Monday, February 4

الفاشيون قادمون

آدي اخرة التطرف.. آدي اللي خدناه من التعصب الأعمى.. أدي اللي بيحصل من تحت راس الشعارات الطائفية والعنصرية المتطرفة

مجموعة من مشجعين الأهلي المتطرفين, اللي بتجمعهم رابطة الالترا اهلاوي(Ultra Ahlawy)
هجمت على واحد من جماهير الزمالك... ومش هقولكم عملوا فيه ايه.. بعد فوز الزمالك على الاهلي في ماتش سلة! أيوة باسكت.. مش كرة قدم حتى

طبعا التعصب بقى شيء عادي جدا ف حياتنا كمصريين, للأسف الشديد.. فممكن جدا واحد يقوللي "يا سلام! وايه يعني؟ ما المشجعين دايما بيمسكوا ف خناق بعض.. دا غير الشتايم اللي بتتقال طول الماتش باعتبارها هتافات تشجيع. عادي يعني". لكن احب اقول لأي حد بيفكر بالأسلوب دا, لأ.. مش عادي. وادينا كلنا بندفع التمن من سمعتنا ومن البيئة الرياضية الملوثة اللي بقينا فيها. لكن حتى لو اتعودنا على كل اللي فات, فمعتقدش اننا مستعدين للي جي.. لزيادة موجة التطرف ف الملاعب و تعصب المشجعين.

اللي حصل للمشجع الزمالكاوي المسكين, ان حظه الهباب رماه في ايد الالترا اهلاوية.. واللي مش عارفهم, يا ريت يشوف الفيديو ده علشان يعرفهم كويس




اللي حصل انهم بعد الماتش والراجل فرحان بفوز ناديه, راحوا جايبنه من قفاه, ورموه على الأرض, ودهسوه برجليهم, وبعدين ولعوا فيه!! أيوة والله ولعوا فيه النار.. حرقوه .. والراجل دلوقتي مرمي ف المستشفى بين الحياة والموت. كل دا علشان راح يشجع فريقه.. كل دا علشان مشجعين فريقه يعتبروا أقلية ف بلد معظم الناس فيها أهلوية.. كل دا علشان بعض الاهلوية فاكرين ان كونهم اغلبية معناه انهم احسن ناس.. كل دا لان فيه ناس ف وسائل الاعلام عمالة تنفخ ف الأهلي وتجامل ف الاهلي مهما كان مستواه.. كل دا علشان لما شوية من جماهير الاهلي تطيح ف الناس محدش بيقدر يوقفهم.. كل دا علشان الشعار المؤرف اللي رافعه نادي الأهلي خلاهم يحسوا انه فوق الجميع فعلا.. وفوق القانون كمان



الالترا اهلاوية فرع من فروع المشجعين المتعصبين حول العالم اللي بيعرفوا نفسهم بانهم ألتراز.. وفيه منهم اللي بيعبر عن تعصبه باليفط والهتافات والشعارات بس.. لكن فيه برضه منهم اللي بيستخدموا العنف والارهاب ضد الفريق الخصم ومشجعينه.. باعتبار ان ده هيخلي فريقهم دايما ف القمة. دا يعني على اساس ان فريقهم دا دولة بيعلنوا انتمائهم ليها, وان الهدف انه لازم يكسب, بصرف النظر عن الرياضة والقوانين واداء فريقهم وكل الكلام ده. هما لازم يستخدموا كل الوسايل, المشروعة واللي مش مشروعة لتأمين المكسب.. حتى لو هددوا الحكم بالقتل, أو خطفوا عياله وخلوهم رهاين لحد الماتش ما يخلص

أول دخول للفكر دا في مصر كان في مارس 2007, وبدأ طبعا بين مشجعين الأهلي.. لأنه النادي اللي بتتوفر فيه كل العوامل اللي بتشجع على التعصب. وحدث ولا حرج عن الشعار اللي رافعه النادي اثناء احتفاله بالمئوية.. "الأهلي فوق الجميع".. اللي هو ف الأصل كان شعار النازي.. المانيا فوق الجميع.. وكان وقتها مستوحى من الشعار الفاشي "الدولة فوق الجميع".. والألترا اهلاوية هما نتيجة طبيعية لشعار عنصري بالشكل, رافعه نادي رياضي علشان يخلي نفسه فوق رقبة الكل وغصب عن عين الكل

العنصرية والتطرف بقوا سمة ف حياتنا للأسف. احساس ناس كتير بانعدام القيمة الحقيقية بيخليهم يبقوا مهاويس بأي حاجة تديلهم قيمة وتجمعهم في مجموعة بتقول على نفسها ان هي الأحسن وهي الأفضل والأصلح وفوق الجميع بالعافية. الانتماء لمجموعة عنصرية طبيعي جدا انه يولد مشاعر الحقد والتطرف.. طبيعي جدا انه يؤدي للتعصب والتحقير من الاخرين ورفضهم وكرههم ومحاربتهم بشتى الطرق الممكنة. وهي دي كانت فكرة هتلر بالظبط لما حب يشعل الروح الوطنية ف المانيا عن طريق النازية.. هتلر اللي دلوقتي كل الناس عارفه انه كان مجنون ومعقد نفسيا. هتلر دلوقتي بقى ف كل حتة.. ف كل بلد.. ف كل مدينة.. ف كل قرية.. ف كل شارع. احنا عملنا استنساخ من هتلر وعممناه ف مجالات كتير للأسف



ممكن ناس كتير تفكر اني بشاور ع الاخوان.. لكن أرجع وأقول الاخوان هما فرع من تنظيم عالمي.. والتنظيم العالمي هو شكل من اشكال ايدولوجية التأسلم السياسي.. والتنظيمات دي فيه منها المسلح وغير المسلح.. لكن ف الاخر الي مش مسلح بيخدم نفس اغراض المسلح, وبيساعد المسلح على تحقيق اهدافه. يعني مثلا, الفكر المتطرف المسمى بالتأسلم السياسي بدأ في مصر لهدف معين, وكان بيستخدم العنف في بعض عملياته, خصوصا بعد قتل الشيخ حسن البنا. التنظيمات المتأسلمة خدت اشكال كتير.. منها التكفيري والجهادي.. منها اللي كان بيكفر اشخاص واللي كان بيكفر المجتمع كله.. منها اللي كان بيجاهد ضد الاحتلال واللي كان بيجاهد ضد اولاد البلد نفسهم.. منهم اللي كان بيجاهد بالكلام واللي كان بيجاهد بالسلاح. وبلاش ننسى لو سمحتم ان حركة الاخوان المسلمين في بدايتها كان الانضمام ليها عن طريق القسم على المصحف ومعاه المسدس. يعني العنف كان اسلوب مباح في تحقيق اهداف الجماعة. وما ننساش كمان ان الجماعة الاسلامية وجماعة التكفير والهجرة هما ف الاصل حركات انفصالية قام بيها ناس من الاخوان.. يعني اسسها اعضاء من جماعة الاخوان, لكنهم كانوا اكتر تطرفا واشد تعصبا. دي وقائع تاريخية, أعمل ايه؟ هو انا اللي كتبت التاريخ كمان؟


اللي أنا عايزة أقوله هو ان كيان التأسلم السياسي لما تفشى في وقت معين, قضى على كتير من ملامح التسامح والوحدة والحب بين المصريين. وان التيار دا عالميا أساء للاسلام ولم يفيده في شيء, بل شوه صورة الاسلام حتى في عيون الشمال والغرب المعتدل. وده المتوقع من تيار متعصب, بتحكمه نظرة احادية للامور
الجماعات الاسلامية على اختلاف اشكالها وملامحها هي جماعات متعصبة.. ليها اهداف ذاتية, بتحكمها رؤية واحدة بتزعم انها الافضل على الاطلاق.. لكن ف الواقع كل المتطرفين عندهم نفس الفكر وبيرفعوا نفس الشعارات. يعني شعار الاسلام هو الحل مش اختراع الاخوان, ولا حكر عليهم وحدهم. فيه برضه شعار "المسيح هو الحل" (Christ is the Answer)
وفيه تيار اصوالي قوي بيرفع الشعار دا ف امريكا انهاردة. بعض اتباع الطايفة الانجيلية التابعة للكنيسة البروتستنتية افكارهم هي هي افكار الاخوان.. شيل كلمة الشريعة وحط كلمة الانجيل وانت تلاقيهم نسخة طبق الاصل. هما كمان ضد العلمانية, وبيعتبروها خطر على الدين. أيوة ف امريكا.. أيوة الغرب المنحل العلماني الفاسد.. أيوة فيه ناس هناك بيحاربوا العلمانية والعلمانيين. وفيه عندهم قسيسين بيقولوا ان العلمانية الحاد. وبيكفروا الجامعات اللي بتدرس نظريات داروين. وفيه منهم اللي شايف حل كل المشاكل ف العودة للانجيل واتباع المسيح في كل شئون الحياة. أيوة.. بما فيها السياسة. دول كمان كارهين التعددية, مع ان امريكا مفيهاش غير حزبين اتنين بس! هما بقى مش عايزين احزاب من اساسه

http://jesusislife.net/articles/ChristIsTheAnswer.html

http://www.jesusistheanswer.org

http://politicsofthecross.blogspot.com/2006/08/evangelical-mega-church-pastor-says.html

طبعا مش كل الانجيلين كدة. لكن التيار دا نابع من شعار "المسيح هو الحل" واتباعه فصلوه على مزاجهم. وفيه منهم اللي متطرف اكتر من كدة, واللي بيروح يحرق العيادات اللي بتعمل عمليات اجهاض ونوادي المثليين وهكذا
المشكلة ان اللي جوا التجمعات دي عمره ما بيحاول يشوف الصورة من برة. بيستسلم استسلام تام للأفكار المتعصبة وبتكون بالنسباله هي الحقيقة المطلقة. التعصب مجرد بذرة لشجرة جهنمية.. مش ممكن حد يقدر يتخيل فروعها ممكن تطلع ف أي اتجاه أو توصل لغاية فين. عشان كدة مينفعش نسكت ونسمح بتسرب الفكر المتعصب لحياتنا.. ما ينفعش نقف نتفرج عليه وهو بينخر زي السوس في مجتمعنا وبلدنا.. ما ينفعش نسيب الامور تخرج عن نطاق السيطرة علشان كل واحد عايز يبقى ف حاله ويقول وانا مالي.. السلبية بتقتل زيها زي السلاح.. السكوت عن جريمة هو جريمة ف حد ذاته.. واللي شاف مشجع الزمالك وهما بيولعوا فيه وسكت, يبقى هو كمان شريك ف الجريمة. وطول ما الالترا اهلاوية موجودين وسط المشجعين ومرحب بيهم وبأفعالهم من بعض الاهلوية, يبقى مفيش فايدة.. الفاشيون قادمون




طب ليه؟ هو كان هتلر خدمنا ف إيه؟ طب العالم لما يشوف الصور دي هيقول إيه؟

48 comments:

MerMaid said...

بجد شيء مؤسف اللي حصل للراجل ده من الالترا اهلاوية ...انا اصلا مبحبش الكورة و سبب كرهي ليها هو التعصب اللي بلاقيه من المشجعين والالفاظ و الحقارات بتاعتهم
طبعا احنا في عالم التحيز و التعصب يعني ده شيئ طبيعي اننا نشوف كدة و يحصل كدة
مع اسفي
الصور اللي في الاخر دي اللي مع هتلر بتايده لانه حرق اليهود
يعني هم بيحبوا هتلر لانه كان ضد اليهود اللي هم اسرائيل في نظرهم
شفتي اللفة؟؟؟
عادي بقي...عدو عدوي حبيبي ...هههههههههههههه

بوست جميل كالعادة...تحياتي ليكي يا قمر وتصبحي علي خير
:)

Egyptian Feminist Chic said...

OH MY GOD!!! I can't believe these lunatics actually burned someone alive because he was chearing for his own team!!! Yadi elneela 3ala eltakhalof elly gaybna lewara!! belzema elnas dee mabtefhamsh?? ma la2oosh gheer elta3asob elly ray7een besalamethom yestawredooh?? Howa e7na na2seen ta3asob? Ya nas foo2o, 7aram 3aleeko elly bete3melooh filbalad .... 3awzeen tekhrebooha leeh? Allah ye7ra2hom 3ala elghaba2 elly homma feeh. Shatreen bas fi kol soghayara we kebeera yes2alo, howa 7aram walla 7alal... Akol be2eedy elshemal walla 7aram. A3tas walla 7aram... Aboos elnas wana basalem 3aleehom mareteen walla marteen 7aram lazem talata!!! yekhreb beet dah tafkeer. howa deeq el ofoq dah mesh 7anekhlas meno abadan?? We ba3d kol dah... yetla3lena nas beywala3o fi ba3d 3alashan match!! belzema da esmo kalam? Welnaby 7ad yetla3 wy2olohom, ya 7omar enta we howa... el atl 7aram!!! ma 7adesh yemawet 7ad 3alashan mesh 3agboh! Ana sa3at ba7es en fee kemeyet takhalof mesh tabee3eya fi eltafkeer beta3 elnas elmota3aseba. te2tel wa7ed 3alashan mokhtalef ma3ak fi eltafkeer aw fee elra2y aw fee eldeen... 7aram. mesh ma32ool elnas dee masem3etsh elmawdoo3 dah abl keda!! kano feen tool 3omrohom? 3aysheen ta7t tooba? begad ya fanta khabar yedaye2.
leeky 7a2 fee kol kelma 2olteeha... nafs noo3 elta3asob beta3 eldeen, ebtado yetaba2ooh 3ala elreyada. rabena yakhodhom kolohom.

Innocent said...

من البشر أناس خرجوا للدنيا بأيدي فارغة وعقول مليئة فكرا حرا وواجهوا الجميع. ومن البشر من لا فكر صامد له، فلجأ للقوميات التي بالعدد تضفي على فكره قوة. للأسف فكر الأغلبية هو منطق جبان، وإن كان قادرا على حسم الصراع. والفاشية ليست إختراع القرن العشرين. الفاشية إحدى الطرق المتبعة لتكوين القوميات التي بعددها تساند ضعف الفكر. اليهودية تملك حسا فاشيا " شعب الله المختار" والإسلام أيضا "خير أمة". لست أدري إن كان للمسيحية مثل هذا التوجه الصريح أم لا. ولكن يتفق جميعهم في أمر فاشي ويساعد على الفاشية وهو فكرة الحقيقة المطلقة التي يزعم جميعهم - الأديان - إمتلاكها وأنها سبيله إلى النعيم الذي هو حق له دون الآخرين.

قليلون من يضعون أنفسهم محل الآخر - التقمص العاطفي - ليدركوا وقع أفكارهم عليه. وحدها هذه الطريقة قادرة على خلق الحوار والأرضية المشتركة التي قد يقف عليها البشر في إطار من المساواة يمكنهم من السير قدما نحو الحياة.
لست أدري كيف يقتنع الجاهل بأنه من خير أمه أو القاتل بأنه من شعب الله، إلا إن كان الخير الإلهي جهلا، والقتل سمة إلهية مثلا.
علينا أن نتجرد من أنفسنا لحظات لنلبس حذاء الآخر.

تحياتي واحترامي

Rain man said...

كان من الافضل ان تسمي مقالتك الاهلويون قادمون

ثم انه ما علينا

شىء مخجل جدا ان يصل التعصب الى هذه الدرجة
خاصة انى زملكاوى
لو كنت اهلاويا لكنت تقبلت الامر
و هذا ليس تعصبا و انما روح الفانلة
:D
تسليطك الضوء على هذه الواقعة يفشى حقيقة انك متابعة جيدة للأحداث
و هو ما سيدفعني لمتابعة مدونتك فى القوادم

MerMaid said...

مرة قبل كدة يا فانتازيا لقيت واحد في التليفزيون المذيع بيسأله انت مصري؟؟
قاله انا اهلاوي الاول و بعد كدة مصري او اي حاجة تانية

فقدان الانتماء ده هو السبب في التعصب لاي جهة اخري ..الناس مش لاقية حاجة تنتمي ليها وتحبها و يحسوا بقيمة نفسهم من خلالها الا الكورة او الحزب الفلاني او العلاني علشان كدة انا بكره الكورة والتحزب بشكل فظيع
معرفش الناس اللي حرقوا الراجل ده مبيفكروش؟؟
ولا هم مجموعة من الناس اللي عقلهم انعدم
الحقيقة مفيش عذر لحرق انسان
مهما كان
علشان كدة لو كان هتلر فعلا عمل الهولوكوست يبقي انا ضد الصورة اللي تحت دي
اليهود مش اسرائيل
اللي يقول كدة يبقي جاهل ...اليهود موجودين في كل العالم في مصر وفي امريكا و في اوروبا وافريقيا و اسيا
و اسرائيل فيها عرب و مسلمين ومسيحيين و يهود
يعني الموضوع مش بيتاخد بالجملة كدة
-----------------
طيب والناس اللي ولعوا في الراجل عملوا فيهم ايه؟؟؟

وافينا بقي بالاخبار

تحياتي و احترامي يا قمر
:)

haneen said...

عزيزتى فانت

انتى اكيد زملكاويه صح اعترفى الانكار مش هيفيدك .عموماً انا طبعاً عمرى ما بشجع ولا احب ولا بعترف بأى تطرف او تعصب اعمى وهبل اياً كان نوعه وبعدين لما يوصل لدرجه انهم يولعوا فى واحد لمجرد انهم متعصبين لفرقتهم دا يبقى تخلف عقلى بجد يعنى
انا بصراحه اهلاويه صميمه وعيلتى كلها اهلاويين الا واحد دخيل احتمال نولع فيه قريب او نستقطبه للجماعه بس انا شايفه يا فانتا ان شتان ما بين التعصب لتشجيع رياضه مثلا وحب فريق معين وبين التعصب الدينى. يعنى لو المتطرفين دينياً والمتعصبين مسكوا مصر حيبقى فيه مشكله كبيره طبعاً لكن تخيلى لو الاهلاويه مسكوا مصر ياااااااااه
حتبقى مصر فله والله تخيلى يبقى رئيس الجمهوريه ابو تريكه ورئيس مجلس الوزرا عماد متعب ويشكل الحكومه من كل لعيبة الاهلى بقى يااااااسلام هنبقى بلد هيىء ميىء صحيح وهنرقص الشعب . وبعدين يا فانتا يعنى واحنا زنبنا ايه يعنى ان كل ما يطلق عليه اسم اهلى يبقى رائع كده وعظيم دا غصبن عننا حبنا لفريق سوبر زى دا سواء فى السله او فى كرة القدم انا عارفه انك ممكن تمنعينى اعلق مره تانيه فى المدونات بتاعتك بس اعمل ايه لازم اعترف ما اقدرشى امنع نفسى اشجع فريقى وشوفى الحته دى بقى ..بــــيب .بـــــيب . اهــــلى

والاهلى عمهم وحابس دمهم

mohand said...

السلام عليكم

طبعا اللي حصل غبط جدا
وعار علي رابطة المشجعين المنشقة من الرابطة الاصلية

ودي رابطة منشقة

يعني مش هي الاساس

هما انشقوا لانهم عايزين يكونوا متعصبين والرابطة الاصلية رفضت

وهما برضه اللي شتموا جوزية ولاعبي النادي الاهلي بعد هزيمتهم من الفريق السوري وطلب الجهاز الفني خروجهم من ملعب التتش


ثانيا شعار الاهلي يعني ان الاهلي فوق الجميع اللي هما الاعضضاء المنتمين له

سواء مشجعين او مجلس اداره او اعضاء او لاعبين

يعني مصلحة الاهلي فوق مصلحة الجميع من المنتمين

مش من المصريين او العالم


وعموما الحركات المتعصبة في الكوره بدات في انجلترا اساسا

وبما اننا ثقافتنا الي حد كبير انجليزية نظرا للاحتلال القديم وهو اللي دخل الكوره في مصر

دا يخلي الناس بتتبع نفس النهج

عموما اعتقد ان النادي الاهلي اصدر بيان بانكاره لهذا الفعل المشين

بس نفسي اعرف هما ولعوا فيه من غير سبب كده

معقولة

Nsreen Bsunee said...

عزيزتى فانتازيا

انا لسه جايه دلوقتى من عند رامز كاتب بوست عن التحرش الجنسي وان محدش بيساعد البنت اللى بتتعرض لتحرش او يدافع عنها
عاوزه اعرف بقي مشجعى الاهلى المتخلفين التافهين الفاشيين اللى ولعو فى الراجل لو ذكر منهم"ذكر وليس رجل"فى اوتوبيس وشاف بنت بتتعرض لتحرش حيولع فى الراجل اللى تحرش بيها
طبعا لا
ليه
لانه "ذكر"وليس"رجل"ولو تلاحظى هما ولعو فى راجل واحد تكتلو عليه ولاد الكلب الاوساخ وولعو فيه يعني مش رجل قصاد راجل
ليه
عشان هما اهلاويه فاشيين "ذكور"مش رجال وميعرفوش يعني ايه رجوله

وطبعا تجدى بعض "الاهلاويه"يقولولك ما اكيد الراجل اللى ولعو فيه ده عمل حاجه كبيره
تعمللى ايه بقي لما تسمعى البق ده
"تولعى فى نفسك"

يعني موقف لا يجادل فيه انسان اصبح ممكن فيه المجادله والتحليل والتفنيد ويا ترى الراجل اللى ولع عمل ايه اكيد عمل مصيبه وهو اللى جابه لنفسه
زى البنت اللى بتتعرض للتحرش هى اللى بتتلام
اصلها مش محجبه
لا محجبه بس ده مش حجاب صح
وهكذا
مفاهيم مشوهه وافكار مقلوبه والصح بقي غلط والغلط بقي صح والتعصب بقي انتماء والتحرش بقي امر واقع والتخلف بقي الوضع السائد وحاجه تقرف

فى النهايه ادعو الله ان تكون هذه الحادثه بدايه ليسود الاهلويزم
:)

Nsreen Bsunee said...

بجد يا حنين تعليقك مستفز

مع انى بحبك وانتى عارفه

بس اول ما اتكلمتى عن الاهلى قلتى كلام مستفز وكله تعصب

بجد الاهلاويه حاله خاصه من حالات التعصب والفاشيه مع انها راحت ولا جت كوره متموتش ومتحييش وعشان كده الاهلاويه مكروهين والاهلى بقي مكروه ولاعيبته بسبب الاهلاويه بقو مكروهين برضه من ناس كتير
الاعلاميين الاهلاويه مستفزين كيك
والريس اهلاوى كمان

وكمان عاوزه البلد يمسكها بنى عشيرتك فقط
مع انك مش كده
بس اول ما اتكلمتى عن الاهلى بقيتى ديكتاتوريه

طبعا ناس كتير مش حيعجبهم كلامى

ما انا صبأت عن دين الاهلى
هههههههههههههههههههههه
خخخخخخخخخخخخخخخخخخخخخخ

حتعلنو عليا الحد
هو حد تشجيع حد غير الاهلى الجلد ولا الحرق

احمد الجيزاوى said...

بصى
تنتقضى على الاخوان ماشى عيله و..... والاخوان اكبر من انى واحدة محترمه زى حضرتك تاثر فيهم(انا بقول كلام فعلاى وليس اهانه)ماشى
وكمان انا مش هزعل لانى انا كد كدة حزب عمل مش اخوان
ويا رب ثقافتك السياسيه تكون وصلت لفرق بين العمل والاخوان
لكن تطولى لسانك الجميل المحترم دة على الاهلى لا دة دخلتى عش الدببير

خلينا نتكلم جد انا كنت بهزر اوعى تزعلى انا متفق معاكى خلى نفسك طويل معايه

الكلام الجد بيقول انى مشكلتك انى لو فى 100 واحد منهم
99 همله الصح
و واحد بث عمل الغلط تمسكى فى الواحد وكمان تتهمى 99
بغلط الواحد تعميم الخطاء انتى اكلمتى على النادى الاهلى وجمهيرة وبعموم وكانه اسرائيل
طيب انا واحد من جمهير الاهلى رفض هذا الحدث وشيفه غلط له تتهمينى مع باقى الناس انتى كدة ظلمتينى صح وله غلط
تكلمنى وحددى الاتهام على من فعل الفعل وله صالح سليم طلع من تربطه وحرض اااالجمهير انهم يعمله كدة علشان يكون خط تعصب وبعدكدة تحملى هجومك التعصب على الجهير الاهلى اى ملهاش فى السياسى لهجوم على جماعات الاسلاميه اى ملهاش فى الكورة



النظريه بتقول

ناس بتشجع كورة ملهاش فى السياسه


وناس بتشتغل سياسه وملهاش فى الكورة

تجيبه زيد عن عبيد له
ربنا يهديكى



اخر حاجه مهمه جدا




انتى بتقولى مطش سله طيب الفيديو الاول لناس بتولع نار فى استاد كورة قدم ايه جاب لجاب



وله احنا بنلوى اعنقه الحجات علشان نهاجم من ناعديهم من غير موضوعيه


صحيح
صحيح

صحيح

فى اسئله من البوست الى فات هربتى منه وموبتنيش عليهم

فكراهم
افكرك


اولا دعوة الى المحاكه والتعامل المباشر مع الاخوان ؟
ممثل فى مكتب الارشاد _شباب الاخوان _




ثانيا سؤال عن الولاء والبراء


عوز اثبت لنفسى انى غلطان لمه قلت انى
معلوماتك كله عن الموضوع من كلام الاخ وزعلانه انه قلك عندك فساد عقيدة



ثالثا لم نسمع منك تعليق لمه فسرت ليكى الفرق بينفساد العقيدة والكفر
واثبتلك انى الاخ متهمكيش بكفر مثل ادعئك له لا حس ولا خبر


سؤال الاخير

هل رسول الله الله عندما اقامه دوله فى المدينه كانت
اختار من بين الاقواس
دوله اسلاميه – دوله شيوعيه – دوله لبراليه
اجب مع التعليل


اخيرا اتمنه ان نكون على تواصل




صحيح احنا عملين قعدة لكل مدونين مصر بكل الاتجهات يوم الخميس
الساعه 6 على مقهى البورصه فى وسط البلد اتمنه ان تحضرى لانى فعلا انا معجب بمدونتك ونفسى اتعرف على حضرتك



واخير ارجه

تكونى مش زعلانه ولا فى اى نوع من الحساسيه منى لانى انا بتناقش معاكى وهذا لا يمنع العلاقات الانسانيه انا بنمى ثروتى الفكريه بنقاش معاكى
كلام دة لانى فجائت

انى فى ناس كتير بيقولى انت زعلان من فانتازيا له زى مثلا
ميرميرت

انا وله مش زعلان واتمنه انى حضرتك مكنيش زعلانه
دة حوار من اجل وصول الى حق وليس من اجل انى خصر حد لو الحوار هيخلينى اخس حضرتك انا هسكت وهحتفظ براى لنفسى
اخير اكرر دعوتى يوم الخميس واتمنه ان تكونى صديقة عزيزة لنا

شمس الزناتى هو من مسئول عن تنظيم اليوم لمدونين و هو لبرالى مستقل
نتمنه ان نراكى
احمد الجيزاوى

haneen said...

نسرين

طبعاً كلامى كان معظمه استظراف وهزار يعنى انا باخد راحتى فى مدونة حبيبتى فانتا ومتأكده انها هتفهم قصدى ومش هتزعل منى وبعدين يا رينا الاختلاف فى تشجيع النوادى والفرق لا يفسد للود قضيه ولا ايه يا زملكاويه وطبعا اكيد انتى مش ممكن تنكرى ان الاهلى فى الفتره الاخيره تقريباً ما بقاش فيه غيره فى مصر بيعرف يلعب كوره ودا واضح يعنى وانتى اكيد بنافسك بطلتى من زمان تشجعى الزمالك علشان مستواهم اللى بقى هباب وبعدين لعيبة الاهلى تحسى انهم ولاد متربين واخلاقهم عاليه وعمرهم ما عمله اى شىء مشين او يقلل من رصيد حبهم عند الناس علشان كده تلاقى مشجعى الاهلى بيزيدوا يوم عن يوم ومش معنى ان مجموعه متعصبه وعيال فافى مش لاقيه حاجه تعملها واكيد كلهم عاطلين ويمسكوا الناس يولعوا فيها يبقى دا حال كل مشجعى الاهلى لا طبعا دى حاله شاذه وحدث فردى اكيد بيحصل كمان عند المتعصبين الزملكاويه بس انتى علشان بتشجعيهم بتدارى عليهم ...صح

وانا كنت بستفذك انتى على فكره علشان عارفه انك زملكاويه
:)
وبعدين حد تشجيع حد غير الاهلى هو الرجم بالكانز الصفيح بتاع البيبسى فى وسط ملعب نادى الاهلى حتى الموت
ههههههههههه


سلام يا شرز انت

على باب الله said...

حين يؤمن الإنسان أن رأيه هو الحقيقة المطلقة ... تلك التي لا تقبل الجدل أو الحوار

يتحول إلي قنبلة موقوتة في إنتظار أن تنفجر في أقرب فرصة

Hassan El Helali said...

فانتا

التطرف في كل شئ أصبح
our way of life

مؤمن

إنت أهطل؟
أنا مش جاوبت علي سؤالك

هل رسول الله الله عندما اقامه دوله فى المدينه كانت
اختار من بين الاقواس
دوله اسلاميه – دوله شيوعيه – دوله لبراليه
اجب مع التعليل

Fantasia said...

العزيزة ميرميد

الرياضة عندنا بقت حاجة تكسف للأسف.. خصوصا كرة القدم
وزي ما انتي قولتي.. ساعات بيكون الانتماء لنادي معين أقوى من الانتماء لمصر.. التعصب بيضعف الاحساس بالوطنية لغاية لما يقضي عليه.. امال انا بنتقد فكر الجماعات الاسلامية ليه؟ ماهو عشان الانضمام ليهم بيولد التعصب لاهدافهم بغض النظر عن مصلحة البلد.. ودا نفس السيناريو اللي دايما بيحصل في أي بلد بتتواجد فيها جماعات متطرفة بشكل واضح
بيبتدي كل واحد يشوفله جماعة أو نادي أو حزب يروح ينضمله ويتعصب ليه على حساب الباقيين
هي دي الكارثة ف البلاد اللي التعليم والتنمية فيها ضعاف.. امال البلاد الافريقية مقطعين بعض ليه, من عنف طائفي لتصفية عرقية لحركات انفصالية, وغيره وغيره
شوفي الانتخابات في كينيا مات فيها كام واحد.. والموضوع اتقلب من اختلاف سياسي لصراع بين القبائل وتصفية عرقية.. ولغاية دلوقتي الموضوع عمال يكبر والدم للركب.. البلد اتهدت على دماغ اللي فيها عشان واحد سقط ف الانتخابات.. بالرغم من ان الانتخابات كانت خاضعة لرقابة دولية.. لكن ازاي الراجل بتاعنا يسقط؟ دا احنا احسن حزب.. خلاص نطربقها على راس الكل ونجيب عاليها واطيها

بالنسبة للراجل اللي اتحرق, البوليس قبض على اربعة وافرج عن اتنين منهم امبارح
انهاردة بقى رابطة مشجعين الاهلي عملوا واقفة احتجاجية قدام النادي, بيرفضوا القبض على العيال دول.. اللي فيه اقوال لزمايلهم وشهادات من ناس حضرت الماتش ضدهم
ومعظم اللي اشتركوا ف الوقفة الاحتجاجية دول ما حضروش الماتش من اساسه, ولا يعرفوا العيال اللي اتقبض عليهم.. لكن ازاي وازاي يتقبض على مشجعين اهلاوية مخلصين بيولعوا ف مشجعين الزمالك؟

شوفتي الاقتداء بهتلر وصل لغاية فين؟ هو ولع ف اليهود, ودول بيولعوا ف الزمالكاوية

خالص تحياتي

Fantasia said...

dear EFC,

shofty elmoseeba elli e7na feeha? i don't want to freak you out, but this is not the end.. this is just the beginning of the road..7aga kedda 3al mashy. ma7na ba2eena bnestawred kol zebalet el3alam: ta3asob, 3ala fetna, 3ala 2tehad, 3ala fascist ideology. 7aga fol. howa da eltakadom wala balash.. 3ash ya regala 3ash.. yalla wala3ooha 7aree2a.

shofty elvideo bta3 elhetaf el7amasy elfazee3 "hatewla3 hatewla3".. dol asdohom 3al balad.. hya di elli 3ayzenha tewla3.. khaleehom yowaroona hye3melo eih ba3d maye7ra2ooha. hyroo7o f steen dahya.. bas e7na zanbena eih nroo7 ma3ahom?

sorry for causing you all this sadness dear. i couldn't help ringing the alarm before it is too late.

best regards

Fantasia said...

الاستاذ انوسنت

كلماتك لها وقع خاص, يطرب العقل.. نعم يجب ان نرتدي حذاء الآخر ولو للحظات, لندرك اننا بشر, ولندرك ان الخالق لابد ان يسمو فوق كل الصفات البشعة التي ينسبها اليه المتعصبين والعنصريين والمتطرفين والفاشيين.. لكن المتعصب هو شخص عصي على النظر خارج افقه المحدود, المكبل بالافكار المملاة عليه والاحقاد التي زرعت في قلبه.. فهو لا يستطيع الفكاك من براثن هذا الفكر الشيطاني اللعين, الذي يصور له كل الآخرين في صورة اعداء وكافرين وفاسدين ومتآمرين وعملاء

نعم يا سيدي لقد كان للمسيحية نفس هذا التوجه الفاشيستي ف العصور الوسطى.. وتم استخدام شعارات مماثلة في حشد الجموع للاشتراك في الحملات الصليبية, التي كان احد اهدافها هو تخليص العالم من اكبر عدد ممكن ممن لا يعتنقون الدين المسيحي.. هذه الحملات كانت شديدة الوحشية بسبب شحن الجنود بهذه الروح العنصرية. ولهذه السبب كان الجنود يتعدون مرحلة مجرد السيطرة على البلاد التي تمر عليها الحملات. فمثلا يسجل التاريخ وقائع غاية ف البشاعة واللا ادمية, من التمثيل بجثث ضحايا هذه الحملات الى واقعة أكل لحوم الضحايا المسلمين في سوريا. وهناك سجلات بها وصف تفصيلي لهذه الاحداث.. فيصف رالف الكاني, وهو أحد الجنود الذين شاركوا في هذه الحملات, ما حدث ليقول "في معرة النعمان كان الجيش يقوم بغلي الكفار البالغين, بينما يقومون بوضع اطفالهم على صفيح ساخن ليلتهموهم مشويين

وبينما كان المسلمون يلقبون بالكفار, كان اليهود يلقبون بالكفار قتلة المسيح.. وحتى المسيحيين الاورثودوكس لم يسلموا من هذا التكفير وهذه المجازر.. التعصب ليس له وطن ولا دين.. التعصب هو العمى.. والبشر قد يصابون بالعمى في اي مكان وزمان

خالص تحياتي

Fantasia said...

الاستاذ rain man

اشكرك سيدي على الاشادة, وارجو ان تكون المدونة دائما عند حسن ظنك

وانا معك للأسف في ان روح فانلة الاهلي بدأ يشوبها التعصب, وان لم يتسرب الى جميع المشجعين. لكن هناك الكثير من الاستعلاء والتجبر والعنصرية في اللافتات التي ترفع من قبل بعض مشجعين الاهلي والهتافات البذيئة التي اصبحت سمة الملاعب المصرية مع كل أسف

خالص تحياتي

Fantasia said...

عزيزتي الاهلوية حنين

لا يا ستي مش هانكر اني زملكاوية.. هي تهمة ولا ايه؟ وبعدين ما احنا كسبناكوا ف البسكت اهوه.. ليه بقى مفيش روح رياضية؟ يعني مش كفاية عليكوا مكوشين على كرة القدم.. كمان مش عاجبكم حد يغلبكم ف السلة؟ هي السلة دي ليها جمهور في مصر اصلا؟ دا تلاقي الراجل المحروق يا عيني راح ماتش الباسكت دا من يأسه.. قالك مشيها سلة ممكن يبقى فيها أمل.. لكن يا ولداه ما يعرفش ان قضاه كان مستنيه هناك

و متعب ايه دا اللي عايزاه يبقى رئيس وزرا؟ دا الواد هيشلني من لعبه ف المنتخب. وكمان بتاع بنات وماشي على حل شعره.. احنا ناقصين يا حنين؟

انا بقى مستعدة اترجم بكانز بيبسي وكوكا كولا وسبرايت كمان.. بس بلاش كانز الفانتا والنبي, حتى تبقى عيبة ف حقي.. لكن متعب دا ما يبقاش رئيس وزرا

ما احنا بنشجع لعيبة الاهلي لما بيلعبوا ف المنتخب. بس يا ترى الاهلوية عندهم استعداد يشجعوا لعيبة الزمالك؟ يعني انتي مثلا شوفتي الجون اللي حاطه عمرو زكي بصدره ف الماتش اللي فات؟ فيه لعيب ف الاهلي يقدر يجيب جون بالروعة دي؟

طب شوفتي فلافيو اللي بيلعب ف الاهلي كان متعصب لفريقه ازاي؟ كان عمال يضرب ف اللعيبة بتوعنا ولا كأنه شافهم قبل كدة ف حياته

دول الزملكوية دول حمالين قاسية والله يا حنين. وبعدين هو احنا اللي كنا طلعناكم من الكاس؟ امال لو بنشجع بترول اسيوط كنتوا عملتوا فينا ايه؟ هههههههه
بترول اسيوط؟ الاهلي السوبر الجبار اللي فوق الجميع ينهزم من بترول اسيوط؟

خالص تحياتي

Fantasia said...

مهند

"رابطة مشجعي الاهلي تقوم بوقفة احتجاجية بسبب القبض على اتنين من مشجعين الألترا بتهمة اشعالهم النار في مشجع زملكاوي"

لا تعليق


"بس نفسي اعرف هما ولعوا فيه من غير سبب كده"

أكيد يستاهل الحرق.. كفاية انه مش اهلاوي

Drop from the Ocean said...

مساء الخير

عجبنى تعليق انسينت وردك على تعليقه ..هتخلونى اعيط.

آه لو خلينا انسانيتنا هى المقياس الاول بعد كده تيجى مقاييس توجهاتنا الدينية والسياسية و الرياضية (آخر زمن) ..
اللى حرقوا الراجل دول نسيوا انهم بنى آدمين ولغوا انسانيتهم كلها و افتكروا بس انهم اهلاوية.
اللى بيقتل مدنين وبيقول بجاهد عشان ربنا ده نسى انه بنى أدم ولغى انسانيته ..واللى حرق اليهود ف افران غاز ، واللى شوى الاطفال واكلهم ..و اللى قال انه فوق الجميع نسى تماما ان الانسانية هى الهوية الاساسية ليه وللجميع قبل مايتنيل يبقى زفت نازى ولا شيوعى (سورى ، اصل دمى محروق) ياريت قبل م الواحد يقر بأى انتماء ليه يقرر الاول بإنتماءه الآدمى لفصيلة البنى آدمين ...قول انا انســــــــان اهلاوى ، انا انســــــــــان مسلم ...وساعة م اللى بعد كلمه انسان يخليك تعمل حاجة ضد انك انسان فوووووووق لنفسك واعرف انك اكيد غلطان او ان انتماءك غلط .
افتكرت حوار مع واحدة سلفية اتكلمت عن اليهود بضيق افق فظيع ف قولتلها " سؤال برئ ..انتى ليه بتكرهى اليهود كسلالة او كأصحاب دين ؟" قالتلى بثقة :"عشان ربنا قال ف القرآن انهم اعداءنا واشد الناس عداوة لينا كمان وانا مرجعيتى القرآن، انتى مش بتكرهى اليهود؟؟ " ، قولتلها لأ عشان انسانيتى هى مرجعيتى .

انت انســــــان وهو انســـــان دى هويتنا الاساسية والمشتركة ، اوعى تنساها او تتخلى عنها

بوست جميل ياجميل:)
تحياتى

ابو احمد said...

العزيزه فانتازيا
حين يفقد الوطن بعض من اركانه ويبدأ في التفتت يضعف الانتماء الوطنى يلجأ الناس الى الانتماءات الصغيره دينيه قبليه او كرويه
كانت وحشانى مدونتك اشكر لكى سؤالك وتعازيكى الكريمه
دمتى بخير

احمد الجيزاوى said...

Hassan El Helali

انا كلمتك انت ايه حشرك انا بوجه كلامى الى فانتازيا
لانى شيف انه عقله وتعرف تخطبتى وعقله كبير
اما انت بصراحه انا موجهتلكش كلام
لسببين
الاول انت ملكش فيه لانك مش انت اى كاتب البوست

السبب الثانى انى انا متاكد اى يعمل حركه دة بتاعتك ويصدر صدرة كدة اكيد من السفاء وانا بصراحه بارف ونفسى حلوة
هههههههههههههههههههههههه

ومش نقصه عيل
على المسه

عمان انا يا فنتازيا كان نفسى بس اتشرف بحوار وجدال معاكى
بس واضح انك ملكيش مزاك
عموما
شكرا لحضرتك
الف تحيه لشخصك الكريم ولمدونتك لات انا احترمه
وكنت اتمنه ان نكون اصدقاء
شكرا لكى لعم الرد
السلام عليكم ورحمه الله وبركاته

The Innocent said...

حين حاولت استثناء المسيحية كان ذلك لعدم وجود نص صريح بكتابها يحمل توجها فاشي كما في كلمات " شعب الله وخير أمة". أما بخصوص فاشية فكرة الحقيقة المطلقة فهي متملكة الجميع. وعن فعال المسيحين والكنيسة فتاريخهم بالعصور الوسطى لهو أبشع ما يكون ومن الأخر تاريخ وسخ. إن غفر لهم العالم جميع فعالهم، لن أغفر لهم محاكمتهم لجاليليو.

تحياتي

MerMaid said...

دا تلاقي الراجل المحروق يا عيني راح ماتش الباسكت دا من يأسه.. قالك مشيها سلة ممكن يبقى فيها أمل



هههههههههههههههههههههههههههههههه
والله انتي سكر يا فانتازيا

بجد ضحكتنيني علي حال الكورة في مصر

تحياتي ليكي يا قمر

Fantasia said...

العزيزة نسرين

ههههه.. حلوة الاهلويزم دي.. أنا لو منك أروح أسجل المصطلح دا باسمي ف الشهر العقاري, لانهم اكيد هيستخدموه قريب.. وساعتها ينوبني م الحب جانب.. يعني أي يافطة يكتبوا عليها أهلويزم, يدفعولي عليها رسوم استغلال المصطلح
ما هي دي فايدة الملكية الفكرية

بكرة هيحرقوا الزملكاوية في محارق غاز جماعية يا نسرين
يعني المتأسلمين عايزنا نتحرق ف الآخرة, ودول هيحرقونا ف الدنيا
طب نروح فين؟ يعني اللي مش عايز يخش ف الاهلويزم ولا الاسلاميزم يروح يولع ف نفسه على رأيك

أنا قريت التدوينة بتاعة رامز واستأذنته اني انشرها أو اجزاء منها على مدونتي التانية
فعلا كلامه صحيح.. الناس بقت بتفصل الصح والغلط على مزاجها عن طريق سياسة فرض أمر واقع
يعني الحرام من كتر ما بتسمعي تبريراته وتشوفيه بيحصل قدامك يتحول ويبقى حلال.. لأ ومش حلال وبس, دا يبقى هو دا الحلال بعينه ومفيش غيره
والشر يبقى خير
والقبح يبقى جمال
والفوضى تبقى نظام
والكره يبقى حب
والظلم يبقى عدل
والتدنيس يبقى تطهير
والايمان يبقى كفر, وفي قول آخر فساد عقيدة

يا ستي احنا داخلين على ايام سودة.. نصيبنا نعيش ف العصور الوسطى العربية, هنعمل ايه؟

بكرة التاريخ هيذكر الهولوكوست الأهلاوي, ويخلد اسم الاهلاوي الالتراوي اللي هيعمل المحارق.. لكن الزملكاوية اللي هيتحرقوا هيبقوا مجرد ارقام.. وارقام متضاربة كمان

خالص تحياتي

Fantasia said...

يا حزب العمل

الرد ع التعليقات هنا بالدور.. هنا فيه نظام واحترام, مش حزب عمل هو

ثانيا
انصحك بالكشف على نظرك عند أي دكتور عيون, بس يا ريت مش اخواني, لعمل نظارة كعب كباية وعدسة مكبرة.. مع تعلم القراءة على طريقة برايل

ثالثا
لا يعنيني محاولاتك لاستفزازي.. وطالما تصر على التحدث باسلوب غير لائق, فلا تنتظر مني ان اطيع اوامر السيادة وأرضخ لابتزازك السخيف

رابعا
لقد تخطيت ردي التفصيلي المهذب على تعليقك الأول الذي اتقنت فيه تمثيل الأدب وادعاء التحلي بالخلق الرفيع
وتجاهلت تماما كل ما ورد به من اسئلة موضوعية جوهرية في صميم تعليقك.. فلماذا يا ترى يفرض علي انا الرد على اسئلة سمجة استفزازية صبيانية غير ذات صلة بأي من المواضيع المطروحة

خامسا
كرهك للقراءة ليس لي فيه شأن.. وجميع اسئلتك التافهة تمت الاجابة عليها في تدوينات سابقة, لان كل الببغوات تكرر نفس الاسئلة التي لا يعرفون هم انفسهم اجاباتها

سادسا
من الخطأ, بل ومن اللغط, بل ومن غير المعقول تسمية ما تقوم به بالحوار, فهو لا يمت للحوار بصلة بأي حال من الاحوال.. فهو يفصح عن منطق هش, ولغة ركيكة, ومعرفة معدومة, ورؤية ضحلة, واسلوب سوقي, وانعدام التحلي بصفات المسلم.. أي مسلم.. فما بالك بمن ينتمي لجماعة اسلامية

سابعا
دعوتك مرفوضة.. فانا لا اريد ان أرى طلعتك البهية بعد ان وجهت لي وابلا من السباب والتجريح المسف

ثامنا
في حالة حدوث معجزة, وتم فك طلاسم هذا الكلام: "لانى شيف انه عقله وتعرف تخطبتى وعقله كبير
اما انت بصراحه انا موجهتلكش كلام
لسببين
الاول انت ملكش فيه لانك مش انت اى كاتب البوست
السبب الثانى انى انا متاكد اى يعمل حركه دة بتاعتك ويصدر صدرة كدة اكيد من السفاء وانا بصراحه بارف ونفسى حلوة
هههههههههههههههههههههههه
ومش نقصه عيل
على المسه

فهذا يفضح شخص لا يعرف أي شيء عن اصول الحوار, ناهيك عن الأدب أو مراعاة شعور الاخرين.. وناهيك عن التمسح بخلق الاسلام

تاسعا
أنا لا اسمح لأي شخص غير محترم بالتطاول على ضيوفي.. فهم في داري, ومن يقتحم داري ويتطاول علي وعلى ضيوفي, لا يستحق سوى ان يطرد شر طردة غير مأسوفا عليه

عاشرا
من رابع المستحيلات ان نصبح اصدقاء, فلا تمني نفسك بهذا الوهم الخرافي. أنا انسانة احترم نفسي واحترم الاخرين, ولا يمكن ان اصادق من هم دون ذلك

ملحوظة: ينصح بالاستعانة بالمعجم العربي للمساعدة في فهم ما سبق

تحياتي

Fantasia said...

العزيز على باب الله

صدقت قولا يا سيدي الفاضل.. فنحن نعيش وسط مجموعة من القنابل الادمية

ومن يحاول نزع هذا الفتيل يعرض نفسه لخطر التفجير والتكفير

خالص تحياتي

Fantasia said...

العزيز حسن الهلالي

خلاص يعني بقت رسمي؟ طب اللي رافض التعصب يروح فين يا عم هلالي؟

معلش حقك عليا.. متاخدش على خاطرك من جيزاوي, الله يجازيه
انا قولتلك مفيش فايدة من الكلام معاه.. دا انت اكتر واحد فاهم العالم دي.. انت بتصدق انه عايز يعرف؟

خالص تحياتي

Fantasia said...

العزيزة دروبس

مساء الفل يا قمر
كلامك بجد اثر فيا.. انتي اللي كنتي هتخليني أعيط

للأسف يا دروبس تاريخ البشر كله سفك دماء.. موضوع الانسانية دا ملوش جمهور.. واللي بيقول حقوق انسان عندنا يبقى عميل ومش متدين وقتي كدة

على قد ما صعب عليا اقول الكلام ده, على قد ما لازم نواجه نفسنا بيه.. الانسانية دي قضية خسرانة ف الوقت الحالي
وزي ما قولت لانوسنت في تعليق قبل كدة, البشر قدامهم كتيييير أوي علشان يوصلوا للمرحلة دي من التطور.. اجيال كتير جاية مكتوب عليها تشوف نفس اللي بنشوفه وتعاني نفس اللي بنعانيه.. التاريخ حركته بطيئة للأسف, والانسان عنيد بطبعه ولسة صراع الغابة مترسب جواه

الفاشيون قادمون يا عزيزتي

خالص تحياتي

Fantasia said...

الاستاذ العزيز أبو أحمد

سعادتي بالغة بعودتكم الكريمة لعالم التدوين يا سيدي.. وكلي رجاء ان ينعم عليك الخالق بنعمة السلوان وتداوي الايام ما حل بكم من جراء هذا المصاب الاليم
لا شكر على واجب يا سيدي الفاضل.. احزانكم هي احزاني, وقد كنت اواسي نفسي واكفف دموعي على فقدان كريمتكم الغالية

صحيح ان الوطن يتفتت.. والآن ينسحق تحت اقدام من وجدوا انتماءات بديلة, جعلتهم يرون في وجود الوطن تهديدا لوجودهم وهويتهم الجديدة

هذه الانتماءات الثانوية فعلت بهم كما فعلت بالذين من قبلهم, لكنها ستجر الخراب والدمار على الاغلبية من الابرياء

اشفق على هذا الوطن الغالي من الهوة السيحقة التي يقف على شفاهها

خالص تحياتي ومودتي

بحبك يامصر said...

اعذرينى يا فانتازيا انى هقول رأيى بصراحه وبالطبع رأيى مش هيعجبك
اولا انا حاسس ان تفكيرك متطرف يعنى اى شئ مش عاجبك بتهاجميه بشراسه طبعا مفيش اى بنى ادم هيعجبه موقف الناس اللى حرقوا الراجل بس انك تنسبى الموقف ده للنادى كله ومشجعينه وعشان تدللى على صحة كلامك تجيبى شعار زى(الاهلى فوق الجميع) وتقولى معناه بالرغم ان كل الناس فاهمه الشعار ده معناه ايه وانا مش هقوله لان فى زميل اخر قال معناه انما انك عشان حاسه انك كذمالكاويه يعينى مش بتفرحوا ومضطهدين
فده مش ذنب الاهلاويه ولا ذنب نادى ناجح زى الاهلى
ثانيا انا بصراحه كنت معجب بثقافتك وكنت بدخل مدونتك بستفاد بجد بالرغم انى كنت بختلف معاكى بس منكرش انى كنت بستفاد منها هو انتى كنتى واخده خط الهجوم على الاخوان فمش لاقيه حاجه للاخوان اليومين دول تتكلمى عليها فقولتى يلا امال انا هبطل نقد وشتيمه فى الناس ؟ قمتى جبتى موضوع المشجع اللى ولعوا فيه شوية بلطجيه وبتحملى نادى وجماهيره فعله زى دى
المهم اننا فى وقت منتخب مصر بيلعب فيه ومحتاج مننا كل مسانده مش نقول اهلى وزمالك ونقسمها فين الوطنيه بقه

Nsreen Bsunee said...

حبيبتي فانتازيا

تصحيح واجب ولابد منه انا اقصد
"اتمنى ان تكون هذه الحادثه بدايه لتسود "الانتى اهلويزم"وليس الاهلويزم عفانا الله منه يا اختشي

عزيزتى حنين
اوعى تفتكرى انى زعلانه يا بنتى احنا بنناغش بعض بس وبنعاكس بعض احنا صحاب وحبايب
:)


حسن الهلالى
ارجو منك عدم الرد على التعليق الموجه لك زى ما فانتا قالت مفيش فايده مالوش لازم
والله ينفع مطلع اغنيه
مافيش فايده0000مالوش لازمه
منكم لله00عملتو للغه العربيه ازمه


تحياتى

Fantasia said...

الاستاذ العزيز انوسنت

على حسب معرفتي لا يوجد في المسيحية نص صريح بفكرة تفوق الدين المسيحي أو اتباع الديانة المسيحية.. انما الفكرة موجودة, وتوجد اجتهادات من بعض رجال الدين المسيحي لاثباتها.. وهم من اتباع نفس الطائفة التي اشرت اليها في هذه التدوينة
آخ على جاليليو وما حل به, حيا وميتا.. وآخ على الفتاوى التي قضت بتكفير كل من يصدق ما توصل اليه هذا العالم المارق! ترى كم جاليليو حرمت منهم البشرية بسبب هذا الارهاب الفكري؟

خالص تحياتي

Fantasia said...

العزيزة ميرميد

مبروك لمصر فوزها على كوت ديفوار 4/1 وعقبال البطولة

سيبك انتي, لا اهلي ولا زمالك.. المنتخب هو الحل

تحياتي

Fantasia said...

الاستاذ بحبك يا مصر

يا سيدي انا لم اذكر كلمة مشجعي الاهلي الا وسبقتها بكلمة بعض, فلماذا تتهمني بالتعميم؟ لا يمكن ابدا ان ارتكب هذا الخطأ يا سيدي.. هذا ليس تفكيري وهذه ليست طباعي

وحين تكلمت عن شعار الاهلي فوق الجميع ذكرت انه رفع من قبل النادي اثناء احتفالاته بالمئوية, أي ليس من المنطقي أو من المعقول ان يكون المعنى المراد هو ان النادي أهم من ادارته واعضائه.. خاصة حين يقترن هذا الشعار بلافتات اخرى رفعت على النادي اثناء هذه الاحتفالات.. منها الاهلي نادي القرن ونادي السوبر.. أي ان المعنى المراد واضح.. ان النادي الاهلي هو افضل النوادي على الاطلاق.. وان الشعار كان تكليلا لانجازات فريق كرة القدم التابع للنادي, وليس النادي الرياضي نفسه. كما ان هذا الشعار يرفع على لافتات التشجيع في ماتشات الاهلي

وحتى ان فرض وكان المعنى المراد هو الذي تشير اليه حضرتك, فيظل شعار نازي وفاشي.. فكيف يكون النادي فوق اعضائه؟ هل النادي هو الملاعب والمقاهي وحمام السباحة؟ كيف يمكن للنادي ان ينفصل عن اعضائه؟ الا ترى يا سيدي ان هذا تأكيد للشعار الفاشي "الدولة فوق الجميع"؟ وهو الذي فصل مفهوم الدولة عن الشعب, بل وجعل الدولة مقرونة بايدولوجية معينة يجب ان يتبعها الجميع

يا سيدي انا لا اهاجم لا النادي الاهلي ولا مشجعيه.. انا انتقد سلوك بعض المشجعين المتعصبين.. واحاول تحليل الاسباب التي ادت بهم لهذا التجبر والتوحش.. أرأيت يا سيدي هؤلاء المجانين وهم يقذفون النيران؟ ألم هناك العديد من مشجعين الاهلي الذي سمحوا باستمرار هذه المهزلة وتكرارها؟ ألم يكن هناك مشجعين اخرين يهللون ويهتفون اثناء قيام الالترا بهذا الفعل التخريبي الهمجي؟
انا اعترف اني اشجع نادي الزمالك لاني ببساطة لا أرى بطحة فوق رأسي.. أي اني كتبت مقال متوازن ليس فيه أي شكل من اشكال التعصب أو التجني على احد.. ومستحيل ان يعرف من يقرأه ان كاتبته تشجع نادي منافس دون تصريحها الشخصي بذلك.. وقد صرحت بتشجيعي للزمالك مع صديقة اهلوية, وكنا نداعب بعضنا ونتحدث بكل ود.. فلماذا قلب الامور على هذا النحو؟ ولماذا الاصرار على اني اهاجم الاخوان رغم نفيي الدائم وتوضيحي لهذه النقطة في المقال؟

لقد حزنت حقيقة حين قرأت هذا الهجوم الغير مبرر في تعليقك "هو انتى كنتى واخده خط الهجوم على الاخوان فمش لاقيه حاجه للاخوان اليومين دول تتكلمى عليها فقولتى يلا امال انا هبطل نقد وشتيمه فى الناس ؟ قمتى جبتى موضوع المشجع اللى ولعوا فيه شوية بلطجيه وبتحملى نادى وجماهيره فعله

هل فعلت أنا ذلك؟ ما دليلك؟ هل تراني أشتم الناس؟ لماذا هذا الهجوم والتهكم رغم ادبي الجم في جميع مناقشاتنا؟ لماذا يا سيدي؟ ارجوك ان تجيبني

تحياتي

Fantasia said...

عزيزتي نسرين

مبروك لمصر يا رينا.. عقبال البطولة ان شاء الله

اشكرك يا حبيبتي على التوضيح.. انا برضه قولت اكيد انتي بتهزي.. لكن قولت هي بتفوول علينا ليه؟

تحياتي يا قمر

haneen said...

يـــا زمالك يا مدرسه فـن ولعب وهندسه

ادينى روحى رياضيه اهوه وبشجع الزمالك وبرفع القبعه لعمرو زكى المناضل والمقاتل واللعيب الكبير قوى بس وربنا يا فانتا الجون اللى جه ببطنه دا كان ببركة دعا الوالدين والجماهير فى ماتش انجولا بس بجد اتمزجت بالجونين بتوع كوت ديفوار لا حقيقى استاذ انتى عارفه يا فانتا اللى خللى المنتخب يفوز وانشاء الله حياخد الكاس انهم كلهم عندهم روح التعاون والاخوه والمشاركه جميله بينهم وهو دا فعلا اللى احنا عايزينه اننا نشجع اللعبه الحلوه وما نتعصبشى لفريق معين والله انا مش من المتعصبين للكوره خالص وبشجع السكه الحديد الا هو لسه موجود نادى السكه الحديد ويا ستى لو مش عاجبك متعب يبقى رئيس وزرا فأنتى عندك حق بصراحه الواد هيس خالص فى البطوله دى يخرب بيته يظهر صحيح البنات جابت داغه
:)

عزيزتى نسرين

انا عمرى ما ازعل منك يا قمر دول غاليين عليا اهل اسكندريه وحمد الله على سلامتك ووصولك لارض الوطن الغالى نورتى مصر واسكندريه منوره بيكى والف الف مبروك لمصر وعقبال يا رب ما يرجعولنا بالكاس
خالص تحياتى واحترامى للجميع

كان معكم حنين من امام الشرفه تشاهد احتفالات الجماهير المصريه فى الشوارع حتى الصباح
فاصل اعلانى

haneen said...

عزيزتى فانتا

نسيت اقول حاجه مهمه
الواد بقى عمرو زكى دا ليه بيلعب حلو كده واكتر من رائع مع المنتخب دايماً لكن لما بيلعب مع الزمالك بيبقى محتاس وحظه بيبقى زفت زى عماد متعب كده مع المنتخب انا نصيحتى ان هو يلعب بعد كده فى نادى الاهلى احسن سؤال برىء يعنى؟

Alexandrian far away said...

الصديقه العزيزه فانتازيا
صباح الخير وتحياتي لك ولكل الصديقات والأصدقاء
أسمح لي ببدء تعقيبي قائلا أنني فعلا أشعر بالأشمئزاز الشديد حين أسمع جمل مثل: أنا اهلاوي أو أنا زملكاوي أو أنا أتحداوي ....إلخ، فالتعصب مبدئيا شكل بدائي من أشكال الوعي، وعي غير ناضج أو مكتمل وغالبا وعي ذو طبيعة طفوليه، وأنا أقصد كل وأي نوع من التعصب، التشجيع الرياضي وهو شىء لا علاقة له بالرياضه حيث عادة ما يمارسه سادة وسيدات بكروش وأجسام مترهله يسرفون في التدخين وألتهام الكوليسترول ويمارسون التشجيع وهم مرحرحين على الكنبه أو على دكك الأستاد، والإنتماء الرياضي أصبح في الحقيقه أعادة أنتاج للإنتماءات القبليه وإن كانت بصورة جديده، وهي تستخدم نفس تقنيات أعلان الأنتماء القبلي من دهن للجسم والوجه ورفع شعار القبيله، وطوطمية رموزها وتقديس أبطالها والغناء الجماعي ....إلخ
بأختصار هي ممارسة لنمط بدائي ومتأخر حضاريا من الوعي البشري
لذلك لا أستغرب ما فعله مشجعي نادي يرفع شعارا فاشستيا واضحا وتمارس فيه هيراركيه وديكتاتوريه تذكر باسوأ أشكال الحكم الفاشيستي

فعل بدائي مارسه بدائيون بوعي بدائي
تقريبا الموضوع أنثروبولجي أو مبحث من بحوث علم التطور
أما الكابتن بتاع الأسئله
فأسمحي لي أجيب عن سؤال واحد
يا أخ الرسول أسس في المدينه
دوله ثيوقراطيه

تحياتي وشكري على الموضوع الواعي

ذو النون المصري said...

انا استغربت جدا من حدث حرق مشجع زملكاوي بعد احدي المباريات
و مش مصدق ان هذا ممكن يحصل فعلا من ناس لديها اي عقل او ذرة شعور
هل معني ما حدث ان التعصب حتي و لو كان لشيء تافه ممكن يلغي الاحساس و العقل تماما لهذه الدرجه؟
الظاهر ان الاجابه بنعم
لكن بالنسبه ايضا للصوره الاخيره فانا رايت صوره اخري اقبح منها و انكي و انكت
الصوره لواحد زي اللوح واقف بساطور و يافطه كاتب عليها بالانجليزي
سوف نقطع رقبة كل من يقول بان الاسلام دين ارهاب
يعني الحمار راح ينفي الارهاب اثبته بغباؤه

مص said...

فعلا مصيبه اللي حصل ده

لكن اه فيلم رد قلبي ده ومصحف ومسدس؟؟؟؟؟

انصح حضرتك بس تقري من اكتر من مصدي بلاش احادية الفكر والرائ دي

مصري للابد said...

فعلا مصيبه اللي حصل ده

لكن اه فيلم رد قلبي ده ومصحف ومسدس؟؟؟؟؟

انصح حضرتك بس تقري من اكتر من مصدي بلاش احادية الفكر والرائ دي


ثانيا هو حضرتك مردتيش علي الجيزاوي ليه لو مش عارفه تردي علي الاسئله مش مشكله قولي متتكسفيش

Fantasia said...

العزيزة حنين

شوفتي بقى سي متعب اللي كنتي عايزاه يكون رئيس وزرا مرة واحدة؟ دا بيتكعبل ف نفسه يا حنين, كان هيشلني.. بس الواد عمرو زكي ده بجد هايل. يا سلام على حماسه وحرفنته. بقى عايزين تضموه هو كمان للأهلي يا ظلمة؟ مش هاين عليكم تسيبولنا نفر عدل نلعب بيه؟ دا انتوا مكويشين ع اللعيبة الكويسين كلهم.. كفاية عصام الحضري لوحده, دا بفريق كامل. طب تجيبوا الحضري وتاخدوا عبد المنصف؟ يعني يا ريت الاهلي يعمل عمل انساني زي ده.. تعاطفك لوحده مش كفاية

ألف مبروك لمصر يا حنين, وعقبال الكاس يا رب. ان شاء الله مصر تكون دايما منصورة, مش ف الكورة وبس

تحياتي يا جميل

Fantasia said...

الاستاذ العزيز اليكزاندريان

مش عارفة اقول لحضرتك ايه عشان أوفي تعليقك الرائع حقه.. فعلا الانتماء لنادي رياضي عندنا بقى زيه زي الانتماء القبلي. مش ممكن كمية الهمجية والاسفاف والتعصب والعنف اللي بيمارس ف الملاعب.. دي مش رياضة خالص
انا من اللي بيحبوا مشاهدة الماتشات ف الملعب, لكن بقيت بتجنب الماتشات الكبيرة وخصوصا الماتشات اللي بيسموها ماتشات القمة, بين الاهلي والزمالك
يعني مثلا تشبيه الفريقين دول بالقطبين, اللي كل المعلقين الرياضين مصممين يقولوه, بيعمق احساس التعصب والعداوة والبعد والعلاقة الضدية. كأن التنافس معناه ان يبقى الفريقين على طرفي نقيض

من أجمل ما قرأت عن حالة التشجيع الرياضي في ملاعبنا هي تدوينة للاستاذ على باب الله.. تذكرتها وانا اقرأ تعليقك المتميز. هذا هو اللينك الخاص بها
http://al-karma.blogspot.com/2007/11/blog-post_19.html

الرؤية هنا من وجهة نظر مشجع متطفل على عالم التشجيع الحالي, يذهب لمشاهدة مباراة في استاد القاهرة ليرى بعينيه ما آل اليه حال الرياضة وحال التشجيع وحال المواطن المصري وحال مصر

هناك دائما اسباب.. لا يوجد شيء من عدم.. حتى وان بدا كذلك

خالص تحياتي

Fantasia said...

الاستاذ ذو النون المصري

اهلا ومرحبا بيك في مدونتي المتواضعة

الظاهر فعلا ان التعصب بيقضي على الانسانية والضمير وأي عواطف سامية

اما بخصوص الصورة اللي حضرتك اشرت اليها, فهي فعلا بشعة, وتعد أكبر دليل على فشلنا ف الدفاع عن هويتنا
انا شايفة ان الغباء هو اصعب مرض بيصيب البشر
نفسي نكتشف دوا يقضي على الغباء
لان ضحايا الغباء حول العالم اكتر بكتير من ضحايا أي مرض تاني

تلاقي اللي كان ماسك الساطور دا مايعرفش يدبح فرخة, لكن الصورة دي طلعته نموذج لشعوب همجية غوغائية دموية ما تعرفش اسلوب تتعامل بيه مع المحتجين غير التقطيع بالساطور

دا واحد غباؤه اضر شعوب بحالها. وللأسف الملايين منهم اللي مش موافقين ع اللي عمله هما اللي بيدفعوا التمن

خالص تحياتي

S H A H said...

جهل و تخلف و تعصب اعمى بجد,
اروح عشان اتفرج على ماتش و انبسط باللعب , ابات في المستشفى محروق بين الحيا و الموت

Fantasia said...

S H A H

شوفت يا عم؟ يرضيك كدة؟ التعصب يفسد أي شيء جميل.. حتى الفرحة

تحياتي

تــــايه ومش تـــايه said...

والله انا تعبت قريت البوست والتعليقات .بس من الواضح ان حضرتك بتعجبك دماغك اوى .بس فى حاج استفزتنى جدا.اسلوبك فى الرد على الحمد الجيزاوى هوا اه عندو اخطأكتير فى التعليق بتاعو .بس هوا مشتمش حد .زى ما ناس تانيه عملت.انا اقصد طبعا الاخت نسرين اللى قالت "الاعلاميين الاهلاويه مستفزين كيك "كلنا طبعا عافين كلمة كيك دى بتدل على ايه او المقصود بيها ايه ومش محتاجه توضيح."عاوزه اعرف بقي مشجعى الاهلى المتخلفين التافهين الفاشيين"وده كمان من تعليق ليها ادتنا كلنا على دماغنا
انا على فكره مش بنتمى لحد لا اخوان ولا ليبرالى ولا عمل انا كل اللى عيشتو 19 سنه ومش بقالى كتير بدخل مدونات لسه الموضع طاقق فى دماغى من فتره صغير.اه انا اهلاوى بس انا معلقتش هنا علشان ارد عن الاهلاويه لان الموضوع تافه خناقه عاديه وناس غلطت ولامزم تتحاسب
بس انتى كنتى واضحه فى تحيزك للنادى اللى بتشجعيه وللناس اللى بتتفق معاكى فى رايك