Thursday, January 24

الفتنة المحلية


قررررب قرررررررب قرررررررررررب.. شوف فخر الصناعة المحلية.. الفلاية الاخوانجية.. اللي تطلع فاسد العقيدة من وسط مية

قررب قررب وأتفرج.. شوف الحاوي بتاع الجلا جلا.. فرصة عظيمة للي عايز يتعلم الحنجلة, وأصول الشعللة

قررب وشوف كمان.. البغبغان أبو نص لسان.. تعالوا واسمعوا يا جدعان.. قبل ما يروح المرستان

يلا كله يقرب ويتفرج ببلاش.. على التعلب الغشاش.. اللي قاعد يخططلك وانت ماتدراش.. وعايز بلدك يحتلوها الأوباش

يلا يلا يا جدعاااان.. العرض الآن.. وكله على عينك يا تاجر.. عايز تتفرج بس ولا ناوي تعافر؟ وتقف في وش اللي بيلعبوا بيك الكورة وانت غافل.. وعمال تسقفلهم من غير ما تجادل

قررررررررررب وفتح عنيك.. شوف العميان اللي حواليك.. واللي بيخربوا ف أراضيك.. وعاملين قال إن قلبهم عليك

قررب وأفهم يا محتاس.. ما خلاص الفاس وقعت ف الراس.. انتوا لسة قاعدين تتفرجوا يا ناس؟.. كفاية بقي, ورونا شوية اخلاص

يلا يا جدعان صح النوم.. معدش ييجي منه بعد اليوم.. بكرة يقطعوا رقبينا بسيفهم المسموم.. ويقولوا دول شوية كفرة ملهمشي لزوم

قررربوا يا جدعان.. قربوا كمان وكمان.. قربكم من بعض هو الأمان.. ماتسمعوش كلام اللي بايعين الأوطان.. وواكلينها والعة من زمان

قربوا وقولوا كلمتكم.. دي بلدكم, وكل المصريين قرايبكم.. مسيحي مجدع, علماني وطني, بهائي طيب, وشوشهم هيا وشوشكم.. ماتخلوش حد ف لحظة ضعف يخدعكم.. يهد اللي بينكم ويفرقكم.. وبالكره والحقد يملا قلوبكم.. ويرمي رمل الصحرا في عيونكم.. لا تعرفوا عدوكم من حبيبكم

قربوا وابنوا المستقبل لولادكم.. إبني وإبني, بنتي وبنتك, أمانة ف رقبتكم.. لازم تفضل مصر عمار علشانهم.. ويفضل الخير والحب يدفي قلوبهم

قربوا بدل ما ييجي اليوم الشوم.. ويتلم علينا الغربان والبوم.. يقولوا للولد "أبوك عقيدته فاسدة.. يلا يا مسلم ورينا الهمة.. هاتلنا راسه على طبق فضة.. نعملك أمير وتخش الجنة".. يجي الواد شايل راس أبوه.. ياخدوه بالحضن ويبوسوه.. وف آخر العالم يرموه.. ويجندوه ويسلحوه.. يصبح قاتل يقتل أخوه.. وعلى البشرية يطلقوه

قرررررب قررررب فتح عينك.. شوف الدم اللي بيني وبينك.. دمنا اللي سال على أرض سينا.. اللي ترابها الغالي يشهد علينا.. اننا طول عمرنا واحد.. مسلم, مسيحي, ربنا واحد.. ربي ربك, دمي دمك, بلدي بلدك, واسمي علي اسمك.. مصري ومصرية

خلصت الأغنية

39 comments:

الفاتح اليعقوبي said...

هههههههههههههههههههه
سلاما
لااجد خيرا منها لهذا البوست الرائع

اكملي مسيرتك

والسلام

Rain man said...

و ليه اخوانجية وفقط ؟
انت حزب و طني و لا ايه ؟

EmY said...

ازيك يا قمر
واحشاني اوي اوي اوي
بصي يا فانتا يا جميله انتي ليه رابطه الموضوع ده بالاخوان
اول انا كلامي مش هايكون دفاع عن الاخوان لاني مش اخوانيه و بصراحه اكتر مش موافقاهم و انا ضد اي حزبعلي اساس ديني

بس انا قابلت ناس اخوان محترمين جدا منهم اليعقوبي و الجعفري و الجيزاوي

الحكم علي عقيدة حد بالفساد او الصلاح مش من حق اي حد ولا هانعمل جنه و نار علي الارض و نحاكم الناس علي مزاجنا و بمصالحنا

البوست حلو جدا و في ناس كده كتير

bassim said...

ايه الحلاوة دي يا فانتا!

Dr-Online said...

اجمل ما قرات في هذة الساعة
من المواضيع
اولا احب ان اهنيكي علي امتلاك مدونة كهذة المدونة ذات الطابع الخاص في التعبير عن الراي بكل حرية ؟
ثانيا احب ان اهنيكي علي موهبتك العبقرية
في انتقاء الكلمات وتنسيقها بطريقة سهلة وخفيفة الظل مما يجعل القارئ يكمل الموضوع متلهفا للوصول الي النهاية

شكرا اختي الكريمة
واستمتعت بوقتي في مدونتك الجميلة في خلال اول زيارة لي
واتمني ان اري لك تعليقا في مدونتي المتواضعة


الصيدلي المطحون

MerMaid said...

ايه يا فانتا ؟؟
ايه اللي حصلك يا حبيبتي ؟
سايباكي سليمة من كام بوست كدة
ايه اللي جري..؟؟
انا شفت البوست اللي فات علي فكرة والتعليقات عليه و مرضيتش اعلق لاني مختلفة معاكم كلكم
بس انتم دايما بتتكلموا سوا و كنتم كويسين..ليه بقي قلبتوا كدة علي بعض فجأة ؟؟
محدش يقدر يحكم ان الاخوان المسلمين واكلينها والعة ولا انهم خونة ولا ان مصريتهم مش سليمة
لانهم فيهم ناس كويسين قوي و ناس مصريين قوي قوي..زي الجيزاوي كدة
و ناس غيرت فكرتي عنهم زي الفاتح اليعقوبي والجعفري
انا بحترمهم قوي
انا مش تبع اي حزب سياسي او ديني و انتي عارفة كدة كويس..بس لازم نعترف انه كل الاحزاب فيها الكويس و فيها الوحش..محدش يقدر يقول ان كل المجموعة دي وحشة لمجرد انه مختلف معاهم في طريقة التعامل مع الامور
و بعدين برضه الاخوان مش عاوزين يقتلوا حد ولا بيكفروا حد..انتي اللي اخدتي الكلام علي منحي اخر وهم فعلا مش كفروكي ولا اساؤوا ليكي ولا اساءوا لاي حد
بالعكس انا شايفة ان هم اتهاجموا هنا اكتر ما حد تحاور معاهم...
احنا كلنا مصريين
اخوان..علماني..مسلم ولا يهودي ولا مسيحي
في الاخر كلنا مصريين
ولازم نحب بعض و نتقبل بعض و نتقبل فكر بعض
يا انما هنفضل في قاع الامم بقي دايما و علي طول في تشتت و فرقة
اختلافك مع الاخوان لا يقلل من قيمتهم او اهميتهم
و اختلافهم معاكي لا يقلل من قيمتك ولا اهميتك
و في الاخر كلكوا بتحبوا مصر بلدكم

تحياتي و متزعليش
منورة يا قمر

mohand said...

السلام عليكم

طيب ممكن كمية عشان عايز اصدر منها

يا ريت يكون في منها كتير

دا هيبقي الاقبال عليها خطير


يا سلام يا ولاد علي الاختراعات

Fantasia said...

الفاتح اليعقوبي
هههههههه
كويس انه عجبك
وشكرا على وصفه بالرائع

سلاما يا أخي

Fantasia said...

rain man
لأ يا باشا حزب مصري, ينفع؟
خطوة عزيزة

Fantasia said...

الجميلة إيمي
هو حد يا حبيبتي بيكفر الناس غير الاخوان واللي متأثرين بفكرهم؟
أكيد طبعا فيهم ناس محترمة. وفيهم ضحايا كتير. وأنا كلامي كله عن اللي بيفرق بين البشر على اساس الدين أو الاعتقاد, فمفيش داعي أبدا لتسمية أشخاص
صدقيني أنا مازعلتش لما اشخاص معينين من الاخوان قالولي انتي فاسدة العقيدة, ولا كانت مفاجأة بالنسبالي
المشكلة مش انهم يصارحوني بالكلمة, ما أنا عارفة ان دا رأيهم فيا من زمان, وفي أي حد مش متبع فكرهم. يعني أنا واحدة من ملايين. ف الموضوع مش شخصي خالص. الكلام البسيط بتاع البوست دا هو عبارة عن خلاصة البوستين اللي قبليه
يعني الفلاية دي مجرد رمز للفكر الاخواني, اللي بيزرع روح التعصب والتطرف والتمييز والتفرقة والطائفية, اللي بتتهرس تحتهم الوطنية
باختصار أنا زيك بالظبط, ضد محاكم التفتيش اللي عاملينهالنا. وضد ان بشري يعمل نفسه إله ويحكم ان دا كافر ودا عقيدته فاسدة ودا إيمانه ضعيف ودا مسلم بجد ودا مسلم نص نص ودا مسلم ربع ربع

تحياتي يا قمر

Fantasia said...

bassim
دا إيه النور دا كله؟
حلوة بجد؟
أهو بحاول أكتب شعر حلمنتيشي على قدي
خالص تحياتي

Fantasia said...

صيدلي مطحون
شكرا على كلامك الجميل وتشجيعك للمدونة
واتمنى أكون دايما عن حسن ظن الجميع
سعيدة بتشريفك ليا, وأكيد هازور مدونتك طبعا. حتى عشان ناخد عينات أدوية مجانية
بس هي الصورة انتحرت ليه كف الله الشر؟

خالص تحياتي وتقديري

Fantasia said...

العزيزة ميرميد
اشكرك على التعليق
أنا سليمة والحمد لله
اختلافي هو مع فكر الاخوان وليس شخصهم

تحياتي

Fantasia said...

الاستاذ مهند
سعيدة بتشريفك
يا ريت يا عم نصدر كل الانتاج لاسرائيل
ايدي على كتفك
دا يبقى بيزنس مية مية بجد
بس تفتكر مين هيشري الاختراع المهبب ده؟

خالص تحياتي

دمعاتي said...

لا يوجد تيار فكري ليس فيه الصالح و الطالح
كل يؤخذ منه ويرد عليه
قد تكون تجربتك مع الاخوان ذات تاثير عليك
وهذا نستطيع فهمه
فانت بالتاكيد تشيرين الى موضع الجرح ولا تقصدين التعميم

لست اخوانيا وهيه ليست بتهمه اتبرأ منها
ولكن حقيقي ارى رغم ما فيهم من عيوب انهم افضل كثيرا ممن تملئهم العيوب

تحياتي لك

MerMaid said...

طيب كويس انك كويسة
يهمني كدة

تحياتي للقمر

:)

appy said...

ههههههههههههههههه
لا بجد موتينى على نفسى من الضحك طيب عموما مش هعلق يمكن تكونى فهمتى وجهه نظرى يعنى احنا مش ملايكه يعنى فينا اللى بيخطأ وفينا اللى بيصيب وعموما انتى جبتى من الاخر لان فيه ناس كتير مش شرط الاخوان بتحكمهم مصالحهم الشخصيه

nonoymm said...

انا لله وانا اليه راجعون
ايه الكلام دة بس
اخوان ايه وعلمانية ايه وليبرالية ايه بس
ومين قالك ان الاخوان بيكفروا
عموما انا لا اخوان ولا غيره انا مسلمة مصرية
ياريت تكوني فهمتي رد اليعقوبي كويس
فانا لا اجد انسب منه رد سلاما

Nsreen Bsunee said...

ازيك يا فانتا
انا بصي حاتدخل بس واقول حاجه
مفيش داعى ان كل شويه حد يدخل ويقول انا باحترم فلان وبحب علان من الاخوه المصنفين اخوان كده انتم يا جماعه بتوجهو من غير ما تقصدو اتهام لفانتا انها بتهاجم اشخاص بعينهم لكن فانتا بتهاجم وبتعرض وجهه نظرها تجاه الجماعه وفكرها الواضح والمعلن
مش معنى كده انها بتنفى عن كل الاخوان مصريتهم او بتتهمهم انهم مشعلى فتنه لكن سياسه التكفير والاتهام بفساد العقيده هى سياسه واضحه للاخوان واللى مش شايفها يروح يلبس نضاره
وانا عن نفسي مختلفه بشكل تام على ان اى حزب يقوم على اساس دينى انا شايفه ان فصل الدين عن الدوله هو حمايه للمؤسسه الدينيه وحفاظا عليها من لعب السياسه
وافتكر ان التعامل مع اكبر المؤسسات الدينيه فى مصر اللى هى الازهر الشريف ومفتي الجمهوريه اصبح فيه شئ من عدم الاحترام لاننا بنتهمهم انهم عملاء للحكومه وبيفصلو الدين على مقاس الحكومه
يبقى ازاى ممكن نتقبل ان حزب على اساس دينى يوصل للحكم
شئ مش منطقى ومصر مش محتمله اى افتكاسات وفتن وغيرها
ازاى انا كليبراليه او يساريه حاحط ايدى فى ايد حد بيتهمنى بفساد العقيده البلد محتاجه ناس متصالحه مع نفسها ومحتاجين نتقبل الاخر كمصرى دون حتى الاشاره لدين او خلافه
مش حنقعد نصنف بعض ونحاسب عقيده ونفوس بعض
مش منهج يعنى ولا اساس ممكن نغير بيه حال البلد اللى من سئ لاسوأ
وبعدين الاخوان كجماعه قدمت ايه للبلد او الناس مشكلتنا اننا عاطفيين ومش بنفوق غير بعد خراب مالطه
الناس البسيطه اللى بتنتخب حد اخوانى بنتخبه عشان امام المسجد بتاع المنطقه قالهم فى حق المرشح كلمتين حلوين فى خطبه الجمعه وراح موزع امساكيه والناس تفرح وخلاص
مين من الناس دى عارفين البرنامج الاخوانى مين يعرف الاخوان عاوزين ايه كل الشواهد بتقول ان الاخوان بيحافظو على كيانهم وخلاص ومصالحهم الشخصيه وخلاص حتى لو كانت عند امريكا او اوروبا حيجرو وراها
واحنا بقى تعبنا من اصحاب المصالح والتكفيرين والبلد يا ناس مش مستحمله
واحقاقا للحق ان فيه شخصيات دون ذكر اسماء محترمين جدا فى صفوف الاخوان لكن هو احنا حنمسك واحد واحد فى الاخوان نشوف نظامه ايه احنا بنتكلم عن كيان وجماعه وافكار معينه محدش جرح فى اشخاص بعينهم فا ياريت نكون اكبر من كده ونفهم الكلام زى ما هو من غير افتكاس وتخمينات

وربنا يتوب على البلد ايه اللى مش حتقوملها قومه غير لما نحب بعض وتكون لينا رؤيه واحده(كمصريين)0

Nsreen Bsunee said...

الاخت nonoymm
مممممممممممم
مش فاهمه يعنى هو فيه حد مات عشان انا لله وانا اليه راجعون
ومادام رد الاخ الجعفرى كان كافى ليه حضرتك رخمتى ع الكيبورد وعلقتى
طيب مش كان المفروض توضحى وجهه نظرك اللى اكيد كانت حتحترم حتى لو اختلف عليها
بس واضح عن معندكيش وجهه نظر اساسا
بس نصيحه انتى حره انك تتقبليها او لا
لما تستظرفى وتستهترى بعقليه اللى قدامك وتقولى كلام مالوش لازمه اكيد حتسمعى مالا يرضيكى فا حفاظا على ماء وجهك متستهتريش بفكر حد حتى لو مختلفه معاه عشان ميستهترش بيكى ويجرحك ويتهمك بالغباء مثلا

haneen said...

hii fanta,


انا جايه ارخم شويه على الكيبورد واعلق على رأى نسرين
:))
بصراحه ما عنديش تعليق اقوله غير ان انا كل يوم اكتشف فيكى موهبه جديده يا فانتا وكمان بتعرفى تكتبى شعر حلمنتيشى دا احنا عندنا عبقريه فذا دى مش كوره دى مزيكا قصدى دا مش كلام دا مزيكا يا جامد انت

وبعدين انا سعيده علشان مصر فازت على السودان ومبروك مبروك مبروك مبروك عليكم وعلينا ... اغنية يا سمين الخيام اللى بيجيبوها بعد الماتش انا موجوده يا ولاد لو حد ضايقكم اندهولى على طول دى كانت حاجه كدايعنى نطرى بيها القاعده شويه

باى باى

nonoymm said...

Nsreen Bsuneeالى



يخاطبني السفيه بكل قُبْحٍ فأكره أن أكون له مجيبـًا


يَزيد سفاهة فأزيد حِلْمـًا كَعُودٍ زاده الإحراقُ طِيبـًا


.........
سلاما

Nsreen Bsunee said...

ههههههههههههههه
واضح ان حضرتك مفلسه فكريا وليس على المفلس حرج

Innocent said...

أولا كلام جميل جدا.
ثانيا؛ الشعب نايم ومستسلم لسكينة الأخوان التلمة.
إمبارح كنت في زيارة لمنطقة سياحية وحاول احد اصباحي يتخيل معي شكل الحياة والسلطة في قبضة الأخوان. لم نتخيل سوى الدمار.

فعلا لو فاضل في البلد رمق أخير بلاش نسيبها تخسره على إيديهم.

تحياتي

goodman said...

رغم كرهى للاخوان وغضبى عليهم الا ان الحزب الوطنى ينال منى القدر الاعظم من الاحتقار
فهو يذكرنى بالرجل الذى ادخل الذئب الى بيتة حتى يخيف اطفالة من العصيان علية فاذا بالذئب ياكل الاطفال واحدا يلو واحدا

Fantasia said...

دمعاتي
أهلا بك ومرحبا
بالطبع لك حرية تقييم موقفك الشخصي من الاخوان
أما بالنسبة لي, فالأمر هو العكس تماما مما ظننته سيدي الفاضل
فأنا أقصد التعيم بالفعل
أنا لا أقيم أشخاص, ولذلك أنا لا أخص ولا استثني أحدا
أنا أقيم حركة, تيار, فكر معين يقود هذه الجماعة
لهذا, فالطبع أنا أقصد التعميم. لا دخل لذلك بتجارب معينة مع أشخاص.. فالفكر الاخواني معروف, ومواقفه معروفه للجميع

خالص تحياتي

Fantasia said...

العزيزة ميرميد
لا حرمنا الله من سؤالك
تحياتي

Fantasia said...

العزيزة appy
كلامي عن الاخوان كحركة تتبني فكر معين, ولها اهداف محددة تفصح عنها, لا يعني أن اعضائهم وحدهم هم من يسعون وراء مصالحهم الشخصية
هناك آخرون.. وهؤلاء الآخرون يمكن أن يكونوا من النظام أو من المعارضة. لكنهم لا يستغلون الدين كما يفعل الاخوان.. ولا يكفرون الناس, ولا يشعلون الفتنة الطائفية, ولا يقولون طظ ف مصر

Fantasia said...

nonoymm
يا حاجة انتي مكلفة نفسك
وجاية بتاكسي, ورايحة بتاكسي
علشان تقوليلي انك مش اخوان؟ وسلاما كمان؟
طب ما م الأول
الله يسامحك

Fantasia said...

العزيزة نسرين
أوجزتي فأفادتي بجد
أشكرك على هذا التوضيح للناس الكتير اللي عايزين نضارة كعب كباية
هو أنا بكتب بالهيروغليفي ولا إيه يا نسرين؟
هو الكلام مش مفسر نفسه؟
هو أنا غلطت ف حد لا سمح الله؟
عملت إيه أنا؟ ولا قولت إيه غلط؟
خلاص ثبتت عليا اني فاسدة العقيدة ولا إيه؟ ههههههههه
أنا نفسي افهم الناس اللي داخلة تقولي أنا مش اخوان دول, محموئين ليه طيب؟ امال لو كانوا اخوان كانوا عملوا إيه؟
يا نهار مدوحس! هو خلاص أي واحد يربي دقن ويقول أنا متدين يعمل ما بداله؟
يعني أنا لو كنت اخوانجية, كان حد يستجرى يقولي ان عقيدتي فاسدة؟
ولا كان حد اتشملل وساب كل الكلام اللي انا كاتباه علشان يقعد يتغزل ف
جمال الاخوان ويدافع عنهم من غير داعي؟
طيب الناس دي كلها قروا برنامج الاخوان وموافقين عليه؟
كل الناس دي موافقة على التكفير؟
كل الناس دي عايزة مهدي عاكف بتاع طظ ف مصر؟
أنا مش عارفة إيه اللي حصل للناس! ليه اللي بيفكرهم انهم مصريين بيتقلبوا عليه؟ ليه كل تركيزنا ف الخلاف والتشنج والتعصب؟ ليه محدش كلف خاطره يقولي انه فاهم قصدي, وان موضوع اننا مصريين دا له الاولوية؟
هو مفيش فايدة بجد يا نسرين؟

اشكرك يا حبيبتي على تعليقك الرائع
مغرقاني بجمايلك اللي مش عارفة أردهالك
:)

خالص تحياتي واحترامي

Fantasia said...

الغالية حنين
دا أنا اسيبلك الكيبورد بتاعي شخصيا يا قمر. دا كلام؟
مبروك يا حبيبتي. انشاء الله مصر دايما تفوز.. ف كل حاجة, مش ف الكورة بس

شوفتي تعدد المواهب اللي عندي؟ هههه الله يمسيه بالخير, واحد مش عايزة افتكره, خلاني اكتشف ان عندي مواهب فنية, والبركة ف الفلاية الاخونجية, اللي فضلها عليا, زاد وشوية
وجون وجون وجووون.. يا فانتا يا جامدة.. شوفتي الحتة اللي ع الماشي دي؟

اطمني سيادتك يا فندم. الوضع تحت السيطرة. وأي حاجة كدة ولا كدة هنبلغك على طول. حوول يا قيادة

تحياتي يا احلى حنين

Fantasia said...

الاستاذ انوسنت

منور يا باشا
يعني انت رايح مع واحد صاحبك تتفسح ف منطقة سياحية, تقوموا متلاقوش غير السيرة دي تتكلموا فيها؟
يا عمنا بلاش تفول ف وشنا والنبي
دي سيرة تتجاب في مكان سياحي؟ امال قهوة عم اتش يتقال فيها إيه؟
انتوا عايزين تضربولنا السياحة ولا إيه يا عمنا؟
وقعدتوا تتخيلوا الدمار كمان؟
يا نهار فوحلؤي

ع العموم جت سليمة المرادي
بس أمانة عليك بلاش السيرة دي تاني
نفسي ف بارقة أمل
على سبيل التغيير ليس إلا

خالص تحياتي

Fantasia said...

جودمان
فينك يا استاذ من زمان؟
بص انا الحزن الوطني مش باطيق سيرته
واشكالهم بتجيبلي استبحس
لكن لو حظي الهباب خلاني أشوف حد من البعدا بتوع المحظوظة وهو بيتكلم ع الجزيرة, بقول يا حلاوتك يا وطني
دا حتى بتوع الوطني شكلهم يشرح. ودايما مبتسمين كدة ما تعرفشي ليه
انما التانيين... بوريييه
زعيق وصريح وخناق وبوز شبرين
وتلاقي الواحد منهم متشنج وطالعله عرق هينط من جبينه وهو عمال يشتم. دول حتى بيستخدوا كلام ربنا ف تلقيح الكلام. شوفت ألعن من كدة؟
على العموم يا سيدي انا لو مسحت الأرض ببتوع الحزب الوطني, محدش فيهم هيقولي يا كافرة. يعني ف الآخر كلامهم قابل للأخذ والرد. مش هيقيموا عليا حد الردة علشان معترضة على سياساتهم

خالص تحياتي

Alexandrian far away said...

اننا طول عمرنا واحد.. مسلم, مسيحي, ربنا واحد.. ربي ربك, دمي دمك, بلدي بلدك, واسمي علي اسمك.. مصري ومصرية

أمين

Hassan El Helali said...

فانتا العزيزة جدا

تعبت من الجري وراكي في كل مدونه من مدوناتك الرائعه شويه عربي وشويه إنجليزي ودلوقت حلمنتيشي؟ مش ملاحق حتي أعلق يا بنتي!!!! جامده أوي والله وواضح إنها فعلا من القلب

Fantasia said...

عزيزي Alexandrian

جايزة أفضل تعليق

خالص تحياتي

Fantasia said...

العزيز حسن الهلالي

معلش انا دايما متعبة كدة
شكرا بجد على تشجيعك ليا وكلامك الرائع

هاروح انا فين جنب ملك الشعر الحلمنتيشي؟
دا حاجة كدا على قدي
انما فعلا م القلب

خالص تحياتي

Anonymous said...

السلام عليكم ورحمة الله وبركاتة

يا حاجة فانتا هو الاخوان عملولك اية علشان بتكرهيهم كدة

ولا انتى بتكرهى كل شئ اسلامى

انتى يبدو انك تعانين من رهاب من الاخوان

على فكرة انتى علمانية

بس بالمناسبة انتى مسلمة
ولا لاء

لو مسلمة

اية هو شكل الاسلام اللى انتى عايزاة مثلا يعنى خلينا بقى

نتكلم
بصراحة

انتى عايزة اسلام بس جوة الجامع ونطلع برة نبقى قراطيس

هو الاخوان غايظنكم اوى كدة لية

Fantasia said...

المجهول

وعليكم السلام ورحمة الله وبركاته

هو انتوا اللي متغاظين مني ليه؟ وعمالين تدخلولي مجهولين وتشككوا ف ديني وتقلوا ادبكم عليا.. الله يسامحك ع العموم

حضرتك الاسلام مش اختراع الاخوان ولا حكر عليهم.. واسلام ماركة الاخوان ده مش هو الاسلام الوحيد ف الدنيا

هو كمان اللي بيروح الجامع مش عاجبكم؟ حلوة دي.. جديدة.. مش كفاية يا ابني تروح الجامع علشان تبقى مسلم.. لازم تسمع كلام عمك الاخواني وتقول وراه آمين

افندم حضرتك.. قولي انت بقى شكل الاسلام عندك عامل ازاي انهاردة؟.. والقراطيس نظامها ايه؟ يعني الواحد ازاي يكون قرطاس؟ نورنا.. قولنا.. منكم نستفيد

ع العموم انا قرطاس الاخوان مش على مقاسي.. فيا ريت تبطلوا شغل الارطسة ده معايا