Friday, December 21

حد فاهم حاجة؟


ف يوم وأنا راجعة البيت ف عز الزحمة, وطبعا الشارع واقف ومفيش أي أمل ان الناس دي تروح ف يومها الاسود.. لقيت خير اللهم أجعله خير عربية من بتوع السرفيس اللي بيسوقها فصيلة نادرة من السواقين اسمهم عفاريت الأسفلت, وهو أسم على مسمى خصوصا إنك بتلاقي الواحد منهم إذ فجأتا ظهر قدامك كأنه فعلا عفريت طلع من تحت الأسفلت.. المهم طبعا العفريت طلع بقدرة قادر قدامي رغم ان الشارع واقف تماما كأننا ف متحف الشمع. فرحت طبعا ان عملية الجلا جلا دي تمت من غير خساير, هو حد يقدر يعترض وللا يزعل من العفاريت؟


العروسة اللي كان سايقها الباشا كانت متعبية بشر فشر علبة السردين.. بس الصراحة كانت زي الفل, كأنها لسة طلعة من مكنة الغسيل اللي بتلف بتاعة البنزينة اللي عديت عليها من نص ساعة ومع ذلك أقدر أشوفها ف المراية, بما أن السرعة ف الشارع ده حدها الأقصى 5 كيلو ف اليوم. مش مشكلة, الواحد اتعود. أهو ع الأقل السرفيس اللي قدامي مش مهكعة, ولا بتطلع هباب إسود, ولا شكلها مؤذي للعين.. يعني الواحد المفروض يفرح إن حظه طلع حلو.. والفضل ف ده أكيد يرجع لعناية الباشا العفريت الفائقة بالعربية.


وطبعا العروسة مش أقل من باقي السرافيس اللي ف البلد, يعني لازم السواق يدلعها بكلمتين ع الإزاز الوراني أو الرفرف.. حاجة كدة لزوم العين أو تخليد لفلذات أكباده, وهو حتى الزباين يعرفوا ينادوله يقولوله يا أبو مين. المهم قلت الوقفة شكلها هتطول, أما أشوف الباشا كاتب إيه, أهو نوع من التسلية والفضول برضه.. بضرب بعيني كده لقيته كاتب أروع حكمة ممكن يوصلها أي واحد عايش ف مصر! وقلت ف عقل بالي "يخرب عقلك, دا انتا عبقري!".. الصراحة مقدرتش أداري إعجابي باللي قرايته, وقلت لازم الحكمة دي تشوف النور. ومن يومها وأنا بقولها لنفسي, وأكتبها قدامي إن لزم الأمر عشان أفتكر هذا التحليل العبقري اللي خلاني اتأكد من سلامة قواي العقلية.


أشكر الزحمة, والمرور, والسرفيس, والفيلسوف الكبير عفريت الأسفلت على ظهوره المفاجيء ووقوفه الميمون أمامي.. وقد كتب باللون الأحمر على زجاج عربته الخلفي: محدش فاهم حاجة

40 comments:

على باب الله said...

هههههههه

فعلاً هي عبارة عبقرية

و حقيقية لدرجة مفزعة

---

ألف مبروك علي البلوج الجديد

و عقبال فانتازيا كمان و كمان و كمان .. : )

---

egy anatomist said...

ضحكت من أعمق نقطة بداخلي لدى قراءة هذا البوست وهذه الجملة العبقرية


أراها تختزل كل حكمة المصريين وعبقريتهم وحضارتهم عندما يواجهون بأوضاع سيئة

محدش فاهم حاجة

يااااااه

يعني مش عايزين دوشة

ولا كلام

ولا حد يدعي المعرفة

محدش فاهم حاجة يا ريس بنقول

آه والله

بس لازم نحاول نفهم يا فانتازيا هانم.. لازم.. معندناش بدائل

..

مبروك وكل تحياتي وإعجابي اللانهائي بعربيتك الرائعة وانجليزيتك المعجزة

..

تحياتي واحترامي

haneen said...
This comment has been removed by the author.
haneen said...

مبروك يا فانتا على المدونه الجديده الروشه والشقيه دى ايوه كده عايزين نشوف الوجه الاخر لفانتا هنا واشطه يا معلم وبهذه المناسبه اسأل الله لكى ثبات ال (بى إم دبليو) وجمال ال " ايه 5" وقوة المرسيدس وصبر "128" وراحة الباسات وصحة ال " جى إم سى" وارتفاع ال " فور باى فور" وهيبة " الجاجوار" وزودك الله بجميع الكماليات وتسبقى هؤلاء العفاريت وادخلك الجنه وكل عام وانتم عالزيرو

Fantasia said...

العزيز على باب الله,
أهلا وسهلا
أشكرك على تشريفك وتشجيعك المستمر ليا
أتمنى البلوج الجديد يكون عجبك
أنا كدة احتليت بلوجر كله تقريبا
ههههههه
أنا فعلا اتفزعت لما أدركت الوقعية الرهيبة اللي ف الجملة دي
اقعدت اكررها لنفسي كذا مرة
محدش فاهم حاجة؟
وفعلا الموضوع بعد ما كان نكتة, قلب بكآبة
خصوصا لما أصتدم بموقف يأكدلي ان حقيقي محدش فاهم حاجة
وبذات اللي فاكرين نفسهم فاهمين كل حاجة
بس كل م احاول أتخيل السبب اللي خللا السواق يكتب كدة ع العربية, أموت من الضحك
أكيد هو شافها من منظور تاني خالص
ومش ممكن ييجي على باله مدى تأثير الحكمة بتاعته دي فيا
لكن كلنا ف الهم مصريين, فانتزيا زي عفريت الأسفلت, محدش فاهم حاجة

Fantasia said...

عزيزي اناتومست
سعيدة ان البوست اعجبك وجعلك تضحك من اعماقك
الصراحة فعلا الراجل لخص حاجات كتير أوي في 3 كلمات
أهو دا اللي اسمه المختصر المفيد بجد
لازم نحاول نفهم طبعا, مفيش كلام
حتى لومحدش سابنا نفهم ف حالنا
أصل هي دي المشكلة, محدش عايزنا نفهم
أنا شخصيا مؤمنة ان كل حاجة ممكن تتفهم, دا الراجل الفرنساوي شمبليون فهم الهيروغليفي
وبكرة هنخللي أبو الهول ينطق كمان
بس على الله حد يفهم حاجة
نورت البلوج الجديد
أرجو دوام المتابعة
وأنا برضه هفضل أتابع مجهودك المتميز في محاولة فك طلاسم مشاكل المصريين
يمكن أفهم حاجة

Fantasia said...

الجميلة حنين
كل سنة وانتي طيبة
يا ألف خطوة عزيزة
اتمنى البلوج يكون عجبك
ومن ناحية الوجه الآخر لفانتا, هتشوفي وجه جديد نوفي
أشكرك ع التهنئة الفول أوبشن دي
هههههههههه
يسمع من بقك ربنا
وسنة سعيدة عليكي ان شاء الله
تحياتي يا قمر

haneen said...

عجبتك بجد . طيب الحمد لله اصل واحده صحبتى بعتتهالى فى العيد تقريباً بتتريق على عربيتى المكحكحه وبتتمنى لى اغيرها واوسع على نفسى بس على مين برضه انا عندى عاده غريبه جداً وهى انى لما اعاشر حاجه لمده كبيره احبها وما افرطشى فيها حتى الجماد كمان يعنى محتفظه بحاجات من ايام الطفوله وما بحبش افرط فيهامع ان الناس كلها عايزانى مبقاش كده بس انا عندى حب التمسك بالاشياء اللى ليها ذكريات حلوه عندى ودى تعتبر هوايه برضه ولا ايه ... على العموم حاولى تتجنبى سواقين الميكروباسات دول الا انا ياما عانيت من رزالتهم وبتهرب منهم بكل الوسائل وعلى فكره ساعات كتير قوى بيكون فيهم مثقفين ومتعلمين وبيقولوا كلام واقعى
اهم حاجه ربنا يكفيكى شر الطريق اظن دى اجمل دعوة ويا رب دايماً فى تقدم ونجاح
خالص تحياتى

The Alien said...

مبروك البلوج الجديد
وخطوة العربي دي ف رأيي ضرورية
وكويس إنك بدأتي .. والبداية موفقة

أكيد محدش فاهم حاجة
أنا مش فاهم .. ولما بفهم .. بفهم إني مش فاهم

تحياتي

Innocent said...

خذوا الحكمة من افواه المجانين. يوجد رجل ممن فصلوا نفسهم عن المجتمع - لعدم رضاءهم عنه - يمر بميدان رمسيس بين الحين والآخر مناديا بأعلى صوت:

كله مطنش، كله منتح، كله متيس

تحياتي

Fantasia said...

عزيزتي حنين
تصدقي انا كمان عندي نفس الموضوع؟ خصوصا مع العربية
اصل أنا من النوع اللي بيعتني بحاجته أوي
ف تلاقيني دايما واخدة بالي من مواعيد الصيانة وتغيير الزيت والكشف الدوري والكلام ده
وبعدين مش بستحمل اسيب أي خربوش, ولو صغير, فتحسي كإن العربية دي بتمشي في شوارع استوكهلم مش القاهرة
علشان كدة بيصعب عليا أفرط فيها, أصلي خايفة عليها م البهدلة من بعد العز اللي شافته معايا
ولو انها برضه بتعمل معايا حركات ندالة, ودايما ف أصعب أوقات وفجأة
بس لازم الواحد يعمل حساب السن برضه هي م يبانشي عليها سنها برغم انها عجزت أوي
اعمل إيه؟ صعبانة عليا.. شوفنا سنين غلب وبهدلة سوا, أقوم أفرط فيها بعد العشرة دي؟ مايصحش
اشكرك على نصيحتك الغالية ودعوتك الجميلة.. وأتمنى أن يكون طريقك سالما دائما
تحياتي

Fantasia said...

زميل الكفاح, ألين
اشكرك على تهتنئتك وتشجيعك لي أن أكتب بالعربية
طالما أردت أن أقهر هذه الصعوبة البالغة التي ألقاها ف عثور أصابعي على الحروف العربية
اتمني أن تكون المدونة خطوة ناجحة, تمكني من تحقيق هذا الهدف
وعندي أمل أيضا أن أفهم في يوم ما
صحيح محدش فاهم حاجة
وكويس أوي ان الواحد يفهم إنه مش فاهم حاجة
صدقني فيه ناس كتير مشكلتها الاساسية هي انها فاكرة نفسها فاهمة
لكن أصعب موضوع هو انك تعرف ان محدش فاهم حاجة, ولا حتى حد فاهم نفسه
سعيدة انك نورتني ويا ريت ماتملش من الشحططة اللي أنا عملهالك دي
كل تقديري

Fantasia said...

عزيزي إنوسنت
المجانين من هذا النوع هم من أرهقوا أنفسهم أكثر من اللازم في فهم مايجري حولهم
حتي وصلوا لحقيقة ما
أو صدمة ما
لم يبتغوا الوصول اليها من الاساس
ولم يستعدوا لمواجهتها
الراجل ده يا حرام كان فاكر ان فيه ناس محموءة زيه وهاممها اللي بيحصل
طلع كله مطنش
يا عيني الراجل ضرب
وتلاقيه لسة محموء وفاكر ان الناس لما تسمعه بيقول عليها كدة, هيختشوا على دمهم ويبطلوا تناحة
تخيل بقى لو فهم انهم بيضحكوا عليه هو! ومش شايفين ان الطناش ده حاجة وحشة
وهيفضلوا متيسين كدة حتى لو سمعوه مليون مرة
نورتني واضفت حكمة كعادتك دائما

EmY said...

فانتا يا قمر
مبروك البلوج معلش متأخره بس لسه شايفا حالا ايه الجمال ده و كمان بتكتبي الردود بالعربي
والله ياريت تحتلي البلوج سبوت كله و مكتوب كمان علي الاقل انتي بتقدمي حاجه محترمه و مفيده و ممتعه مش اي كلام وخلاص

مش هاقولك البوست حلو علشان دي حاجه معرفه انا بدخل عندك و انا عارفه اني هاقرا كلام جميل بسيط ليه معني كبير

فعلا ماحدش فاهم حاجه

الي طول اليوم يقول قال الله و قال الرسول و يفتي و هو مش فاهم حاجه
و الي يهين مراته و يضربها و يقول ربنا قال كده و هو مش فاهم حاجه

و الي يقول شغل المرأه بيأخر المجتمع و هو اصلا مش عارف يعني ايه مجتمع

البلد بقي كل واحد مش فاهم يفتي

تحياتي و حبي ليكي يا قمر

Fantasia said...

الجميلة إيمي
الله يبارك فيكي يا قمر
أنا احتليت مكان كبير أوي أهه, والبركة ف تشجيعكوا
بس لازم أسيب فرصة للناس التانية برضه
كفاية احتلال لحد كدة, ههههههه
اللي مش فاهم وبيفتي دا مصيبة تانية
مصيبة سودة ومنيلة بستين نيلة
وللأسف الشعب بتاعنا بيموت ف الفتي
يحبوا يصدروا أحكام وهما قاعدين يشيشوا ع القهوة
بلا قراية بلا بحث بلا وجع قلب
هما يعني بتوع الكتب والثقافة كانوا خدوا إيه
جاتها نيلة اللي عايزة تفهم
هما كلمتين من بتوع المصاطب وسلاموا عليكوا
هتوجعوا دماغنا ليه؟
شكرا يل إيمي على كلامك الجميل واشادتك باللي بكتبه
والله يا بنتي انتي بتديني أمل ف الحياة
كل سنة وانتي طيبة يا أحلى إيمي
تحياتي

coca said...

مبروك يا قمر علي البلوج الجديد

بلوج جميل زي صاحبته

مش عاررفه انا دايما بوصل متاخر ليه

بس الحمد لله عشت لحد ما شوفت فانتا بحالها بتكتب عربي

بس للامانه اسلوبك العربي حلو اوي ودمه خفيف

Ahmed Al-Sabbagh said...

ههههههههههه

بجد اسلوبك حلو اوى

انا بحب الكتابة الساخرة مووت

مش عارف انا دخلت مدونة تانية اسمها فانتازيا بالعنجليزى

هى دى تبعك ؟؟

معلش سامحى جهلى وبلاش ضرب
اصلى ساعات بتوه كدة

بس اصل المدونة ام انجليزى دى عجبتنى اوى وحسيت انى قدام حاجة كدة وفضلت متنح كدة

مش عارف كنت متنح عشان الانجليزى ولا عشان الحاجات اللى عجبتنى

كمان انا حاسس ان المدونة دى جديدة

ولا انتو لسه كانسين وراشين ؟

عموما مبروك لو كانت جديدة

وهابى نيو يير يارب

و

تحياتى

Fantasia said...

الغالية كوكا
أهلااااااااا, دا إيه النور ده؟
مش متأخرة ولا حاجة يا قمر
إحنا لسة بنفتتح البلوج زي ما أنتي شايفة
أخجلتم تواضعنا والله
أنا صحيح العربي بتاعي على أده يعني
بس أديني بحاول
أسعدتني زيارتك جدا
كل سنة وانتي طيبة

Fantasia said...

أحمد الصباغ
يا مرحب يا مرحب
أيوة حضرتك أنا هي بتاعة العنجليزي
معلش عاملة تمويه
أشكرك جدا على رأيك ف البلوجين
دي شهادة أعتز بيها
الحقيقة البلوج ده هو الخامس في مجموعتي التدوينية
يعني خمسة وخميسة
منورنا دايما, وكل عام وحضرتك بخير

فتحي الشيخ said...

هي المشكلة ان محدش فاهم فعلا ولا ان اللي فاهم عايزها تفضل كدة
البوست حلو
كل سنة واحنا كلنا طيبين

مش هاقولك اسمى said...

لأننا لا نهتم إلا بالمظهر
ولا نهتم إلا بأنفسنا
ولا نسأل إلا عقولنا

محدش فاهم حاجة

مروة الزارع said...

تعرفى بقى انى بكون واحدة من اللى راكبين السرفيس دة

يالا بقى هنعمل اية

الحمد لله على كل حال

خشى شوفى البوست بتاعى بتاع (انا عاوزة اتجوز ميكانيكى) وهتحسى بمأساتى

فعلا محدش فاهم حاجة

مروة الزارع said...

تعرفى بقى انى بكون واحدة من اللى راكبين السرفيس دة

يالا بقى هنعمل اية

الحمد لله على كل حال

خشى شوفى البوست بتاعى بتاع (انا عاوزة اتجوز ميكانيكى) وهتحسى بمأساتى

فعلا محدش فاهم حاجة

الفاتح اليعقوبي said...

االسلام عليكم
ههههههههههههههههههههههههههههههههههه
محدش فاهم حاجة
وبمناسبة سواقين الميكروباصات والله سمعت من احدهم حكمة الصراحة من الاخر
والله خذها ولم لم تكن من فقيه

قال لي وكان ميكروباص فلوكس وكنت بكلم واحد صحبي عن مشكلة البلد
(قال لي يابيه مشكلة البلد دي مش في عدم وجود المثقفين ولكن في كترة المثتثقفين)
جامدة
والف مبروك علي البلوج الجديد وفي تحسن باين الكتابة العربي بدات تتشتغل

وكل وانت بخير
والسلام

MerMaid said...

هههههههههههههههههههههههه
انا الحقيقة فرحانة قوي اني لاقيت بوست بالعربي عندك
ده مش لاني جاهلة بالانجليش لاسمح الله
لا طبعا
بس لان العربي اسهل كتير كتير في المتابعة
بس كل واحد وراحته بقي
انا كمان كنت زمان معرفش اكتب عربي خالص
لغاية ما بدات اتعلم من حوالي سنة وكل شيء تمام دلوقتي
---------------------
كل سنة وانتي طيبة
السواقة في مصر دي معجزة
ولا فن ولا ذوق ولا اخلاق

مش الكل طبعا

بس بجد بلوج جامد

صورتك دي؟؟؟اللي في البوست؟؟
حلوة قوي

:)))))
منورة

Fantasia said...

استاذ فتحي الشيخ
اشكر مروركم الكريم
سعيدة ان البوست عجبك
واتمنى دوام المتابعة

Fantasia said...

مش هاقولك اسمي
ليه يا عم كدة؟
حد زعلك ف حاجة؟
ع العموم براحتك
ماهو محدش فاهم حاجة
تحياتي

Fantasia said...

عزيزتي مروة الشجاعة
يا ستي ركاب السرفيس دول أجدع ناس
الله يكون ف عون الجميع
صدقيني السواقة ف القاهرة هم زيه زي ركوب المواصلات
بعد الشر عليكي من المأساة يا مروة
تمنياتي القلبية بعام سعيد

Fantasia said...

الفاتح اليعقوبي
يا ألف خطوة عزيزة
أيوة كدة شجعني واديني شوية أمل
اصل العربي مطلع عيني الصراحة
وبعدين مش عارفة أحسن الخط عن كدة
مع ان خطي ف العربي فشر اجدع خطاط
انا اكتشفت ان مجتمع السواقين ده عالم تاني
التعامل اليومي مع ناس كتير والسواقة طول اليوم ف الزحمة اكيد بتخليهم فلاسفة
ههههههههه
الله يكون ف عون الجميع
اشكرك على الزيارة الجميلة دي
تحياتي

Fantasia said...

عزيزتي ميرميد
مبسوطة اوي اني مش الوحيدة اللي بعاني علشان الكتابة بالعربي
معنى كلامك ان فيه أمل
اصل الموضوع صعب, بس تشجيعكم الصراحة حمسني اني اكمل
لا يأس مع الحياة

السواقة ف القاهرة رحلة عذاب ومعاناة يومية
دا الواحد لو كان عليه ذنوب يبقى اكيد مش هيتحاسب عليها أكتر من كدة
انا بحس اني بنزل من البيت علشان احارب
رحلة الذهاب حرق اعصاب علشان الواحد يوصل ف معاده
ورحلة العودة اختبار للصبر وقوة الاحتمال
مش ممكن
الناس عمرها بيضيع علشان تروح تقضي ابسط مصالحها

الصورة مش صورتي
بقى انا وحشة كدة؟ اخص عليكي يا ميرميد
هو انا دايما بكون مكشرة وانا سايقة
بس لسة ما فكرتش اني اربط راسي
ولو انها فكرة علشان راسي ما تضربش
ههههههههه
منوراني يا قمر

حسن ارابيسك said...

حد فاهم حاجه
العبارة فعلاً عبارة عن عيار من النوع التقيل وهذا صحيح أذا أجزنا لها المعنى الحرفي لها
ولكن أخطر ما في الموضوع أن الكل فاهم والكل مدرك والكل يرى الصورة دون أي رتوش
والكل يدرك معنى كل حاجه من الألف للياء
الكل يعرف المعنى الذي في بطن الشاعر بل الشعراء كلهم
الكل اصبح يستوعب كل شئ وأي شئ دون الدخول في أي تفاصيل جزئية لها

ولكن تسألينني اين المشكلة أذن
ولن أخفيكي سراً أن الكل أدرك أن الفهم أو عدم الفهم لن يجدي ولن يفيد
طالما أصول الألعاب جميعا داخل تلك المدينة.. مدينة الملاهي ..أصولا كل لعبة معروفة مسبقاً للجميع ومن يحاول الخروج عن تراك أو مضمار اللعية فلن يضر إلا نفسه
ولذلك الجميع اراحوا أنفسهم وأوهموا أنفسهم أو عاشوا في خدعة من صنع إيديهم أن..حد فاهم حاجه..وهذا أسلم لهم في كل شئ حتى لايصابون من الخارج أو من داخلهم بما لاتتحمله عقولهم وأنفسهم وقلوبهم وكل معتقداتهم فيصابوا بما لايحمد عقباة ويصبح رقم من الأرقام في أي شئ سواء مرضى أو وفيات ..الخ
لذلك فالأحسن لكل أن يمر في هذه الحياة وفي تلك الفترة بالذات مرور الكرام وهو يدعي الغباء والجهل حتى يصيرا يقينا لديه بأنه فعلا لا يفهم شيئاً..حد فاهم حاجه

DR.HAMAS said...

راااااااااااائع

ههههههههههههههه

هو فيه حكمة أروع من كدة

فعلا

محدش فاهم حاجة

انتى فاهمة حاجة ؟؟

اوعى تقولى آه

أحسن أزعل

خليكى حكيمة انتى كمان

و لأ

هرد عليكى

أقولك و لا أنا




د.حمـــــــاس

m5m said...

مبروك المدونة الجديدة..الحقيقة أول مرة أعلق عندك وان شاء الله ماتكونش الأخيرة

على فكرة الجملة دى قديمة قوى و أنا فاكر انى شفتها مكتوبة على تاكسى من سنتين تقريبا..بس طبعا عندك حق هى جملة من نوعية "خير الكلام ماقل ودل"

تحياتى

محمد العدوي said...

ههههههههه

شكرا لأني ضحكت هذا الصباح ..


الميكروباصات دي دفاتر الحكمة الضائعة في بلدنا ..


شكرا لك .

appy said...

اول مرة ليه هنا
بس اوضح ليكى حاجه اولا عرفتك من مدونة مرمريد وعجبنى ردك جدا على موضوع كرهه مصر
المهم اوضح لكى حاجه بس عفاريت الاسفلت اتقالت عليهم كمان علشان حافظين المطبات كلها اسالينى انا كل ما اعمل رحله من رحلات ابن بطوطه فى المحافظات امشى وراء سواق ميكروباص وبكده بحافظ على عربيتى من المطبات والردار هههههههههه وبعدين يا حبيبتى دول احلى ناس تقول حكم وهما اصلا مش فاهمنها

Fantasia said...

حسن ارابسك
أشكرك على زيارتك الكريمة وتعليقك التحليلي المتميز
فعلا فيه ناس فاهمة ومستخبية وسط إللي مش فاهمين
بس أنا بعتبر دول برضه مش فاهمين
لانهم مستفادوش حاجة باللي فهموه
يعني من الآخر مش فاهمين إن الفهم في حد ذاته مش غاية, إنما وسيلة
الانهزامي مش فاهم حاجة
والمتهور برضه مش فاهم حاجة
الكسلان مش فاهم حاجة
والمتشائم مش فاهم حاجة
والمتفائل من غير داعي برضه مش فاهم حاجة
والراجل اللي كتب الحكمة دي على عربيته أساسا مش فاهم حاجة
إنما اللي فعلا فاهمين هما أصحاب اللعبة اللي حضرتك أشرت إليهم
خالص تحياتي وإحترامي

Fantasia said...

د. حماس
أسعدني تشريفك لمدونتي المتواضعة
و ما تقلقشي, مش هقولك إني فاهمة حاجة
بس بحاول أفهم
لعل وعسى
نفسي أفهم, وأكتر حاجة نفسي أفهمها
ليه محدش فاهم حاجة؟
خالص تحياتي

Fantasia said...

m5m
أهلا وسهلا بيك
وأتمنى بالفعل تكرار الزيارة
الموقف اللي حكيته دا على فكرة حصل من أكتر من سنتين
بس فضل في ذاكرتي وأثر فيا أكتر مع مرور الوقت
كل ما أمسك ورقة وقلم علشان أشخبط, ألاقي نفسي كتبت محدش فاهم حاجة
تحياتي

Fantasia said...

محمد العدوي
سعيدة إن الموضوع ساهم في إدخال شيء من السرور على صباحك
يا رب صباحك دايما زي الفل
تحياتي

Fantasia said...

appy
يا ألف خطوة عزيزة
أشكرك على ذكر إعجابك بتعليقي عند العزيزة ميرميد
أنا صحيح زعلت شوية من اللي قالته
بس أنا عارفة ان قلبها أبيض وبتحب مصر رغم القسوة ف التعبير عن إحباطها
وعلى العموم لازم أشكرها إنها عرفتني على ناس جميلة من خلال البلوج بتاعها

معاكي جدا ف موضوع المطبات والرادار
فعلا هما بقوا مبرمجين على تفادي الوقوع ف أي مصيدة من دول
بس الصراحة عليهم سواقة تجيب الضغط والسكر والقلب مع بعض بعيد عنك
بجد زي اللي راكبهم عفريت
ويا سلام بقى لو كسر عليكي ومعجبكيش
يروح طالعلك بكل جسمه من الشباك ويقولك لامؤاخذة يا طنط
طنط! ينيلك يا بعيد! سواقين إيه دول؟
بيتعلموا السواقة فين؟

نورتيني, واتمنى دوام المتابعة