Monday, November 17

مصر بتتجلد


من ساعة ما قريت خبر الحكم على الطبيب المصري بالسجن 7 سنين والجلد 1500 جلدة وأنا عندي اكتئاب واحساس فظيع بالاهانة.. حاسة ان كل جلدة بتنزل على ضهري أنا

نشرت مقال الدكتور علاء الأسواني لأنه قال كل اللي كنت عايزة أقوله ومش قادرة.. مش قادرة اكتب عن مصيبة وكارثة انسانية بالبشاعة دي.. كل ما كنت احاول اعبر عن الألم اللي جوايا كانت ايدي بتقف واحس بنفسي بيضيق واني مش عارفة ألاقي كلام. مقال الدكتور الأسواني، ومقالات تانية كتير الحقيقة كلها ممتازة، تناولت الموضوع من زوايا عديدة

انما اللافت للانتباه ان اللي بالك بالك، جماعة الشوم والندامة، عرة البشر، اللي قاعدين وسطينا وعاملين نفسهم مصريين وهما عرر وواطيين.. حاطين جزمة وسخة في بقهم ولا حد فيهم جاب سيرة الموضوع ده لا من قريب ولا من بعيد!! خير اللهم اجعله خير! فين الجاعورة اللي مفتوحة على آخرها على اتفه وابسط الامور؟؟ فين الاستجوابات بتاعة الكلكيعة البرلمانية الذرية المكوكية اللي فالحة بس في الهيافة وعمل استجوابات على افلام السينما اللي مش على ذوق الجماعة!! مفيش استجواب ليه؟ مفيش تنديد ليه؟ مفيش مظاهرات في الجامعات ليه؟ دول طلاب المحظورة كل يوم بيعملوا مظاهرة على اهيف حاجة.. دا لو حد مسك صوباع أخ فيهم الدنيا بتقوم.. دول بيتنشقوا على أي حاجة يعملوا عليها مناحة وجنازة يشبعوا فيها لطم.. وشعارات م اللي قبلك يحبها.. ويا أمة الاسلام قومي وانتفضي عشان الاخوان مش عارفين يعلقوا بوسترات في الجامعة!! وجيش صامدون يعلن الحرب عشان كام صايع م العيال بتوعهم اترفد. لكن لما الموضوع يمس اولياء نعمتهم اللي بيقبضوا منهم، يحطوا ف بقهم صرمة قديمة ولا حد يسمعلهم حس

جاتكم القرف.. ربنا يخصلنا من نفاقكم وعمالتكم وسمومكم يا جماعة الطابور الخامس. طبعا حبيبكم تبلعوله الزلط وتعملوله خدكم مداس كمان، ولو على حساب كرامة بلدكم ودم واحد من اهلكم.. اخص.. اتفووووو.. مستحيل تكونوا مصريين.. مستحيل تكونوا بني آدمين أصلا. يا عرر!.. اللي بيحصل في الدكتور اللي راح يشتغل بشرف في بلد ما تعرفش حاجة عن الشرف دا ممكن يحصل لأي حقير فيكم.. ساعتها للأسف هيلاقي كل مصري بيدافع عنه وحاسس بالظلم والاهانة كأنه هو اللي مسجون وهو اللي بيتجلد.. هيلاقي كل مصري بيضغط على الحكومة عشان تنقذه وتردله كرامته.. يالي ما تعرفوش حاجة عن الكرامة.. يا لاحسين الاحذية يا حثالة.. كان يوم اسود يوم ما اتزرعتم وسطينا.. نبتة قذرة وعايزة الحش من جدورها

إلهي تتكتموا كدا إلى أبد الآبدين.. خلاص القطة بلعت لسانكم دلوقتي؟؟.. مش عارفين يا متدينين بالقوي، يا بتوع قال الله وقال الرسول، ان الساكت عن الحق شيطان أخرس؟؟.. بس هأقول إيه؟ ما انتم عارفين حقيقة نفسكم.. دا الشيطان انضف منكم.. عمركم شفتم شيطان ندل بيبيع أهله؟.. عمركم شفتم شيطان بيلحس الجزم زي الكلب لحسن السبوبة تنقطع عنه؟؟.. انتم مرض.. سرطان.. عايشين وسطنا ليه؟ احنا كلنا زي ما انتم شايفين ضالين ومنيلين بستين نيلة.. روحوا لحبايبكم اقعدوا ف حضنهم وفارقونا.. قولولهم الشرع مافيهوش حاجة اسمها 1500 جلدة.. علموهم من علمكم الواسع با جهابذة.. قولولهم ان حتى الجاهلية ماكانش بيحصل فيها كدا.. قولولهم ان ربنا أمر ان الحكم بين الناس يكون بالعدل.. ولا انتم شايفين ان كلام الاسياد اللي بيمولوكم فوق كلام ربنا كمان؟.. فارقونا لو عندكم ذرة ضمير.. كفاية بقى

جلدة ورا جلدة نازلة على جسدك النحيل يا مصر.. جلدة ورا جلدة بتقطع في لحمك.. وكل نقطة دم بتصرخ وتبكي على كرامة وطن عظيم، شاء القدر انه يعاني من كبوات كتير، لكن لأنه عظيم كان دايما بيقف تاني ويرفع راسه بكل فخر.. إنما المصيبة لما الضربة تيجي من جوا.. ضربة جبانة وقذرة.. والمصيبة انها لابسة عباية الدين عشان تداري على قذارتها وتعفنها وخيانتها ليكي

خيرك يا مصر كان دايما لغيرك.. كان الأول بالغصب والاحتلال والاستعمار.. وأول ما استقليتي جريتي توزعي خيرك على اللي حواليكي، لكن الواطي هيفضل واطي.. هي دي طريقته في رد الجميل.. (ولا أقصد هنا الشعب السعودي المغلوب على أمره، بل أقصد نظام آل سعود) مش كفاية انه زارع عصابة عشان يقضي على حضارتك، عديم الأصل هيفضل يحقد عليكي.. فاكر ان فلوسه هتشتريله أصل.. لكن ولا فلوس الدنيا هتنضف الجلخ اللي جواه.. قلبه اسود سواد الزيت اللي منقوع فيه. لكن حقك هيرجع.. والله هيرجع.. وهنطهرك من كل قراضة عمالة تمص في دمك.. وساعتها هنقدر نعمل تغيير حقيقي واحنا مش خايفين.. وهنعمل تطوير وتحديث وعلم وثقافة وفن وتاخدي حقك يا غالية.. ياللي الزمن جار عليكي كتير

إلى كل الحثالة المتخاذلين.. انتم وجهين لعملة واحدة.. عملة مزيفة.. وزي الطفليات ودودة البلهارسيا كل واحد فيكم ماسك ف غيره عشان يطول عمره وينهش ف البلد دي.. كل واحد فيكم واخد رئة صناعية عشان يفضل كاتم على نفسنا.. واحد رئته هما المحظورة اللي عاملها فزاعة عشان يمنع الديمقراطية وتداول السلطة، والتاني رئته هي فلوس الجاز.. القضاء على هذه الجماعة المسمومة هو السبيل لتحرير مصر.. لازم نحرر مصر من الخطر الداخلي اللي بيعمل على هدمها بالغزو الثقافي وضربها بجرثومة الرجعية.. وفي نفس الوقت نكون بنقضي على حجة النظام في عدم تطبيق الديمقراطية، ونحرمه من الفزاعة اللي ماسكها للشعب وللقوى الخارجية

فمتى نتخلص من هذا الكابوس الجاثم على صدورنا؟

44 comments:

Hoda said...

ومين سمعك يا فانتا عندك حق فى كل كلمه قلتيها والله العظيم انا كمان حاسه ان فى حاجه هتنفجر فى دماغى كل اما اقرى او اشوف حاجه تخص الموضوع دا .الحق على الواطيين اللى ماسكين البلد فين الجبان وزير الخارجيه المعوق اللى مستخبى ورا فشله وغباؤه من ساعة ما تولى منصبه فين ريسنا اللى مقضيها فسح وملغم البلد كلها بالعربيات المصفحه للامن المركزى ولا كأنه احتلال . احنا حقنا وكرامتنا ضايعه فى بلادنا يا فانتا يبقى عايزانا نلاقيها براها. احنا ليه بقينا كده شوية جعرات بيذلوا فينا والله العظيم دا لو كانوا الطبيبين دول راحوا تل ابيب كانوا هيعاملوهم بآدميه اكتر من كده . لكن للاسف دول فاقوا فرعون فى تجبرهم وظلمهم .والمصيبه ان بنت الكلب الاميره ولا الزفته دى عندها سرطان اساساً ومدمنه من الاول وهتموت وتغور فى ستين داهيه يعنى لازمة دا كله ايه يعنى دا جزاؤه انه عايز يرحمها من الالم كان سابها احسن تتألم ولا تغور فى ستين خراره ربنا ياخدهم كلهم العيله الوسخه دى نفر نفر يجيلهم شلل معيز يا رب .دى زوجة الطبيب يا عينى آخر ما يأست طلبت انها تبوس على رجل المقشف الملك علشان يعفوا عن جوزها يا ربى انا هتشل فى اكتر من كده اهدار للكرامه واهانه للبشر . فين منظمات حقوق الانسان من دا كله .فين العالم، بس اكيد قريب ليهم يوم اسود بأذن الله .. يا ريت اى مصرى وعربى عنده كرامه ما يسافرشى يشتغل عند النازيين دول ساعتها هيرجعوا لاصلهم حفاه ومتخلفين دا احنا اللى مخلينهم بنى آدمين البقر دول اللى ولا واحد فيهم لغاية النهارده بيعرف الالف من كوز الدره . وعلشان كده هما بيحقدوا علينا وهيموتوا مننا والفرصه جتلهم لغاية عندهم لاننا للاسف مالناش كبير . ولا لينا ديه عند الواطيين دول والسبب فى الدلاديل لحاسين المؤخرات حكامنا .ربنا يجعل نهايتهم زى فرعون وقارون ... يا رب ورينا فيهم يوم قبل اما نموت

واحد من الناس said...

انا مش عارف انتى كنتى مستنيه ايه من الاخوان يعنى؟؟ وبعدين همه فى ايديهم ايه يعملوه... الدور والباقى بقى على الحكومه المصريه من اول رئيس الجمهوريه و وزير الخارجيه والسفير المصرى فى السعوديه.. دول اللى فى ايديهم يعملوا حاجه بحكم مناصبهم همه دول اللى يستهلوا انك تصبى غضبك عليهم ...همه دول اللى خلوا المصرى مالوش كرامه لابره ولا جوه بلده... همه دول اللى ساكتين بطريقه مستفزه، الإ ما سمعنا حتى تصريح رسمى ولا كأن الحكايه تمت ليهم باى صله؟؟ بجد حاجه تكسف... اتفووو على ده موقف متخاذل.

Alkomi said...

عارفة الحل ايه يا فانتا

بجد اسرة الطبيبين دول تخطف اي جوز معيز ولا خرفان من السعوديين اللي بيتنططوا في المحروسة و تبقى معاملة بالمثل و الله ساعتها الحكومة بتاعتنا هتتحرك بسرعة لانها بتخاف جدا على سلامة المواطن





الغير مصري

3ashry said...

انا مش اخوانجى ولا بطيق الاخوان بس انا مع كل كلمة قالها واحد من الناس ) الدور و الباقى ع الحكومة اللى عاملة نفسها مش من هنا

bluestone said...

معاكي في كل كلمة
انا مش فاهمة فعلا هم راحوا فين
صوتهم مش طالع

معلش يا واحد من الناس
محدش قالهم يخربوا الدنيا ولا يحاربوا السعودية مثلا
بس يعني لما نواب الاخوان في البرلمان اللي فرحنا انهم اول معارضة منظمة تقتحم المجلس زي ما بيقولوا .. من ساعة ما دخلوا المجلس معملوش استجواب محترم يوحد ربنا ولا حاجة مفيدة للناس

كل استجواباتهم في الهايفة وخلاص
وبصراحة صمتهم مريب جدا في موضوع الاطباء ده

طيب يا اخي على الاقل بيان لذر العيون
استجواب لوزير الصحة ولا وزيرة القوى العاملة

أي حاجة
أي حاجة
بدل كتمة العدس اللي هم فيها

ماهي حاجة مثيرة للريبة برضه

عم مينا said...

تدوينة رائعة يا فانتا
كلعادة طلعتي اللي جوه الواحد

Unknown said...

انا مش عارف انت او انتى مين
المهم فيه لينك جابني لهنا
وللعلم انا حد مسلم وللأسف ليس على قدر من التدين
لا إخوانى ولا علماني
مسلم وخلاص
بس بجد ازهلنى الكره العميق لجماعه الإخوان المسلمين في كلامك
وكأنك مرعوبه من النظام الفاسد الزباله ده وخايفه تجيبي سيره امه
لدرجه حسستني انك حد ملحد فعلا
ومقدرتش امشي بدون ماقولك الكلام ده
حازم جوده
مخرج

farm and care said...

لقد أسمعت لو ناديت حيا ....ولكن لا حياة لمن تنادى
ولو نارا نفخت بها أضاءت ..ولكن انت تنفخ فى رماد
مش جديدة علينا ...من زمااااااااااااان..واحنا بنتهاااااااان

Anonymous said...

ومين يقرا ويفهم دى عقول غير ادميه مغسولة بمية وسخه وبول المحزن ان تجدى ناس ممن يصنفون مثقفون يدافعون عنهم بالباطل قبل الحق
صحيح اخص اتفووووووووو وان كانت جميع فضلاتى اشرف من لن تنزل عليهم
asad shaker

Anonymous said...

هو اللي بيعملوة السعوديين من فساد و زنا و قله حياء لرجالهم و نساءهم مش بيتحاسبوا عليه ليه؟
ييجي يشوفوا القرف في الفنادق هنا و برة مصر و الدعارة اللي بشجعهوها ما تفتح الحكومه السعوديه اليوتيوب و تشوف البلاوي الي متصور فيها سعوديين و تجلدهم

دول مش جلدوا لطبيب دول جلدوا قلوبنا احنا حسبي الله و نعم الوكيل
و لا هي علشان اميرة و مراة امير و ازاي اختلوا بالسيدات الاخريات ان كان فيه ممرضه بتدخل مع المريضه و بتكون موجودة طول الوقت

اخوان ايه اللي هايعترضوا دول لو مسكوا البلد هايجلدونا احنا كمان مش بيبصوا لنفسهم و فيهم نسبه شواذ بس مين يقدر يتكلم
انا بجد باتخنق من مصر و من الدول العربيه و ياريت عمري مش يطول فيها اكثر من كدة
لو واحد دكتور سعودي عمل كدة هنا مش هايتعاقب و لا حد ييجي جنبه

يارب ارحمنا من اللي مفرط فينا و في كرامتنا

Fantasia said...

العزيزة حنين

زوجة الطبيب كل همها ان زوجها يرجعلها وتشوفه تاني.. لأن طبعا مفيش حد يقدر يستحمل 1500 جلدة، الراجل هيموت أكيد

لكنها للاسف بتخاطب الجهة الغلط وباسلوب بيرسخ مفهوم اننا ناس ذليلة معدومة الكرامة.. والأخوة.. خدي بالك من الأخوة دي.. اللي في السعودية نشروا كلامها ده على اليوتيوب مع كمية سخرية وقلة أدب غير طبيعية.. على اسلوب اتفرجوا وشوفوا الست مرات الدكتور اللي مستعدة تبوس الجزم، وان دي هي المعاملة اللي تنفع مع المصريين

الست دي المفروض ماكانتش تخاف وكانت تستغل فرصة تحدثها للاعلام وتطالب الحكومة المصرية بالتصرف.. نفسي أفهم لو الرئيس استدعى السفير السعودي هيحصل إيه ف الدنيا!! يا ستي بلاش يطرده، لأن ف الآخر دا حكم محكمة في قضية جنائية، مش قرار سيادي أو سياسي.. لكن من حقه التعبير عن الاعتراض وتصعيد الموقف لأقصى حد.. مش عارفة إيه السبب انه ماعملش كدا! هل الرئيس مثلا خايف ما يحصلش استجابة لو عمل كدا؟ دي تبقى مصيبة لو وصلنا للمرحلة دي

وزارة القوى العاملة عملت رد فعل ضعيف.. لكنه نوع من رد الفعل وهو منع أي تعاقدات جديدة مع اطباء مصريين للعمل في السعودية.. وكمان نشرت قائمة سوداء بالاماكن اللي بتسيء معاملة المصريين هناك.. طب القائمة دي لم يتم نشرها قبل كدا ليه؟؟؟ طالما هي متوفرة وموجودة لدى وزارة القوى العاملة بناءا على الشكاوي اللي بتوصلها من العاملين هناك.. يبقى المفروض كان يتم الاعلان عنها أول بأول ويتم الاحتجاج رسميا على هذه الممارسات! إنما ليه يعني نخبي اللستة دي وما نوقفش التعامل مع هذه الاماكن في حينها؟؟ ما أكيد هو دا اللي مهد للوضع اللي احنا فيه دلوقتي

ولما وصلنا ان مصريين يتجلدوا بالشكل ده، أقل حاجة تتعمل هي وقف تصدير العمالة بكل اشكالها للسعودية.. مش الأطباء بس

فيه تخاذل كمية تخاذل تصيب بالغثيان.. لكن دا مش جديد على حكومتنا يا حنين.. الدور والباقي على المندسين وسط المعارضة وسكتم بكتم.. ولا كلمة عن اللي حصل

Fantasia said...

الاستاذ واحد من الناس

يا سيدي أنا مش مستنية منهم حاجة.. إلهي يتكتموا ما يطلع لهم حس أبدا قادر يا كريم.. أنا بس عايزة الناس تعرف مدى حقارة هذه الجماعة اللي بتدعي التدين وهي أبعد ما يكون عنه

يا سيدي بلاش عشان المصريين اللي بيتعاملوا معاملة العبيد هناك، حتى عشان الدين ومشروعهم المتخلف اللي عايزين يفرضوه علينا ومفهمين الناس ان هو ده اللي هيحللهم كل مشاكلهم.. مش هما بيقولوا حكم بالشرع؟؟ مش السعودية دي هي التطبيق الفعلي للنظام اللي عايزينه؟؟؟ هو دا بقى الشرع؟؟ هما عايزينا نكون كدا يعني؟
أهو مشروعهم اللوذعي والجهة اللي بتمولهم يعملوا السخام ده عندنا مش متشطرة غير على أهل بلدهم.. لكن قواعد عسكرية امريكية على ارضهم وماله؟.. بنوك أمريكيا اللي بيحرموها علينا احنا عشان يوقعوا اقتصادنا ومسمينها بنوك ربوية تبقى حلالا بلالا لفلوسهم هما واستثماراتهم.. واحنا نتجلد ونتكفر ونتحرق كمان

قولي الحكومة اللي مش عاجباك دي هنغيرها ازاي طالما الجماعة اياها دي سيف محطوط على رقبتنا؟ ممكن افهم هنعمل ديمقراطية ازاي ودول داخلين السياسة بشعار الاسلام هو الحل؟؟؟ لازم نعرف ان الصفقات اللي بتتم بين الجماعة والنظام هي السبب في اللي احنا فيه

ولما يبقى الاخوان هما التيار الوحيد اللي له تمثيل "معارض" داخل البرلمان، يبقى من حقي أسأل عن السر ورا صمتهم عن اللي بيحصل، وعن مستقبل البلد لو وقعت تحت ايديهم لا قدر الله.. انت دلوقتي زعلان من الحكومة وعندك مليون حق.. لكن ع الأقل أهي الحكومة بتتحرك على استحياء.. وبتعمل محاولات بالذوق واجراءات مش على المستوى المطلوب لكنها بتتخذها.. وكل ما الضغط الشعبي بيزيد دا هيدفعهم انهم ياخدوا اجراءات تانية.. لكن الحكومة الزفت دي لو اتغيرت بكرة الصبح، مين اللي هيجي يا واحد من الناس؟؟ وهل لو الثعبان الاخواني هو اللي كان بيحكمنا دلوقتي كنا قدرنا أصلا نفتح بقنا وننتقد صمته؟؟

احنا ليه خايفين نواجه الواقع ومصممين نبص للدنيا من خرم ابرة.. لكن اللي يفتح عينينا للصورة الشاملة نقوله انت بتعمل كدا ليه

خالص تحياتي

Fantasia said...

الاستاذ العزيز محمد الكومي

هههههه.. احنا نجيب صعايدة وبالشوم ندغدغ المحكمة اللي طلعت الحكم ده

إيه يا عم ده.. بقى احنا نعمل كدا برضه؟ دا احنا الشعب المضياف اللي بنقولهم في اعلانات السياحة البيت بيتكم.. دا احنا اللي الاميرة هند عمالة تبرطع في بلدنا ومحدش قالها تلت التلاتة كمان، سرقت مصريين وعذبت خادماتها المصريات وقتلت واحد مصري وهي سكرانة، كل دا على ارضنا ومازالت حرة طليقة محدش لمسها.. بقى احنا نعمل كدا برضه؟

أنا رأيي كفاية أوي اننا نحاكم الست دي.. شوف انت بقى مجموع الاحكام عن كل جريمة من دول.. يعني بالمستريح تاخد مؤبد وبعدها اعدام.. يا ريت كمان لو تتحاكم عندنا بالنظام السعودي.. عشان نقطع ايديها ونجلدها وبعدين نعدمها

خالص تحياتي

Fantasia said...

خوليو

بما انك مع كل كلمة قالها واحد من الناس، يبقى اقرا ردي على تعليقه وقولي رأيك

تحياتي

Fantasia said...

بلو ستون

هي دي بالظبط وجهة نظري.. بالاضافة لمزيد من الاشياء اللي فصلتلها في ردي على واحد من الناس

أنا كمان واحدة من الناس، وشايفة بكل صراحة ووضوح ان ما نعانيه مش نتيجة فشل الحكومة وبس.. لأ وفشلنا احنا كمان اننا نواجه واقع الحياة السياسية في مصر واللي أدى اننا مش قادرين نغير حكومتنا اللي عمالين نشتمها ليل نهار

طب احنا عايزين إيه؟ لو عايزين الحكومة اللي مش عاجبانا دي يبقى بنشتم فيها ليه؟ ولو مش عايزينها، طب عملنا إيه عشان نغيرها؟ وليه ساكتين على وجود هذا الكيان الشيطاني اللي أفسد الحياة السياسية والاجتماعية والثقافية في مصر؟ طب ما احنا عارفين ان مفيش حكومة في بلد غير ديمقراطي هتراعي متطلبات الشعب.. دا شيء بديهي يعني.. وفي نفس الوقت رافضين اننا نواجه المشكلة من جذورها، وهي غياب بديل يقدر يحل محل النظام ده بما يحقق الديمقراطية.. عندنا يا وطني يا اخوان.. اختار بقى يا حلو

وواضح ان الشعب مضطر يرضى بالوطني، لأن في ظل نظامه بيتحققله الحد الأدنى من الحرية، إنما التاني دا هيقطع رقبتك أصلا.

معندناش نقد حقيقي لواقعنا السياسي.. كله عايز شتيمة وخلاص.. بنحب نصرخ ونولول زي الولايا.. طب فين المعارضة السياسية؟؟ ما اسخم من سيدي إلا سيتي.. وهي دي المشكلة.. بلد بتحكم بالديكتاتورية، وأكبر قوى المعارضة فيها فاسدة.. مش فاسدة بس.. دي عميلة كمان، وبتستخدم الدين كستار لتحقيق اغراض وضيعة

هو دا اللي انا عايزة الناس تشوفه.. طول ما احنا مغيبين ورافضين نشوف الواقع اللي أدى بينا لانتهاك كرامتنا داخليا وخارجيا بهذا الشكل، عمرنا ما هنقدر نلاقي حل أو نطمح في ان المستقبل هيكون أفضل

خالص تحياتي

Fantasia said...

عزيزي عم مينا

دا شيء يشرفني جدا

سعيدة باطلالتك الكريمة

خالص تحياتي

Fantasia said...

حازم جودة

لا فعلا اثبتلي انك مش اخواني ولا سلفي.. والدليل اتهامك ليا بالالحاد لمجرد انك مابتعرفش تقرا

طب يا سيدي أنا عميلة للنظام.. أو معنديش الشجاعة الادبية اني انتقده وخايفة منه.. ماشي، وجهة نظر.. إيه دخل ده في ايماني بالله؟؟

ههههههههه

انتي فاكرني إيه؟ عيلة بضفاير؟
وهما الاخوان بقوا ربنا خلاص؟ اللي ينتقدهم يبقى ملحد!!! لا حول ولا قوة إلا بالله العلي العظيم

وسيادتك مخرج إيه بقى؟ تلاقيك مخرج في قناة الناس.. دا آخرك.. أو ممكن أكون أنا اللي قريتها غلط.. ممكن تكون مخرج بفتح الميم

يا عم روح الله يسهلك.. انا مش عارفة انتم بتستعروا من جماعتكم ليه. كل واحد اخواني يجي يقولي انا مش اخواني.. وناقص يقولي أنا بوذي.. مشكلتكم انكم مفضوحين.. وحتة المخرج دي كمان كانت اوفر الصراحة.. بتعتبر انك كدا بتأكد ان فاسق وفاجر بقى.. ههههههههه.. ما تقول تاجر مخدرات أحسن

تحياتي للاستوديو

ابو احمد said...

العزيزه فانتازيا
من لاكرامه له فى وطنه لايبحث عن كرامه فى وطن آخر
إحترام الإنسان يبدأ من هنا من الداخل
كل العالم يعرف أن الحكومه تهدر كرامه المواطن فى الداخل ولاتسأل عنه فى الخارج
لقد ضاقت على المصرى أرضه ولن تسعه أراضى الكون
تحياتى

ذو النون المصري said...

انا قريت المقال ده و اللي قبله و انا كل ما افكر في احوالنا في الخارج فعلا قلبي بيتالم بشده
الم مستمر لا ينقطع

Anonymous said...

طبيب قبطي اتعمل فيه اكتر من كده بعد تلفيق تهمة التبشير له من حوالى سنة و أكتر

كنتم فين؟

عموما اللى بتعملوه ده له تأثير كبير عليكم كمان مش علينا بس

Anonymous said...

مطلوب تعلم فن اداره الازمات وخصوصا تللك اتى تؤدى الى توتر بين الاخوة لماذا هذا التربص....وهناك الاف الاطباء عاشوا فى امان كامل لعشرات السنين رفقا بالاسر التى سوف تتضرر فى استمرار التصعيد ...

Alkomi said...

فانتا انتي مفكراني بهزر

صدقيني انا بتكلم بجد

لاننا هنفضل في مباحثات جهود و حبشتكانات لحد ما الراجل يقع من كتر الجلد

انما لو اللي قلته صل

التحركات هتزيد و مبدئيا الجلد هيقف

و يا حبذا بقى لو عيلة الدكتور خطفت و عذبت و صورت التعذيب و يهددوا ان اي اقتحام هيموتوهم صدقيني و الله ساعتها بس هيعتذروا الكلاب دول لاسيادهم المصريين و يطلبوا العفو و السماح

يا نهار اسود لما طبيب بيتجلد في بلد الخرفان و المعيز

امال العامل البسيط بقى ممكن يبقى جارية سيده هناك ولا ايه

ولاحظي ان ده اللي عرفناه يعني الله اعلم باللي ماعرفناهوش

desperate egyptian said...

عزيزتى فانتا تعليقى ده منى نا وامى لانى خلتها تقرأ كلامك لأنها متفقة معاكى جداَ فى كرهك واحتقارك لتلك الجماعة اولاَ الكلام اللى نقولة جاى من خبرة عشان معظم افراد عائلتنا من الاخوان، وماشوفناش منهم اى شئ يمت للدين بصلة اهم حاجة الحجاب والخمار والنقاب لكن المعاملة مافيش ، صلة رحم مش موجودة حتى مع الام كلمة طيبة ماتلاقيش لكن تلاقى كلام عن الناس واعراضهم ، توقيع بين الاخوات باختصار اعوذ بالله منهم ومن مثلهم السئ للاسلام، لكن طبعا هم فرضين نوع من الحماية لنفسهم وصورتهو ليه؟؟؟!!!! لأنهم _(متدينين) يعنى لو اختلافتى معاهم تبيقى ماعندكيش دين

Unknown said...

حبيبة قلبي احلي فانتا دايما مواضيعك جميله

الموضوع ده بجد حاجه تكسف

دي مش مجرد اهانه لمصر دي همجيه و تخلف يعني ايه 1500 جلده اي عقل يوافق علي الكلام ده

و كمان هو عمل ايه فين اللجنه الطبيه الي قالت انه غلطان فين شهادة المريضه ان هو السبب في ادمانها

مش ممكن تكون هي الي زودت الجرعات

و انا معاكي ان صمت الاخوان الرهيب ده شيء مريب او يمكن علشان الموضوع يخص السعوديه يعني المعونات و الفلوس يبقي اكيد ال سعود معاهم حق و ده مصري مش متربي يستاهل اكتر من كده

تحياتي يا قمر

egy anatomist said...

فانتا هانم

اسمحيلي اقول رأيي في الموضوع المهم ده


اولا تعرفين أنت جيدا مواقفي من الاستخدام السياسي للدين وهو العمود الرئيس الذي تقوم عليه جماعة الإخوان المسلمين، فلا أحتاج لتكرار موقفي بخصوصهم فهم خطيئة تاريخية، ولكنهم موجودون ولهم مساحتهم سواء في الشارع وفي مؤسسات الحكم ولا يمكن في رأيي تجاهلهم إن أردنا لهذا البلد إصلاحا

لا يمنع موقفي هذا أن أسجل تحفظا – متشفعا بود وتقدير أعلم أنك تكنينهم لي وتعلمين إني أحملهما لك – على الحدة الزائدة والنرفذة الفائضة في هذا المقال .. فأنا من مدرسة لا تؤمن بأن الحوار – حتى مع الأعداء – يحسم بالصوت الأعلى أو الكلمات الأجرح .. ومع تسليمي المطلق بأن الحادث يمزق القلب ويولد دموع الدم من عيون أي مصري يعلم قدر الغالية مصر ، إلا إن هذا لا يبرر – في مفهومي – هذا الاحتداد الصارخ الذي لم أعتده من قلمك الموهوب الراقي

ولا يمنع اعتراضي السابق أن أتفق معك حول فكرة مقالك الأساسية بشأن تخاذل الإخوان – الطبيعي والمتكرر – إزاء موضوع يحرق قلب أي حر في العالم وليس فقط أي مصري .. إن هذا التخاذل وتواطء الصمت سيدتي يعبر – بصدق – عن أزمة الإخوان كتنظيم دعوي فقد عذريته لما اشتغل بالسياسة وعبثا يحاول استعادة هذه البكارة أمام عيون الناس الذين طالما أعجبوا بتاريخ الجماعة في بداياتها ولكن هيهات سيدتي فالناس بدأت تدرك مدى براجماتية هذه الجماعة وبعدها الكامل عن مبادئ الدين الإسلامي العظيم بل وافتئاتها عليه بصمتهم بينما يملكون ضغطا على الحكومة لاتخاذ رد فعل يهدئ النار في الصدور ويرد بعض الحق لأصحابه

ولكن – ومع كل ما سبق – أرى أن هذا الحكم البربري اللامتصور صدوره إلا من وحوش ضارية في غابة لم تعرف التحضر يوما ، أرى أنه يحسم – قطعيا – قضية تطبيق الشريعة الإسلامية في مصر .. أو في أي مكان .. وهي التي يتخذها الإخوان وغيرهم ستارا يريدون من خلفه ممارسة فعل التنكيل بشعب سيظل حرا أبيا متحضرا راقيا ولو كره من هم وراء البحر الأحمر .. الآن سيدتي لا أعتقد عاقلا في مصر أو غيرها سيخرج صوتا من جوفه ينادي بتطبيق شريعة الجلد والذل .. لا أقول شريعة الإسلام .. لسبب بسيط ومباشر: ليس هناك اتفاقا واحدا عبر تاريخ المسلمين حول كيف يجب أن تكون هذه الشريعة؟ وبالتالي فإن الأبواب مفتوحة أمام السلطة الحاكمة في المجتمع لتفسير الشريعة كما تريد ووضع حدود تبدأ بالجلد وتنتهي بتقطيع الأرجل والأيدي وربما الألسن أيضا .. والإسلام ورسوله برئ مما يدعون ولو كان الإسلام بهذه الدموية التي يلصقها به أهله لما أسلم رجل واحد .. ولكنه السياسة يا سيدتي .. سياستهم .. تذهب العقل وتضيع القلب وتزور الحق

أما بخصوص التعامل مع هذه الأزمة فأرى لذلك شقين .. شق شعبي وشق سياسي .. وقبل توضيح ما أراه بخصوصهما أود أن أشيد بما قلتيه عن الشعب السعودي المغلوب على أمره .. وربما هو ليس مغلوب تماما على أمره إذ إنه مازال في أطوار التغير والتطور والنمو الاجتماعي .. ومازالت أموال النفط تؤجل إبادة نظام آل سعود الذي تحالف مع فكر الوهابيين في يوم أغبر في تاريخ هذه المنطقة فأظلمها حتى الآن – مع عوامل أخرى بالطبع – ومازال الشعب السعودي لا يرى المأساة الحقيقية التي يحياها بسبب ارتفاع مستوى معيشة غالبية أفراده ... ولكن .. أؤكد لك سيدتي الفاضلة أن من السعوديين كثيرون يعشقون مصر وترابها ويعرفون لمصر قدرها ومقدارها ويرفضون ما حدث ويحدث لأي مصري في بلادهم .. المشكلة سيدتي أننا نهتم كثيرا بأهايف السعوديين وما يقولونه أو يغنونه ونصور هذا على أنه رأي الشعب السعودي جميعا وهذا خطأ كبير .. فكما أن هناك جماعة من المصريين تسمى جماعة الإخوان المسلمين أو غيرها فهناك جماعة أو جماعات من السعوديين تكره مصر وتتمنى لها كل الشر .. ليس كل المصريين إخوانا وليس كل السعوديين كراها لمصر .. لذلك فأرى أنه على المستوى الشعبي يجب الفصل الكامل بين الشعب السعودي وبين حكم المحكمة السعودية .. فلا يخفى عليك – وأنت القارئة المطلعة – أن كثيرا من السعوديين المعارضين لنظام الحكم قد جلدوا ونكل بهم ولا يتمنى أي سعودي – من غير الأسرة الحاكمة – إلا إزالة هذه الأحكام الهمجية المتوحشة التي ربما تطبق عليه هو نفسه يوما ما .. لذلك ثانية أرى أنه يجب على كل مصري يشاهد سعودي في القاهرة أو البحر الأحمر أو في أي مكان في مصر أن يخبره – بالكلام فقط وليس بالضرب(!) فليس هذا السعودي هو من أصدر هذا الحكم – أن هذا لم يكن يوما عشم مصر في السعودية .. يخبره أن قلب مصر بدأ يغلق في وجه السعودية والسعوديين وأن هذا الكلام يسري على كل المصريين .. إذ أن المدافعين عن السعودية بعد هذا الحكم سيكونون كالمدافعين عن الإلحاد في صحن جامع الأزهر الشريف مثلا .. يجب على كل مصري أن يظهر – عن طريق الاتصال المباشر والالكتروني وغيره – مدى ضيقه وتأثره وغضبه من هذا الحكم الشاذ .. يجب على الرأي العام السعودي أن يعلم أن أحكام محاكمه التي لا تخضع لأي قانون انساني – أو حتى حيواني – يضر بالعلاقات – التي هي فعلا تاريخية – مع مصر والمصريين

أما على المستوى السياسي فأنت تعلمين سيدتي جيدا مدى تشابك ملف العلاقات مع السعودية .. وأنا أتحدث هنا محاولا تمثل وجهة نظر النظام المصري بغض النظر عن رأيي فيها .. ففضلا عن المليون مصري ونصف المقيمين هناك والذين لو عادوا فجأة لتسببوا في أزمة اقتصادية لمصر تجعل الأيام الصعبة الحالية جنة بالمقارنة بما سيحدث لو عاد مليون ونصف (معظمهم عمالة غير ماهرة) فجأة لبلد مثقل أصلا بهموم بلا حد، وفضلا عن الدعم السعودي المادي المباشر و غير المباشر للقضايا التي لمصر مصلحة فيها (مثل لبنان وفلسطين والعلاقات مع أمريكا ومحاربة الإرهاب (الذي اكتوت به السعودية كثيرا الآن) .. وفضلا عن الصراع الضخم الدائر حاليا حول أمن الخليج وهو الملف الذي لمصر فيه مصالح شديدة الحيوية .. فهذا النظام يا سيدتي لا يستطيع – واقعا – أن يتخذ ردود أفعال من النوع الذي قد يرضي جموع الشعب الثائرة .. فمثلا هناك خشية من أن يتسبب رد فعل مصري حاد في إثارة الهمج الهائجين في السعودية فيصدرون عدة أحكام – وليس واحدا – ضد مصريين آخرين .. وبدلا من واحد سيجلد نجد عشرات يجلدون وعشرات يعدمون أو يرجمون .. وللأسف يا سيدتي هم الطرف الأقوى اقتصاديا في المعادلة ويجب أن يحسب حساب هذا .. أرى أن رد فعل سياسي من النظام المصري الحالي يستحيل – للأسف - لأسباب كثيرة – أكرر للأسف الشديد

وربما يجب أن يعلم المصريون – وأنا منهم - جيدا أن فقرهم هو سبب هوانهم على الناس ، وأن ضعف انتاجهم .. واتكاليتهم .. وتجمد أفكارهم مؤخرا .. وتشبثهم بأفكار اقتصادية وسياسية وثقافية بالية هو سبب ما يحدث .. أليست هذه هي السعودية التي سمح لها الشعب المصري بغزو عقله ثقافيا؟ أليست هي سعودية الشيوخ والنقاب والتزمت .. أليس هي سعودية الضرب للصلاة وغلق الحوانيت .. النظام السياسي المصري يا سيدتي لأنه فاسد في الأصل فلم يفعل أكثر من انه استجاب لرغبة المصرين العارمة التي ظهرت في السنوات الماضية: فتح جميع الأبواب للسعودية .. أليست التزمت السعودي بات هو حبيب الشعب المصري مؤخرا؟ حتى قراءة القرآن على الطريقة المصرية التي عشنا سنوات ننتشى بسماعها وسماع أصوات شيوخنا القادمة رأسا من السماء تلوثت بطريقة قراءة تجارية متعجلة كأنها إعلان تجاري بلا طعم ..

ومع ذلك فإنني أرى أن هناك وسائل عقاب سياسية يقدر بها النظام أن يؤذي بها ولاة الأمر في السعودية وبدون أن تسبب رد فعل حاد .. ولكن لهذا مجال آخر .. فقط أشير لرد فعل مصري (بسيط ودون المستوى وإن كان في الاتجاه الصحيح) تركز في عدم تمثيل مصر بمستوى رفيع أو عال أو حتى معتبر في مؤتمر مبادرة الملك عبد الله للحوار بين الأديان في نيويورك منذ أيام .. فلم يحضر مبارك القمة رغم حضور عبد الله وبوش وغيرهم كثير من قادة العالم .. وكما قلت هذا أقل من المستوى .. فالمطلوب هو فضح ممارسات السعودية التي تريد الحوار بين الأديان .. حوار بين أي أديان والمحاكم السعودية لا تتحاور مع المسلمين أصلا .. أي صورة للدين يقدمها للعالم من يدعي أنه يريد حوار بين الأديان؟؟؟

والحديث قد لا ينتهي لو شئنا .. فالقلب في أعماقه مازال ينزف والعجز يدوس على الجرح المفتوح فلا يزيده إلا التهابا

أعتذر – مطولا – فانتا هانم - عن الإطالة .. وأرجو ألا أكون قد أثقلت كثيرا عليك .. تحياتي واحترامي

Desert cat said...

ايه يا فانتا الكلام اللى بتقوليه ده
انتى يعنى قصدك
انهم يقفوا مع الحق ويقولوا مرة واحده فى وش الظلم لاء
طيب ايه المصلحة اللى هترجع للعالم الرمم دى بعد كدا ؟؟؟
يعنى هما يقفوا فى وش اسيادهم اللى بيبسواو جزمهم ليل نهار علشان التمويل مش ياتقطع علشان واحد دكتور ولا كرامة وطن
ما قالها زمان المخبر بتاعهم
طز فى مصر وشعب مصر
الوطن مش هامه يا فانتا ولا الشعب
يبقى عايزاهم يهتموا بحتة دكتور
هما مش هيهتموا يا فانتا الا بنفسهم فقط لا غير وباولياء نعمتهم وبمصادر تمويلهم والمعارض يا قلبى بالجزمة
جزمة فى بؤهم نفر نفر

3ashry said...

كلامك واضح و مفهوم يا فانتازيا ..الفكرة بس ان الموضوع اللى بنتكلم فيه ربطه بالاخوان غريب شوية لان المسئول فى موضوع زى ده هو النظام الحاكم


تحياتى

Anonymous said...

اخ خوليو
ازاى الموضوع مالوش علاقة بالاخوان؟ مش
كلاب السعودية و عملائها؟
و هما اللى ركبوها علينا؟

Fantasia said...

حكيمو

أهلا وسهلا

اهو أنا بقى بأفتش عن أحياء بين الأموات وتحت الرماد
مش من مصلحة مصر اننا نفقد الأمل.. فيه أجيال جاية من حقها علينا اننا نحاول عشان يعيشوا حياة أفضل.. حتى لو احنا كدا من زمان، فده مش معناه اننا نفضل كدا للأبد.. لو قررنا الاستسلام يبقى فعلا ما نستحقش نعيش

خالص تحياتي

Fantasia said...

الأستاذ أسعد شاكر

أنا شخصيا لا أعتبر أي شخص يبيع نفسه مثقفا.. الثقافة ليست هي المعرفة، بل هي المعرفة التي تهذب النفس وترتقي بالحالة الانسانية.. الثقافة هي ان تناضل من أجل مبدأ سامي ومن أجل اصلاح المجتمع ودفعه للامام.. الذين صنفوا هؤلاء الحثالة كمثقفين لا يعرفون شيئا عن الثقافة، والواجب على كل مثقف حقيقي أن يطعن في هذا التصنيف

لكني اتفق معك، فهي حالة مقززة بكل تأكيد

خالص تحياتي

Fantasia said...

المجهول أو المجهولة

هما محتاجين حد يعرفهم؟؟ ما هما عارفين كل حاجة.. انت\ي بتصدق\ي الشوية اللي بيعملوهم ع الناس؟ أكتر نسبة فساد أخلاقي وازدواجية في المعايير موجودة داخل هذا المجتمع المريض.. دا فيه بلاد بقى فيها بيزنس اسمه "الدعارة السياحية" مخصوص عشانهم.. يعني احنا عندنا يا عيني بغتصبوا بنات غلابة ويضحكوا عليهم بحتة ورقة ويرموهم بعد اسبوع ولا اتنين، دعارة مقنعة ورخيصة.. لكن فيه بلاد اسيوية عارفين اللي فيها، ومفيش بقى موضوع النصب أبو ورقة ده، فيه حساب بالساعة.. ويبقى كله واضح وعلى بلاطة كدا

دا الخدامات هناك بيعاملوهم على انهم ملك اليمين!!.. فيه أكتر من كدا قذارة؟.. راحت وزارة القوى العاملة عندنا مقررة تنظم موضوع تسفير الخادمات لهناك، وعشان حفظ ماء الوجه وعدم فضح المصيبة دي، ماقالوش السبب الحقيقي، ووزيرة القوى العاملة يا عيني خدت شوية شتيمة في كل الجرايد ومحطات التليفزيون وع المدونات!! وبرضه ماحدش فضح السبب الحقيقي ورا البلوة دي.. مش عارفة ليه؟
الفقر عمره ما كان عيب.. لكن الدور والباقي على الحيوانات اللي بيرتكبوا افظع الجرائم ويحطوا عليها يافطة الدين

خالص تحياتي

Fantasia said...

العزيز ابو احمد

معاك حق.. وأنا متفقة مع وجهة نظرك تماما
فقط اضيف ان كرامة الشعوب هي ملك لهذه الشعوب بالمقام الأول.. بمعنى أنه لا يستطيع أحد أن يمتطي ظهرك طالما أنت لم تنحني.. وأنا أرى ان استسلام الشعب للقهر داخليا كان هو بداية هوانه، ولا يمكن أن اتوقع من نفس السلطة التي تقهرني أن تضع كرامتي ضمن اولوياتها

خالص تحياتي

Fantasia said...

الاستاذ العزيز ذو النون المصري

أحوالنا في الخارج هي انعكاس طبيعي لاحوالنا في الداخل.. والألم واحد.. متصل وموجع

خالص تحياتي

Fantasia said...

آن ايجيبشن

إيه هو اللي بنعمله؟ ومين اللي كانوا فين؟
أنا شخصيا كنت أعاني من نفس الشعور الذي اشعر به الآن وعبرت عنه بنفس القوة، لكن لم أكن قد بدأت التدوين في هذا الوقت
أنا مش فاهمة انت عايز توصل لإيه.. يا ريت توضح أكتر

Fantasia said...

المجهول 2

تصعيد؟؟.. من الذي تسبب في التصعيد؟ نحن؟

والمحكمة اللي ضاعفت الحكم من 750 جلدة إلى 1500 بعد ما الطبيب المتهم قدم دعوى استئناف، دي بقى كانت بتعمل إيه بالظبط؟ بتعمل تهدئة؟

معلش مصطلح ادارة الأزمات دا اتبهدل أوي اليومين دول أنا ملاحظة.. خصوصا لما يستخدم رسميا.. أول ما نسمع ادارة ازمات يبقى معناها نفي ان فيه ازمات من أصله والطرمخة عشان الموضوع يعدي

وأسر مين اللي هتتضرر لما المصريين يطالبوا بحقوقهم؟ معتقدش الأسر السعودية هتضرر في حاجة.. إلا لو حضرتك فاكر ان المصريين دول عبارة عن عبيد!!.. الفقر ليس فقر الأموال، بل فقر النفوس والاخلاق.. يا ترى ما الذي سيفيد هذه الأسر لو تركناهم يتجرعون الذل ويداسون بالأقدام في نفطستان؟

وفي النهاية اللي عايز يبقى عبد محدش هيمنعه، يتفضل.. لكن مش المفروض اننا نفرط في حقوق الأغلبية من الأحرار عشان حفنة من العبيد

Hassan El Helali said...

تتصوري يا فانتا إني توقعت يوم سمعت الخبر ده إنه تخرج المظاهرات والمسيرات وتتعلق اليفط في الجامعات والمدارس ويضرب الطلبه عن الدراسه وتظيط الدنيا علي كرامة بلدهم..... زي ما ظاطوا كده علي معبر رفح

كنت متخيل إن ده حا يوحد التيارات كلها ضد الإهانه القاسيه دي... إخوان ولا كفايه ولا الغد ولا الوطني ولا أي زفت أغبر.... إنما الظاهر إن كلة متأبج من العراعير

أما انا طلعت أهطل.... إتفو علي الشعب الخانع في كل زمان ومكان... والله حلال فيه الإحتلال

Fantasia said...

الاستاذ العزيز محمد الكومي

انا مقدرة شعورك بالغضب طبعا.. لكن مش دا الحل

احنا عندنا مليون وسيلة لم نستخدمها، فمش من المنطقي اننا نلجأ للارهاب لمجرد عجزنا أو امتناعنا عن استرداد حقوقنا بالطرق المشروعة

شوف يا محمد، أنا عايزة اقولك بكل صراحة ان الشعب المصري خذلنا كلنا.. يعني نقابة الاطباء عملت إيه؟ المجتمع المدني عمل إيه؟ طلبة الجامعة عملوا إيه؟ ولا حاجة.. جلود سميكة وصمت مخزي

لو فيه ارادة شعبية لحماية الكرامة المصرية كان أكيد الوضع هيختلف كتير

الحكومة بتاعتنا عارفة آخرنا كويس.. يرفعوا الاسعار، نقوم نشتم ونلعن شوية ونكاكي زي الفراخ ونرجع نسكت تاني.. عبارة يموت فيها 1300 مصري ولا يعاقب أحد على التقصير، عادي جدا.. لأن الهوجة كانت خدت وقتها وقت الحادثة وخلاص، ماتت.. قطر يتحرق بالناس، وماله؟.. مجلس شعب يولع، وإيه يعني؟.. صفر مونديال، عادي.. محدش حاسس ان البلد دي بلده، ولا ان كرامة المصري يعني كرامة مصر

اللي نفسي الناس تفهمه هو انهم هما السبب في وجود الحكومة اللي بيلعنوها ليل نهار.. وهما السبب في الفشل والتأخر اللي مصر بتعاني منه.. لأن السكوت علامة الرضا

كل الناس عارفة ان الطبيب المصري ده بيتجلد عشان هو مصري.. وعارفين انه لو كان يحمل جنسية أي دولة محترمة كان اتعمله ألف حساب ومش بأقول انه هيكون فوق القانون، لأ، دا غير وارد.. لكن كان هيتحاكم محاكمة عادلة ولو ادان كان هيكون العقاب آدمي، ويسمح له بتلقي الزيارات وبالاستئناف كحق أي انسان.. لكن اللي حصل بيقول انهم عارفين انه مالوش دية.. دية عند ناسه قبل ماتكون عن حكومته.. وكأن المصريين بيأكدوا انهم فعلا لا يستحقوا سوى هذه المعاملة وهذه المذلة. المصري اصبح يعاني من شعور غريب بالدونية.. ودا هو التبرير الوحيد لصمته عن كل هذه الانتهاكات لآدميته، سواءا داخليا أو خارجيا

خالص تحياتي

Fantasia said...

ديسبريت ايجيبشان

الله يكون في عونك وعون الوالدة

عايزة أقولك بس ان رؤيتي لجماعة الاخوان مش من منظور الحب والكره، وانما من منظور عقلاني وموضوعي بحت، لا تتدخل فيه أي عوامل شخصية

أنا مقدرة جدا ما تعانونه وحاسة بشعوركم، لأن المجتمع كله تأثر سلبا بوجود هؤلاء بيننا، فما بالنا بمن اجبرتهم الحياة على العيش معهم؟.. أنا لو أحكي عن كمية الرسائل اللي بتوصلني من داخل الاسر التي بها احد الافراد أو اكثر من اعضاء هذه الجماعة هيكون دا كفيل جدا بفضحهم وضربهم في مقتل.. لكن اخلاقي تمنعني من كشف اسرار استأمني عليها اصحابها، حتى لو كان الهدف هو انقاذ بلدي من هذا الشيطان الذي ينهش فيها

انما نصيحتي دايما هي عدم الاستسلام لارهاب هؤلاء.. انا عارفة اننا من مكاني ده سهل أقول بلاش تستلموا ليهم وارفضوا ترضخوا لاسلوبهم الارهابي في فرض وصايتهم.. لكن عن دراية كاملة اؤكد ان 90% من قوتهم ليست بقوة على الاطلاق، وانما لاعتمادهم على خضوع الآخر امام ارهابهم الفكري والمعنوي

موضوع ادعاء انهم الاكثر تدينا والأكثر صلاحا ده من السهل فضح كذبه، خصوصا لما يكون أمام الأهل والاقارب. لكن لما نستسلم لارهابهم بنكون زي اللي عايز يكدب الكدبة ويصدقها. اعضاء الجماعة هم في غاية الهشاشة، لا يستأسدوا إلا على من يحسون ضعفهم. كلهم من الآخر عندهم عقد نقص، وبيتم اختيارهم على هذا الاساس حتى يسهل التحكم فيهم من قبل الجماعة.. زي صبي البلطجي كدا.. البلطجي لازم ينفخ فيه ويفهمه انه له هيبة

كل واحد اخواني يكلمني يبخ البق بتاع الارهاب اياه، من نوع انتي كافرة وانتي فاسدة العقيدة وانتي منحلة إلخ، وهو متخيل اني هأنصرف للدفاع عن نفسي ودفع هذه التهم الباطلة عني.. لكن لأني واثقة في نفسي، وعارفة ان اللي بيكلمني دا آخر واحد يتكلم في الدين أصلا، فعمري ما كشيت ولا استسلمت للارهاب الرخيص ده.. بأقوله اطلع من دول وكلمني راجل لراجل.. والنتيجة فشل ذريع وتعرية كاملة لكل القبح الاخلاقي والتشوه الفكري اللي تحت ستار التدين الزائف

عن صدق وعن تجربة بأقول السيف بتاعهم بلاستك.. وأضعف مما ممكن حد يتخيل. كل الحكاية هي تحلينا بالجرأة في المواجهة والمكاشفة، وعدم الخوف من الاسلوب الساذج بتاع التكفير والتشكيك في الايمان واتهامنا بالانحلال.. لو سبناهم يسرقوا الاسلام ويشوهوه زي ماهما عايزين يبقى هيجي يوم نلاقي الاسلام اتحرف بالكامل.. وقتها هنقابل ربنا ازاي لما يسألنا عن تخاذلنا واحنا شايفين اسلامنا بيتحول لدعوة كره وحقد ودمار ورجعية؟

سعيدة جدا بمتابعتكم.. وسلامي الخاص للوالدة

خالص تحياتي

Fantasia said...

العزيزة ايمي

اشكرك على متابعتك ودعمك الدائم يا عزيزتي

للأسف المحاكمة تمت في ظروف تشوبها شبهات عديدة.. فمش ممكن نعرف إيه هي الأدلة وإيه كانت شهادة الشهود ان وجدوا.. واضح ان الاميرة المدمنة لا يعلى على كلامها

دلوقتي هما خافوا يجلدوا الطبيب في ساحة عامة، قال إيه عشان عاملين حساب ان حد يصور اللي بيحصل!! هينفذوا العقوبة داخل زنزانته، والله أعلم بقى ال 1500 جلدة دول ممكن يوصلوا لكام.. وكمان مانعين عنه الزيارة.. يعني ماحدش يقدر يعرف احواله الصحية عاملة ازاي

اللي خلاهم يخافوا ينفذوا الجلد ف العلن، معناه انهم عارفين انهم بيعملوا جريمة.. وده الوقت المناسب لتكثيف الضغط لو فيه نية حقيقية لانقاذ هذا الطبيب.. لكن للأسف لا حياة لمن تنادي

خالص تحياتي

Fantasia said...

الاستاذ العزيز ايجي اناتوميست

أشكرك على الاطالة يا سيدي.. وسعيدة بتواصلك معنا حول هذا الموضوع الهام بفروعه العديدة والمتشابكة

أولا، عندك حق في ملاحظتك هو نبرة الاحتداد التي وجدتها في هذا المقال، بالاختلاف عما عهده الجميع مني في كتاباتي.. فأنا اعتمد على الاسلوب الساخر وممكن اللاذع، من دون عصبية أو احتداد.. إلا في هذا المقال، الذي تركت لغضبي فيه مساحة للتنفيث عما يجول في صدري من ألم وضيق بهؤلاء المرتزقة الذين يسيئون لمصر وللدين الاسلامي وللبشرية جمعاء في وجهة نظري.. فأي شخص يرتكب فعل الخيانة والتخريب تحت دعوى ارادة الخالق وتعاليم الدين هو يسيء للانسانية ولكل قيمة كافحت من اجلها البشرية ودعت لها الاديان

أحييك على ما قلته.. "أرى أن هذا الحكم البربري اللامتصور صدوره إلا من وحوش ضارية في غابة لم تعرف التحضر يوما ، أرى أنه يحسم – قطعيا – قضية تطبيق الشريعة الإسلامية في مصر .. أو في أي مكان .. وهي التي يتخذها الإخوان وغيرهم ستارا يريدون من خلفه ممارسة فعل التنكيل بشعب سيظل حرا أبيا متحضرا راقيا ولو كره من هم وراء البحر الأحمر
.....

فهذا بالضبط ما يهرب الاخوان من مواجهته عن طريق هذا الصمت المخزي. لكنهم -بغبائهم المعهود- اثبتوا ان ولائهم لم يكن يوما لمصر أو للمصريين، بل لمن يمول عصابتهم لتقوم بجرائمها في مصر

لابد بالطبع من الفصل بين الشعب السعودي ونظام آل سعود، وألا نقع في فخ التعميم والتشطر على البردعة. وبما أن هذه هي معركة الشعب السعودي الذي عليه أن يخوضها، فأنا أرى أن علينا كمصريين هو ان نقطع ذيل الأفعى الممتد في بلادنا، من جماعات اصولية متطرفة تستخدم الدين كخطاف للتسلق على ظهور البسطاء إلى الحكم

خالص تحياتي وتقديري

Fantasia said...

العزيزة قطة الصحراء

هما عملوا المتوقع منهم مش أكتر، أنا معاكي 100%.. لكن المشكلة ف الناس العامية، المغيبة، اللي عمالة تسقفلهم ومش شايفين الخنجر اللي بيغرسوه في ضهرنا كلنا

واحدة مرة بتقولي وإيه يعني لما يبقى فيه اخوان، اهم بيعارضوا النظام!! تخيلي؟ طب دي شافت الحوار اللي عمله مرشد الغبرة وقعد يقول فيه شعر عن النظام المصري؟؟.. حد يفهمني ازاي مرشد جماعة محظورة المفروض انهم كل يوم بيعتقلوا منها كام واحد والحركات دي، يطلع بعد كدا يقول احنا معندناش مشاكل مع النظام المصري!!! دي ولا فوازير رمضان يعني

ومعارضة إيه اللي بيعارضوها نفسي افهم؟؟ دول بيعارضوا الشعب مش الحكومة.. بيقولوا الشعب فاسق ومنحل وفاسد وهما بس اللي يعرفوا ربنا.. وكل تاريخهم السياسي عبارة عن فرض وصاية على الشارع، ليس إلا.. عمرهم اثاروا قضية حقيقية؟ ولا كلها قضايا مفتعلة؟.. مش دول اللي اندسوا وسط حركة كفاية لغاية ما فتتوها وجابوا اجلها؟؟ يبقى دول بيتشغلوا لصالح مين بالذمة؟؟ وبيعارضوا مين؟

وآخرتها طظ ف مصر!.. ياخي طظ فيك وف اللي جابوك واللي ماشين وراك زي البقر

نفسي الناس تفوق بقى يا قطة.. خلاص.. معدش فيه وقت للغيبوبة دي

خالص تحياتي يا قمر

Fantasia said...

الاستاذ العزيز حسن الهلالي

والله ما يستاهلوا يعكروا دمك يا عزيزي

كل متخاذل مسيره يدفع التمن.. اللي يقبل بالاهانة على غيره انهاردة هتطوله بكرة وهتطول ولاده بعد بكرة

وبعدين هما البعدا دول سابولنا أي معارضة عدلة نتعكز عليها؟ ماهم خربوها وعايزين يقعدوا على تلها.. "كفاية" خلاص اتصفت واتخرست إلى الأبد بعد ما اخترقوها.. النقابات كلها اتضربت بعد ما تسربوا ليها.. "الغد" بقى غد اسود ومنيل من ساعة ما ايمن نور راح يبوس الايادي عشان ينول رضا بسلامتهم ويتعطفوا ويشحنوا قطيع المعيز بتوعهم يدولوا اصواتهم في مسرحية الانتخابات الرئاسية.. فاضلنا إيه؟؟ جامعات؟ احتلوها بالعيال المغيبة الصيع بتوعهم.. محدش له حس ف الجامعة غيرهم.. بقى عندنا طبستان وهندستان وحقوقستان ودار علومستان وكله مرستان ف مرستان

هو دا اللي هما عايزينه، ظاهرة الصوت العالي اللي اتخدع فيها ناس كتير لغاية لما احتلونا ونزعوا صوتنا من حناجرنا.. الحل الوحيد هو ان صوتنا الحقيقي يطلع ويجلجل ويطرد الحثالة دول.. عايزين بروجي يا هلالي

خالص تحياتي

Anonymous said...

وهنفضل نتنفض بالشكل دا لحين ميسرة

محمد said...

وماله ما هي من أيام الفراعنة بتتجلد هيه جت على دلوقتي؟؟؟
ربنا معانا.