Monday, September 29

البحث العلمي عند الاخوان


قبل ما أدخل في الموضوع.. عايزة أقول وحشتوني وحشتوني وحشتوني يا أصدقاء التدوين الغالين. آسفة على الغياب الطويل.. وأشكر كل من سأل عني اثناء غيابي

بصوا بقى.. من حريق لحريق يا قلبي لازم تحزن.. ومن انهيار لانهيار (والانهيار عندنا أشكال وألوان ما تتعدش) يا قلبي لازم تحزن.. من كتر المصايب مش عارفة أبدأ منين الصراحة.. لكن أعتقد ان الأولوية هي للمصايب المستخبية اللي بتتم من غير ما حد يحس ومن غير تسليط الضوء عليها في الوقت المناسب قبل وقوع المزيد من الكوارث

عايزة أحذر الجميع من محاولة الاخوان المستميتة للسيطرة على القطاع الطبي في مصر.. طبعا كلنا عارف ان كليات الطب ونقابة الأطباء أصبحوا مرتعا للجماعة المحظورة لممارسة نشاطها ونشر سمومها في المجتمع ككل. الدكتور بما يحمله من احترام وتوقير من قبل المجتمع لعلمه ومهنته الانسانية، بيكون قدوة لناس كتير.. خاصة البسطاء ومن لم ينالوا القسط الكافي من التعليم.. عشان كدة كانت كليات الطب من أول الكليات اللي نابها م الحب جانب في خريطة الانتشار الاخواني وفي قلب خطتهم للامساك بعنق المجتمع

مش عايزة أعيد وأزيد في كلام معروف عن تحرك الاخوان بين الاطباء وفرض سيطرتهم على النقابة.. إللي انتهى بالمهزلة والفضيحة التي لم ترى مصر مثلها في تاريخها الطبي من أيام الفراعنة -مخترعي الطب- وحتى أن دنس شرف المهنة الانسانية الجليلة نقيب الأطباء بقراره الطائفي بحظر نقل الأعضاء البشرية بين المسلمين والمسيحيين

كل ده -بالرغم من فداحته- كوم، وتأميم مناهج كلية الطب لصالح الاخوان المتأسلمين كوم تاني. يعني لما نصحى في يوم نلاقي عصابة الجماعة هي اللي بتحط المناهج المقررة على طلبة الطب يبقى ما ينفعش نسكت لغاية لما المصيبة تقع واحنا مش دريانين

كل ما تتكلم مع أخ صايع من عصابة المحظورة يقولك بكل انشكاح، " احنا معانا دكاترة ومهندسين واساتذة جامعة لمؤاخذة".. كأن يعني دا معناه انه خد عضوية الروتاري يا خي! طب دا هيفيده هو في إيه يعني مش عارفة؟ هيحسن حاله مثلا؟ ما هو هيفضل صايع ومتخلف

ما علينا.. المهم اني كذا مرة أقولهم الموضوع مالوش دعوة بالمهن، المهنة مش هي اللي بتدي القيمة لصاحبها، انما الشخص هو اللي بيدي قيمة للمنصب اللي هو فيه. فين بقى أبحاث العلماء الجهابذ الاخوانجية اللي هتطلعنا الفضاء في ركاب الصين كدة عن قريب؟ ولا حاجة.. ولا أي شيء له أي قيمة تذكر.. مش فالحين غير في الفتي والنصب على البسطاء والسذج

خد عندك عينة من بحوثهم المكوكية الطبية الفقهية السياسية التكتيكية المهلبية الاخوانجية.. بيقولك إيه يا سيدي؟.. قال "رسالة ماجستير: لا يجوز فرض الفحص الطبي قبل الزواج".. شوفتوا الحلاوة؟ مش بقولكم مهلبية ياخواتي

الباحث -اسم النبي حارسه- ساب كل المشاكل اللي في الدنيا والمصايب اللي المصريين غرقانين فيها من ساسهم لراسهم وراح اختار يعمل البحث بتاعه عن عدم جواز فرض الفحوصات الطبية قبل الجواز عشان يا عيني التحاليل غالية!! شوفتوا الابحاث العلمية يا بشر؟ مش تقولي اللي هاريين نفسهم عايزين يكتشفوا علاج للأمراض المزمنة واللي ضيعوا عمرهم في البحث الاجتماعي والاقتصادي.. هو دا اللي هيحل مشاكل مصر يا جدعان.. ليه تدفع أكتر لما ممكن تدفع أقل؟.. شيل العروسة يا عريس بأمراضها يلا بالشفى.. وانتي يا عروسة خدي العريس عمياني كدة ع البركة.. مش بيقولك الجواز زي البطيخة.. والامراض كمان زي البطيخة.. والأطفال يدفعوا التمن ومالوا؟ قدر الله وما شاء فعل يعني.. خلينا ماشيين ع البركة كدة عشان البركة تعم علينا والفيروسات برضه تسترزق

طبعا الأخ الباحث أول واحد البركة حلت عليه.. البحث متمول تمويل متين ونزل في كتاب طباعة فاخرة كمان.. بركاتك يا محظورة!.. ولسة.. ممكن يعملوا منه كتيبات تتوزع مجانا قدام الجوامع بعد صلاة الجمعة.. وأهو الغلابة يوفروا القرشين اللي كانوا هيروحوا للمعمل ويدعوا للأخ الباحث.. وكله بالعلم يا هندسة.. شغل على مية بيضا.. رسالة ماجيستير مش أي كلام.. يعني تقنع التخين

يا انجازاتك العلمية والبحثية يا مصر! ولسة ياما هنشوف بلاوي على ايد اللي ما يتسموش

المهم بقى ان اللي يقرا الموضوع كما ورد على موقع الجماعة يكتشف انه اتكتب بعناية بحيث ان اللي يقرا أي حاجة بعد العنوان ما يفهمش حاجة.. ازاي؟ اقولك

أولا اللي مكتوب في نص الموضوع يتناقض تماما مع العنوان ومقدمة الموضوع
العنوان بيقول "لا يجوز فرض الفحص الطبي قبل الزواج".. والمقدمة بتقول "أكدت دراسة فقهية حديثة عدمَ جواز إجبار الحكومة أو ولي الأمر أي شخص على إجراء الفحص الطبي قبل الزواج من أي مرض، موضحةً أن ذلك افتئاتٌ على الحرية الشخصية، ويسبِّب عدة مشاكل مادية ونفسية تتمثَّل في التكاليف المالية، وكذا خوف المقبلين على الزواج من نتائج الفحوصات وعواقبها على حياتهم؛ مما يدفعهم إلى اجتناب الزواج أو التحايل عليه بالزواج السري أو بشراء الشهادات الطبية التي تثبت سلامة الشخص من العيوب الوراثية أو الصحية بالمال؛ مما يفتح بابًا للمخالفات الأخلاقية التي يرفضها الشرع، ومن ثم تكون هذه الفحوصات اختيارية وليس إجبارية.

طيب انزل شوية بقى، هتلاقي الأخ الباحث بيقولك ان الفحوصات دي خير وبركة ويا ريت تتعمل.. مش كدة وبس، دا الدين الاسلامي بيشجعها ويحث عليها

"وأجازت الدراسة التي جاءت تحت عنوان "الفحص الطبي قبل الزواج والأحكام الفقهية المتعلقة به" إجراء الفحص الطبي قبل الزوج، مع اشتراط الوسيلة الآمنة المباحة؛ وذلك اعتمادًا على التكييف الفقهي والشرعي؛ لأن إجراء الفحص يحقِّق مصالحَ شرعيةً راجحةً، ويدرأ مفسدةً متوقعةً، وليس في هذا مضادٌّ لقضاء الله وقدره.

وينفع الفحص الطبي قبل الزوج، خاصةً في العائلات التي لها تاريخ وراثي لبعض الأمراض ويتوقع الإصابة بها يقينًا أو غالبًا، والمتوقع كالواقع، والشرع يحتاط لما يكثر وقوعه احتياطًا لما تحقق وقوعه.

وأشارت الدراسة إلى أن الفحص الطبي لا يتعارض مع مقاصد الشريعة الإسلامية ولا مع الزواج؛ لأن الزواج من الأصحَّاء يدوم ويستمر أكثر من زواج المرضى، والشرع أوصى باختيار الأصلح والأحسن لتحقيق مقصود الزواج والمحافظة على النسل، خاصةً أن النسل الصحيح لا المريض هو مقصود الشريعة.

وأكد الباحث أن الحكم بالجواز جاء متوافقًا مع القواعد الشرعية الأصولية والفقهية؛ لأنه إن أمكن رفع وإزالة الضرر قبل وقوعه تجنُّبًا للمفاسد فهذا أولى من إزالته بعد الوقوع، خاصةً أن الفحص الطبي قبل الزواج يُعد من العلاجات الوقائية، وقد أمر الشرع الحنيف بالوقاية من الأمراض، وفيه رعايةٌ لمصالح المسلمين، وحرصٌ على أرواحهم ونسلهم.


واستدلَّ الباحث بفتوى المجلس الأوروبي للإفتاء بالجواز في بيانه الصادر في 27 فبراير 2005م.

الله الله الله.. استنوا بقى.. يعني إيه الكلام ده؟ أمال العنوان لزمته إيه؟ والمقدمة اللوزعية دي هدفها إيه؟ والاعتراض أصلا على إيه؟ حد فاهم حاجة؟

اقرا بقى آخر فقرة في الموضوع تحت عنوان "تدريس الفقه للأطباء" عشان تفهم

"وأوصت الدراسة بتضمين مقرّرات ومناهج كليات الطب بالجامعات مادة "قضايا فقهية معاصرة"؛ تهتم بقضايا الطب وعلاقتها بالشريعة الإسلامية؛ حتى يكون الطبيب على علم بأمور دينه ورأي الدين في المستجدات في علم الطب

هو دا يا حبيبي الهدف من البحث.. لا تقولي فحوصات ولا تحاليل ولا معامل ولا عينات.. الحكاية م الآخر فرض وصاية واللبيب بالأشارة يفهم.. عايزين يتدخلوا كمان في المناهج اللي بتتم تدريسها جوة كليات الطب.. حد يقولي إيه علاقة الطب بالشريعة الاسلامية؟.. عايزين يعملوا فلتر يعني م الآخر عشان نتخلف في الطب ونمرض ومانلاقيش حد يعالجنا.. ف الآخر ما نلاقيش غير الدجالين والمعالجين بالرقية الشرعية وبول الإبل.. عايزين يتحكموا في صحتنا ويدمروا التعليم والبحث العلمي عشان يخنقونا أكتر وأكتر ونتخلف وننعزل عن العالم

يا رب نفوق قبل فوات الآوان

22 comments:

Alkomi said...

طولتي الغيبة يا فانتا

اهنيكي بالرجوع و ليا عودة

ألِف said...

الدراسة مقارنة بين الآراء الفقهية يا فانتا، و دي طبيعي و مطلوب في الدراسات (بغض النظر عن أهمية الدراسات الفقهية من وجهة نظري يعني)

من ناحية ثانية دي دراسة فقهية، مش طبية.

رأيي أنا أن الفحص الطبي مهم، لكنه لو تحول إلى شرط إجباري مصاحب لتوثيق الزواج يبقى لازم الحكومة تخليه مجاني.

طبعا كون التحليل إجباري ممكن يكون مفيد لتنوير الناس و إعلامهم بالأخطار المتوقعة على ذريتهم (أو عليهم لو تعبانين و مش هيقدروا يعني :)

لكن لو أصبحت نتيجة الفحص محدد للسماح بالجواز (رخصة جواز من الحكومة) يبقى فعلا تعدي على الحريات.

Fantasia said...

الاستاذ العزيز محمد الكومي


كل عام وأنت بألف خير
معلش طولت عليكم شوية.. سعيدة بمتابعتك للمدونة
أشكرك على تهنئتك الرقيقة وأنتظر عودتك

Hassan El Helali said...
This comment has been removed by the author.
Hassan El Helali said...

فانتا العزيزه جدا

يا الف حمدلله علي السلامه
وحشنا كلامك

مين بقي اللي بيتكلم عن التعدي علي الحريات؟
بالذمه صحيح؟

هو الرساله دي متقدمه لأنهو كليه بالظبط؟
أكيد مش الطب ولا لجامعه فيها بني آدم محترم
يقول للباحث: إجري ياله العب بعيد
ونزعل إن جامعاتنا خرجت من التصنيف العالمي؟

بس العيب مش عليه
العيب علي حكومة بلدنا اللي سايبه المساخيط دول يرتعوا فيها
وسايبه العرعر يشترونا ببلاش
مش حازهق من قولة
يا خساره يا مصر

Fantasia said...

الأستاذ العزيز ألف

يا صديقي كنت أظنك تفهمني أكثر من ذلك
معقولة يعني أنا قصدي كدة؟

أنا لما أدرجت كلمة "طبية" في وصف البحث كان على سبيل السخرية، لأن موضوع "البحث" مالوش أدني علاقة بالتوصيات اللي "الباحث" توصل إليها في النهاية.. مال كليات الطب ومال الموضوع؟

من ناحية تانية، ولو ان دا مش موضوعنا، أحب أوضح 3 نقاط عن القانون ده.. أولا ان نتيجة الفحوص مالهاش دعوة بإتمام الزواج من عدمه.. اجرائها فقط هو اللي وجوبي حتى يكون الزوجين على علم بما قد يحملانه من أمراض

النقطة التانية هي ان الفحوص بتجرى في المستشفيات والوحدات الصحية الحكومية (وهذا شرط في القانون) وتتكلف 70 جنية فقط! وأظن ان مجتمع مصاب بداء البذخ لحد السفه في الاحتفال بالزواج المفروض يختشي على دمه قبل ما يقول ما أقدرش أدفع 70 جنيه.. خصوصا لما يتعلق الأمر بصحة الزوجين ونسلهم

النقطة التالتة هي ان القانون ده هو بند من بنود قانون الطفل الجديد.. وحضرتك عارف ان الجماعة المسمومة اياها كانت متربصة للقانون ده من الأول.. وأنا اشرت للموضوع ده قبل كدة في مقال عن الختان وموقف الجماعة من منعه

لو بقى هنقيم البحث من وجهة نظر علمية بحتة، فهو بحث غير مترابط وغير واضح الأهداف. ممكن حد يلخصلي الهدف من البحث ده في جملة مفيدة؟ طب ممكن حد يفهمني إيه علاقة التوصيات بموضوع البحث لو هدفه فقط هو عمل دراسة مقارنة؟ ممكن أفهم إيه علاقة مناهج كليات الطب.. وهي كليات علمية عملية.. بقانون مدني هدفه حماية حقوق الطفل؟

لأ واللي مجنني ان الباحث أكد عدم تعارض الغرض من هذا القانون مع الشريعة الاسلامية. يعني حتى لو الموضوع كله تلكيكة فهي تلكيكة خايبة وفاشلة

أرجو ان الصورة تكون وضحت أكتر

خالص تحياتي

Fantasia said...

الاستاذ العزيز حسن الهلالي

الله يسلمك يا هلالي.. والله انتم اللي وحشتوني
أنا برضه قولت مال المدونة نورت كدة ليه

هو أنا الصراحة وأنا بكتب الموضوع فكرت في كل اللاسئلة اللي حضرتك تفضلت بيها ووصلت لاجابات تخلينا قدام واقع مخيف

التوصيات اللي خرج بيها الأخ اللي قدم الدراسة إياها دي لوحدها المفروض تخلي البحث كله يترفض ولا تمنح له الدرجة العلمية.. دا يعني لو فيه أي قواعد للبحث العلمي في مصر

أنا مش مستغربة ان الجامعات المصرية خارج التصنيف العالمي.. دا شيء منطقي جدا ومتوقع.. وأي واحد يقول إنها كانت صدمة أو ان دا نوع من الاضطهاد أو الكوسة في وضع التصنيف العالمي ما هو إلا منافق حقير، ينافق من تتسببوا في انهيار التعليم في مصر

حكومة بلدنا مش متوقع منها غير الطناش.. لأن الحكومة كلها مسخرة-بضم (وفتح) الميم- للحفاظ على الوضع كما هو عليه.. لا توجد نية للتنمية ولا توجد معايير واضحة تحكم المنظومة التعليمية في مصر. المهم ان كله يدي التمام عشان يفضل في كرسيه.. والكل عايز ياكل عيش

بيئة مثالية لتكاثر جرثومة التخلف.. خاصة في ظل وجود بؤرة تعمل على نشر المرض

صحيح خسارة وألف خسارة

Alkomi said...

بصي يا فانتا

يستمر الاخوان دائما في اخونة و تضليل اي واقع

هم فقط يريدون من الحياة العصرية الديمقراطية الى ان يصلوا الى قمة المجتمع و هو الحكم و عندها بقى يبقى يطلع دكر يفتح بقه و هيلبس تهمة عيب في الذات الاخوانية

و تبقى واحدة بني ادمة كدة راضعة من مامتها على حق تمشي من غير خيمة

هما دايما كدة بيمسكوا في الهايفة و يسوقوا الناس عالهيافة وراهم

على راي الراجل الاعمى الشيخ حسني في فيلم الكيت كات

الراجل الاعمى اللي شاف اللي الناس كلها شايفاه و مش قادرين يفضحوه و هو فضحوا

يرضيك اللي بيحصل ده يا شيخ حسني

اهي حاجات غريبة و السلام

في ايه يا شيخ حسني

لا ماتاخدش في بالك دي عالم وسخة

فكبري دماغك يا فانتا هما خلاص بيستنفذوا رصيدهم الوهمي في الشارع

ابتدوا السحب عالمكشوف

قصدي اللعب عالمكشوف

Alkomi said...

حاجة كمان

انا مش استاذ ولا حاجة

انا 25 سنة بس يعني في احتمال اكون اصغر منك و لو كنت اكبر منك اكيد مش هيكون كتير لدرجة تقوليلي استاذ

قشطة

سلاموووووووووووووووووووووز
بالمووووووووووووووووووووووز

Fantasia said...

الاستاذ العزيز محمد الكومي

أيوة مصرة على استاذ بقى.. والموضوع مالوش دعوة بالسن

المشكلة يا صديقي ان فيه ناس كتير عملوا زي ما انت بتقول واعتمدوا على ان دجل الاخوان يحمل من السفاهات ما هو كفيل بهدمه.. لكنهم تناسوا أن مصر تعاني من أزمة ثقافية بشعة.. وزاد من هذا غياب دور الدولة تماما وتخليها عن مسؤوليتها تجاه التعليم وتثقيف العامة

يعني مثلا الموضوع اللي أنا بتكلم فيه ده واضح جدا إنه شيء لا يقبله عقل ولا منطق.. ومع ذلك هذا الخرف استطاع في ظل التخلف الذي نعيشه أن يمنح من كتبه درجة الماجيستير وهي درجة علمية.. ودي المصيبة. الأخ ده بكرة هيدرس ولادك وولادي في الجامعة.. ساعتها هنعمل إيه؟ هنقول نسيبنا منه برضه؟

الحاجة التانية هي انك هتلاقي ناس ومنهم اللي المفروض متعلم لكنه لن يتوقف عند شيء مثل هذا.. وهيقولك "وماله، ما يدرسوا فقه في الطب"! لما دا يكون الوضع يبقى لازم انزعج واتكلم واصرخ بأعلى حسي عشان الناس تفوق

هو انت فاكرني غاوية تعب قلب؟ بس اللي الكل مطنش عليه انهاردة بكرة هينفجر في وشنا كلنا

وبمناسبة الأفلام.. عجبني جدا المشهد قبل الأخير في فيلم "حين ميسرة" لخالد يوسف.. حين تنبأ بتفاقم مشكلة العشوائيات حتى تحولت إلى قنبلة لتنفجر وتدمر المجتمع. واسم الفيلم "حين ميسرة" له دلالة هامة تعبر عن جنوح المصريين دوما إلى اهمال المشكلة وازاحتها أو ترحيلها ظنا منهم أنها ستختفي من طلقاء نفسها.. كما يعبر أيضا عن اسلوب تعامل الدولة والنظام السياسي مع المشاكل التي تعاني منها مصر

للأسف مش هأقدر أكبر دماغي.. لأني غير مستعدة لدفع التمن إذا خسرت بلدي.. عشقي الأبدي الذي يجري في دمائي

Desert cat said...

الزيزة فانتا
الف حمد الله على سلامتك نورتى الدنيا كلها
ويارب اجازة سعيدة
الاخوانجية يا عزيزتى يتفننو فى الدخول لجميع المجالات وبالاخص المجالات المهمة ليس لبث سمومهم فحسب بل ولكيون لهم الكلمة والمسيطرين على زمام الامور
وطالما مازال هناك من الجهلاء من يصدقهم القول ويسير على خطاهم فمن الان وصاعد نتقبل التعازى فى مصر التى كانت منارة للعلم والمعرفه
ما علاقة الفقه بالعلم ؟؟
اهذا الباحث يتبع هراءات زغلول النجار فى بحثه
ماذا لو دخلت اليه سيدة تضع جنينها وهى فى اسوء حالتها .. سيعتذر بحجه لا يجوز

الله يرحمنا من فكرهم
مودتى واحترامى

egy anatomist said...

المشكلة الأكبر في رأيي، فانتا هانم، هي ان الاخوان المسلمين - كحركة معارضة سياسية في الأصل والأساس - بتهدر طاقتها في النضال الأيديولوجي، في حين أن الوطن يحتاج منها - إذا صح ادعاؤها للوطنية - إلى أن تتفق مع باقي أطياف المعارضة على كلمة/كلمات سواء وعلى أرضية مشتركة تمكنها جميعا - المعارضة - من تحقيق حد أدنى من المكاسب السياسية الحقيقة للقوى الاجتماعية المصرية

يعني ايه

يعني شباب وشابات الجماعة - وغيرهم من المتأثرين بفكرهم دون أن يكونوا أعضاء مسجلين - يكملوا ضغط على جماعتهم من أجل أن تتحرك سياسيا بجد .. من أجل أن تركز على مساحات اتفاقها مع باقي المعارضة وتتناسى اختلافاتها السفسطائية الوهمية

يعني بدل الكلام الفاضي والابحاث البلهاء التي يضحكون بها المجتمع المدني والعالم كله عليهم .. يروحوا يعملوا جبهة معارضة موحدة وتعلن عن رغبتها في عقد لقاء مع رئيس الجمهورية من أجل بحث مستقبل الرئاسة في مصر عام 2011 (وهو قريب لو تعلمون) .. بدل ما يفضلوا يقرفوا المجتمع بسلفيتهم وأفكارهم التابوتية المحنطة يروحوا ينسقوا مع قوى المعارضة (لو صح وصفها بقوى) عشان انتخابات 2010 البرلمانية

برلمان 2010 هوه اللي هينتخب الرئيس القادم لمصر (سواء كان الرئيس مبارك أو غيره) .. والوقت بيقرب من عملية كبرى ستتم في البلد والاخوان مشغولين بالاستيلاء على المجتمع وتسميم أفكاره .. كل ده ليه؟ من أجل تحجيب الفتيات وتلحية الرجال وخلاص؟ من أجل إقامة مجتمع الفضيلة الإسلامي كما يتصورونه؟ المشكلة إن المجتمع في مصر مالوش قيمة أصلا ومش هينفع الإخوان في الوصول للحكم . وطول ماهم مش عايزين يدفعوا ضريبة الدم والنار عشان يدافعوا عن حقوقهم السياسية هيعيشوا كده: جماعة شبه سرية تعيث ظلاما (وهو أسوأ من الفساد) في مجتمع شبه أعمى

..

حمدالله على السلامة .. اشتقنا لكتاباتك وخبطاتك الصحفية :) وكل سنة وانتي طيبة

karakib said...

بتتكلمي و كأنهم مش متدخلين فعلا في المناهج و من اولي ابتدائي كمان
هو مين اللي اعد المناهج الدراسية في عهد عبد الناصر ؟؟ اسمه معروف اوي

Fantasia said...

العزيزة جدا قطة الصحراء

هي المشكلة فعلا يا قطة في الجهلاء اللي بيسيروا على خطاهم دول.. بقى يا ناس فيه حد يكون عنده ربع عقل يمشي ورا هرتلة الاخوانجية؟ وبعدين إزاي توصل بيهم الوقاحة إنهم يتخيلوا ان اقتراح زي ده ممكن يقنع أي حد.. حتى لو حطوه في رسالة دكتوراه! هي الرسايل اللي بيسلكوها لبعض دي ليها أي علاقة بالبحث العلمي أصلا؟ دي ما تستاهلش الحبر اللي اتكتبت بيه

بس الناس البسيطة ما تعرفش ان نظام التعليم عندنا طلعله قرون على آخر الزمن وبقى بيسمح ان المهازل دي تمر من عليه. منهم لله اللي كانوا السبب

نورتيني يا قطة

Fantasia said...

الأستاذ العزيز ايجي اناتوميست

كل سنة وحضرتك طيب وبألف خير

والله التعليق بتاع حضرتك ده خسارة في جماعة حلق حوش دي. يا سيدي الفاضل ما تقوله هو غير وارد بالمرة في خطة عمل هذه العصابة. دول الاخوان المنتفعون، ولا يوجد لديهم أي شيء يقدمونه لخدمة المجتمع أو أي اضافة للحياة السياسية المصرية

كل ما يجيدونه هو لعبة الثلاث ورقات. فين السنيورة؟ مفيش. المهم تبرجل اللي قدامك وخلاص. يقعد يا عيني يدور على وهم مالوش وجود. السفسطة الايدولوجية دي من عدة النصب ليس إلا.. لعبة الايحاء او التنويم التي يمارسها صاحب اللعبة لاستغفال الزيون

يا سيدي، خطة الاخوان تهدف بالاساس إلى تغيب وعي الشعب المصري، ومن ثم فتخريب الواقع أكثر وأكثر هو في صلب منافعهم. لازم الناس تفقد الأمل تماما في الواقع وفي العلم وفي التفكير المنطقي، حتى يسهل لهؤلاء السيطرة في ظل الشعور العام باليأس والاحباط وعدم جدوى أي شيء، ويبدأ الاستسلام للغيبيات والحلول الخارجية وبركة شيوخ الجماعة اللي هتفك العقد

لا يصح ان ندرج هؤلاء ضمن المعارضة المصرية.. التيار السياسي المعارض في مصر كان دوما شريفا ومخلصا للوطن، إلى ان دخل ثعبان الاخوان ليبث سمومه في الحياة السياسية ويفسدها ويخرب المعارضة، التي للأسف تحولت هي الاخرى إلى جماعات مصالح، بوق ينهق ويسود الواقع دون تكليف انفسهم أي عناء في البحث عن بدائل حقيقية أو حلول عملية لانقاذ الوطن وخدمة هذا الشعب الذي يتاجر به الجميع ويتلاعب بمستقبله

لقد وصتفهم وصفا دقيقا يا سيدي حين قلت بأنهم "جماعة شبه سرية تعيث ظلاما في مجتمع شبه أعمى

خالص تحياتي وتقديري

على باب الله said...

صحيح أيه علاقة كلية الطب بالكلام ده ؟
و لا هي أصل كل الطرق تؤدي إلي روما ! يعني كل الطرق تؤدي إلي خانة اليك

قصدي خانة الدين

ربنا يستر و ما يحصرناش الإخوان و أمثالهم في الخشب علشان ساعتها ها يبقي دور الطاولة ده خلص

Fantasia said...

الأستاذ العزيز كراكيب

تدخلهم في المناهج السبب الأساسي فيه هو مغازلة النظام السياسي لهم واستفادته من نفس اللعبة اللي بيلعبوها. هما مش أقوى من سانجام زي ما بيحولوا يصورولنا عشان يتدخلوا مباشرة في وضع المناهج. عبد الناصر كان فكر بالفعل يدخل الجماعة عشان كان فاكر ان فيه منهم رجا وانهم ضد الانجليز، لما لقاهم مش بتوع انقلابات وبتوع مؤامرات وأكلان دماغ راح سابهم وعمل الثورة بالجهود الذاتية مع زمايله في الجيش. إنما فضل يدلعهم لغاية ما اتقرص منهم في محاولة الاغتيال. ومع ذلك، وحتى بعد انقلابه عليهم، ففكرة استغلال الدين في السياسة هي فكرة مغرية جدا لأي ديكتاتور. لا يستطيع ان يقاومها. وبما أن الحكم الديكتاتوري يعتمد على تسخير الشعب والتحكم في العقل الجمعي كركيزة لضمان استمراره، فاقحام الدين كأداة من أدوات السيطرة على مقدرات الشعوب هو من الأدوات المفضلة والعلامات المميزة لكل الانظمة الاستبدادية

خالص تحياتي

Fantasia said...

الأستاذ العزيز على باب الله

افتقدت تواجدكم كثيرا. أين أنت يا استاذنا العزيز؟

حضرتك جبتها م الآخر.. هما عايزين كل الطرق تتحول لحارة سد مفيش فيها غيرهم.. إنما الدين مالوش دعوة بالموضوع . مجرد يافطة للتمويه

الدور لسة في أوله يا سيدي الفاضل. خلي نفسك طويل

خالص تحياتي

أبو مسلم السفاح said...

كان لازم تقولي صايع من الاخوان!!!اوووف
فانتازيا
النقطة التانية هي ان الفحوص بتجرى في المستشفيات والوحدات الصحية الحكومية (وهذا شرط في القانون) وتتكلف 70 جنية فقط! وأظن ان مجتمع مصاب بداء البذخ لحد السفه في الاحتفال بالزواج المفروض يختشي على دمه قبل ما يقول ما أقدرش أدفع 70 جنيه.. خصوصا لما يتعلق الأمر بصحة الزوجين ونسلهم
______________
فحص ايه ابو سبعين جنية دا في مصر ؟
اخر حاجة الدكتور هيحط السماعة على قلب المريض و يقوله يالا روح اتجوز
قال مستشفيات و وحدات صحية حكومية قال
العالم دي بتشتغلنا ولا ايه

انا مسمعتش ان الواد فى اوروبا لما بيحب يعاشر الجيرل فريند بتاعته بيقولها يالا على الدكتور الأول

starfish said...

i disagree with your opinion.
making pre-marriage compulsory checkup is unheard of around the world...
so why in Egypt?
i'm talking about compulsory tests..
but if anyone wishes to have a checkup, he/she is free to do so , actually i would encourage him/ her to do so ..
but not compulsory...

secondly
about your the last bit in your post
"وأوصت الدراسة بتضمين مقرّرات ومناهج كليات الطب بالجامعات مادة "قضايا فقهية معاصرة"؛ تهتم بقضايا الطب وعلاقتها بالشريعة الإسلامية؛ حتى يكون الطبيب على علم بأمور دينه ورأي الدين في المستجدات في علم الطب

doctors all over the world (not in Egypt) are taught ethics (and ethical dilemmas )relevant to the kind of patients they will deal with .
and in Egypt , with the majority of Muslims, i think it would be important to know what is okay and what is not to offer to patients

I'm saying this , because if you are a doctor , and you went to work in the USA in an area where the majority of the residents are Muslims , they will definitely teach you how to deal with them including religious beliefs ..so you wont' offer them , for example , insulin obtained bigs....and so on.., they will teach that shaking hands with women might sometimes be considered rude..there are loads of other examples...

so, it is basic that doctors in Egypt should learn about religion and medicine.



regards

مهندس مصري بيحب مصر said...

البحث اصلاً في كلية شريعة و قانون فرع دمنهور - جامعة الأزهر
يعني مش في طب خالص

ثانياً الباحث بكل بساطة بيبحث في حاجة محددة من الناحية الشرعية و الفقهية
هل إجراء الفحوص دي إجباري و لا إختياري
و توصل بعد الدراسة الفقهية لآراء علماء الدين المختلفة إنه ليس إجباري و لكن يفضل عمله
و يجب توعية الناس بأهمية هذه الفحوص و حثهم على عملها و ليس إجبارهم

و هذا خلاصة ما فهمته من اللينك اللي محطوط في البوست

و ملقيتش كلمة في الموضوع بتقول إن الباحث إخواني
و لا علشان الموضوع منشور في موقعهم ؟
يمكن البحث عاجبهم او شايفينه مهم من وجهة نظرهم لكن لو من تبعهم كانوا قالوا
و لا ايه ؟

ابو احمد said...

العزيزه فانتازيا
وحشتينا جدا ووحشتنا مقالاتك
انا المره دى معدى بس اسلم عليكى
تحياتى وصادق مودتى