلام عشان يتكلموا عنها فشلوا في انهم يحددوا أي رؤية واضحة ورا الفكرة

اضراب 6 أبريل, اللي هو مش اضراب أصلا, عامل بالظبط زي مشروع خليك بالبيت. مافيش أي أهداف محددة من وراه ولا ايه اللي متوقع بعده. هل هو تهويش؟ هل هو خطوة لاعلان العصيان المدني؟ هل فيه مطالب محددة ممكن تحصل لها استجابة وعلى هذا الاساس هنضرب؟ ايه المطلوب؟ وليه؟ مفيش أي معالم واضحة. حاجة كدة عاملة زي الاضراب اللي عملوه الطلبة في مسرحية مدرسة المشاغبين, لما منصور (اللي قام بدوره النجم الكوميدي يونس شلبي رحمه الله) قعد يجري ويقول "هيييييه.. اضراب بقى.. هيييييه" كأنها فسحة. لانه مش عارف يعني ايه اضراب ولا ايه الهدف منه. ف يللا, أهي هيصة وخلاص

احنا عايزين نعمل حاجة ايجابية من ورا الاضراب ده ولا عايزين الحكومة تضحك علينا وتقول شوفوا العيال الهبلة؟ احنا كدة بنحرق نفسنا ع الفاضي وقدرتنا على التحرك الشعبي هتبان انها هزيلة وغير منظمة وغير فعالة ولا يمكن تسبب أي قلق للنظام, لانه اضراب عيال مش عارفين أصلا يحددوا هما عايزين ايه

شوفوا والنبي الاعلان اللي اتوزع عشان يدعو الناس للاضراب عامل ازاي

يوم إضراب عام في مصر

يوم 6 إبريل

خليك قاعد في البيت
أوعي تنزل
ماتروحشي الشغل
ماتروحشي الجامعه
ماتروحشي المدرسة
ماتفتحشي المحل
ماتفتحشي الصيدليه
ماتروحشي القسم
ماتروحشي المعسكر

ماشي يا عم هتنيل أقعد ف البيت. أهو الواحد يترحم من الزحمة والحر والقرف. بس ليه؟؟؟
شوفوا بقى المسخرة بتاعة المطالب

عايزين مرتبات تعيشنا
عايزين نشتغل
عايزين تعليم لأولدنا
عايزين مواصلات أدمية
عايزين مستشفيات تعالجنا
عايزين دواء لأطفالنا
عايزين قضاء منصف
عايزين أمن وأمان
عايزين حرية وكرامه
عايزين شقق للعرسان
مش عايزين رفع أسعار
مش عايزين محسوبيه
مش عايزين ظباط بلطجية
مش عايزين تعذيب في الإقسام
مش عايزين أتاوات
مش عايزين فساد
مش عايزين رشاوي
مش عايزين إعتقالات
مش عايزين تلفيق قضايا

بالذمة دي مطالب واقعية؟ عمركم شوفتوا اضراب في أي بلد محترمة تكون مطالبه بالمنظر ده؟ دا انتوا كأنكم بتقولوا للحكومة احنا مش عايزين منكم حاجة, احنا بنتلكك عشان نقعد ف البيت وخلاص! حد يعمل اضراب ويقول أنا عايز أغير الكون؟ طب ما أكيد ما حدش هيسأل فيك

يا ناااااس يا هوووه.. الاضرابات في العالم كله بتبقى لسبب محدد, وبيكون فيه مطالب محددة واقتراحات واقعية لتنفيذها. انما مش عايزين البلد يتقلب حالها في يوم وليلة, ويلا صحة على تعليم على اسعار على مرتبات على قضايا على فساد على سمك لبن تمر هندي. دا كدة اسمه استهبال. يبقى احنا مش عايزين حاجة تتغير. طب لو الحكومة ما استجابتش, ودا أكيد اللي هيحصل.. هنعمل ايه؟ هنضرب تاني؟ وبعدين؟ نفضل مضربين على طول لغاية لما نموت م الجوع ولا حد يسأل فينا برضه. هو جنان؟

احنا عايزين نضرب زي العالم المتحضر عشان تحصل استجابة لمطالبنا ولا عايزين نبقى همج وخلاص؟ مش نخطط للموضوع صح الأول قبل ما نقول للناس اعلنوا العصيان المدني؟ أيوة دا اسمه عصيان مدني مش اضراب. الاضراب ده بيقوم بيه فئة معينة وبتنظمه نقابات أو مؤسسات للمطالبة بحقوق الفئة دي. لكن الاضراب العام دا اسمه عصيان مدني. ودا المفروض يكون آخر كارت الشعوب تلوح بيه للنظام مش تبتدي بيه؟ احنا كدة بنحرق نفسنا ع الفاضي. بنوصل للحكومة رسالة مضادة. اننا شعب أي كلام ولا عايزين حاجة ولا نعرف نعمل تحرك صح, مش عايزين غير نجعر ونفضفض ونشد شعرنا ونمسح عليهم السيدة وخلاص

خلونا نتكلم بالعقل شوية.. احنا عايزين ايه؟ عايزين نعاقب الحكومة مثلا؟.. عايزين نريحلنا يوم زيادة في البيت؟.. عايزين نعمل دوشة ع الفاضي؟

ولا عايزين حال البلد يتصلح؟.. عايزين النظام يعرف ان فيه حركة شعبية؟.. عايزين نشارك في صنع القرار؟.. عايزين نضغط ضغط مدروس عشان نوصل لنتيجة تحفزنا اننا نستمر ونطالب بحاجات أكتر واحنا عارفين ان هيكون فيه استجابة, بدل ما نروح نخبط راسنا ف الحيط ويجيلنا احباط ونتكلكع زيادة والحكومة هي اللي تشمت فينا؟

الاضراب له قواعد وأصول.. مش فوضى وأي هرتلة وخلاص. لازم يكون فيه تنظيم جيد. لازم نعرف بالظبط احنا هنشارك ليه, وايه اللي ممكن يتحقق من ورا الاضراب ده. لكن مش نمشي كدة ورا أي حد بيقولنا يللا اضراب ونقول هيييييييييييه

الاضراب دا فاشل مع كل أسف. ومعمول لخدمة مصالح ناس معينة, بيستغلوا الحالة اللي وصلنا ليها عشان يضغطوا هما بينا على النظام ويحققوا مصالحهم. قال يعني هما اللي بيحركوا الشارع. شوفوا والنبي مين اللي بيدعوا للاضراب
حزب العمل المصري- الإخوان المسلمين - حزب الكرامه - حزب الوسط - حركة كفاية - حركة موظفي الضرائب العقاريه - عمال غزل المحلة - حركة إداريي وعمال القطاع التعليمي - نقابة المحامين - حركة أستاذه الجامعات

إلا ما فيه حزب منهم عنده برنامج أو تصور لحل مشاكل البلد أصلا.. احزاب متأسلمة (العمل والاخوان) واحزاب الشرشحة من غير فعل الكرامة والوسط).. كلها احزاب تتبع نظام اخربها واقعد على تلها

وبعدين راحوا على الناس اللي فعلا عملوا اضرابات واعتصامات عشان ليهم مطالب محددة. وكلها مطالب مالية.. لا ليها دعوة بصحة ولا تعليم ولا اقسام ولا كرامة المواطن ولا اي حاجة. وقالولهم احنا هنجيبلكم حقكم بس ما تنسوناش.. وطبعا كله على قفا الشعب اللي هيعمل اضراب عشان يطالب باصلاح الكرة الأرضية, وهو مجرد ورقة في لعبة عشان الاحزاب دي تاخد شعبية بين الناس اللي عايزة مرتباتها تزيد واللي عايزة تدخل الكادر الخاص بتاع المعلمين بالعافية

أيوة اديكوا فهمتوا أهوه.. ايوة البلد حالها لا هيتصلح ولا الاضراب ده هيعمل أي حاجة. هنفضل احنا زي ما احنا. احنا مجرد عرايس ماريونيت بيعلبوا بينا الاخوان والمعارضة الحنجورية عشان يكسبوا شعبية بين الموظفين والعمال والاساتذة اللي الحكومة فعلا ابتدت تستجيب لمطالبهم لما عملوا اضرابات واعتصامات بجد. يعني هو هو اسلوب حرامي الحلة بتاع الناس دي. مش هيبطلوا لعبة انهم يكسبوا على قفانا

يا جماعة الاضراب والاعتصام وحتى العصيان المدني له أصول. لازم يكون فيه حركة شعبية بجد, مالهاش أي غرض أو مصالح أو بتتبنى اجندة خاصة. لو عايزين نسترد حقوقنا يبقى لازم نخطط مظبوط لأي تحرك شعبي, ويكون عندنا مطالب محددة, ورؤية واضحة.. بلاش اسلوب البليد اللي لما افتكر يذاكر قعد يقرا الكتاب م الآخر

مولد مجلة مصر الجديدة

تعريف بالمجلة

مجلة مصر الجديدة هي مجلة اليكترونية تصدر شهريا, في الخامس العشر من كل شهر. يقوم بتحريرها باقة من ابرز المدونين المصريين والمهتمين بالشأن المصري

المجلة تهدف الي تحليل المشهد المصري الحالي وتقديم رؤية عصرية لكيفية التعامل مع المشاكل التي بيمر بها المجتمع المصري الآن. كما يقوم كل كاتب من كتاب المجلة بطرح وجهة نظره الخاصة واقتراحاته فيما يتعلق بالتغلب على هذه المشاكل وما قد يساهم في تنمية المجتمع وافراده
يعني بالبلدي كدة, لو عايز تعرف ايه مشاكل مصر, وليه, والحل ايه, تعالى كل شهر في نصه بالتمام, واقرا الناس دي بتقول ايه. أكيد هتلاقي حاجات كتيرة تهمك وافكار كتيرة تنفعك

لو انت مصري بتحلم ان مصر تبقى أحسن

لو انتي مصرية عايزة بكرة يبقى اجمل من النهاردة

لو انت عربي ومهتم ان مصر تنهض ويبقالها دور فعال في المنطقة

لو انتي عربية وحاسة ان اللأمل في وطن عربي متطور ومتقدم بيبدأ من مصر

يبقى المجلة دي هي اللي انت وانتي بتدوروا عليه

هتلاقونا دايما معاكم باقتراحاتنا واراءنا وتحليلاتنا ودراساتنا.. كلنا عندنا نفس الحلم.. كلنا بنحب مصر وعايزينها تبقى أم الدنيا بحق وحقيق. عايزينها تطلع من مشاكلها وتقوم من غفلتها وتتقدم بولادها. عايزين بكرة يبقى أحسن للأجيال اللي جاية. عايزين الأطفال بتوع انهاردة يفتخروا بينا وباللي حققه جيلنايلا ايديكم ف ايدينا.. نبني سوا مصر الجديدة

لقراءة أول أعداد المجلة: اضغط هنا

شكر كبير لكل من ساهم في ان تخرج هذه المجلة إلى النور

كلية المتطرفين: دار العلوم سابقا

جماعة الأمر بالحجاب والنهى عن التعليم فى دار العلوم

اسماء نصار - هاني الوزيري

سبق أن نبهنا فى «روزاليوسف» من الخطر الكائن فى كلية دار العلوم والتى تحولت إلى بؤرة للتطرف يتصارع فيها السلفيون والإخوان، ويتسابقان فى استقطاب الطلاب والطالبات.. ومع ذلك لم ينتبه أحد! ما توقعناه، حدث بالفعل، فما جرى من اشتباك الطالبات المنتقبات مع طالبتين غير محجبتين لإجبارهما على ارتداء الحجاب سوى شرارة لما حذرنا منه، ويبدو التحقيق التالى أن هناك ما يشبه التواطؤ بين أصحاب الأفكار المتطرفة من الطلاب وأعضاء هيئة التدريس، وهو ما ينذر بكارثة أكبر، وهذه المرة ندق ناقوس الخطر، على أمل أن ينتبه أولو الأمر!

الأجواء السابقة لتلك الأزمة، كانت تنذر بوقوعها بعد تعمد الطالبات المنتقبات فى كلية دار العلوم التعامل بجفاء مع زميلتيهن «نيرفانا هاشم» و«سارة محمد».. - الصف الأول - لأنهما لا ترتديان الحجاب، وأصبحتا فى نظر الطالبات المنتقبات متبرجتين وترتكبان المعصية لمجرد كشف شعرهما، وأنه لا يليق أن تضمهما نفس الكلية! المشكلة تفجرت هذه المرة يوم الاثنين الماضى فى محاضرة د. طه الجندى فى مادة النحو والتى امتلأت بالطلاب والطالبات، وكما هى العادة فى هذه الكلية التى اتخذت من التطرف سبيلا فصل الطالبات عن الطلاب، وكل منهم فى صف منعزل، إلا أن الطالبتين «نيرفانا» و«سارة» جلستا فى الصف الأمامى بجانب الطلاب، مما أثار غضب الطلاب والطالبات المنتمين لجماعة الإخوان : الواقعة كما يرويها د. «طه الجندى» بصفته شاهد عيان وأحد المشاركين فيها أنه أثناء قيامه بإلقاء محاضرته، وصلت إليه ورقة من أحد الطلاب يقول فيها إنه لا يستطيع التركيز والاستيعاب بسبب جلوس زميلتين أمامه. د. «طه» لم يرد عليه وأكمل محاضرته وإذا بورقة أخرى تصله تطلب استبعاد الطالبتين لأنهما مصدر فتنة فى المكان

أستاذ النحو رد هذه المرة قائلا : الطالبتان من المفترض أنهما أختان لكم وأنهما محترمتان وتنصتان للدرس ولا داعى لمثل تلك الأقوال عند ذلك قامت إحدى الطالبتين غير المحجبتين تطلب الاستئذان بالخروج فمنعها الدكتور، وقال إنه قد تكون هناك طالبات متبرجات ومحترمات وطالبات منتقبات ومحجبات ولهن سلوك سيىء! بعد المحاضرة حاصرت الطالبات المنتقبات السلفيات والإخوانيات الطالبتين، وبدأن فى قذفهما بالسب واتهامهما بإثارة الفتنة بين الشباب، وأنهما من «بنات خليعات» ودار شجار طويل بينهن، وقالت الطالبة «أسماء محمود» - منتقبة - لزميلتها «سارة السيد» الطلاب بالكلية يتمسكون بالله وبالدين، وأنت بتبرجك تضيعين عليهم كل هذا، «حرام عليكى اتقى الله»!! وردت «سارة» مدافعة عن نفسها بأنها ترتدى زيا مناسبا ومحترما ولا يظهر منها إلا شعرها! وبعدها انهارت «سارة» وقالت «لسنا حيوانات ونحن فى جامعة وليس فى غابة ومن لا يعجبه يغض من بصره»

الطالبة المنتقبة توجهت للدكتور «طه الجندى» تنهره وتقول له: كيف تدعى أن هناك منتقبات سيئات السلوك، فرد عليها بأن النصيحة يجب أن تكون بالحسنى. الغريب أنه على الرغم من معالجة د. «طه» الموقف بشكل متوازن إلا أنه يرى أن ما فعله الطلاب والطالبات كان من منطلق الإخلاص والغيرة والخوف على طالبة مسلمة غير ملتزمة!! موضحا بقوله : أنه من منطلق خبرتى أعرف أن الجو العام سيفرض على تلك الفتيات ارتداء الحجاب عاجلا أم آجلا لأنهن لن يطقن أن يتجنبهن الطلبة والطالبات بسبب شكلهن الذى لا يعجبهم لأنه لا يتماشى مع ما تعلموه وتربوا عليه!! الطالبة «سارة السيد» والتى أثيرت بسببها الأزمة قالت لنا: إن هذه المشكلة لم تكن الأولى التى تتعرض فيها لتلك المضايقات والتى تجعلها تشعر أنها أقل من زميلاتها، وأنه بسبب ذلك رسبت العام الماضى لما كانت تتعرض له مما جعلها تشعر بكراهيتها للكلية ورفضت أن تذهب إليها، وكانت تذهب فى الامتحانات فقط حتى إنها كانت تفكر أن ترتدى نقابا أثناء ذهابها للجامعة حتى لا يتعرض لها أحد، ولكنها عادت وقررت الامتناع عن الحضور أفضل من مخالفة اعتقادها أن الدين لا يمكن أن يقاس بالحجاب، ورفضت أيضا أن تخضع للقهر، وتضطر لعمل شىء غير مقتنعة به

من المهم أن نشير إلى أن «سارة» طالبة متفوقة فهى خريجة مدرسة الأورمان الثانوية للغات ودخلت الجامعة واختارت كلية دار العلوم، حسب كلامها، وتمنت أن تصبح أستاذة فى الشريعة الإسلامية، وليس لديها مانع أن ترتدى الحجاب إذا درست وفهمت واقتنعت، ولكن هذا الأسلوب لم يترك لها متسعا أو موضعا لحرية الدراسة والفهم والاعتقاد! «سارة» واجهت مرة أخرى نفس الأساليب التى رفضتها العام الماضى، واصطدمت بنفس الأفكار المتطرفة موضحة بقولها هؤلاء البنات لسن يرفضن كشف الشعر فقط، وإنما يعتبرن كل ما فى الأنثى عورة يجب أن تختفى

وأضافت كاشفة: أنها اضطرت للغياب من الجامعة طوال شهر رمضان لأنها خافت أن تتعرض للإيذاء والتجاوزات، ومحاولة الاستقطاب الدائمة لجماعات وتيارات لا ترغب فيها لدرجة أنها أصبحت تعرف السلفيات من لبسهن النقاب الأسود والأخوات المسلمات من خمارهن الطويل والبنات المحجبات العاديات اللاتى يرين أنها خارجة عن الدين يجب الابتعاد عنها وتجنبها! من يعايش قليلا الطلبة والطالبات فى كلية «دار العلوم»، كما لاحظت فى زيارتى هناك يدرك أن هناك حرب استقطاب شرسة بين تيارات إخوانية وسلفية تختلف قليلا فى التفاصيل، ولكنها تتفق تماما فى الرجعية والتطرف، فتأتى مثلا الفتاة السلفية تقول للمتبرجة «لا تسمعى لكلام الإخوانية لأن الإخوان لديهم أخطاء قاتلة فى فهم الشريعة، حيث يبيح الفكر الإخوانى الأغانى والأناشيد فى حين أنه لا يوجد فى الإسلام ما يسمى أناشيد أصلا، فى حين تأتى الطالبة الإخوانية لتحذر المتبرجة من اتباع السلفية لأن فكر الإخوان أكثر رحابة وتسامحا ومع ذلك فإن المرأة عورة

الطالبة الثانية «نرفانا هاشم» التى اشتعلت الأزمة بشأنها هى الأخرى تعرضت لمحاولة استقطاب من قبل الطالبات الإخوانيات لحثها على ارتداء الحجاب، وبالفعل قامت بارتدائه لمدة أسبوعين، ولكنها شعرت بالضيق لأنها مجبرة على الوضع فخلعته مرة أخرى، وهنا عانت الأمرّين حيث تضاعف ذنبها أمام الطلبة والطالبات، وكأنها ارتدت عن الإسلام! قد يكون وصف المعاملة السيئة التى تعرضت لها الطالبتان مبالغا فيه، لذك حرصنا على حضور محاضرة معهما، وأثناء دخول الطالبتين انفجر الطلاب والطالبات بالضحك، وكذلك أستاذ التاريخ الإسلامى والملاحظ أنه أثناء المحاضرة كان هناك الكثير من البنات يتحدثن إلى بعضهن فترك الدكتور الذى وضح من لهجته الاستياء من كل البنات ونادى قائلا : «البنت إللى كاشفة شعرها دى تسكت وإلا هطردها» فى حين طلبت طالبة منتقبة تجلس خلف إحدى البنات غير المحجبات أن تغير موضعها بحجة أنها لا ترى الدكتور، وأثناء نزولنا إلى جامع الكلية، والذى علمنا من مصادرنا أنه أصبح لديه برنامج يومى لدروس طلبة وطالبات الإخوان، حيث مواعيد لدرس الفقه ومواعيد العقيدة وللتنمية البشرية وللتجويد، وهى أنشطة تقوم بها طالبات الإخوان لنشر فكرهم، والتى وضعت عميد الكلية الدكتور «محمد الطويل»، والذى يرفض ما يحدث فى موقف صعب لأنه لا يمكن للرجال الدخول إلى مسجد البنات لمعرفة ما يحدث. وعندما مررت مع الطالبتين غير المحجبتين من أمام مسجد البنات فى اليوم التالى للواقعة تعرفت الطالبتان «سارة» و«نيرفانا» على الطالبات المنتقبات اللاتى تعرضن لهن، ودارت مشاجرة كبيرة بينهن مرة أخرى، وعندما عرفت إحدى الطالبات المنتقبات أنى صديقة لـ«نرفانا» طلبت منى بصوت عالٍ أمام المسجد أن أوصل لها أنهن لن يتركنها تفسد إيمان الشباب وأن دورهن النهى عن المنكر ولن يهدأ لهن بال قبل أن يغيروها، وبعدها أعطتنى مصحفا وقالت لى إنها تتمنى لو زرتهن كثيرا فى كلية دار العلوم. تصرف البنات المنتقبات بدا من منطقة الاستقواء مما دفعنا للحديث مع مزيد من الطلبة لمعرفة ما يجرى داخل الكلية منهم الطالب «أحمد سالم»، والذى قدم نفسه لنا على أساس أنه طالب منتمٍ لجامعة الإخوان، وذلك دون أن أساله عن هويته السياسية، وتكلم بنفس القوة التى تحدثت بها الفتاة المنتقبة، وقال إننا ندرس فى مادة الشريعة أن الحجاب فرض والبنت غير المحجبة تعد شاذة ومخطئة فى حق نفسها، حيث إنها جوهرة لابد أن يُحافظ عليها ولا تكون رخيصة يرى شعرها كل من هب ودب!!

«وأضاف أن هناك خوفا كبيرا من البنت غير المحجبة أن تكون أول من اتبع بدعة اللا حجاب، وتضطر البنات لتقليدها، وهنا يكون حرص من الطالبات الإخوانيات والملتزمات على محاولة جعلها تعدل عما هى عليه حتى لا يقلدها الآخرون، وتحمل هى الوزر الأكبر، أما الشباب فيكون لهم دور آخر، ولكن بشكل غير مباشر، حيث يدخل شباب الإخوان المحاضرات ليتحدثوا عن التبرج وعواقبه ويكون قصد الشباب الفتيات غير المحجبات. أخطر ما قاله الطالب الإخوانى أن الأمر بالمعروف والنهى عن المنكر فرض كفاية إذا لم يقم به أحد فى كلية دار العلوم تكون الكلية بأكملها آثمة ومن لا ينصح البنت غير المحجبة يكون آثما

وفى أثناء حديثه عن الأساتذة كشف تعاطف بعضهم مع الإخوان مثل د. «محمد المنسى» ود. «أحمد يوسف» ود.«محمد غنايم» ود. «عبد الحميد مدكور» ود. «حمدى شاهين» إلا أن منهم من يعد ويخلف، فمثلا حسب كلام الطالب أن «إبراهيم عبد الرحيم» وكيل الكلية وعدهم بأن تكون هناك أسر للإخوان المسلمين. ولكنه يضيق عليهم فى بعض الأحيان بحجة أن الأمر ليس بيديه ولكنها أوامر عليا!! اللافت أن الطلاب يتحدثون عن ذلك وكأنه حق مغتصب منهم، ويعكس السياسة المتبعة مع الإخوان داخل الحرم الجامعى، والتى جعلتهم أقوى من أن يستطيع أحد أن يمنعهم منعا باتا من إزالة ملصقاتهم وإعلاناتهم داخل الجامعة! طالب إخوانى اسمه «عماد» - ولم يكشف عن باقى اسمه اعتبر دار العلوم كلية إسلامية تمنع الطلاب غير المسلمين بالدراسة فيها، وروى واقعة أخرى حيث وجد طالبة غير محجبة تقف مع طالب أمام الكلية، فأمرهما بالكف عن ذلك، وقام بتصعيد الأمر إلى وكيل الكلية، والأخطر أن الطالب الإخوانى يرى ضرورة وجود جماعة أشبه بالأمر بالمعروف والنهى عن المنكر فى الجامعة تقوم بمتابعة الطلبة ولا مانع من الاختلاط الشرعى أى أن يعطى ولد محاضرة للبنت ولكن فى حال إذا وجد طالب جالسا مع طالبة بالساعات أو غيرها تتم معاقبتهما. «عماد» اقترح أن يتولى طلاب من الكلية مسئولية اللجنة التنفيذية، لأنهم يعانون من طريقة نصح زملائهم فى أنهم ليسوا جهة تنفيذية، وتقوم إدارة الكلية بمعاقبتهم، ولولا تعاطف البعض فى إدارة الكلية معهم لوقعوا فى مشاكل كثيرة. أما الطالب «تامر حسن جمال» الذى تواجد فى مقر الإخوان المسلمين بالكلية وصف الفتاة غير المحجبة بأنها مثل «الطعام المكشوف الذى يعف عليه الذباب». وأضاف: لا يوجد فى كل الدفعة أكثر من 3 أو 4 بنات غير محجبات، ومع الصف الرابع يكن قد ارتدين الحجاب جميعهن

نقلا عن روز اليوسف

.............................................................

دا اسمه ايه بالذمة؟

دا مالوش غير اسم واحد.. ارهااااااب. بلاش بقى نضحك على نفسينا ونقول ان مفيش فكر ارهابي ومتطرف في مصر. ويا ريت الناس المتطرفين الظلاميين اللي محموءين أوي بسبب الرسوم الدانماركية يعرفوا انهم هما اللي اساءوا للاسلام ولرسوله قبل أي حد تاني.. هما اللي شوههوا سمعة المسلمين كلهم وخلوا اسم الاسلام مقترن بالعنف والارهاب والتطرف والدم

دول طلبة دول ولا خلية ارهابية؟ وازاي أي جامعة محترمة ف العالم تسمح بالكلام دا داخل الحرم الجامعي؟ دي مهزلة

التواطؤ واضح ومفضوح وريحته بقت تزكم الانوف. منهم لله, سايبين مجموعة من المرضى النفسيين يحتلوا الجامعة بدل ما يترموا ف مستشفى المجانين! والبلد تخرب مش مهم. هو فيه تعليم من أصله؟ ايه يعني لما الاساتذة والطلبة يسلوا وقتهم.. ما هي كدة كدة خربانة. خليهم يقلبوها طالبان عشان يستريحوا. وبكرة يجيبولهم بن لادن يديلهم محاضرات كمان.. ع الأقل الخريجين مش هيعانوا م البطالة, هيجيلهم عقود عمل في افغانستان وباكستان والعراق