Thursday, January 8

The Heikal Syndrome


موضوع غزة ده تحول إلى صفعة على وجه العرب كلهم. وأعني صفعة
Slap on the face
أنا اتكلمت كتير عن غزة وعن ما صحب الهجوم الغاشم على غزة من متاجرة بدم الضحايا واستغلال للموقف لاستهداف مصر اعلاميا وشحن الشعوب العربية ضد الموقف المصري لممارسة الضغط على النظام السياسي لصالح أطراف أخرى.. وخاصة إيران

المرة دي اسمحولي اكتب عن شيء آخر.. لكن في نفس السياق.. فالشيء بالشيء يذكر

اخترت العنوان بالانجليزي لمقال بالعربي عشان هتكلم عن اللورد.. لورد الاعلام العربي من وجهة نظري.. وكان لازم العنوان يبقى شيك برضه عشان يناسب مقال عن الاستاذ.. ولما نقول الاستاذ في عالمنا العربي، معروف مين.. الاستاذ محمد حسنين هيكل. اللي رغم كل شيء أصر اني احفظله لقبه، لاعجابي الشديد بشخصه وباسلوبه مهما اختلفت معاه ومهما كان انتقادي لمواقفه

فيه ناس ممكن تلاقي ده شيء مثير للسخرية أو حتى الشفقة.. مين انتي با حتة مدونة بنت امبارح عشان تكتبي تنتقدي الاستاذ؟؟.. أصل الاستاذ له دراويش مخلصين لا يطيقون انتقاده أبدا.. ودراويش بمعنى الكلمة.. يعتبرونه المرجعية العليا التي لا يمكن المساس بها.. دراويش فاق اخلاصهم حدود الاعجاب والتأثر بآراء الاستاذ ليتحول إلى وله واتباع اعمى وترديد لكل كلامه وتحليلاته وآراءه. فيه ناس شغلتها انها بغبغنات لهيكل بمعنى الكلمة. ولا اعتقد ان في هذا ما يعظم من شأنه، ولا أعتقد ان هذا يسعده هو شخصيا أو يرضيه، لأن أي استاذ يتمنى أن يعلم الآخرين ويلهمهم، لا أن يصنع اتباع من فاقدين الشخصية والرؤية الذاتية، أو يتحول إلى طوطم للعميان ومدعي الثقافة السياسية. لكن دراويش الاستاذ لا يعرفون ذلك. بل ويعتقدون أنهم قد وصلوا إلى قمة المعرفة والحنكة والفتاكة السياسية لمجرد انهم يرددون كلامه دون وعي، واذا ناقشت احدهم فيما يقوله، ينفش ريشه ويقولك بكل فخر "دا نفس رأي الاستاذ"!!! كأنه كلام الاستاذ قد منح نوعا من القداسة لأن الاستاذ هو اللي قاله.. أو كأن لا قول يعلو فوق قول الاستاذ.. أو كأن دا رأيهم هما وقال إيه اتفاق الاستاذ معاهم قد اعطى هذه الآراء علامة الجودة

العبدة الفقيرة لله لا تدعي أي معرفة لوذعية بالعلوم السياسية.. أنا مجرد بحب التاريخ وباتابع اللي بيحصل زي أي حد مهتم بالشأن العام. بأستخدم عقلي في ربط ما أراه حتى أخرج برأي ما أو تحليل ما، والحمد لله اني حتة مدونة لا راحت ولا جت، وإلا كان زماني بجد في هذا الزمن بقيت استاذة أنا كمان وليا دراويش ماسكين في ديلي. أنا بقول كدا ليس لثقة زيادة في قدراتي، لكن لوجود واقع مؤسف في عالمنا العربي ومجتمعنا المصري تحديدا يسهل فيه جدا صناعة الرموز والشيوخ والاساتذة والقادة

خلونا في الموضوع

الاستاذ اتكلم انهاردة على القناة اياها اللي كلنا عارفينها في لقاء خاص يعقب فيه عما يحدث في غزة. طبعا اجندة القناة في استضافة الاستاذ لاجراء هذه المقابلة الاستثنائية معروفة، ومش محتاجة ان حد يشوف الحلقة أصلا.. هما عايزين واحد بثقل الاستاذ يدعم الموقف اللي واخداه الجزيرة ضد مصر. وهو طبعا كان واعي لده جدا، وماطل وراوغ كتير في انه يناولهم مرادهم، وكاد أن يفلت، وكان ممكن جدا يفلت لو ان من ادار هذا الحوار هو محاوره المعهود محمد كريشان، لكن من حاوره هذه المرة هو حسين عبد الغني، مدير مكتب الجزيرة في مصر.. وقد استطاع ان يحاصر الاستاذ ويزنقه في خانة اليك عشان يطلع منه أي ادانة واضحة للموقف المصري، ومع ذلك فشل برضه

سر اعجابي بهيكل واحترامي الشديد له هو انه بيحترمني وبيحترم عقلي.. مش أنا شخصيا كفانتازيا، لكنه بيحترم عقلية جمهوره وفعلا بيعمل مجهود في تحليلاته ومحاولة اقناع الرأي العام بوجهة نظره.. فعلا استاذ.. تحس انه داخل المحاضرة ومحضر نفسه.. مراجع ووثائق وكلام مدورس واسلوب رصين وقلم في ايده.. ودا أنا اقدره الصراحة. رغم انه ف الآخر بيلبسني الطاسة، لكني بلبسها وأنا سعيدة ومنشكحة والابتسامة من الودن للودن، لأنه لبسهالي بذكاء، ماضربنيش بيها على دماغي زي العيال بتوع أولى سياسة وأولى صحافة. مش أي حد يعرف يلبس النخبة المصرية السلطانية.. الاستاذ بس هو اللي يقدر يقلوظ السلطانية كويس
وأعني بالنخبة المصرية، الايليت
Elite
وأنا مش بقول النخبة على اعتبار اني منهم، لكن لأن ده التعريف الصحيح للفئة اللي بيخاطبها الاستاذ واللي بيأثر فيها، وعن طريق تأثيره فيها بيزيد تأثيره هو الشخصي وثقله وقيمته

أنا أشجع اللعبة الحلوة.. اشجعها حتى لو كان فريقي مهزوم.. بس كل أملي هو ان فريقي يتعلم اللعب

نرجع لحوار الاستاذ.. قال إيه؟
أولا ضرب كرسي في الكلوب بشياكة وممكن بشكل مفاجيء للناس الموهومة بيه وبمواقفه القومية العروبية الصريحة وانتقاده واعتراضه الشديد على النظام المصري الحالي، اللي هو بالمناسبة مجرد امتداد لنظام عبد الناصر اللي هو كان المايسترو فيه.. ما علينا دا مش موضوعنا

أول كرسي في الكلوب انه قال ان حماس غلطت وقال بالحرف انهم اوقفوا الهدنة عشان كام صاروخ مابيعملوش حاجة، ودا خطأ ومكانش ليه داعي.. وقال ان سر انهم بيقعوا في الخطأ هو عدم وعيهم بما يحدث في العالم.. قصده ان تفكيرهم سطحي ولا يهتمون بتحليل المشهد السياسي.. وقال نفس اللي أنا قلته في مقالي الأول عن جهل حماس بسوء توقيت وقف التهدئة بسبب انتقال السلطة في امريكا وما احدثه هذا من فراغ.. واعترف ان الفاعل الوحيد حاليا في الموقف الراهن هو امريكا اللي مع غيابها أي طرف تاني مش هيكون مؤثر! الاستاذ اللي كان من أشد المعارضين لموقف السادات لأنه قال أن 99% من أوراق اللعبة في ايد امريكا دلوقتي بيقول ان مفيش حد يقدر يعمل حاجة غير امريكا!! ياللهول

تاني كرسي كان انه قال ان السيد حسن نصر الله أخطأ في الخطاب اللي وجهه للشعب المصري! وقال ما معناه برضه ان نصر الله جاهل ومش عارف بيكلم مين، فهو لا يعي طبيعة الشعب المصري ومدى تعلقه التاريخي بوطنه

وبعدين رفض ان قضية فلسطين تعامل على انها قضية دينية ورفض استخدام الدين في التسويق ليها، وقال طبعا انها قضية قومية وليست اسلامية.. ورغم استخدامه تعبير "قومية" فهو لم يدلل على ذلك واختص مصر وأمن مصر القومي بعلاقته وتشابكه مع هذه القضية ومصلحة مصر في تمسكها بوجودها الفاعل داخل كيان أكبر

طب يا استاذ كدا تمام.. انت كدا بتعارض التيار الراديكالي وشايف ان من يقودون ما يسمى بتيار المقاومة هم عبارة عن جهلة، خارج الزمن والتاريخ، لا يعرفون شيء عن العالم ولا تعقيدات السياسة ولا يعنيهم حتى ان المقاومة تكون فعالة، بيضربوا صواريخ في الهوا وخلاص. وكمان رافض التشابك الحالي بين القومية والتيار الديني.. وبعدين بتصور القومية دي على انها قدر مصر ومسؤولية مصر، ومصر وحدها! طب هي دي القومية يعني؟

كل ما كان حسين عبد الغني يسأله سؤال مباشر عن تقصير مصر تجاه ما يحدث في غزة، كان الاستاذ بيتوه الموضوع.. ابتدا الأول بجملة اكلاشيه من جمله المعهودة الظريفة.. رجع في كرسيه كدا وبرق وقال "أنا مش قادر أفهم موقف مصر. حاولت ومش فاهم."! طيب إيه اللي حضرتك مش فاهمه؟ قعد يتكلم عن ضعف الدور المصري.. بس الدور المصرى كقوة ناعمة، مش كقوة عسكرية زي ما الاخوة في الجزيرة ومن يعملون لحسابهم والقومجيين بيتكلموا
Soft Power
من الآخر معناها ان يبقالك دور خارجي من خلال ادوات تانية غير التدخل الفعلي.. طبعا التجربة الناصرية الاعلامية اللي هو صنعها هي المقياس الوحيد اللي بيقيس عليه.. لكني أويده جدا في هذا الكلام

بس إيه علاقة غياب السوفت باور المصري في موضوع تقصير مصر تجاه القضية الفلسطينية؟

وهنا تتجلى عبقرية هيكل، وعشان كدا بحبه وبحترمه، وهأفضل رغم كل شيء أشجع اللعبة الحلوة.. فبدل من أن تستخدمه قناة الجزيرة لخدمة اهدافها، استخدمها هو كوسيلة مسموعة ومرئية لتوجيه رسايل واسئلة مباشرة للنظام المصري

الحوار محتاج ان اللي ماشافوش يشوفه، عشان كدا هأكتفي بالاجزاء اللي قلتها عشان ما احرقوش.. لازم تشوفوه في الاعادة، اللي للاسف ما اعرفش ميعادها

لكن الرسايل والاسئلة واضحة وأنا أدعمها جميعا ويا ريت نشوف استجابة ليها ولا يتم اغفالها عشان كلام عابر فيه ثمة انتقاد للنظام المصري، مع انه مش انتقاد أبدا.. أنا شايفه انه عتاب ومحاولة للفت الانتباه للسقطات اللي بيقع فيها النظام وبتخسره كتير برغم سلامة موقفه في هذه القضية. أنا هلخص محتوى الرسايل بعد فك الشفرة من كلام الاستاذ.. الرسايل والاسئلة ببساطة هي

1- لماذا هذا الفراغ الاعلامي والاخفاق في صنع رأي عام مؤيد لمصر؟ م الآخر ازاي نسيب غيرنا يزايد علينا ونتعالى عن مجرد تفسير ما يحدث حتى تكون الصورة واضحة للعامة ولا يتم استغلال هذا التعتيم ضد مصر؟

2- لماذا لا يتم شرح الرؤية المصرية كاملة وواضحة مثلما تم تقديم الطرح الراديكالي أو المعارض؟ لماذا الاصرار على ابقاء الكل في الظلام، حتى أن أفضل المحللين يعجزون عن الدفاع عن مصر كما ينبغي لغياب الحقائق المطلوبة ول"ترفع؟" النظام المصري عن توضيح وجهة نظره وتصوره بشكل واضح؟

3- لا يجب ان تترك مصر هكذا مكشوفة في وجه أي تيار مضاد. لابد ان تتحصن مصر بدفاعات تقوي من دورها الاقليمي وتعيد لها هيبتها. وتستطيع مصر فعل هذا بكل بساطة عن طريق استخدام القوة الناعمة وهي الاكثر فاعلية من ردود الفعل العنيفة والمتشنجة، التي تنم عن ضعف لا عن قوة

أنا معاك في كل ده يا استاذ.. بس نصيحتك المخلصة في اننا ننضم لحلف ايران.. لأ.. لأ وألف لأ. اعتقد لو النظام المصري وصلته الرسالة واتعلم الدرس وعمل على تصحيح اخطاؤه مش محتاجين حلف ايران اللي هيودينا في داهية ده. يعني ايران بتعمل لمصلحتها، وتركيا بتعمل لمصلحتها، احنا هيبقى دورنا إيه في الحلف ده؟ تابع؟ ولا دراع زي الكام صباع اللي ايران بتلعب بيهم؟ الله يخليك بلاش سكة ايران دي، لأن انت لاعب في دماغ ناس كتير وممكن واحد ملحوس منهم -ربنا لا يقدر - يبقى في موقع صانع قرار بكرة ويعمل بنصيحتك دي ونلاقي نفسنا ورا الشمس

المشكلة يا استاذ ان النخبة المصرية مستهدفة من جهات كتير، مش حضرتك بس اللي بتعرف تلعب لعبة حلوة.. والجيل الجديد بتاع الفكر الجديد كله ع الزيرو وهينهار قدام أي لعيب منهم زي ما فيه ناس كتير منهارين قدام تأثير حضرتك. النخبة المسوسة دي هي السبب في الفشل اللي احنا فيه، مالهمش هوية ولا شخصية ولا صوت.. اغلبهم عجينة طرية، وفيه منهم المؤدلجين ودي مصيبة تانية. ومشكلة النظام انه في ظل هذا التسوس والتآكل (اللي هو متسبب فيه مع عوامل أخرى) مفيش حد يعتمد عليه غير مجموعة من الاغبياء المخلصين والاذكياء الفاسدين. مشكلة كبيرة، ومش من السهل ايجاد الحل لها. فيه تقصير، لكنه غير متعمد بالشكل اللي الناس فاكراه أو اللي حضرتك بتحاول تصوره، وفي أي حال، إيران ليست حلا.. أبدا ليست حلا يا أستاذ.. بل هي نوع من النهاية

8 comments:

عباس العبد said...

ازاى تقللى من نفسك يا فانتا ؟
انتى نفسك " سوفت باور " لنون النسوة , فاهمانى طبعاً ( وش بيغمز ) .. خدى بالك من الموضوع ده
--
انا شفت الحلقة و الصراحة انا لازم اهنئك لسببين :
انك طلعتلى نفس النقط اللى كنت ناوى اكتب عنها و اللى تهدم أى بنيان سياسى -دينى , علشان الناس بتوع الفكر الدينى يسكتوا شوية .. و السبب التانى انك لحقتى تطلعى بوست بتحللى فيه الكلام ده
انتى سريعة اوى
اما بخصوص الأنضمام لأيران
فالراجل مقلش كده
قال فى اوقات لازم نتحالف فيها حتى لو مع ناس مش متفقين معاهم
الراجل مقلش حلف بمعنى انه حلف دائم
قال انه فى التوقيت ده فى تشابك مصالح فممكن يكون فى تحالف مؤقت مع ايران و التحالف هنا مش معناه الأنقياد قد ما معناه أن يكون فى دور ثلاثى لمصر و إيران و تركيا
الراجل عايز يرجع قوة مصر , يكون ليها نفس الهيبة القديمة
محدش يتجرأ عليها
فممكن نستغل الوضع الأقليمى و دور إبران و تركيا لأستعادة القوة المصرية
بس ده اللى يقصده

ابو احمد said...

العزيزه فانتا
انا اتفرجت على الحوار
انا من الجيل الذى تربى على مقالت هيكل فى الأهرام بصراحه
لكن انا مختلف مع أجزاء كتير من اللى قاله على فكره الذور المصرى متآكل مش لقصور فى الرؤيه بس حكايه ال99% فى ايد أمريكا دى مش إختراع السادات دى إختراع هيكل99% انسحبت على ارؤيه الإقتصاديه والرؤيه السياسيه وكل التوجهات حتى النظره لإسرائيل يبقى لازم نكون تبعا لذلك ليس لنا دور إقليمى لان كل تلك السياست هى المسئوله عن اضعف والإنهيار التى تمر به مصر منذ البعينات وحتى الآن كيف لدوله هذا وضعها الداخلى أن تملك وتتبع رؤيه استراتيجيه عى المستوى الدولى أو الإقليمى
وبلاش حكايه القوميه دى لأنها بالضروره تؤدى اى الأصوليه الدينيه التى كان هيكل الى وقت قريب يغازلها
تحياتى واتمنى لك دوام التألق

عم مينا said...

بجد يا فانتا تحليل ممتاز
و زي ما رامز قال انت بجد حطيتي ايدك علي أهم نقط في الحوار.. يعني كالعادة هيكل بيرغي كتير بس بيبقي في النص الكلام كده فيه كام حاجة هما الليلة كلها

أولاً ادانته لحماس و اعترافه بعدم وجود توازن قوة ما بين مصر و اسرائيل علشان اللي بيعدوا يقولوا اننا متشائمين و بنقلل من شأن أنفسنا و بننشر روح الهزيمة يخرسوا بقي

الحاجة التانية موضوع أسلمة قضية فلسطين بس للأسف الكلام ده متأخر بتاع ٥ أو ٦ سنين كده.. أنا كمسيحي مؤمن بالقضية الفلسطينية و غير مؤمن بحق اسرائيل في الوجود بحس كتير ان فيه ناس بتحاول تبعدني عن القضية.. و أكنها بتقولي "ما لكش دعوة بالحوار ده.. دي قضية ما بين المسلمين و اليهود.. انت مالك انت" و علشان كده تأكيد هيكل علي انها قضية قومية كان مهم جداً

الحاجة كمان المهمة قوي كلمته عن الوطنية المصرية اللي عمرها ٧٠٠٠ سنة و دي فعلاً ظاهرة أنا كنت فاكر انها اختفت بس بالصدفة كنت في اجازة في مصر الاسبوعين اللي فاته و سعدت بردة فعل الناس علي تصريحات حسن نصر الله.. يعني أنا أعرف ناس عندها ربنا فوق و حسن نصر الله تحت و رغم كده هاجموه بشدة علشان حسوا انه تطاول علي بلدهم.. ما تتخيليش الموضوع ده فرحني قد ايه..

أما بالنسبة لإيران فزي ما رامز قال هو مش بيدعو لتحالف و لا حاجة.. بس بيني و بينك أنا رغم عدم حماسي لأي علاقات مع ايران بس النغمة المستخدمة في الصحف القومية سخيفة و دمها تقيل بجد.. يعني ربط كل شيء بإيران و كأنها رأس الأفعي اللي مسئول عن كل حاجة وحشة بتحصل في الدنيا يثير الإشمئزاز
يعني ما بقاش فيه فرق بينهم و بين بتوع نظرية المؤامرة اللي لو اتكعبل و هو ماشي في الشارع بيقول ان اسرائيل هي السبب

hartaka said...

الاستاذ بس هو اللي يقدر يقلوظ السلطانية كويس

عجبتني دي اوي يا فانتا
دنتي طلعتي دقرمة اوي
:)
شوقتيني اشوف الحلقة
هادعبس عليها علي النت
ولو عرفت ميعاد الاعادة ابقي قوليلي

على باب الله said...

أولاً ده أجمل مقال أقراه في وصف هيكل و سياسته في الكلام .. و ليس كلامه في السياسة

---

أهم نقطة أستوقفتني هي غياب الرد المصري أو غياب توضيح الموقف المصري

ساعات كتير قوي بتبقي سياستنا الخارجية صح لكن مشكلتنا أننا مش عارفين نفهمها للناس فتلاقي الناس فاكراها غلط

بس أكيد إعلامنا محتاج وقفة أو بالأصح ثورة .. لأنه أصبح منفر للمشاهد و القاريء و المستمع

كمان محتاج دم جديد .. و فكر جديد

مواطن مصري said...

بصراحة انا بحب هيكل و اسلوبة في شرح الاحداث


بس هي حماس الي بتعملة متاجرة بدماء الفلسطينين مش اكتر

blue-wave said...

ممممممممممممممممممممم
بصراحه البوست طويل جدا
لكن ممتع جدا
اول زيارة وشكلها هاتكون وراها زيارات تانيه كتير

soly88 said...

انت برغت فى وصف هيكل كما قال العبد لله
وبعيدا عن القضايا
ان ساعات اسمعه واضحك
ليه
علشان كل تاريخه بيعدى فى دماغى وانا باتفرج
انه من النوع الذى يمكن ان يقنع بالشيىء وعكسه
وفى الحالتين عنده مبرراته
ولكنه وانا معك فى ذلك انسان ذكى
لكننا ايضا مش شوله ولا قراطيس
انه توقف عند فكرة انه الأستاذ
وكما يقولون الأستاذ يعرف أكثر
أو المفروض ان يكون هكذا