Thursday, August 12

ينصر دينك يا وحيد يا حامد


أيوة بأعترف إني في لحظة انهزام تملك اليأس مني تماما وأقلعت عن الكتابة. والبوست ده مش بالضرورة يكون معناه إني هأرجع للتدوين تاني. أنا حاسة إني نسيت الكتابة أصلا. حتى الشاشة بتاعة البلوجر دي شكلها بقى غريب في عينيا بالرغم من علاقة الألفة اللي جمعتنا لمدة طويلة لما كانت نافذتي للفضفضة واللقاء مع اصدقاء القلم

تعبت.. آه.. بني آدمة طبيعية ومن حقي أتعب

وقرفت.. ودا حق دستوري لكل مواطن يتعرض للي أنا اتعرضتله في الفترة القصيرة اللي مارست فيها التدوين

المهم رمضان كريم وكل سنة وانتم طيبين يا غاليين. وحشتوني بجد. وما بعدنيش عنكم غير الشديد القوي
بس إياكش هي حلاوة الروح اللي جرتني تاني لغاية هنا. جت منين حلاوة الروح دي في عز القهرة والاكتئاب النشط اللي عندي؟

وقعت للمرة اللي مش عارفة هي كام بالظبط في غرام وحيد حامد. لأ بلاش دماغكم تروح لبعيد.. أنا بس بأعبر عن اعجابي مش أكتر
بس المرادي غير الاعجاب أنا مدينة له إنه وراني بصيص نور كان غاب عن عيني من زمان وكان بمثابة تهديد حقيقي بالعمى الكامل

يادي النيلة بايني هأقلب البوست غم ونكد وإحنا في أيام مفترجة. معلش، اعذروني. خلوني أسد الدين اللي ف رقبتي. أصلي حاسة إني مديونة لشوشتي، وأنا ما شوفتش غير هما يا دوب حلقتين بس من مسلسل "الجماعة". ولولا إني مش عايزة أقلبها فرح بلدي كنت قعدت أحيي كل اللي اشتركوا في العمل العظيم دا نفر نفر، لغاية لما أوصل لعمال النضافة اللي في الاستديو. بس لازم أحيي المبدع وحيد حامد، ألف مرة.. لأ ألف مرة إيه؟ مليون ألف مرة. أحمدك يا رب إني عشت وشوفت المسلسل ده. كدة بقى الكورة في ملعب الجمهور. محدش له حجة يقول "أصلي ما كنتش عارف.. أصلي ما كنتش فاهم.. طب هما مالهم الاخوان؟ " والحجج إياها دي اللي كلها نابع من الكسل، والتغييب، وعدم الاهتمام بمصير البلد، وإياكش تولع... أهو جالكم لغاية عندكم

وصيتي ليكم تتابعوا المسلسل ده في وسط العشروميت مسلسل بتوع رمضان. قولوا لكل الناس يتابعوه لأنه فعلا يستحق المتابعة وكل التقدير لصناعه ومبدعيه

بس كفاية كدة.. كدة رضا.. تتمسوا بالخير



Wednesday, April 1

مترو في العصور الوسطى


بعد أن صادرتها شرطة الآداب
محاكمة مؤلف وناشر رواية مترو
القاهرة فى 27/3/2009

في الوقت الذي نتطلع فيه جميعاً الي المزيد من الحريات وسقف أعلي لممارسة حقيقية في التعبير وبحرية عن كل ما يجول بخاطرنا لمصلحة هذا الوطن..
تنظر محكمة جنح قصر النيل السبت القادم 28 مارس،القضية رقم 4732 لسنة 2008 جنح قصر النيل، والمتهم فيها كلا من"مجدى الشافعى" مؤلف رواية "مترو"،و"محمد الشرقاوى" ناشر الرواية،بعد أن احالتهم نيابة حوادث القاهرة للمحاكمة بعد أن اتهمتهم بأنهم" صنعا وحازا بقصد الاتجار والتوزيع مطبوعات منافية للآداب العامة بأن قام المتهم الأول(مجدى الشافعى) بتأليف كتاب"مترو" وضمنه عبارات منافية للآداب العامة وقدمه المتهم الثانى(محمد الشرقاوى) الذى قام بطباعته ونشره وتوزيعه.."،وطالبت النيابة بمعاقبة المبدعين بموجب المواد30 و171 و178 و198 من قانون العقوبات.
وكانت الإدارة العامة لحماية الآداب(وهى إدارة تابعة لوزارة الداخلية) قد قامت بضبط مئات النسخ من رواية "مترو" فى ابريل الماضى(2008) بعد أن اقتحمت دار "ملامح" للنشر،وبعض المكتبات منها مكتبة الشروق،ومكتبة الديوان،وحررت محضراً وعرضته على النيابة العامة والتى استدعت كلا من"مجدى الشافعى" و"الشرقاوى"،للتحقيق معهم،ثم صدر قرار رئيس محكمة جنوب القاهرة بتأييد ضبط ومصادرة الرواية.
وفى يونيه الماضى(2008) تقدم أحد محامو الحسبة،ببلاغ للنائب العام ضد مؤلف الرواية وناشرها،وقد أرفق البلاغ بالتحقيقات،ثم قررت النيابة العامة تقديم"مجدى الشافعى"،و"الشرقاوى" للمحاكمة أمام محكمة جنح قصر النيل.
أن دار"ملامح" للنشر،والمبدع"مجدى الشافعى"و"مركز هشام مبارك للقانون"،يعلنوا عن حاجتهم لدعم كافة المهمومين بحرية التعبير،للدفاع عن حرية التعبير والإبداع،وخاصة أن الرواية يتربص بها بعض المحتسبين،كما يعلنوا بأن محاكمة رواية "مترو" لن يزعزع ايمانهم بحرية الإبداع كما وردت بالدستور المصري بالمادة 49 وكذلك بالمواثيق الدولية لحقوق الإنسان.
للاستفسار يمكنمكم الاتصال
0106888331
0107920678
0120624003
0225758908

نقلا عن مدونة ايجيبشن فيميل


تحديث: تم تأجيل النظر في القضية إلى الرابع من ابريل 2009

..........................................


أنا مش عارفة إلى متى سيستمر هذا المسلسل المخزي المسمى بالحسبة؟؟؟ بقى فيه دولة مدنية محترمة في القرن الحادي والعشرين يسمح قانونها بهذا الانتهاك السافر لحرية المفكرين والمبدعين؟ لماذا نتفنن في الاساءة إلى سمعة مصر عالميا؟ لماذا نصر أن نكون نكتة يتندر بها العالم الحديث؟ لماذا نرتضي أن نكون مثارا لسخرية المجتمعات المتقدمة ثم ندعي زورا وبهتانا أننا نسعى للحاق بركاب الحضارة ونتجه نحو التقدم وتكريس احترام الحريات وحقوق الانسان؟

يعني إيه الدولة تسمح إن أديب يتجرجر على القسم زي المجرمين لمجرد إنه كتب رواية؟؟؟

يعني إيه ندعي إن مصر دولة مدنية لها دستور مدني وبعدين نسمح بوجود محتسب؟؟ محتسب!! هو إحنا عايشين في أي زمن؟ ولو إحنا راضيين إننا نعيش في العصور الوسطى، بنضحك على نفسنا ولا بنضحك على العالم لما بنلبس بدل وكرافتات وتايورات ونركب عربيات آخر موديل ونتعامل مع اجهزة كمبيوتر ونطالب العالم المتقدم بمعاملتنا معاملة الأنداد؟ ما نخلينا واضحين مع نفسنا بقى ونبطل موضوع الرقص ع السلم ده، وبلاش قشور الحضارة والكلام الكبير بتاع الديمقراطية والتحديث والتطوير. دا أي حد عندنا بيفكر -لا سمح الله- بيكون ارتكب ذنب لا يغتفر! وأي واحد يتجنن ويعبر عن أفكاره يبقى مارق يستوجب الملاحقة والتأديب! ويا سلام لو صدق إنه عايش في دولة حديثة بجد بقى وقالك يعمل عمل فني أو ثقافي! خد عندك بقى يا حلو.. تعالى ياللي عامللي فيها فنان. إنت صدقت نفسك ياخويا؟ عيب يا بابا دي قلة أدب. ويلا يا محتسب إحمي المجتمع من شرور هذا الزنديق اللي اتجنن في نافوخه وافتكر نفسه عايش في بلد بتحترم أصحاب العقول والموهوبين.. شكله صدق الكلمتين اللي بيتقالوا في الجرايد والتليفزيون. قال ثقافة قال! هي سايبة؟

للأسف.. إحنا عايشين في واقع كابوسي. قال وأنا محموقة أوي وبادافع عن الدستور وسيادة القانون، وزعلانة أوي من اللي عايز الخلافة ترجع تاني! طب هي الخلافة هتعمل إيه اسوأ من كدة؟ هو الشكل يعني؟ أعتقد وقتها هيكون شكلنا أكثر اتساقا مع واقعنا، بدل الازدواجية اللي مالهاش معنى ولا طعم دي. واحد صاحب دار نشر يلاقي نفسه متهم في قضية أخلاقية عشان نشر رواية؟؟ لأ وإيه بعد ما اطبعت ونزلت السوق واتعرضت في معرض الكتاب واتباعت واتقرت.. فجأة المحتسب قرر إنها رواية خارجة وقليلة الأدب! لأ والأجهزة الأمنية النشيطة ما شاء الله راحت قلبت دار النشر وطربقتها على راس أصحابها واقتحموا المكتبات عشان يصادروا الممنوعات.. قصدي الرواية!! يا عيني يا عيني!! يا ترى كام جريمة تم ارتكابها اثناء ما كان هؤلاء "العسس" بيقوموا بهذه المهمة الأمنية الباسلة؟ والباشا مقدم الدرك اللي حقق مع الشرقاوي والشافعي، يا ترى كان احساسه إيه وهو بيقوم بهذه الخدمة الجليلة للأمن؟ يا سلااااااام. أكيد كان كله زهو وافتخار بعد ما تم القبض عليهم متلبسين بهذا الفعل الفاضح وبعد ما لم جريمتهم الشنعاء من خمارات.. قصدي مكتبات المحروسة. متخيلة كدا وهو بيفكر في السنوات اللي امضاها في كلية الشرطة وهو بيدرس القانون وبيحلم باليوم اللي يستلم فيه عمله عشان يحمي المجتمع من مثل هؤلاء المجرمين الأوغاد. فعلا حاجة تشرف

آه يا بلدي.. وآه يا شباب بلدي.. وآه يا عقول بلدي. يا من آمنتم بوهم وسراب. يا من خدعتم باكذوبة حرية الفكر والابداع. يا من لم تدركوا أننا مازلنا نقبع في ظلمات العصور الوسطى حيث المحتسب والعسس ومحاكم التفتيش! ستدفعون ثمن ايمانكم وسندفع جميعا ثمن الصمت والرضوخ وستدفعه أجيالا قادمة ستنمو في حضن القهر والكبت وتعقيم العقول

الحرية لمحمد الشرقاوي ومجدي الشافعي

لنثبت أننا شعبا يستحق الحرية ولنقضي على بعبع الحسبة وزمن العمائم والعسس
انقذوا العقل والأبداع.. أملنا الوحيد.. الذي إن أحييناه أحيانا، وإن قتلناه حكمنا على مستقلبل مصر بالموت


Thursday, January 8

The Heikal Syndrome


موضوع غزة ده تحول إلى صفعة على وجه العرب كلهم. وأعني صفعة
Slap on the face
أنا اتكلمت كتير عن غزة وعن ما صحب الهجوم الغاشم على غزة من متاجرة بدم الضحايا واستغلال للموقف لاستهداف مصر اعلاميا وشحن الشعوب العربية ضد الموقف المصري لممارسة الضغط على النظام السياسي لصالح أطراف أخرى.. وخاصة إيران

المرة دي اسمحولي اكتب عن شيء آخر.. لكن في نفس السياق.. فالشيء بالشيء يذكر

اخترت العنوان بالانجليزي لمقال بالعربي عشان هتكلم عن اللورد.. لورد الاعلام العربي من وجهة نظري.. وكان لازم العنوان يبقى شيك برضه عشان يناسب مقال عن الاستاذ.. ولما نقول الاستاذ في عالمنا العربي، معروف مين.. الاستاذ محمد حسنين هيكل. اللي رغم كل شيء أصر اني احفظله لقبه، لاعجابي الشديد بشخصه وباسلوبه مهما اختلفت معاه ومهما كان انتقادي لمواقفه

فيه ناس ممكن تلاقي ده شيء مثير للسخرية أو حتى الشفقة.. مين انتي با حتة مدونة بنت امبارح عشان تكتبي تنتقدي الاستاذ؟؟.. أصل الاستاذ له دراويش مخلصين لا يطيقون انتقاده أبدا.. ودراويش بمعنى الكلمة.. يعتبرونه المرجعية العليا التي لا يمكن المساس بها.. دراويش فاق اخلاصهم حدود الاعجاب والتأثر بآراء الاستاذ ليتحول إلى وله واتباع اعمى وترديد لكل كلامه وتحليلاته وآراءه. فيه ناس شغلتها انها بغبغنات لهيكل بمعنى الكلمة. ولا اعتقد ان في هذا ما يعظم من شأنه، ولا أعتقد ان هذا يسعده هو شخصيا أو يرضيه، لأن أي استاذ يتمنى أن يعلم الآخرين ويلهمهم، لا أن يصنع اتباع من فاقدين الشخصية والرؤية الذاتية، أو يتحول إلى طوطم للعميان ومدعي الثقافة السياسية. لكن دراويش الاستاذ لا يعرفون ذلك. بل ويعتقدون أنهم قد وصلوا إلى قمة المعرفة والحنكة والفتاكة السياسية لمجرد انهم يرددون كلامه دون وعي، واذا ناقشت احدهم فيما يقوله، ينفش ريشه ويقولك بكل فخر "دا نفس رأي الاستاذ"!!! كأنه كلام الاستاذ قد منح نوعا من القداسة لأن الاستاذ هو اللي قاله.. أو كأن لا قول يعلو فوق قول الاستاذ.. أو كأن دا رأيهم هما وقال إيه اتفاق الاستاذ معاهم قد اعطى هذه الآراء علامة الجودة

العبدة الفقيرة لله لا تدعي أي معرفة لوذعية بالعلوم السياسية.. أنا مجرد بحب التاريخ وباتابع اللي بيحصل زي أي حد مهتم بالشأن العام. بأستخدم عقلي في ربط ما أراه حتى أخرج برأي ما أو تحليل ما، والحمد لله اني حتة مدونة لا راحت ولا جت، وإلا كان زماني بجد في هذا الزمن بقيت استاذة أنا كمان وليا دراويش ماسكين في ديلي. أنا بقول كدا ليس لثقة زيادة في قدراتي، لكن لوجود واقع مؤسف في عالمنا العربي ومجتمعنا المصري تحديدا يسهل فيه جدا صناعة الرموز والشيوخ والاساتذة والقادة

خلونا في الموضوع

الاستاذ اتكلم انهاردة على القناة اياها اللي كلنا عارفينها في لقاء خاص يعقب فيه عما يحدث في غزة. طبعا اجندة القناة في استضافة الاستاذ لاجراء هذه المقابلة الاستثنائية معروفة، ومش محتاجة ان حد يشوف الحلقة أصلا.. هما عايزين واحد بثقل الاستاذ يدعم الموقف اللي واخداه الجزيرة ضد مصر. وهو طبعا كان واعي لده جدا، وماطل وراوغ كتير في انه يناولهم مرادهم، وكاد أن يفلت، وكان ممكن جدا يفلت لو ان من ادار هذا الحوار هو محاوره المعهود محمد كريشان، لكن من حاوره هذه المرة هو حسين عبد الغني، مدير مكتب الجزيرة في مصر.. وقد استطاع ان يحاصر الاستاذ ويزنقه في خانة اليك عشان يطلع منه أي ادانة واضحة للموقف المصري، ومع ذلك فشل برضه

سر اعجابي بهيكل واحترامي الشديد له هو انه بيحترمني وبيحترم عقلي.. مش أنا شخصيا كفانتازيا، لكنه بيحترم عقلية جمهوره وفعلا بيعمل مجهود في تحليلاته ومحاولة اقناع الرأي العام بوجهة نظره.. فعلا استاذ.. تحس انه داخل المحاضرة ومحضر نفسه.. مراجع ووثائق وكلام مدورس واسلوب رصين وقلم في ايده.. ودا أنا اقدره الصراحة. رغم انه ف الآخر بيلبسني الطاسة، لكني بلبسها وأنا سعيدة ومنشكحة والابتسامة من الودن للودن، لأنه لبسهالي بذكاء، ماضربنيش بيها على دماغي زي العيال بتوع أولى سياسة وأولى صحافة. مش أي حد يعرف يلبس النخبة المصرية السلطانية.. الاستاذ بس هو اللي يقدر يقلوظ السلطانية كويس
وأعني بالنخبة المصرية، الايليت
Elite
وأنا مش بقول النخبة على اعتبار اني منهم، لكن لأن ده التعريف الصحيح للفئة اللي بيخاطبها الاستاذ واللي بيأثر فيها، وعن طريق تأثيره فيها بيزيد تأثيره هو الشخصي وثقله وقيمته

أنا أشجع اللعبة الحلوة.. اشجعها حتى لو كان فريقي مهزوم.. بس كل أملي هو ان فريقي يتعلم اللعب

نرجع لحوار الاستاذ.. قال إيه؟
أولا ضرب كرسي في الكلوب بشياكة وممكن بشكل مفاجيء للناس الموهومة بيه وبمواقفه القومية العروبية الصريحة وانتقاده واعتراضه الشديد على النظام المصري الحالي، اللي هو بالمناسبة مجرد امتداد لنظام عبد الناصر اللي هو كان المايسترو فيه.. ما علينا دا مش موضوعنا

أول كرسي في الكلوب انه قال ان حماس غلطت وقال بالحرف انهم اوقفوا الهدنة عشان كام صاروخ مابيعملوش حاجة، ودا خطأ ومكانش ليه داعي.. وقال ان سر انهم بيقعوا في الخطأ هو عدم وعيهم بما يحدث في العالم.. قصده ان تفكيرهم سطحي ولا يهتمون بتحليل المشهد السياسي.. وقال نفس اللي أنا قلته في مقالي الأول عن جهل حماس بسوء توقيت وقف التهدئة بسبب انتقال السلطة في امريكا وما احدثه هذا من فراغ.. واعترف ان الفاعل الوحيد حاليا في الموقف الراهن هو امريكا اللي مع غيابها أي طرف تاني مش هيكون مؤثر! الاستاذ اللي كان من أشد المعارضين لموقف السادات لأنه قال أن 99% من أوراق اللعبة في ايد امريكا دلوقتي بيقول ان مفيش حد يقدر يعمل حاجة غير امريكا!! ياللهول

تاني كرسي كان انه قال ان السيد حسن نصر الله أخطأ في الخطاب اللي وجهه للشعب المصري! وقال ما معناه برضه ان نصر الله جاهل ومش عارف بيكلم مين، فهو لا يعي طبيعة الشعب المصري ومدى تعلقه التاريخي بوطنه

وبعدين رفض ان قضية فلسطين تعامل على انها قضية دينية ورفض استخدام الدين في التسويق ليها، وقال طبعا انها قضية قومية وليست اسلامية.. ورغم استخدامه تعبير "قومية" فهو لم يدلل على ذلك واختص مصر وأمن مصر القومي بعلاقته وتشابكه مع هذه القضية ومصلحة مصر في تمسكها بوجودها الفاعل داخل كيان أكبر

طب يا استاذ كدا تمام.. انت كدا بتعارض التيار الراديكالي وشايف ان من يقودون ما يسمى بتيار المقاومة هم عبارة عن جهلة، خارج الزمن والتاريخ، لا يعرفون شيء عن العالم ولا تعقيدات السياسة ولا يعنيهم حتى ان المقاومة تكون فعالة، بيضربوا صواريخ في الهوا وخلاص. وكمان رافض التشابك الحالي بين القومية والتيار الديني.. وبعدين بتصور القومية دي على انها قدر مصر ومسؤولية مصر، ومصر وحدها! طب هي دي القومية يعني؟

كل ما كان حسين عبد الغني يسأله سؤال مباشر عن تقصير مصر تجاه ما يحدث في غزة، كان الاستاذ بيتوه الموضوع.. ابتدا الأول بجملة اكلاشيه من جمله المعهودة الظريفة.. رجع في كرسيه كدا وبرق وقال "أنا مش قادر أفهم موقف مصر. حاولت ومش فاهم."! طيب إيه اللي حضرتك مش فاهمه؟ قعد يتكلم عن ضعف الدور المصري.. بس الدور المصرى كقوة ناعمة، مش كقوة عسكرية زي ما الاخوة في الجزيرة ومن يعملون لحسابهم والقومجيين بيتكلموا
Soft Power
من الآخر معناها ان يبقالك دور خارجي من خلال ادوات تانية غير التدخل الفعلي.. طبعا التجربة الناصرية الاعلامية اللي هو صنعها هي المقياس الوحيد اللي بيقيس عليه.. لكني أويده جدا في هذا الكلام

بس إيه علاقة غياب السوفت باور المصري في موضوع تقصير مصر تجاه القضية الفلسطينية؟

وهنا تتجلى عبقرية هيكل، وعشان كدا بحبه وبحترمه، وهأفضل رغم كل شيء أشجع اللعبة الحلوة.. فبدل من أن تستخدمه قناة الجزيرة لخدمة اهدافها، استخدمها هو كوسيلة مسموعة ومرئية لتوجيه رسايل واسئلة مباشرة للنظام المصري

الحوار محتاج ان اللي ماشافوش يشوفه، عشان كدا هأكتفي بالاجزاء اللي قلتها عشان ما احرقوش.. لازم تشوفوه في الاعادة، اللي للاسف ما اعرفش ميعادها

لكن الرسايل والاسئلة واضحة وأنا أدعمها جميعا ويا ريت نشوف استجابة ليها ولا يتم اغفالها عشان كلام عابر فيه ثمة انتقاد للنظام المصري، مع انه مش انتقاد أبدا.. أنا شايفه انه عتاب ومحاولة للفت الانتباه للسقطات اللي بيقع فيها النظام وبتخسره كتير برغم سلامة موقفه في هذه القضية. أنا هلخص محتوى الرسايل بعد فك الشفرة من كلام الاستاذ.. الرسايل والاسئلة ببساطة هي

1- لماذا هذا الفراغ الاعلامي والاخفاق في صنع رأي عام مؤيد لمصر؟ م الآخر ازاي نسيب غيرنا يزايد علينا ونتعالى عن مجرد تفسير ما يحدث حتى تكون الصورة واضحة للعامة ولا يتم استغلال هذا التعتيم ضد مصر؟

2- لماذا لا يتم شرح الرؤية المصرية كاملة وواضحة مثلما تم تقديم الطرح الراديكالي أو المعارض؟ لماذا الاصرار على ابقاء الكل في الظلام، حتى أن أفضل المحللين يعجزون عن الدفاع عن مصر كما ينبغي لغياب الحقائق المطلوبة ول"ترفع؟" النظام المصري عن توضيح وجهة نظره وتصوره بشكل واضح؟

3- لا يجب ان تترك مصر هكذا مكشوفة في وجه أي تيار مضاد. لابد ان تتحصن مصر بدفاعات تقوي من دورها الاقليمي وتعيد لها هيبتها. وتستطيع مصر فعل هذا بكل بساطة عن طريق استخدام القوة الناعمة وهي الاكثر فاعلية من ردود الفعل العنيفة والمتشنجة، التي تنم عن ضعف لا عن قوة

أنا معاك في كل ده يا استاذ.. بس نصيحتك المخلصة في اننا ننضم لحلف ايران.. لأ.. لأ وألف لأ. اعتقد لو النظام المصري وصلته الرسالة واتعلم الدرس وعمل على تصحيح اخطاؤه مش محتاجين حلف ايران اللي هيودينا في داهية ده. يعني ايران بتعمل لمصلحتها، وتركيا بتعمل لمصلحتها، احنا هيبقى دورنا إيه في الحلف ده؟ تابع؟ ولا دراع زي الكام صباع اللي ايران بتلعب بيهم؟ الله يخليك بلاش سكة ايران دي، لأن انت لاعب في دماغ ناس كتير وممكن واحد ملحوس منهم -ربنا لا يقدر - يبقى في موقع صانع قرار بكرة ويعمل بنصيحتك دي ونلاقي نفسنا ورا الشمس

المشكلة يا استاذ ان النخبة المصرية مستهدفة من جهات كتير، مش حضرتك بس اللي بتعرف تلعب لعبة حلوة.. والجيل الجديد بتاع الفكر الجديد كله ع الزيرو وهينهار قدام أي لعيب منهم زي ما فيه ناس كتير منهارين قدام تأثير حضرتك. النخبة المسوسة دي هي السبب في الفشل اللي احنا فيه، مالهمش هوية ولا شخصية ولا صوت.. اغلبهم عجينة طرية، وفيه منهم المؤدلجين ودي مصيبة تانية. ومشكلة النظام انه في ظل هذا التسوس والتآكل (اللي هو متسبب فيه مع عوامل أخرى) مفيش حد يعتمد عليه غير مجموعة من الاغبياء المخلصين والاذكياء الفاسدين. مشكلة كبيرة، ومش من السهل ايجاد الحل لها. فيه تقصير، لكنه غير متعمد بالشكل اللي الناس فاكراه أو اللي حضرتك بتحاول تصوره، وفي أي حال، إيران ليست حلا.. أبدا ليست حلا يا أستاذ.. بل هي نوع من النهاية

Sunday, December 28

وتتوه القضية.. كالعادة


أكبر تحدي بيواجه المدونين المصريين هو محاولة مواكبة الاحداث الكثيرة والمتلاحقة اللي بتحصل. الهم العام والسياسة بياخدوا مساحة كبيرة من مجمل المدونات المصرية ودا لأسباب كتير. المهم أننا قررنا بدون سابق تنسيق من أي نوع، وفي حالة عشوائية بحتة اننا كشباب بيعبر عن افكاره باستخدام الوسائط الحديثة اننا نتكلم عن أمور عامة، اجتماعية وسياسية في اغلبها، ودا بيعكس احساس بالمسؤولية ووعي، حتى لو كان مشوش وغير ناضج في معظم الأحيان لصغر سن المدونين، لكن ما لا شك فيه هو انه أيا كان نوع هذا الاجتهاد التدويني فهو يعكس نوع من الوعي والاهتمام بمجريات الامور

بداية غريبة للموضوع.. بس كان لازم اكتبها

موضوعي هو مأساة انسانية بكل المقاييس.. تتلخص في ثلاث حروف.. غزة

غزة ليست كلمة
غزة أرض وبشر وقضية لا تسقط بالتقادم
قضية انسانية.. قضية حق في الوجود.. حق في الحياة.. وهذه هي أول حقوق الانسان

أطلقت العنان لدموعي بالامس.. أطلقت العنان لغضبي.. أطلقت العنان لمشاعري البدائية تستحوذ وتنفس عما فاض به قلب اعتصر من الألم

بس أنا كمدونة، دوري هو الكتابة ومخاطبة العقل وليس لعب دور المعددة الذي لا اجيده.. وهي مهنة لها احترامها من تراثنا الشعبي.. وقد تساعد من فقدوا عزيزا في التعبير عن حزنهم واخراج كل شحنة مشاعرهم بشكل مكثف وقوي في نوع من العلاج النفسي.. زي الزار مثلا، كتفريغ لشحنة عاطفية في شكل صاخب يؤدي بعد بلوغ ذروة الانفعال إلى حالة من الهدوء والراحة. ودا اللي بيخلي ناس كتير متعلمة وفاهمة تلجأ لاساليب بدائية للتعامل مع مشاكلهم النفسية والعصبية، لأن احساس الراحة اللي بيتبع هذه الهيستيريا الجماعية بيخدع صاحب المشكلة بايحائة ان المشكلة اتحلت واتبخرت. ولأنه مجرد ايحاء، فسرعان ما يزول أثره وتجد الزار منصوب مرة اخرى بعد فترة، وهكذا

المشهد الذي نراه الآن في غزة هو مشهد متكرر، واسلوب علاجنا له هو ذاته لا يتغير. الشهداء يتساقطون والهيستيريا الجماعية تشتعل في زار من الولولة يصل إلى الذروة ثم يخمد فجأة مثلما انفجر فجأة، وكأن المشكلة قد حلت.. وكأن فلسطين لم تعد محتلة.. وكأن الضحايا لا يتساقطون كل يوم

هل من السماجة ان اكتب مقالا عاقلا في هذا التوقيت السيء؟ هل من الجنون أن اخاطب العقول في وقت جلسة المعددة وتولي كودية الزار لزمام الامور؟ هل من قلة الأدب ألا اساير الهوجة و أن اصدم الناس بكلام قد يكون فارغ في نظر البعض اللي فاكر ان الصريخ والشتيمة هما العمل الفعال وان أي ادعاء لاستخدام العقل هو مجرد سفسطة فارغة أو حتى تخاذل؟ جايز.. وممكن جدا.. واللي يقول كدا عنده حق. بس أنا كمدونة، أولا وأخيرا بأعبر عن آرائي الشخصية، من غير ما افرضها على حد ومن غير ما احاول الايحاء بان كلامي دا هو الصح وهو السليم وكل ما عاداه غلط ويذهب للجحيم

استحملوني شوية عشان اعرف اوضح وجهة نظري. هأحاول أكون منظمة واتكلم على 3 محاور

1- قضية غزة بالنسبالي هي جزء من قضية شعب فلسطين، وليست قضية التيارات والفصائل المختلفة التي تتحدث باسمه والتي تتصارع على زعامة دولة لا وجود لها حتى الآن. أنا انظر لهذه القضية الانسانية من منظور اخلاقي بحت، لا أفرق فيه بين فلسطيني مسلم وفلسطيني مسيحي.. لا أفرق فيه بين اماكن مقدسة اسلامية أو مسيحية.. فلسطين ارض مسلوبة وشعب تمت ابادته ونفيه وسرقة اراضيه واملاكه ودياره لزرع كيان شاذ، لا وجود لمثله في العالم

2- موضوع اني انسى ان اللي بيحصل في فلسطين بيقوم به هذا الكيان الصهيوني المتمثل في دولة اسرائيل واحط اللوم على مصر واقول كلام اهطل سمعته في قناة الجزيرة دا أنا اعتبره يصب في خانة الخيانة العظمى. بس مضطرة اناقشه في ظل المهزلة اللي أنا شفتها في التجني على مصر واتهامها علنيا بالعمالة بعد كل ما قدمته وتقدمه للقضية الفلسطينية. بلدي هزيلة، ضعيفة، مريضة، لكنها شريفة ولا أسمح بتلطيخ شرفها مهما كان.

3- رؤيتي الخاصة للدور الفاعل اللي ممكن تقوم بيه الشعوب العربية بعيدا عن اسلوبها العاجز في التعامل مع ما تقابله من مشاكل وازمات مختلفة بالنواح والاتهامات المتبادلة فيما بينهم بالعمالة والتخوين

واحدة واحدة كدا

أولا: هل حد عنده شك ان الكيان الصهيوني دا كيان اجرامي منعدم الضمير؟ حد يقدر يقول ان اللي تم دا ممكن يكون له أي تبرير من أي نوع؟.. لأ طبعا. دا اجرام منظم بتقوم بيه اسرائيل منذ يوم زرعها في المنطقة، وليست قضية اليوم ولا الامس ولكنها قضية وجود كما قلت في البداية. نحن نريد لفلسطين أن تكون، والكيان الصهيوني المتحامي في القوة الامريكية المتغطرسة يريد ألا تكون.. اذن فقضية الوجود هذه قد تجسدت في صراع بين إرادتين متضادتين. والقضية هي فلسطين.. أقول فلسطين ولا أقول غزة، فمن يريدون ان يستفردوا بغزة ويفصلوها عن الضفة يعملون وفق اجندا لا تمت بصلة للقضية الفلسطينية، بل إن هذا هو نوع من تصفية للقضية الفلسطينية من الداخل، وهنا تكمن الخطورة، فلا يمكن لأي قوى خارجية أن تقوم بتصفية هذه القضية من الخارج. تقسيم فلسطين إلى مناطق خاضعة لسلطات مختلفة ومحاولة تقسيم الشعب الفلسطيني حسب انتماءاته الدينية أو السياسية هو الطريق إلى تحقيق الارادة الاسرائيلية وليس العكس، مهما كانت النوايا

ثانيا: ما تم من زج باسم مصر وتوجيه الاتهامات لها بالعمالة لحساب امريكيا واسرائيل بشكل حقير، لدرجة ان يقول البعض ان ليفني جائت تأخذ ضوءا اخضر من مصر لبدء الاجتياح، هو جريمة أخرى.. المستفيد الوحيد فيها هو من يقوم بعمل هذه الاوركسترا لاستغلال الظرف بكل خسة لاستهداف مصر والضغط عليها.. المستفيد الوحيد هو إيران. ومن المحزن ان ترى الشعوب العربية مغيبة لدرجة تقترب من السذاجة لتتصور ان ايران ممكن ان تكون نصيرة للقضايا العربية! معلش يعني، هو مين اللي عمل الفتنة بين السنة والشيعة في المنطقة؟ مين اللي انهاردة بيقود ويمول الفتنة السنية\الشيعية في العراق؟ هو دا الدفاع عن مصالح العرب والمسلمين؟ الناس عقولها راحت فين؟.. بس أنا مش هأعتمد على موضوع مخاطبة العقول والبناء على معرفة دور ايران في المنطقة، خليني اتلكم بالبلدي زي ما دايما بتكلم

شوفت في مظاهرة كلها على بعضها تلاتين نفر، واحدة واقفة بتكلم مراسل الجزيرة (طبعا) وبتقول بكل فخر "احنا كمصريين بنعتذر لشعب غزة لأن النظام العميل هو اللي تسبب في اللي حصل واحنا ضد ده وجينا نقول كدا".. يا فرحة مامتها بيها بجد
إيه الهبل ده؟ هي مصر بقت دولة عظمى واحنا مش داريانين ولا إيه؟ وفي المدابح اللي قبل كدا ماكانوش بياخدوا الأوكي مننا ليه؟ ولو ما وافقناش، هنعملهم إيه يعني؟ ولا ممكن عايزين يشتروا مننا سلاح متقدم مثلا؟ ولا عايزين يستلفوا قرشين عشان الموضوع مزنق معاهم؟ معقولة يعني التخريف ونظرية المؤامرة الهابلة اللي مسيطرة على دماغنا توصل للدرجة دي؟
وطبعا بقى الناس دي متخيلة مبارك قاعد يتفرج على القتلى والاطفال اللي بتموت وهو فرحان وبيضحك نيااااااااهاااااااهاااااااا
إيه ده؟ الناس دي مش متخيلة هي بتقول إيه وهي عمالة تعيد كلام ورا قناة الحصيرة بتاعتهم من غير ما حتى يفكروا جزء من الثانية مصر هتستفيد إيه لو عملت كدا؟

أهو ظابط مصري اتقتل ع الحدود عشان استباحة دمه، لأنه طبعا مصري خاين وعميل وهو اللي موت الناس في غزة مش الاسرائيلين!

ساعات بحس اننا كعرب مشكلتنا الاساسية هي اننا مش طايقين بعض.. سيبك بقى من اسرائيل دي مجرد تلكيكة.. كله مصر واقفاله في زوره بالعرض، وكله مش طايق اللي جنبه وعايز يهبش فيه وخلاص. ويحضرني دلوقتي المشاهد الخالدة من اجتماعات جامعة الدول العربية، والخناقة الفتاكة بين الرئيس الليبي والملك السعودي وكل واحد منهم بيتهم التاني بالعمالة والخيانة على مرأى ومسمع من العالم. اختشوا يعني.. دا لولا مصر مصدرة نفسها في مشروع الوحدة العربية المنيل اللي مش باينله أي معالم ده كان زمانكم قاعدين تدبحوا في بعض، ولكم في غزو العراق للكويت عبرة

مش هأعيد كلام قلته عن دور مصر وتضحيات مصر.. لكن غريب قوي ان خالد مشعل يطلع يقول قصايد مدح في مصر وأبو مازن انهاردة بيشيد بالدور المصري قدام العالم كله، ويجي كام واحد لا لهم في الطور ولا الطحين يقولوا مصر هي السبب! وبعدين حسن نصر الله كمان عايز يعمل فيها زعيم عربي وقاعد يدي أوامر للمصريين انهم يروحوا يطربقوا الحدود عشان "الأحياء" اللي هما حماس.. يدخلوا يضربوا صواريخهم الصفيح من مصر ويدخلونا في حرب! طب بالذمة فيه حد في مصر يقدر يروح يحرض شعب في أي بلد عربي على النظام بتاعه؟ بلاش الانظمة السياسية.. حد يقدر يحرض اللبنانيين ضد حسن نصر الله اللي فعلا بقى تسبب في حرب وابادة وحشية للشعب اللبناني بسبب عملية غير محسوبة باعترافه هو نفسه؟ ولما هو جدع أوي كدا وعنده صواريخ فتاكة، ما يتفضل يضرب.. هو مش على حدود اسرائيل هو كمان ولا إيه؟ طب يا سيدي احنا خونة وعملا ومنيلين بنيلة، اتفضل حضرتك يا غضنفر انصر اخوتك في فلسطين. ولا إيران ما ادتكش الاذن زي المرة اللي فاتت لما كانت عايزة تهدي الهوجة الدولية اللي قامت ضد برنامجها النووي، وكالعادة بتحارب خارج ارضها وصدرت الشعب اللبناني في وش المدفع عشان يدفع التمن وتستعرض هي نفوذها في المنطقة عشان تكسب كارت في المفاوضات

خلاصة الكلام.. النظام المصري فيه كل العبر.. ومشاكلنا كمصريين مع النظام السياسي مش معناها ابدا اننا نستخدم أي شيء ضده حتى لو اتهمناه بالعمالة والخيانة. احنا عارفين من جوانا ان الكلام ده غير صحيح على الاطلاق وعشان كدا النظام ده مستمر. احنا ممكن نستحمل كتير، ودي طبيعة المصري، انه حمول، ممكن زيادة عن اللزوم ودا السلبي، لكن لا يمكن يستمر تحت نظام يشك في ولائه أبدا. دا احنا أول من قال يا ثورة، واصحاب تاريخ طويل في المقاومة لا يعرفه شعب آخر

ثالثا: أنا مش ضد المظاهرات.. بالعكس.. التظاهر والتعبير عن الرأي دا اسلوب حضاري بينم عن وجود درجة عالية من الوعي والاحساس بالمسؤولية.. لما شعب يتظاهر لادانة العنف والتنديد بالظلم فدا سلوك راقي.. لما نهتم بشؤون شعوب أخرى وندافع عن حقهم في الحياة دا تصرف نبيل.. لكن الوقوف عند ده معناه ان احنا أخدنا شكل التظاهر لعمل نوع من الزار وكل واحد يرجع بيته من المظاهرة مرتاح وحاسس انه عمل اللي عليه، مع انه معملش حاجة. هو عبر عن موقف، لكنه لم يساهم في عمل شيء يدعم هذا الموقف... طب نعمل إيه؟ وقت الكوراث بتكون الاولوية هي التخفيف عن من اصابتهم هذه الكوارث. وبالفعل بيتم نقل للمصابين في رفح وارسال اطباء في مستشفيات غزة لمساعدة الفرق الطبية هناك. ومعتقدش انتم محتاجين اقولكم إزاي ممكن تساعدوا. أنا عارفة ان كتير منكم بيتبرع للاغاثة، لكن ما تجربوا التواجد جنب الناس دي؟ يعني اللي عايز يروح يحارب أكيد مش صعب عليه يروح رفح ويتطوع لخدمة المصابين هناك، ياخد معاه ملابس وأغطية وأكل ويروح بنفسه يكون جنب الناس دي، يحسسهم انهم مش لوحدهم. الامكانيات في رفح مهما كانت أكيد محدودة، وأكيد دوركم هناك هيكون مهم. لكن الأهم هو ما بعد هدوء العاصفة، مش ممكن ننسى اللي حصل كأن شيئا لم يكن وننام بقى لغاية الكارثة الجاية. أعتقد من المهم ان يكون هناك نوع من الدعم المستمر للقضية الفلسطينية واننا نفوق من محاولات بعض الجماعات السياسية للتلاعب بالرأي العام واختزال القضية في ملفات محددة لمصالح لا تخدم الشعب الفلسطيني. لازم يكون فيه جماعات شعبية غير مسيسة، هدفها هو تقديم الدعم بكل أشكاله للقضية الفلسطينية، مش استغلالها والاتجار بمعاناة الشعب الفلسطيني لأهدافها الخاصة. لازم نرجع القضية الفلسطينية لمسارها الصحيح كقضية مصير شعب له الحق في وطنه، وكقضية انسانية بالمقام الأول، وليست حرب دين ضد آخر أو فصيل ضد آخر. طول ما القضية الفلسطينية مخنوقة لأن من يدافعون عنها يدافعون عن اجندات جانبية هتفضل معلقة ومفتتة. الدور الشعبي المصري الحقيقي هو اننا نكون جبهة تعيد القضية لمسارها الصحيح. لكن المجتمع المدني عندنا للاسف ضعيف جدا، فلماذا لا يتم استثمار هذه الشحنة الحماسية لتقوية هذا الاتجاه والبدء بملف القضية الفلسطينية التي تشغلنا جميعا؟

دا مجرد تصور بسيط، لكن أرجو ان الرؤية كلها تكون واضحة بغض النظر عن تفاصيل المقترحات اللي أكيد منكم كتير ممكن يكون عنده افضل منها. لكن المذهب الراديكالي المدمر اللي عايز دم وخلاص، دم مين مش مهم، دا لن ينتج عنه أي شيء سوى الدمار والخراب. مشكلة حماس وحزب الله هي ان المقاومة عندهم معناها اننا نقاتل وخلاص، زي ما تيجي تيجي. مفيش أي نوع من التحرك المدروس أو استطلاع الظروف او دراسة متأنية للوضع، والنتيجة بتكون دايما كارثية لأن الحسابات بتكون غلط. أنا لا أحملهم مسؤولية ان عدونا مجرم، لكن القليل من العقل ممكن أن يفيد. يعني رفض حماس لتجديد التهدئة كان غير محسوب لأن ببساطة الصراع الداخلي في اسرائيل بيخلي كل تيار فيها يتنافس في تصوير نفسه على انه الاقدر على حماية أمن اسرائيل، والولايات المتحدة فيها انتقال سلطة ومش ممكن تتدخل. حماس عايزة تكسب بنط في ظل قرب انتهاء فترة محمود عباس، ودا طبيعي في ظل التناحر السياسي الفلسطيني للاسف، لكن لابد من مراعاة اعتبارات اخرى، ما ينفعش اكون قصير الرؤية لدرجة اني أدمر كل اللي حواليا عشان مكسب سياسي محدود، وبعد كدا أحاول أصور ان اللي عايز يهدي الوضع ويحقن الدماء عميل، وان اللي عايز كل الناس تموت هو اللي وطني ومقاوم! لو المقاومة هي اني الغي الواقع والغي المنطق واحارب لغاية آخر روح ما تطلع، تبقى دي مش مقاومة، دا انتحار جماعي، بس المصيبة ان اللي بيروح فيه ناس مالهمش ذنب، مش بس المنتحرين

وأخيرا.. كلمات الدنيا لا يمكنها تقديم العزاء الواجب، ومهما كثرت الدموع وعظم الألم فلن يكفي للتعبير عن فداحة الجريمة. يبقى الأمل في قلوب عامرة بالخير وعقول واعية وشباب صاحب ارادة يمكنه أن يغير المستقبل

Wednesday, December 3

القاتل ذكر والقتيلة انثى


طبعا كلنا تابعنا الحوادث المثيرة اللي حصلت في الفترة الأخيرة، وقصدي جريمتي قتل سوزان تميم اللي اتهم فيها رجل الاعمال هشام طلعت مصطفى ومقتل ابنة الفنانة ليلى غفران وصديقتها.. وطبعا الدنيا زاطت والجرايد والمجلات ومحطات التليفزيون كانت بتتصارع وتتنافس وتلهث في صراع شرس مع الزمن لارضاء نهم الرأي العام المصري والعربي وسعيه الدءوب للبحث عن فضيحة

ولأن شعور هذه الشعوب تبلد من كتر الهموم والمشاكل وحرق الدم طول اليوم ومشاهدة احداث العنف والقتل وسفك الدماء بجرعات مكثفة على الاخبار يوميا وعلى مدار 24 ساعة، فاصبح من الصعب جدا ارضاء هذا الجمهور.. واعتقد ان لو كان عندنا في مصر مسابقات لمصارعة الثيران مثلا مكانش هيبقالها جمهور، وكان ممكن نعتبرها رياضة فافي

وبجانب كل ده، فإن مجتمعات بتعاني من الكبت والنفاق والخواء الذهني وغياب أي أهداف جادة في الحياة وانعدام لقيمة العمل، بتحصر كل اهتمامها في المظاهر وادعاء الفضيلة والاخلاق اللي بيتكلموا عنها طول الوقت لمداراة حقيقتهم المخجلة، وبيكون عندهم هوس غير طبيعي بشيء اسمه الفضيحة

الفضيحة في مجتمع مريض زي مجتمعنا ده ليها مواصفات خاصة جدا.. مش أي عمل اجرامي أو فعل مخجل بيعتبر فضيحة.. لأ.. بلادة الاحاسيس اللي عندهم دي بتخلي استجابتهم للحدث فاترة ويقابلوها بلا مبالاة شديدة.. إيه يعني لما كل يوم صفحة الحوادث مليانة قتل وسرقة بالاكراه واغتصاب وغيره وغيره؟؟ عادي.. ايه الجديد؟ وإيه يعني تفجيرات في الهند مات فيها 200 واحد؟ وإيه يعني اللي بيموتوا في تفجيرات في العراق كل يوم؟ خلاص.. اتعودنا وبنتفرج وننسى.. وبعدين دي لا تصنف عندنا تحت بند الفضايح لأسباب كتير

مواصفات الفضيحة على الطريقة المصرية

1- ليست فضيحة انهيار منظومة الاخلاق في هذه المجتمعات التي يتغنون بتدينها وفضيلتها ومنظومة القيم فيها.. فالتفجيرات الارهابية على سبيل المثال تفضح التشوه العقلي والنفسي الذي نمت في حضنه هذه الجماعات الارهابية والتي تستخدم نفس الشعار الذي يرفعه المجتمع المحترم جدا في تبرير كل ما يشوبه من عيوب ألقته خارج ركب الحضارة وخارج حركة التاريخ.. تطرف المجتمع دينيا ينم عن جهل بهذا الدين وبما اتت من اجله الاديان بالاساس.. والمغالاة في المظهر الديني ليست سوى ستار يخفي ما بداخل هذا المجتمع من بعد عن أي روحانيات أو قيم حقيقية راسخة في وجدانه

2- الفضيحة يجب ان تكون فردية، فمجتمعنا يرفع الجماعة فوق الفرد، ويستغل سطوته لكبت الحريات الفردية وممارسة شذوذه بشكل علني لأنه يتمتع بالتأييد والمباركة من الجماهير المذعورة اللي عايزة تتحامى في ضل المجتمع ومستعدة تمشي مع القطيع لأنها بتشوف المجتمع بيذل الفرد اللي يخرج من تحت عبايته قد إيه، لأن هذا المجتمع لا يعترف بالاختلاف ولا يحتمل فكرة تمرد الفرد على سطوته التي فرضها عليه بالحديد والنار والتهديد بالفضيحة

3- الفضيحة لازم تكون صارخة وفجة ومشعللة ومثيرة بدرجة تخليها تُشبع نهم المجتمع للتشفي في الشخص المفضوح وتشجع العامة للاجهاز عليه عشان تنهش فيه براحتها.. يعني فضيحة بجلاجل زي ما بنقول.. والجلاجل دي استمديناها من تراثنا الشعبي، اللي كان فيه زمان ايام المماليك اللي يثور على الظلم أو يرفض دفع الجباية أو الضرايب يتحكم عليه انه يركب حمار بالمقلوب أو يتسحل في شوارع المحروسة والمنادي جنبه بيجلجل بجرس عشان الناس تطلع وتتفرج على مصير المجرم.. لكن الجلاجل الحديثة بتاعة احفاد الفراعنة هي عبارة عن التفاصيل المثيرة اللي بتشعلل الموضوع واللي غالبيتها العظمى، ان لم يكن كلها، هي من خيال محرر الحوادث، .. ومن شروط محرر الحوادث في مصر انه يتمتع بخيال خصب جدا ودراية بسيكولوجية الشعب المصري عشان يقدر يقدمله الأكلة المحبشة الدسمة اللي ترضي جوعه للفضيحة

4- الجنس هو عنصر اساسي في الفضيحة.. ماهي الفضيحة ماتبقاش فضيحة من غير جنس.. امال الاثارة هتيجي منين؟ مجتمع غير منتج واغلبه بيعيش حالة من البدائية بعيدا عن الفكر والثقافة والفنون التي تسمو بالروح الانسانية، عايش عشان يرضي غرايزه وشكرا.. ويا ريته عارف يرضيها كمان.. لأ دا مكبوت جنسيا بدرجة شاذة، وعلاجه الوحيد للكبت هو المزيد من الكبت. حتى المتجوزين عندهم كبت، يمكن اكتر من اللي مش متجوزين.. لأن اللي مش متجوز ومكبوت عنده خيال وعنده أمل انه يحققه بعد الجواز، لكن المتجوز عرف اللي فيها، وأمله الوحيد هو انه يخبط في واحدة أويلمس حاجة في الزحمة،أو يشوف فيلم بورنو، ودا آخره.. يا إما يستغل الرخصة اللي مديهاله المجتمع المحترم جدا جدا بتاع احلى من الشرف مفيش ويخون مراته مع واحدة من ادنى المستويات عشان يقدر يعمل معاها اللي خجلان منه مع زوجته المتربية، لأن الحائط النفسي اللي جعل من الجنس تابوه محرم وربطه بمفاهيم كلها بتحط من هذه الغريزة باعتبارها دنس وقرف وفحش وفجر، بيخليه مش قادر يتخلص من العقده دي مع مراته، اللي هي كمان شايفة العملية الجنسية كواجب عليها لغرض معين وان الاستمتاع بالجنس دا شيء مشين واللي عايزة تستمتع بالجنس دي لازم تكون ست من اياهم، لكن المتربية دي بتعمل كدا عشان جوزها وانجاب الاطفال وبس.. يعني بنات وولاد وستات ورجالة وكبار السن كمان عندهم مشاكل جنسية، والهوس الجنسي بيشغل مساحة كبيرة من تفكيرهم فبيبحثوا عنه في كل شيء وأي شيء

5- الفضيحة انثى.. لأننا مجتمع ذكوري، يتمتع فيه الذكور بمساحة من الحرية الجنسية، بتعتبر الزنا والتحرش شقاوة.. والخيانة الزوجية فحولة وأكيد أكيد الزوجة هي الل غلطانة وهي السبب ان جوزها بص برة، لأن زي ما احنا عارفين الراجل مش ممكن يغلط ابدا ولا يكون عديم الاخلاق ولا خسيس ولا أي حاجة من دي. دا يا عيني بيخونها مضطر وهو الدمعة هتفر من عينه.. فطبعا في ظل هذا الترخيص الذي منحه المجتمع للذكر ليتخطى به اسوار اكذوبة التقاليد والفضيلة والاخلاق، حتى انه جعله يتخطى الاوامر الالهية والاديان في هذا الخصوص، فقد تم اخراج الذكر من مفهوم الفضيحة.. مش مهم.. الرجل معندوش غشاء بكارة يبقى مين هيعرف؟ ربنا غفور رحيم يعني وعادي وف اللذيذ، المهم البنت.. هي دي الفاجرة اللي عندها غشاء بكارة ولازم تتكفن وهي عايشة وتتدبح لو مجرد حد اتكلم عليها، مش مهم بقى مظلومة مش مظلومة مش شغلنا.. دي عرض الراجل، وهو دا المهم.. الراجل يعني يمشي من غير عرض؟؟ معقولة؟ دا حتى ما يصحش.. الناس تقول عليه إيه؟.. يعني الراجل عديم الشرف اللي داير زي الكلب يتحرش في دي ويعاكس دي ويبصبص لدي ويزني مع دي مالوش شرف، فلازم يدورله على كيان يسقط عليه كل قرفه ومرضه النفسي واحساسه بالعار عشان يشييله الدلعدي شرفه، وطبعا هيلاقي مين يعمل فيه كدا غيرالحيطة المايلة، الدرجة عاشرة في المجتمع؟.. الانثى.. مصدر الفضيحة والعار.. هو فيه غيرها؟ هي دي اس البلاوي كلها

6- الطبقة العليا والمشاهير هم صناع الفضايح.. لأن طبعا اغلبية المجتمع عندنا بتتدرج بين الطبقة الوسطى للفقرا والمعدمين، فلازم تتم مجاملة هؤلاء.. وتبقى كل المسلسلات والافلام بيلعب فيها الغني أو حتى مجرد الميسور ماديا دور الشرير والمجرم والفاسد والحرامي والنصاب والمنحل اخلاقيا، والستات من هذه الطبقة طبعا كلهم هشك بشك ومفتريين وفاسدين وطماعين وانتهازيين وفيهم كل البلاوي.. لكن الفقير دا الملاك.. النسمة.. المتدين اللي عارف ربنا.. الطيب الغلبان.. اللي عنده كرامة وكبرياء وشهامة.. مش فافي ومهيس وقليل الرباية زي ابن الراجل الغني الحرامي. هذا النفاق المجتمعي اللي للأسف اصبح سمة في حياتنا لن ينفي ابدا العلاقة بين الفقر والجهل والجريمة. أنا اتكلمت عن مجتمع الاحياء الشعبية قبل كدا وما افرزته ثقافتهم من تشوهات في المجتمع وانحطاط اصاب الذوق العام.. وطبعا اغلب الجرايم بيرتكبها هؤلاء ومن ينتمون إلى الشرائح الدنيا في المجتمع.. لكن التصريح بده بيزعل.. مش بس لأننا بنحب النفاق ولازم نمشي في ركاب الاغلبية، لكن لاسباب سياسية كمان خلت الفقر دا سمة من سمات المجتمع وعايزاه يتعايش مع حالته دي لأنها لا تملك تحسين وضعه ولن تستطيع فعل ذلك في الوقت الحاضر ولا المستقبل القريب، ويصبح الحل هو استغلال حالة النفاق اللي موجودة في المجتمع لإلهاءه عن واقعه وعن البحث وراء الاسباب الحقيقية التي ادت به إلى هذا الحال، ومن أحسن الاسلحة التي يمكن الاعتماد عليها هي حواديت الغني الحرامي والفقير الطيب، وفضائح اصحاب المال والمشاهير

7- أكل لحم الموتى.. ولأن الموتى مسالمون لا يتكلمون فإنهم اختيار مثالي لصنع الفضيحة أم جلاجل.. ما بالكم لو كان الميت دا هو واحدة مشهورة وماتت مقتولة؟؟ ماهي بدل واحدة ست واتقتلت يبقى لازم تستاهل القتل والدبح، ولازم طبعا تبقى ماشية على حل شعرها، ولازم تتقطع حتت وراسها تنفصل عن جسمها ولسانها يتقطع وتتفرتك وتتنشر صورها عشان المجتمع الطيب البريء اللي ما يعرفش الحاجات الأياه دي ياخد عبرة ويعرف يشكم البنات اللي فيه كويس. القتيلة الانثى دي تبقى فرخة بكشك بالنسبة للصحافة والاعلام المرئي وقعدات النميمة، خصوصا في ساعات العمل.. أصل احنا شعب بيحب شغله أوي ومتفاني في عمله وفي اتقانه زي ما كلنا عارفين.. شعب منتج منتج يعني.. فتلاقي قعدات النميمة دي ما تحلاش إلا لتضيع ساعات العمل المملة اللي بيقعد فيها الموظفين متيسين في وش بعض، والموظفات يبصوا في الساعة ويغنولها يا ساعة الوقت اجري خليني اروح بيتي بدري.. ويا سلام بقى لما واحدة تكون جايبة معاها جرنال ولا مجلة عشان ياخد الدورة بتاعته ع الحبايب ويتباحثوا ويتناقشوا ويتحاوروا ويبدعوا ويتألقوا في التعليق على التفاصيل واضفاء المزيد من المحسنات البديعية عليها والأحكام على شرف الضحية اللي بتطلع زي الرصاص، "وأدي أخرة المسخرة وقلة الأدب".. الحمد لله احنا فلة.. احنا مفيش احسن مننا، دا احنا ملايكة ناقصلهم جناحات.. انما بنات اليومين دول عايزين الحرق يا اوختشي

منكم لله.. منكم لله يا مجتمع مريض.. ياللي بتخوضوا في اعراض الناس وانتم بيتكم من ازاز.. ياللي اكبر هواية عندكم هي انكم تنهشوا ف لحم بعض.. ياللي بتفرحوا في مصايب الناس وتزعلوا في فرحتهم وتحقدوا عليهم.. ياللي ما تمسكوش جرنال غير عشان تشوفوا اخبار الفضايح وتبقوا ساعاتها مثقفين أوي وكل واحد شايل جرنال ماشي بيه كأنه سلاح التلميذ.. إيه ده؟ إيه القرف ده؟

اللي نشرته الجرايد عن هبة ونادين دا قمة السفالة والحقارة والقذارة والخيال المريض.. لكن العيب مش عليهم، العيب على مجتمع أكل لحم الموتى.. مجتمع مقزز في عنفه وفجاجته وفساده والدمامل المتقيحة اللي طالعة منه في كل حتة ومع ذلك بيدور على فسفوسة يعمل منها فضيحة

مش متخيلة ازاي اللي علقوا على الكلام دا بكلام كله شماتة وتشفي يبقوا بني آدمين؟ وسلالة الكلاب من نباحين الصحف اللي يبيعوا شرفهم وانسانيتهم ويستغلوا هذا السعار العام لتحقيق ارباح وزيادة توزيع زبالاتهم، دول إيه دول؟ إيه ده؟ إيه القرف اللي احنا عايشين فيه ده؟

حصلت ناكل في بعض بالشكل ده؟ اخلاق إيه ومجتمع محافظ إيه وتقاليد إيه وزفت إيه على دماغكم؟ وبتنهشوا ف مين يا متخلفين؟ إيه يعني بنت فنانة؟ ويا ريتها مثلا فنانة بتاعة فن هابط عشان تكون عندكم شحنة الكره دي ضدها!! بنات بين ايدين الله تعملوا فيهم كدا ليه؟ وإيه آدي اخرة الانحلال والبعد عن الدين؟.. اسم الله عليكم وعلى تدينكم اللي مقطع بعضه!! دول بناتكم يا متخلفين!! لحمكم ودمكم.. البنت اللي انتم هريتم نفسكم في الحقد والتشفي فيها لمجرد ان قالوا عليها في الجرايد انها ثرية وعايشة في فيللا لوحدها وجابت عربية ب40000 للبوي فريند بتاعها طلعت بنت عادية، زي بناتكم اللي انتم كرهتوهم في عيشتهم. عايشة حياة عادية من شقى اهلها اللي راحوا يدوروا على لقمة العيش زي ملايين من الغلابة في البلد دي.. اجرمت في إيه؟ انها عايزة تتعلم؟ انها مصاحبة بنت مطربة؟ انها اتقتلت على ايد حرامي خاف من صريخها يفضحه؟؟

لأ وياريت صريخها واستغاثتها عملت حاجة.. دي الجارة اللي افتكرت نفسها هتبقى نجمة في الاعلام وقالوا انها هي اللي كشفت المستور واللي كان بيحصل من حفلات وسهرات في الشقة اللي تمت فيها الجريمة، بتقولك قال خير اللهم اجعله خير، قال صاحية تصلي الفجر سمعت صوت خناقة.. يا عيني على التدين والورع!.. سامعة استغاثة جارتها وقعدت تسمع كدا كأنها مزيكا ولما الاصوات سكتت قال راحت تصلي وتنام.. يا عيني!! اللهم قوي ايمانك يا شيخة!!.. لأ صحيح مصر بخير يعني. وأبو زميلتهم في الجامعة، اللي كمان راح يصلي الفجر في نفس اليوم، سبحان الله ولا حول ولا قوة إلا بالله، إيمان وتقوى يقطعوا القلب. قال برضه للصحافة انه لما رجع من صلاة الفجر عرف باللي حصل من زوجته، اللي أكيد كانت صاحية هي كمان عشان تصلي الفجر، وان بنته كانت مع هبة ونادين في نفس الليلة لكنه كلمها في التليفون الساعة 11 وقالها ارجعي يا حبيبتي من الشقة البطالة بقى الوقت اتأخر

مش ممكن اللي أنا شفته دا؟؟ كمية سادية وتفاصيل مقززة وخيال مريض ما يطلعش غير من حثالة معدومين الضمير، مش شايفين في القتل بالطريقة البشعة دي أي جريمة أو فضيحة، وراحوا يلفقوا الفضيحة للمجني عليهم لمجرد انهم بنات وكانوا قاعدين لوحدهم!! يعني لو كان اللي اتقتلوا دول شابين، كان خبر قتلهم دا اتحول لفضيحة؟ أو لو كانوا حتى شابين بيعملوا حفلات وبيجيبوا بنات وبيعربدوا ويضربوا مخدرات وخمرة وكل اللي ممكن يخطر على بال حد، كان حد اعتبر دي فضيحة؟ كان حد شمت فيهم وقعد يكتب درس في الاخلاق والتربية وهو اصلا آخر واحد يتكلم في الامور دي؟

والد البنت المسكين اللي اتكوى بنار الغربة عشان يعيش ولاده ويعلمهم احسن تعليم يرجع يلاقي بنته جثة، ومع ذلك محدش رحمه.. معقولة أب يطلع في التليفزيون عشان يقول بنته بكر؟؟؟ مش عارف ياخد واجب العزاء فيها؟؟ وتبقى مصيبته في شرف بنته اكبر من مصيبة قتلها.. والمفروض انه يعيش بالعار عشان المجتمع والصحافة القذرة اصدروا حكمهم عليها بالاعدام بعد ما اتقتلت!! أنا مش مصدقة

أنا احترمت الراجل لأنه طلع في التليفزيون يدافع عن شرف بنته اللي نهش فيه الكلاب.. ما استخباش وقال يا حيطة داريني كفاية فضايح.. راح وهو واثق من براءة بنته لأنه عارف رباها ازاي، وانها حتى لو عايشة في قصر وحدها هتفضل هي بنته باخلاقها وتربيتها. لكن مين يرحمه في وسط مجتمع تحول إلى وحوش غير آدمية؟.. تاني يوم يطلع كلام أقذر من اللي اتقال قبل كدا وكأنهم خايفين دموع الأب المكلوم تصحي ذرة انسانية وسط الناس وتخليهم يبطلوا يشتروا ورق التواليتات بتاعهم

نفترض ان الحرامي دا ماكانش اتمسك، ودا وارد جدا.. كان الوضع هيكون إيه؟ العيلة دي تعيش ازاي وهي سمعتها على كل لسان؟ يترحموا على بنتهم ازاي بعد ما كانت سبب في عارهم وفضيحتهم؟ كانوا هيفضلوا موصومين طول حياتهم؟

لو المجتمع هيموت على واحدة مومس يرميها باحجار قبحه وفساده واحقاده وعنفه وازدواجيته، فإليكم الموامس الحقيقيين وهم الصحفيين اللي قعدتم تريللوا على الكلام اللي كانوا بيسرحوا عليكم بيه.. وإليكم القوادين اللي اداروا هذه الدعارة الجماعية باقتدار من رؤساء تحرير هذه الصحف اللي مش هاممهم ينشروا فكر ولا ثقافة ولا وعي لهذا المجتمع الجاهل، وكل همهم هو التربح من الاثارة ولو على حساب تفشي المزيد من المرض والقبح واللاانسانية في هذا المجتمع. بجد كان استعراض عضلات واستعراض لرجولة هذا المجتمع الذكوري.. والجايزة مناصفة بين الصحافة وزباينها بتوع جلسات النميمة

الفضيحة اللي بجد هي فضيحتكم انتم .. انتم صناعها وانتم نجومها

يا من تمجدون القاتل لأنه ذكر وتلعنون القتيلة لأنها انثى

انتم ابشع فضيحة

Monday, November 24

رأس الأفعى


شهدت منطقه عين شمس تجمع مئات المسلمين بعد صلاة العشاء، أمام أحد المنازل التى حولها أقباط المنطقة من مصنع ملابس داخلية إلى مكان يقام به شعائر مسيحية باسم الكنيسة، وهتف المتجمعون أمام المنزل "الله أكبر" "الله أكبر"، حتى تجمع الأمن حولهم وقاموا بتفريقهم بالقنابل المسيلة للدموع، مما دفع المتظاهرين إلى إضرام النار فى سيارة "دوجان" لأحد المسيحيين.

وحضر إلى مكان التجمهر اللواء إسماعيل الشاعر مدير أمن القاهرة، كما حضر إلى المنطقة 50 عربة أمن مركزى، و3 عربات مطافئ، و10 عربات مصفحة حاصرت المنطقة.

وأكد مصدر أمنى لليوم السابع، أن الفتنة التى حدثت مساء اليوم الأحد، بمنطقة عين شمس، كان سببها محمد يوسف أبو حسين، وينتمى لجماعة الإخوان المسلمين، حيث تجمع مئات المصلين أمام عقار تحت الإنشاء، بعد أن أشاع هذا الشخص بأن الأقباط سيقومون ببناء كنيسة بدلاً من العقار.

وأكد المصدر، أن قيادات الشرطة انتقلت إلى موقع الحادث، وتمت السيطرة على الموقف تماماً، مضيفاً أن محافظة القاهرة هى الجهة التى يمكنها أن تحدد أن الأرض مخصصة لبناء منزل أو كنيسة وفقاً لتراخيص البناء

نقلا عن جريدة اليوم السابع

............................

أظن من الصعب تقييد قضية الفتنة الطائفية في مصر ضد مجهول.. لأن كلنا عارفين المجهول ده يطلع مين.. مش محمد يوسف ابو حسين.. دا مجرد دمية مش أكتر، بتحركه الأفعى اللي بتبث سمومها في مصر من ساعة الصفقة المشؤومة اللي عقدها معاهم النظام السياسي في يوم اسود على هذا الشعب الطيب، الشعب العظيم الذي كان مضربا للامثال في التسامح والتعايش.. الذي طالما حسده الحاقدين على وحدته وصلابته في مواجهة الفتن

نظرية فرق تسد مش جديدة.. والاستعمار حاول يلعبها علينا كتير وماعرفش.. يمكن عشان المصري الفتك الفهلوي عارف ان الخواجة مش ممكن يكون عايز مصلحته، وانه لما يوزه على جاره ويحاول يقلبه ضده يبقى أكيد الموضوع فيه انة.. لكن يا عيني الفتك دا مش عارف ان الشجرة اللي طرحته طرحت نبت شيطاني، بينفذ انهاردة نفس المخطط اللي فشل فيه المحتل على مر تاريخ مصر

الفتنة دي صناعة محلية 100%.. محدش يقولي الفيلم الهابط بتاع الصهيونية واستهداف مصر.. مصر طول عمرها مستهدفة، ودا قدرها.. لكن الاستهداف شيء والخيانة شيء تاني.. الطعن في الضهر شيء تاني.. الغدر شيء تاني.. بيع الوطن شيء تاني.. واللي شعاره طظ ف مصر دا مش صهيوني ولا تبع الامبريالية الغربية.. دول للاسف من أهل البلد دي.. وشايلين جنسيتها

أنا اتكلمت عن موضوع الفتنة الطائفية وشرحت المخطط الاخواني الوضيع ده بشكل مبسط للي عايز يفهم.. مش عارفة هنفوق امتي؟؟ هنصحى ونتحرك عشان ننقذ بلدنا من النفق المظلم اللي بيدفعوها ناحيته امتى؟؟ هننتشل وطنا من المستنقع اللي وقع فيه دا امتى؟

الفاعل مش مجهول

الفاعل ملء السمع والبصر ومحاصرنا ف كل حتة

يا ترى هنفضل نتفرج عليه وهو بيدمر بلدنا؟

يا ترى هنفضل خايفين من ارهابه ومستحملين اكاذيبه وادعاءاته وخيانته؟

امتى هنطهر بلدنا من المرض ده؟ امتى هنتصدى للوباء ده ونعمل حاجة ولو صغيرة أوي عشان نقول اننا بنحب البلد دي؟

امتى هنمتلك الشجاعة اننا ننقذ الاسلام من ايديهم بعد ما شوهوه بألف شكل وألف لون وألف جريمة بينسبوها ليه؟

.............

فيها إيه لو اتبنت كنيسة ولا عشرة ولا مية ولا ألف؟؟
مش دي بيوت للعبادة وذكر اسم الله؟

حصلت نتهجم على الناس في بيوتها وهي بتتعبد لله؟؟ وازاي يتم ترديد اسمه اثناء القيام بجريمة بهذه الخسة والوضاعة؟
أين ذهبت عقول المصريين؟؟ أين ذهبت اخلاقهم؟؟
نفترض ان التعبان الاخوانجي دخل يوسوس.. فين عقولنا؟؟ فين ضميرنا؟؟ فين قلوبنا اللي كانت دايما عمرانة بالخير والحب والايمان؟؟

بعتوا الاسلام يا مسلمين؟
بعتوه بالرخيص.. رخيص أوي
واستحقيتم ما وصلتم إليه
مجرمين.. سفاحين.. ارهابيين

لكن ذنب الاسلام إيه تلطخوا اسمه معاكم؟؟

روحوا ادبحوا واحرقوا وخربوا واكرهوا واعملوا كل الافعال الاجرامية.. بس بلاش تجيبوا اسم ربنا على لسانكم.. بلاش تدنسوا دينكم
...........

أما اللي لا هما اخوان ولا هما مسلمين.. فده المتوقع من حثالة امثالكم
يا احقر من انجبت مصر

لستم اخواننا في شيء.. جاري المسيحي الخلوق التقي هو أخي.. معه اتقاسم هموم هذا الوطن.. وقلبنا على نبض واحد وأمل واحد ورجاء ان يزيح الله عنا كابوسكم القميء

Monday, November 17

مصر بتتجلد


من ساعة ما قريت خبر الحكم على الطبيب المصري بالسجن 7 سنين والجلد 1500 جلدة وأنا عندي اكتئاب واحساس فظيع بالاهانة.. حاسة ان كل جلدة بتنزل على ضهري أنا

نشرت مقال الدكتور علاء الأسواني لأنه قال كل اللي كنت عايزة أقوله ومش قادرة.. مش قادرة اكتب عن مصيبة وكارثة انسانية بالبشاعة دي.. كل ما كنت احاول اعبر عن الألم اللي جوايا كانت ايدي بتقف واحس بنفسي بيضيق واني مش عارفة ألاقي كلام. مقال الدكتور الأسواني، ومقالات تانية كتير الحقيقة كلها ممتازة، تناولت الموضوع من زوايا عديدة

انما اللافت للانتباه ان اللي بالك بالك، جماعة الشوم والندامة، عرة البشر، اللي قاعدين وسطينا وعاملين نفسهم مصريين وهما عرر وواطيين.. حاطين جزمة وسخة في بقهم ولا حد فيهم جاب سيرة الموضوع ده لا من قريب ولا من بعيد!! خير اللهم اجعله خير! فين الجاعورة اللي مفتوحة على آخرها على اتفه وابسط الامور؟؟ فين الاستجوابات بتاعة الكلكيعة البرلمانية الذرية المكوكية اللي فالحة بس في الهيافة وعمل استجوابات على افلام السينما اللي مش على ذوق الجماعة!! مفيش استجواب ليه؟ مفيش تنديد ليه؟ مفيش مظاهرات في الجامعات ليه؟ دول طلاب المحظورة كل يوم بيعملوا مظاهرة على اهيف حاجة.. دا لو حد مسك صوباع أخ فيهم الدنيا بتقوم.. دول بيتنشقوا على أي حاجة يعملوا عليها مناحة وجنازة يشبعوا فيها لطم.. وشعارات م اللي قبلك يحبها.. ويا أمة الاسلام قومي وانتفضي عشان الاخوان مش عارفين يعلقوا بوسترات في الجامعة!! وجيش صامدون يعلن الحرب عشان كام صايع م العيال بتوعهم اترفد. لكن لما الموضوع يمس اولياء نعمتهم اللي بيقبضوا منهم، يحطوا ف بقهم صرمة قديمة ولا حد يسمعلهم حس

جاتكم القرف.. ربنا يخصلنا من نفاقكم وعمالتكم وسمومكم يا جماعة الطابور الخامس. طبعا حبيبكم تبلعوله الزلط وتعملوله خدكم مداس كمان، ولو على حساب كرامة بلدكم ودم واحد من اهلكم.. اخص.. اتفووووو.. مستحيل تكونوا مصريين.. مستحيل تكونوا بني آدمين أصلا. يا عرر!.. اللي بيحصل في الدكتور اللي راح يشتغل بشرف في بلد ما تعرفش حاجة عن الشرف دا ممكن يحصل لأي حقير فيكم.. ساعتها للأسف هيلاقي كل مصري بيدافع عنه وحاسس بالظلم والاهانة كأنه هو اللي مسجون وهو اللي بيتجلد.. هيلاقي كل مصري بيضغط على الحكومة عشان تنقذه وتردله كرامته.. يالي ما تعرفوش حاجة عن الكرامة.. يا لاحسين الاحذية يا حثالة.. كان يوم اسود يوم ما اتزرعتم وسطينا.. نبتة قذرة وعايزة الحش من جدورها

إلهي تتكتموا كدا إلى أبد الآبدين.. خلاص القطة بلعت لسانكم دلوقتي؟؟.. مش عارفين يا متدينين بالقوي، يا بتوع قال الله وقال الرسول، ان الساكت عن الحق شيطان أخرس؟؟.. بس هأقول إيه؟ ما انتم عارفين حقيقة نفسكم.. دا الشيطان انضف منكم.. عمركم شفتم شيطان ندل بيبيع أهله؟.. عمركم شفتم شيطان بيلحس الجزم زي الكلب لحسن السبوبة تنقطع عنه؟؟.. انتم مرض.. سرطان.. عايشين وسطنا ليه؟ احنا كلنا زي ما انتم شايفين ضالين ومنيلين بستين نيلة.. روحوا لحبايبكم اقعدوا ف حضنهم وفارقونا.. قولولهم الشرع مافيهوش حاجة اسمها 1500 جلدة.. علموهم من علمكم الواسع با جهابذة.. قولولهم ان حتى الجاهلية ماكانش بيحصل فيها كدا.. قولولهم ان ربنا أمر ان الحكم بين الناس يكون بالعدل.. ولا انتم شايفين ان كلام الاسياد اللي بيمولوكم فوق كلام ربنا كمان؟.. فارقونا لو عندكم ذرة ضمير.. كفاية بقى

جلدة ورا جلدة نازلة على جسدك النحيل يا مصر.. جلدة ورا جلدة بتقطع في لحمك.. وكل نقطة دم بتصرخ وتبكي على كرامة وطن عظيم، شاء القدر انه يعاني من كبوات كتير، لكن لأنه عظيم كان دايما بيقف تاني ويرفع راسه بكل فخر.. إنما المصيبة لما الضربة تيجي من جوا.. ضربة جبانة وقذرة.. والمصيبة انها لابسة عباية الدين عشان تداري على قذارتها وتعفنها وخيانتها ليكي

خيرك يا مصر كان دايما لغيرك.. كان الأول بالغصب والاحتلال والاستعمار.. وأول ما استقليتي جريتي توزعي خيرك على اللي حواليكي، لكن الواطي هيفضل واطي.. هي دي طريقته في رد الجميل.. (ولا أقصد هنا الشعب السعودي المغلوب على أمره، بل أقصد نظام آل سعود) مش كفاية انه زارع عصابة عشان يقضي على حضارتك، عديم الأصل هيفضل يحقد عليكي.. فاكر ان فلوسه هتشتريله أصل.. لكن ولا فلوس الدنيا هتنضف الجلخ اللي جواه.. قلبه اسود سواد الزيت اللي منقوع فيه. لكن حقك هيرجع.. والله هيرجع.. وهنطهرك من كل قراضة عمالة تمص في دمك.. وساعتها هنقدر نعمل تغيير حقيقي واحنا مش خايفين.. وهنعمل تطوير وتحديث وعلم وثقافة وفن وتاخدي حقك يا غالية.. ياللي الزمن جار عليكي كتير

إلى كل الحثالة المتخاذلين.. انتم وجهين لعملة واحدة.. عملة مزيفة.. وزي الطفليات ودودة البلهارسيا كل واحد فيكم ماسك ف غيره عشان يطول عمره وينهش ف البلد دي.. كل واحد فيكم واخد رئة صناعية عشان يفضل كاتم على نفسنا.. واحد رئته هما المحظورة اللي عاملها فزاعة عشان يمنع الديمقراطية وتداول السلطة، والتاني رئته هي فلوس الجاز.. القضاء على هذه الجماعة المسمومة هو السبيل لتحرير مصر.. لازم نحرر مصر من الخطر الداخلي اللي بيعمل على هدمها بالغزو الثقافي وضربها بجرثومة الرجعية.. وفي نفس الوقت نكون بنقضي على حجة النظام في عدم تطبيق الديمقراطية، ونحرمه من الفزاعة اللي ماسكها للشعب وللقوى الخارجية

فمتى نتخلص من هذا الكابوس الجاثم على صدورنا؟

Wednesday, November 5

آخر ضحايا التدين البديل


مقال هام للدكتور علاء الأسواني
جريدة الدستور
5 نوفمبر 2008

حدث ذلك فى العام الماضى ..

كنت فى لندن عندما ثارت ضجة كبرى حول أحد المسلمين من أصل باكستانى وهو مولود فى إنجلترا ويحمل الجنسية الإنجليزية .. فقد ألقى هذا الشخص خطبة الجمعة فى أحد مساجد لندن فأعلن على المصلين أن إنجلترا ليست إلا واحدة من بلاد الكفار , وأن المواطن الإنجليزى المسلم يجب أن يرفض أداء الخدمة العسكرية فى الجيش الإنجليزى الكافر ...

وأن عقوبة المسلم الإنجليزى الذى يقبل التجنيد أن يتم ذبحه بمقتضى الشريعة الإسلامية .

وقد إستعمل الخطيب كلمة يذبح بدلا من يقتل ليؤكد أن حكم الشرع هنا هو قطع الرقبة ...

بالطبع تم القبض على هذا الخطيب وتصدرت كلماته الصحف الإنجليزية جميعا ..

وكانت هذه الواقعة بمثابة هدية العيد إلى الكتاب الصهيونيين والمعادين للإسلام فإنهمرت التعليقات حول دموية الإسلام وتشجيعه للإرهاب.

وقلت لنفسى أن هذا الخطيب المتطرف الجاهل سوف يلقى أقصى عقوبة فى القانون البريطانى وهو يستحقها بالتأكيد , فهو يعلن إحتقاره لبلاده التى يحمل جنسيتها ويحرض الشباب على رفض الخدمة العسكرية ثم يحرض الناس على ذبح الجنود البريطانيين المسلمين , وهذه الدعوة العلنية للقتل تأتى بعد أن تعرضت إنجلترا إلى هجمات إرهابية أدت إلى مقتل العشرات من الأبرياء ..

كل هذه العوامل جعلت عقاب هذا الخطيب مؤكدا ومفهوما بالنسبة إلىّ , لكننى بينما كنت أشاهد نشرة أخبار الساعة الخامسة فى التليفزيون , فوجئت بخبر الإفراج عن الخطيب المتطرف دون توجيه تهمة .! وقد صرح القاضى الإنجليزي الذى أفرج عنه بأن ما دعا إليه الخطيب من قتل المجندين المسلمين لايشكل تهمة تحريض على القتل , لأنه لم يدع إلى قتل شخص بعينه ... ومن ثم فإن دعوته العلنية إلى القتل , برغم وحشيتها ، لا تخرج عن كونها مجرد أفكار والقانون البريطانى لا يعاقب الناس على أفكارهم .

تذكرت هذه الواقعة وأنا أقرأ عن المأساة التى يتعرض لها الآن الطبيبان المصريان شوقى عبد ربه ورءوف أمين، فقد إتهمتهما السلطات السعودية بإعطاء بعض الأدوية المهدئة إلى أميرة سعودية مما تسبب فى إدمانها المخدرات . والتهمة غائمة غير محددة وتحتاج إلى تحقيق طبى متخصص ومحايد ، خصوصا أن الأميرة كانت مدمنة للمخدرات قبل أن تبدأ العلاج مع الطبيبين ...

وفى كل الأحوال فإن من حق أى متهم أن يحظى بمحاكمة عادلة ...

لكن السلطات السعودية إعتبرت أن بلاغ الأميرة عنوان الحقيقة ، فالأميرة السعودية عندهم منزهة عن الكذب .وبالتالى تم القبض على الطبيبين المصريين وضربهما وتعذيبهما حتى يعترفا بما إتهمتهما به سمو الأميرة ، ولما إعترفا تحت وطأة التعذيب البشع صدر الحكم عليهما بالحبس 7 سنوات وألف خمسمائة جلدة لكل منهما ... ولما إستأنف أحدهما ، الدكتور رءوف أمين ، الحكم الصادر ضده ، صدر عليه حكم جديد بالحبس 15 عاما بدلا من سبع سنوات .... عقابا له ، فيما يبدو ، على إستئناف الحكم الأول والإعتراض على مشيئة سمو الأميرة فى التنكيل به ...

ونحن هنا نتساءل : لو كان هذان الطبيبان إنجليزيين أو أمريكيين هل كانت السلطة السعودية تجرؤ على جلدهما وحبسهما ؟

بل وهل كان بمقدور السلطة السعودية أن تقبض عليهما من الأساس ؟؟

الإجابة طبعا معروفة فالغربيون فى السعودية معاملتهم تختلف تماما عن معاملة العرب المسلمين ... ولقد قالت زوجة الدكتور رءوف أمين لجريدة الوفد : (( إن الأمر كله فى يد الأميرة السعودية فهى تستطيع أن تظلم وأن تعفو بالتليفون )) ..

والمعنى هنا أن القانون فى السعودية يتفاوت تطبيقه على الناس تماما ، بإختلاف الجنسيات والنفوذ والمكانة الإجتماعية ....وفى هذا إنتفاء لفكرة العدالة من أساسها .. إن الظلم الذى يتعرض له مئات الألوف من المصريين فى السعودية ، وهذا الإحتقار من السلطات السعودية للمصريين ، وهذا التخاذل المشين من قبل الحكومة المصرية عن حماية المصريين فى السعودية .. كل هذا ليس بجديد .. لكن ما يستحق التأمل أن هذا الظلم الفاحش الذى وقع على الطبيبين المصريين .... إعتبرته السلطات السعودية تنفيذا لشريعة الإسلام ....

وهنا تصدمنا ظاهرة التدين البديل التى كتبت عنها من قبل ، عندما يستبدل الناس بجوهر الإسلام ومبادئه الحقيقية ، الطقوس والمظاهر ... عندما لا نرى فى الإسلام دفاعا عن الحق والعدل والحرية وإنما نقصره على الحجاب وأداء صلاة الجماعة ..

إن ظاهرة التدين البديل قد نشأت أصلا فى المملكة السعودية ثم إنتشرت منها إلى أنحاء المعمورة .

فالسلطات السعودية التى تمنع الإختلاط فى المدارس وتحرم التمثيل ونحت التماثيل والتى تجبر الناس عنوة على أداء الصلاة وتمنع المرأة من قيادة السيارة وتنهرها وتضربها إذا كشفت شعرها أو جزءا من قدمها . هذه السلطة المتشددة فى المظاهر لا تجد غضاضة فى إقامة قواعد للجنود الأمريكيين فى السعودية ليشنوا منها حروب إبادة ضد المسلمين فى البلاد المجاورة , ولا تجد حرجا فى أن تضع الثروات الطائلة التى تقدر بتريليونات الدولارات فى البنوك الأمريكية "" الكافرة "" بينما تحرم البنوك فى العالم الإسلامى من الإنتفاع بها .. وهذه السلطة السعودية المتشددة فى المظاهر لا تتورع عن إرتكاب أكبر أشكال الظلم الفاحش ضد المقيمين غير السعوديين ....

بدءا من الإستيلاء على أجورهم لصالح الكفيل وحتى إذلالهم وضربهم وحبسهم لو خالفوا أوامر سيدهم السعودى ..

ولنقارن هنا بين القاضى الإنجليزى والقاضى السعودى .. فالقاضى الإنجليزى ، غير المسلم ، الذى لم يزعم أبدا إنه ينفذ شريعة الله، إحتكم إلى ضميره الإنسانى والمهنى وإلى قانون ديمقراطى يحرم تجريم الناس على أفكارهم فأطلق سراح شخص دعا إلى تكفير الآخرين وذبحهم .. أما القاضى السعودى فهو يزعم أنه يمثل الإسلام لكنه يصدر أحكاما ظالمة إرضاء لسمو الأميرة ...

إن القاضى الإنجليزى فى رأيى أكثر إسلاما من الشيخ السعودى، لأنه ينفذ العدل وهو الأساس الأول للإسلام .. ولقد قال رسول الله صلى الله عليه وسلم : (( إنما أهلك الذين من قبلكم أنهم كانوا إذا سرق فيهم الشريف تركوه وإذا سرق فيهم الفقير أقاموا عليه الحد , والله لو أن فاطمة بنت محمد سرقت لقطعت يدها ..)) .

إن مأساة الطبيبين المصريين تدل على مدى الهوان الذى وصل إليه المصريون فى الخارج والداخل بسبب النظام الفاسد الظالم الذى يحكم مصر .. لكنها أيضا تقدم لنا نموذجا عمليا على بشاعة التدين البديل ونفاقه وأكاذيبه ...

إن الدين يتحول دائما إلى طاقة إنسانية إصلاحية عظيمة عندما يفهم على أساس دفاعه عن حقوق الإنسان وكرامته .. لكننا فى اللحظة التى نقصر فيها رؤيتنا للدين على المظاهر والطقوس نصبح مؤهلين لإرتكاب أسوأ أنواع الرزائل .. لأننا بفهمنا القاصر للدين نعطل إحساسنا الفطرى بالضمير، وبالتالى نطلق لأنفسنا العنان فى إرضاء مصالحنا ونزواتنا ونحن مطمئنون إننا قد أدينا الصلوات فى أوقاتها .

إن الإسلام قد أبدع حضارته العظمى عندما دافع عن الحق والعدل والحرية والمساواة ...

أما فى أزمنة الإنحطاط فقد إنفصلت العقيدة عن السلوك عند المسلمين فتخلفوا حتى صاروا فى مؤخرة الأمم .

ولن ينهض العرب والمسلمون إلا عندما يستعيدون فهمهم الصحيح للإسلام , وما لم يحدث ذلك ... فسوف نظل مشغولين بالتشاجر حول الحجاب والنقاب وإعفاء اللحية وإرتداء الدبلة الذهبية , بينما نحن نظلم أنفسنا ونظلم الآخرين

Friday, October 31

السردية الأولى

الآن يمكنكم قراءة الجزء الأول من "سردية الخصيان" على الموقع الجديد
في انتظار مشاركاتكم وآرائكم