Monday, January 7

يا صباح الوحدة الوطنية


كل سنة وكل أصدقائي الأقباط بخير.. لأ وكمان كل سنة ومصر كلها بخير. فاليوم هو مولد سيدنا عيسى عليه السلام, كما قالت الكاتبة الرائعة ليلى تكلا. كان نفسي أقول كلام مبهج بالمناسبة السعيدة دي. لكن أنا حاسة إن الكلام اللي هأقوله أهم, وممكن يكون هو أحسن كلام يتقال ف الوقت ده.. الوقت اللي بقت فيه وحدتنا الوطنية مهددة بسبب عدد قليل من الناس اللي للأسف صوتهم علي.. أعلى من أصوات الأغلبية المحبة والمعتدلة. أنا بالبوست دا بتطهر من ذنب غيري من المصريين المسلمين, اللي بيسيئوا لينا كلنا وللإسلام بتعصبهم وطائفيتهم. مش معنى كدا إن مفيش لوم بيقع على الجانب الآخر, على المصريين المسيحيين, اللي فيهم برضه نفس المشكلة. لكن أنا هتكلم عن الجانب اللي يخصني.. وأملي إن هديتي لكل المصريين ف العيد تكون نواة صغيرة للتصدي للطائفية في بلادنا

انتوا عارفين المشكلة ف ايه؟ المشكلة إن الناس حاسه ان مالهاش قيمة. هيا دي المشكلة. التعصب مالوش مكان في المجتمعات المنتجة الناجحة والمتعلمة تعليم سليم

علشان مخرجش بره الموضوع, عايزة أقول إن فيه حاجات كتير أوي حصلت عندنا وهي اللي خلت احساس ناس كتير بقيمتهم يتضاءل، وممكن يتلاشئ كمان. تهميش دور الناس في المشاركة السياسية، إهانة المواطن في المواصلات والمصالح الحكومية، الفقر والجهل، البطالة، المحسوبية والكوسة، تهميش دور المرأة، انعدام جودة التعليم، سوء استخدام السلطة والفساد. كل ده يخلي الناس تحس ان وجودهم مالوش قيمة. بيفقدوا احساسهم بالمشاركة وإن ليهم دور فاعل في الحياة. (طبعا ضيفوا لده احساس الهزيمة في 1967 اللي للأسف لسه عامللنا عقدة)

من هنا بدأ الناس يدوروا على حاجة تحسسهم انهم مهمين، وان وجودهم بيخدم هدف. تصادف ده مع إن فيه جيران لينا في المنطقة اغتنوا من الدهب الاسود اللي اكتشفوه هناك. وتصادف ده برضه مع صراع طاحن بين القوتين العظمتين أمريكا والاتحاد السوفيتي. وتصادف برضه مع توجه جديد في السياسة المصرية الداخلية

المهم، في حالة الضعف اللي كنا فيها، ومازلنا بنحاول نطلع منها، جيراننا الأغنيا كانوا عايزين تنمية وعمار وتعليم, قاموا خدولهم شوية من عندنا. أمريكا كانت عايزة تضرب الاتحاد السوفيتي وتوقفه عند حده عشان خوفها من خطر الشيوعية. فخدوا من عندنا ومن جيراننا شوية ناس كمان عشان يحاربوا السوفييت ويطلعوهم من أفغانستان. اليسار المصري كان ابتدا يقوى وكان فيه تيار شيوعي فاعل في مصر، ودول كانوا مضايقين النظام الحاكم وقتها شوية. فقالوا نجيبلهم اللي يقدر عليهم، طلعولهم الإسلاميين علشان يكفروهم ويقضوا على وجودهم

معايا ولا تهتوا مني؟

المهم كل ده عمل نشاط في صفوف الإسلاميين وقتها. نرجع لجيرانا بتوع الدهب الإسود بقى.. النظام الملكي بتاع جيراننا هيفضل ازاي بعد مالشعب هناك يبقى غني ويتعلم ويشوف بلد فقيرة زي مصر عندها رئيس منتخب (المفروض يعني)؟ ممكن أوي الشعب ده يعمل تغيير سياسي ويشيل العيلة المالكة دي. طيب يعملوا ايه؟ قالولك الدين بيقول طاعة ولي الأمر. الديمقراطية دي اختراع غربي, تبع الشيوعين الكفرة اللي فيه ناس من عندنا راحو يجاهدوهم في أفغانستان. وبعدين احنا عندنا أماكن مقدسة، لازم نحافظ على استقرار البلد علشانها. واحنا اللي ماشيين بشرع ربنا، حد يقدر يجيب نظام سياسة أحسن من شرع ربنا؟ وقام الملك بتاعهم كمان قالك يغير اسمه عشان ملك دي برضه مستفزة شوية. قالك اسمي نفسي خادم الأماكن المقدسة دي

طلعت بقى حملة شعواء لإحياء عصر الخلافة. مع ان العائلة المالكة دي مالهاش دعوة بالخلافة. بس قالك أهو أي حاجة غير الجمهورية والانتخابات. هوووب جابوا كل الكتب القديمة ودفعوا فلوس كتيرا أوي للشيوخ اللي يقدروا يقنعوا الناس بالكلام ده. وفيه ناس من الأزهر عندنا راحوا في بعثات هناك علشان أكل العيش، لكن هناك أقنعوهم بنظرة تانية للدين، من خلالها الدين يقدر يتحكم في حياة الناس. مفيش خلاص موضوع الدين في القلب وبيني وبين ربنا. لأ, لازم تورينا إنك مؤمن بجد. لازم نشوف أمارة. يعني انتا يا فلان قريت التفاسير دي ودي ودي؟ شفت بقى إنك ماكنتش عارف ربنا ولا حاجة؟ احنا بقى يا حبيبي نقولك ربنا عايز ايه

بس يا عم.. وهاتك يا غسيل مخ من اللي قلبك يحبه. هوووب الازهر حاله اتقلب. بعد ما كان بيطلع مظاهرات سياسية (اللي هي بتاعة يحيا الهلال مع الصليب اللي بتشوفيها في الأفلام القديمة دي) وبيوعي الناس بأهمية التحضر والتقدم.. وبعد ما رموز الأزهر كانوا بيقودوا حركة التنوير في مصر.. بقوا خير اللهم إجعله خير يقولولك ارضاع الكبير, ويمنعوا كتب، ويحاكموا الناس بالحسبة زي محاكم التفتيش بتاعة القرون الوسطى

والناس اللي زي العسل، ولاد البلد الجدعان، اللي راحوا يعمروا المخروبة بتاعة جيراننا علشان حوجة لقمة العيش، اتغسل مخهم هما كمان. كان الواحد منهم ميعرفش زميله اللي قاعد جنبه في مصر ديانته إيه. ومكانتشي تفرق معاه. كان كفاية إنهم كلهم مصريين وجدعان، وقلبهم على بعض. رجعوا الجدعان شايلين المراوح والمكوة الكهربا، ولازم مصحف طبعا، لكن للأسف مصحف تاني غير اللي كانوا يعرفوه

المصحف اللي كانوا عارفينه في مصر كان بيحببهم في كل خلق الله. كان بيقولهم ان البشر كلهم واحد, مهما كانت الاختلافات بينهم. لكن لما قعدوا سنين في مجتمع بيفتش على هدوم الناس قبل ضمايرهم، نسيوا أصحابهم الجدعان. ماهو أصل مفيش هناك غير لون واحد ودين واحد وعيلة مالكة واحدة. مفيش حاجة اسمها اختلاف. حتى الستات ميتعرفوش من بعض, كلهم خيم سودة

واللي كانوا حبايب النظام ضد المعارضة اليسارية والشيوعية قلبوا عليه لما راح يصالح اللي احتلوا أرضه، وقتلوا الراجل اللي طلع القيادات بتوعهم من المعتقلات. بعد كده قالولك وماله لما احنا كمان نحكم. يا سلام! ده احنا ناس بتوع ربنا

طيب الدستور والديمقراطية والمساواة؟

طبعا الاجابة معروفة: هوه فيه دستور بعد كلام ربنا يا كفرة؟

طب اشمعني انتوا اللي تحكموا؟

عشان احنا في بلد معظم الناس اللي فيها مسلمين. مش الدستور بتاعكم بيقول الإسلام الدين الرسمي للدولة؟

أيوه بس انتوا مش عاجبكم الدستور ده. هتمشوا على كلامه ليه؟

الضرورات تبيح المحظورات يا أخي! وبعدين دا انت المفروض تشكرنا. دا احنا هندخلكم الجنة. مش احسن ماتفضلوا في الضلال المبين اللي انتوا فيه؟

ضلال مبين؟! طيب ومشاكل البلد؟ الفقر والبطالة والعشوائيات والمرور والمجاري؟
الإسلام هو الحل

طبعها لازم الدخلة تكون شيك. لازم الناس متحسش اننا طمعانين في حكم وللا كلام من ده. لازم الناس هم نفسهم اللي يقولونا لو سمحتم تعالوا احكمونا

طيب ازاي؟ دا انتوا مش هتسمحوا لحد مسيحي انه يشارك في الحكم. وكمان عايزين ترجعوا عصر الخلافة. يعني اللي مش مسلمين هيدفعولكم جزية! مين هيوافق على كده؟

يا أخي الكترة تغلب الشجاعة. لو معانا الأغلبية محدش هيقدر يمنعنا

طيب ازاي الأغلبية هيوافقوا علي كده؟

والله احنا مش مستعجلين.. يعني واحدة واحدة كده هنقنعهم ان ديننا ده احسن دين، وان الناس اللي مش على ديننا دول في ضلال ومصيرهم جهنم وبئس المصير. ومش ممكن واحد يحكمنا يكون في ضلال

بس دول بينهم عشرة وتاريخ ومودة واخوات في وطن واحد! ازاي تقنعوهم بالكلام ده؟

بسيطة.. احنا بعد ما ننشر الدعوة بالكلام ده، نخليهم يقعوا في بعض. نقول اشاعة هنا، نرمي كلام هنا, نعمل مشكلة هنا، نقوم ناس عليهم هنا.. الخ الخ
أيوه بس ده حرام! دا كده البلد تخرب، والشعب الواحد يبقى مقسوم فريقين! هتحكموا البلد ازاي وهي بايظة كده؟

احنا بقى هنبني البيت من جديد. وبعدين في سبيل عودة الدولة الإسلامية مفيش حاجة اسمها حرام. واللي مش هيعجبه حكم ربنا يرحل

يرحل؟! يانهار اسود! يسيب بلده اللي جدود جدوده عاشوا فيها عشان انتوا تبرطعوا فيها زي مانتوا عايزين؟

أيوه. احنا لينا حق تاريخي يا أخي. البلد دي ضمن فتوحات المسلمين. كون بقى الخلافة سقطت في عصر من العصور، ده ميغيرش الواقع. يعني لو مكانتش الخلافة سقطت كانوا هيعملوا ايه؟

انتوا هتعملوا بقى زي الصهاينة اللي عايزين أرض الميعاد باعتبارهم شعب الله المختار. ده بعدكم. احنا مصريين. شاربين من مية النيل. كلنا ولاد بلد. وكلنا إيد واحدة.

ده كان زمان يا حبيبي. بكره تشوف ان الناس دول ممكن يغيروا جلدهم زي التعابين. احنا مش بنلعب يا بابا. احنا عارفين بنعمل ايه. وعارفين الناس دي دماغها عاملها ازاي. فيه حد مش عايز يبقى أحسن واحد في الدنيا؟ فيه حد مبيحبش يفتكر انه أفضل من التانيين؟ فيه حد يقدر يقاوم انه هو بس اللي معاه الحق والباقيين على باطل؟ فيه حد ممكن يرفض إنه يأمن لنفسه مكان في الجنة وهو على الأرض؟ الناس اللي بتتكلم عليهم دول ممكن يبيعوا أي حاجة عشان يعيشوا في الوهم الجميل ده. ناس محبطة ويائسة وحالها كرب. هيقعدوا بقى يفكروا في أخوة ووحدة والنيل رواه والخير جواه؟ احنا عارفين نقطة الضعف فين، ولازم نستغل الفرصة. هم بقى لو شطار يطلعونا غلطانين. تراهن يا كابتن يا بتاع الوحدة اننا هنكسب؟


أنا عن نفسي بقى، فانتازيا، بقول الله لا يكسبهم. لكن معرفش ليه فيه ناس غيري كتير خايفين يقولوها صريحة كده. ماهو مينفعش نفضل مطنشين وكل إسفين وأخوه عمال يندق بيننا. حتى لو فيه ناس من جواها مش موافقة على اللي بيحصل، دا مش كفاية. فين كلمة الحق؟ فين الجهاد اللي بجد عشان أهل البلد دي, اللي بنوا زمان أول حضارة في التاريخ, يفضلوا يبنوها سوا ويحبوها سوا، لانها بجد تستاهل. والله ما تستاهل اللي بيحصل فيها ده! ولو تعبت شوية، أو ضعفت شوية، نستحملها.. علشان مالناش غيرها وواجب علينا نساعدها سوا لما تكون محتاجالنا.. مش نقعد نتخانق مين فينا اللي أحسن وللا مين اللي غلط في حق التاني زي العيال.

عارفين مسرحية العيال كبرت؟ أهو أنا نفسي نعمل اللي العيال عملوه. لما البيت كان هيتهد نسيوا الخلافات اللي بينهم، وبقوا ايد واحدة عشان يحافظوا على شمل عيلتهم. بس للأسف فيه ناس عندنا محصلتش حتى العيال!

أنا شخصيا شايفة إن أي تقليل من حق المسيحيين هو تقليل من حقي أنا كمان. مش معنى إني مسلمة يبقى أنسى أصلي وفصلي. أنا اللي بيحمعني بماريا صاحبتي أكتر مليون ألف مرة من اللي بيجمعني بأي واحدة مسلمة في باكستان. يعني هي بلدها (االلي هي ف الأصل جزء من الهند) اتقسمت بسبب التعصب، أقوم أنا بقى أسأف وأقول برافوووو. إيه قوة الإيمان دي؟!

لو حد أهان مصري مسيحي يبقى بيهيني أنا شخصيا. ولو هو مصري يبقى بيهين نفسه. احنا كلنا جدودنا كانوا مسيحيين. ازاي أنا أهين معتقدات جدودي اللي هما سبب وجودي في الحياة؟
عارفين زي ايه بالظبط؟ زي الناس اللي النهاردة بينتقدوا الستات اللي مش محجبات، وبيتقال عليهم متبرجات وكاسيات عاريات وكلام كده. مش معنى إني أتحجبت أقوم أغلّط اللي ميعملش زيي. أنا لو قلت الكلام ده أبقى بشتم أمي وجدتي. كام واحدة من اللي بيقولوا الكلام دا كانت جدتها محجبة؟ ازاي تقبل انها تحكم على سلوك جدتها بالشكل ده؟ لأ وكمان بقى المفروض إن جدي الشيخ الله يرحمه كان ديوث، علشان محجبش مراته ولا واحدة من بناته، اللي أمي واحدة منهم! دا إيه الجمال ده؟! ايه التربية والأخلاق الرفيعة دي؟

يا ريت الناس اللي بتكرر كلام سمعته، تفكر ولو كام دقيقة هم بيهينوا مين بالظبط. هو يعني الاحتلال مقدرش علينا, نقوم احنا بقى نعمل اللي الاحتلال مقدرشي عليه؟ ده مش غسيل مخ لا مؤاخذة. دول رموا حاجات مش نضيفة في دماغنا.. ده لو لسه عندنا دماغ يعني.



اللي مزهقش من كل الرغي ده يا ريت يشوف البوست ده عند مصرية.

هذا البوست مأخوذ من تعليقي على بوست في مدونة
إيمي وكوكا

45 comments:

EmY said...

لقد صبأت فانتازيا و اتبعت الدين الجديد انتي جاسوسه خاينه ازاي تتجراي و تقولي المسلم زي المسيحي
هاتشوفي الويل و الثبور و عظائم الامور ايتها الاخت الضااااله

تعرفي انا عمري ما سألت حد عرفته انت دينك ايه و انا مالي بدينه دي مسأله خاصه جدا بين العبد و ربه مسلم مسيحي يهودي ليه دينيه و طقوسه و هو حر في ديانته شيء لا يخص اي حد غيره

بس للأسف في ناس مايعجبهاش كده اصل مصر تورته لازم نقسمها بالعدل الي بيقول المسلم و المسيحي ياكلو بعض و التورته ياكلها حد من برا

للأسف كل متعصب حاطط لبانة قال الله و قال الرسول في بقه و حاسس انه الحاكم بأمر الله و كل يوم بينزله الوحي و هو طبعا معصوم من الخطأ و مفوض بتطهير مصر من المسيحين الخونه الي المفروض يبقوا خدم عند المسلمين اسيادهم

ده غير المسيحي المتعصب الي الكره عماه و نسي ان الله محبه و تعاليم السيد المسيح كلها خير و حب للناس كلها

و ده كل تفكيره ازاي يكفر المسيحي و التاني بيشغل عقله ازاي يطلع المسلم متوحش و ظالم

و نجح غسيل المخ و نسينا اننا واحد هموم و مشاكل واحده و الي يضر الكنيسه هايأذي الجامع

احنا كيان واحد تاريخ مشترك و مستقبل بيجمعنا سوا لو المسلم كره المسيحي مصر مش هاتحرك خطوه و لو المسيحي بعد عن المسلم و بقي منفصل يبقي الله يرحم مصر كان في دوله اسمها مصر

هانبقي زي لبنان مش قادرين يتفقوا علي اي حاجه حتي راس السنه الهجريه السنه هاتحتفل في يوم و الشيعه في يوم

تحياتي يا احلي فانتا علي البوست الجميل ده

هو انتي مختفيه فين انا الميل القديم في واحد حرامي سرقه و عملت واحد جديد و عملتلك اد ياريت اشوفك اون لاين قريب

كل سنه و انتي طيبه

بحبك يامصر said...

بسم الله الرحمن الرحيم
سواء انتى اللى كتبتى البوست ده او غيرك فيهمنى انى اقول تعليقى هنا لانى ببساطه قرأته هنا
اولا .. انتى بدأتى كويس اوى وهنأتى اخوانا المسيحيين بالعيد وهنأتى مصر كلها بالعيد وانا معاكى وهرد عليكى واقول ليكى ( وانتى طيبه) لانى برده شايف زيك اننا اصحاب الوطن مسلمين ومسيحين بس انتى ازاى معترضه على ان مينفعش ان مسيحى يحكم مصر ازاى انتى تعترضى على شئ مشرعه ربنا اه دينا بيقول ان مينفعش ان غير مسلم يحكم بلد مسلم هتقولى اشمعنى المسلم يحكم ربنا حكم فى القضيه دى بس انتى اسالى ربنا بالدين الاسلامى وشريعته نسخ الدين المسيحى ورضى للبشريه كافه الدين الاسلامىلانه اشمل واعم وده مش معناه انى بدخل فى عقيدة غيرى لا بس انا بوضح ليه المسلم يحكم بلد مسلمه والغير مسلم لا وبعد كده انا متفق معاكى فى حكاية ملوك دول الخليج اللى بيحولو يحمو كراسيهم عن طريقنا برده ومختلف معاكى فى كلامك عن الاسلام هو الحل او الاخوان المسلمين وعلى فكره ده مش راى فيهم بس انتى كنتى بتسالى السؤال وتردى بالاجابه اللى على هواكى وتخدم موضوعك وكفايه كده بقه احسن انا حسييت انك اتخنقتى واسف ان يكون اول مرور لى عندك اختلاف

Fantasia said...

العسولة إيمي
هههههههههههه
ومين سمعك؟ بكرة يهدروا دمي يا أوختي
هو أنا كنت أحسن من مين يعني؟
الله ينور عليكي يا بنتي
هما فعلا مش هيرتاحوا غير لما نبقى زي لبنان
ويا ريتنا هنحصل لبنان حتى
دي لبنان فيها ديمقراطية وحكومة فيها تمثيل لكل طوايف الشعب
دول عايزين يرجعولنا الخلافة, تخيلي وصلنا لغاية فين!
بس هنجيب سلطان من تركيا برضه ولا إيه النظام؟
وبعدين انتي فكرة الشخص المتعصب ده تفرق معاه مصر؟ دا مش شايف ف الدنيا غير كفرة
مش الراجل الكبير بتاعهم قالها صريحة كدة "طظ ف مصر"؟
والناس اللي بيشعلولها من برة, اللي هما قلة من أقباط المهجر, عايزين أمريكا هي اللي تتصرف؟
بلد إيه بقى؟.. سمعيني سلام بودعك ع الوطنية
مفيش أمل ان الشخص المتعصب دا يفهم يعني إيه انتماء
ماينفعشي الموضوع يتساب للنوايا كدة
وكل ما تحصل مصيبة يروحوا جايبين الناس من الناحيتين
ويللا يا حابيبي بوسوا راس بعض وخلصت القصة
والتليفزيون يروح جايبلك شيخ الأزهر والبابا بيبوسوا بعض, كدة بقى عرفنا إن مفيش فتنة ولا حاجة!
هو احنا بنضحك على نفسنا؟
دا اسمه تهريج
لازم يكون فيه ردع
القانون يطبق ع الكل
المسلم اللي يحرق بيت مسلم زي المسلم اللي يحرق بيت مسيحي
يترمي ف السجن علشان عمل جناية زائد تسببه ف زعزعة الأمن وإشاعة الفتنة
يعني دا ياخد 8 سنين ع الأقل
أمال القانون معمول ليه؟
علشان ننقي الناس اللي هنطبقه عليهم؟
وحتى الناس اللي بتشعل الفتنة من الخارج
المفروض يطلع ضدهم أحكام ف مصر علشان مايعتبوهاش تاني,ولو جم يتسجنوا
انما إيه الفوضى ونظام المطيبطية ده؟
اشكرك يا إيمي على التعليق الجميل
وعايزة أقولك إن موضوعك الأخير انتي وكوكا هايل
خالص تحياتي يا قمر

Fantasia said...

بحبك يا مصر
اسم جميل اهنيك على اختياره
وأرجو ان يتعدى حدود الاسم للفعل
أولا أحب أرحب بحضرتك
وأتمنى دوام الزيارة
فالاختلاف ف الرأي لا يجب ان يفسد للود قضية
ثانيا الموضوع بالفعل من انتاجي
والملحوظة كانت بخصوص انها المرة التانية لنشره في شكل بوست بعد أن كان تعليقا لي على مدونة أخرى
وأود أن أوضح أن الحوار المكتوب هو من تأليفي ومن إنتاج خيالي الشخصي
فلا توجد أي اشارة من قريب أو بعيد توحي أنه حوار حقيقي
بل هو عمل فني الغرض منه عرض وجهة نظر كاتبة المقال
وهو من نوع الأدب الساخر الذي يخضع للمعايير الأدبية في تقييمه

أما بخصوص الملاحظات الأخرى
أوجه عناية سيادتك ان هذا طرح لوجهة نظر شخصية بحتة
وأظن أن حرية الرأي مكفولة بموجب الدستور والقانون الحالي لجمهورية مصر العربية
ومصر هي دولة مدنية
ودستورها يحمي حقوق المواطنة ويمنع التمييز على أساس الدين أو الجنس أو العرق
كما أن كلام حضرتك عن الاسلام هو ايضا رأي شخصي من خلال مفهومك الخاص للاسلام
وانني لأتعجب من التناقض الشديد بين ما طرحته من آراء هنا وبين ما كتب في مدونتك
واسمح لي ان اعيد نشر بعضه هنا
فأنت تقول "بيزرعوا بينا الفروق دى عشان كل فرقه تتعصب لفرقتها او جماعتها او مبادئها وبعد كده نكون صيد سهل ليهم بعد اما نكون متفرقين ومش مجتمعين...انا عارف ان الكلام ده مش هيعجب ناس كتير بس انا شايف واكيد الكل هيشوف زيى اننا لو اتجمعنا هنكون اقوى ..كفايه كده ويلا نتجمع على حب بلدنا ونخلص فى حبها" ثم تقول في تعليقك "ازاى معترضه على ان مينفعش ان مسيحى يحكم مصر ازاى انتى تعترضى على شئ مشرعه ربنا اه دينا بيقول ان مينفعش ان غير مسلم يحكم بلد مسلم هتقولى اشمعنى المسلم يحكم ربنا حكم فى القضيه دى بس انتى اسالى ربنا بالدين الاسلامى وشريعته نسخ الدين المسيحى ورضى للبشريه كافه الدين الاسلامىلانه اشمل واعم" حقيقتا لا أستوعب مثل هذا التناقض
انا أعترض لاني مؤمنة بحق المسيحي في هذا الوطن, ودماء المسيحيين اللتي أعادت أرض هذا الوطن, وعرق المسيحيين الذين عمروا هذا الوطن, وعلماء المسيحيين الذين علموا أبناء هذا الوطن, وأطباء المسيحيين الذين أسعفوا الألاف من شعب هذا الوطن, وأموال المسيحيين التي تستثمر في خير هذا الوطن, ومصانع المسيحيين اللتي تفتح بيوت ألاف الأسر في هذا الوطن
كيف لا أعترض على اهدار حقوق هؤلاء الشرفاء الذين خدموا وطنهم باخلاص والذين عاشوا يعلون بنيانه معنا يدا بيدا؟
هم أهلي وأصدقائي وجيراني وأساتذتي ومعلميني واخوتي.. فهم مني وأنا منهم
صديقهم هو صديقي وعدوهم هو عدوي
لن أبيع ماريا وكارولين ونادين وهايدي ونانسي صديقاتي المخلصات
ولن أنسى فضل اساتذتي من المسيحيين الذين لولاهم ما كنت أصبحت هذه الفتاة المتعلمة الواعية المجتهدة ذات الضمير اليقظ والشغف للعلم
فمن علمني حرفا صرت له عبدا
وهؤلاء كانوا نعم الأساتذة ونعم المعلمون
فهم كالرسل والقديسين
ان ارادة الله العدل الكريم العظيم لا يمكن أن تدفعني في طريق الجحود أو الظلم أو اهدار حقوق المواطنين في وطنهم

أرجو يا سيدي أن أكون قد أجبت على سؤالك ازاى معترضه على ان مينفعش ان مسيحى يحكم مصر
معترضة علشان مصرية مسلمة مؤمنة بعدل الله

تحياتي

haneen said...

الله عليكى يا فانتا الجامده قوى

بس مين بقى قال ان حقوقهم مهدوره ... بالعكس بقى انا شايفه ان مصر اكتر بلد اعطت للمسيحى كل حقوقه كامله واكبر دليل حى على التسامح والاندماج بينا ودا بشهادة ناس كتير كانوا عايزين يضربوا اسافين وما عرفوش
على العموم انا جايه تانى اكمل
سلام

حسن ارابيسك said...

فعلا
انا محتاج دلوقتي كوب شاي أظبط بيه دماغي بعد البوست الجامد الجامع الشامل الوافي ده
الحقيقة أنا مش هاعلق تعليق مباشر على البوست ده
ها بدأ باستعارة عبارتك الموجهة لي في كومنت البوست السابق ...
التحليل المتميز...
عاوز أقول الحمد لله أن في حد فاهم حاجه أهه..يعني عكس كلامك في البوست السابق
وأنك لست من الأغلبية التي لا تفهم حاجه، الأغلبية التي صنفتيها تحت عبارة ..حد فاهم حاجه..
اذن فأستطيع القول أيضا أنكي من الصفوة التي تفهم الحاجه ولكنها على حد قولك انتي أنها قلة تختبئ وسط اللي مش فاهمين حاجه
هذا بالطبع ليس استنتاج ولكنه كلامك انتي
وانا بالفعل اريد اجابه منكي
فانت تنتمين لمن..!!
هل لمن هم تحت شعار ..حد فاهم حاجه
وهنا سوف أوجه لكي اللوم وأقولك
اذن كيف تدعي عدم الفهم وتكتبين بوست مثل هذا

أما ان كانت اجابتك أنكي من الصفوة التي تفهم حاجه ولكنها تختبئ بين من هم لايفهمون حاجه
سوف أوجه لكي العتاب وأقول لكي طيب ولما تختبئين بينهم

لكن أنا في النهاية حقيقي سعيد بما تكتبين لأنه واضح ان ماشاء الله ان قراءاتك كثيرة في زمن لا يقرأ فيه أحد

ولكن القراءة شئ
والتحليل شئ أخر
فلا بد من وجود منهج للتحليل
لربط النقاط والموضوعات جيداً حتى لاينفرط عقدها من بين أيدينا

شكراً على اتاحة التعليق

haneen said...

الاخت العزيزه/ فانتازيا
الحمد لله ان تعليقى التالى جاء ورا الاولانى اولا احب احييكى على البوست الرائع دا وطبعاً كعادتك تأتى بكل ما هو قيم ومهم بس انا المره دى عندى شوية ملاحظات قد تكون ارائى انا من وجهة نظرى البحته وممكن تكون بتتعارض الى حد ما مع ارائك وانا بطلب منك سعة صدرك وتقبل الرأى الاخر بكل ديمقراطيه كما هو معروف عنك
اولا انا مع وجهة نظر الاخ بحبك يا مصر وهو انه فعلا لازم يكون رئيس دوله عربيه اسلاميه زى مصر يكون مسلم ودا اللى الاسلام وضعوا لكل البلاد اللى الديانه الاولى فيها الاسلام ودا امر واقع طول عمرنا عايشين عليه وعمر ما مسيحى اعترض وقال انا عايز امسك البلد لانه فاهم ابعاد القصه كويس وكمان الماده التانيه من الدستور المصرى بتقول أن الأسلام دين الدوله ، واللغه العربية لغتها الرسمية ، ومبادىء الشريعة الاسلامية المصدر الرئيسى للتشريع . طيب يبقى ازاى بقى تكون الشريعه الاسلاميه هى المصدر الرئيسى للتشريع وينفذها واحد مسيحى . عمرك ما تخيلتى الأحوال فى البلد حتبقى ازاى لو مسكوها المسيحين طبعاً كتير من اللى الجانب اللى انتى ذكرتيه وبيكره المسلمين حيحاول يطلع القديم والجديد على جتت المسلم ويطلع عينه ويغربه فى بلده فى الوقت اللى المسلم عمره ما عمل كده معاه وبأكد للمره التانيه ان مصر اوضح واحسن نموذج للوحده الوطنيه واحنا من الرواد والاوائل اللى قدرنا كل السنين اللى فاتت دى كلها نفضل اخوات ودم واحد على ارض واحده ممكن بقى لو اتحقق اللى انتى بتقوليه دا تولع الدنيا وما تقعدش وحنبقى اقليه بالرغم من ان عددنا ماشاء الله كتير وعدد المسيحين فى مصر كمان مش قليل واللى بيقول ان فى فتن وكلام من دا يبقى مش فاهم حاجه لان اللى بينا انتى ذكرتيه فى مقالتك ومش من السهل انه يتهد وبعدين عمر المسيحى ما شاف عصر حريه وظهور وانتعاش زى عصر الرئيس مبارك بصراحه ودى كلمة حق بقولها كانوا يستجروا حتى فى عصر عبد الناصر انهم يلبسوا صليب ويمشوا بيه فى الشارع دلوقتى والله وقدامى الكلام دا جامع وكنيسه جنب بعض والكنيسه راحت اشتكت ان صوت الميكروفونات اللى فى الجامع عالى قوى وانهم مش بيقدروا يمارسوا الشعائر بتاعتهم من الصوت تعرفى الحكومه عملت ايه خلت الجامع يشيل الميكروفون خالص الا بس وقت الاقامه لكن الصلاه والخطبه لا يبقى بذمتك فين الاضطهاد دا بقى لما احنا يا مسلمين نتهم المسلمين اللى زينا بأنهم بيضطهدوا المسيحين اخوتهم اللى فى بلادهم يبقى احنا كده اللى بنعمل الفتنه وعلى رأى الشيخ خالد الجندى كل المصرين اقباط علشان مصر فى الاساس قبطيه لكن فى مصرى قبطى مسلم ومصرى قبطى مسيحى. وبعدين المسيحى بيمسك فى الدوله مناصب اكثر اهميه من منصب رئيس الجمهورية يعنى على مدار السنين اللى فاتت كتير منهم مسكوا وزارات والاستاذ اسامه الباز مسيحى وماسك اهم موقع سياسى فى البلد الا وهو المستشار السياسى لرئيس الجمهوريه اد ايه موقع حساس لانه بكده بيشارك فى وضع سياسات الدوله والقرارات الهامه يبقى ايه بقى وقبل منه كان اعبقرى بطرس غالى والعديد من رجال الفكر والادب والفن اللى بنقدرهم وبنحترمهم .
ارجوا انك تكونى تفهمتى موقفى وما تكونيش زعلتى منى بس كنت عايزه اقول وجهة نظرى ... خالص تحياتى واحترامى

الفاتح اليعقوبي said...

السلام عليكم
ازي حضرتك يااستاذة فنتزيا
الصراحة ومن غير زعل مقال ولا ليه اي لازمة غير انه فقط بيعرض وجهة نظر صاحبته في فكر مخالف ليها يعني لاطائفية ولابتنجان
بصي يااستاذة ىانا مش مختلف معاكي في رايك في بعض دول الخليج بس بصي علي الدول دي دلوقتي فين واحنا فين بصي علي العلماء اللي مصر بتطردهم وبيستضيفهم بتوع الخليج بصي علي مستوي دخل افرد هناك بصي علي الحرية في بعض هذه الدول والانتخابات التي تتم فيها بشكل نزيه علي غير العادة عندنا



بصي يااستاذة بمنتهي البساطة حضرتك ضربتي الجماعات الاسلامية كلها مع بعض في خلاط وطلعتي كلامك يعني جيبتي اراء للسلفيين وشوية شعار الاخوان وشوية التكفييرين وشوية الجهاد واتحداك ان تعرفي الفرق بينهم ايدلوجيا وافكارهم واتجاهتم فهذا واضح تماما من مقالك


واما مسئلة الشيوعيين والتكفير فهذه عذرا حجة هؤلاء البلداء الذين سقطوا في اول مواجهات فكرية مع التيارات الاسلامية وانهاروا امامها ومش لازم تقولي ان البشر دي الاسلاميين ضحكوا علي الشعب لان الواقع غير كده لان كما كان في هؤلاء اليساريين مثقافين وعلي درجة عالية من التعليم فهناك ايضا من الاسلاميين من كانوا كذلك بل الادهي ان الكثير من هؤلاء اليساريين تحولوا الي اسلامييين مثل خيرت الشاطر وهو كان من الشباب اليساري في ذلك الوقت في نهاية عهد عبدالناصر والاستاذمحمد عمارة وكان ماركسي يعني يساري لاسع والمستشار طارق البشري وغيرهم الكثير

يااستاذة في فرق بين افكار اثبتت فشلها في الواقع وبين افكار تقد حل واقعي لمشاكل الامة ولا تفصلها عن هويتها الاسلامية كما يحلو للبعض ان يفعلوا من هؤلاء المسمون بالعلمانين وما وجدت العلمانية اساسا الا لالغاء الدين سواء كان مسيحي او اسلامي
وارجعي الي اصل العلمانية بعد حادثة جاليليو مع الكنيسة وقتلهم له لانه خالف امر من امور الكنيسة فقامت ثورة من العلماء علي تحكم الكنيسة وانطلقت بعدها الافكار العلمانية قد ينفع هذا مع المسيحية لانها تنقصها الكثير من التشريعات التي تسير الحياة



يااستاذتي الفاضلة
الخلافة ليست وهم بل هي وهم ابتكره العلمانيون لاقناع انفسهم بالخطا
ياسيديتي الفاضلة الم تنظري الي سيرة رسولك صلي الله عليه وسلم عندما مات وتاخر دفنه يوم باكمله اتعلمي لماذا لانه لايجوز ان يدفن الرسول والحاكم والمسلمون بلا خليفة او قائد يحكمهم

يااستاذة
عندما كانت هناك خلافة كنا نسود العالم
عندما كانت هناك خلافة اصبح لهؤلاء البدو حضارة علمية فاقت الحضارة الاوربية بل وتعلمت منها اوربا في عصور الظلام عندما اتت اوربا تحت اسم وشعار الصليب وهي كاذبة لتحتل بلادنا وبقيت فيها حوالي 170سنة وفي اثناء هذا انتقلت الحضارة اليهم وايضا عن طريق الاندلس التي لم تشهد العصور الوسطي حضارة مثلها
والكثير الذي لااجد الوقت لكتابته


يااستاذة فقط انظري بحيادية قليلا للتاريخ الاسلامي ومن مصادره الاساسية اي من المؤرخين الذين عاشوا في تلك الاوقات مثل ابن كثير في البداية والنهاية وابن الاثير والكثير من عالماء الذين عاهدوا تلك الفترات ولا تقرايها من اولئك المستشرقين الجدد اقصد العلمانين



والمشكلة مع اولئك النفر انهم ليسوا الا بعض المتفذلكين الذين سقطوا في الواقع واصبحت ايامهم معدودة باذن الله في هذه البلاد ليس بالعنف والاكراه ولكن لان الناس اصبحت لاتؤمن الا بان
الاسلام هو الحل
قد نختلف في تطبيقه وفي فهمه لذا لنضع تلك الثوابت اليت وضعها القران والسنة
ومنها يقول الرسول صلي الله عليه وسلم :(اوثق عري الايمان الحب في الله والبغض في الله والموالاة في الله والمعاداة في الله ) وهذا بالنسبة لماريا صاحبتك وتلك الباكستانية التي ترفضي ان تقربيها اليك مثلما تقربي صاحبتك ماريا
ايهما اقرب صلة الدين ام صلة الدم ياسيدتي الفاضلة اقراي القران جيدا ثم اجيبي علي هذا السؤال لان اجابته في القران الذي جاء ليهدم كل نقاط الاختلاف بين اهل الاسلام ويوصل لهم ان الصلة بينهم ليست صلة دم ولا بلد ولون بل هي صلة دين الله
يقول رسول الله صلي الله عليه وسلم:(لافرق بين عربي علي اعجمي الا بالتقوي)
يقول تعالي :(ياايها الذين لاتتولوا اليهود والنصاري )
ي
ويقو تعالي:( ياايها الذين لاتتخذوا عدوي وعدوكم اولياء تلقون اليهم بالمودة وقد كفروا بما جاءكم من الحق)

علي فكرة ده كلام ربنا
انا عارف انك عارفة
بس والله في اية جميلة في القران بتقول :(وذكر فان الذكري تنفع المؤمنين)
وكلام الله محدد حيث يقول سبحانه المؤمنين ولم ينف عن الذين يذكروا بعضهم صفة الايمان




واما مسئلة الباحثين عن الفتنة الطائفية
فدعيني احدثك عن التعذيب الكنسي وما يحدث لبعض الذين يعلنون اسلامهم في الكنائس وهذه اعترافات احد مساعدي البابا شنودة وكان مسئول عن الجانب التنصيري في افريقيا

ولا تقصدي اللي حاولوا يعملوا دولة في اسيوط لولا تدخل الامن لمنعهم وقد حاول بعض نصاري مصر هذا وايضا بعض الجماعات الاسلامية المتطرفة

ولاتقصدي ازمة وفاء قسطنطين التي قلبوا الدنيا راسا علي عقب بعد اعلانها اسلامها
ولا تقصدي المسرحيات التي كانت تعمل في الكنائس للاستهزاء بالاسلام

سؤال برئ جداااااااا
لماذا يلبس نصاري مصر اسود واقصد رجال دينهم والمتدينين منهم بالرغم ان الفاتيكان وهو الكنيسة الام والاقدم في المسيحية يلبس رجال الدين فيها ابيض ؟؟؟؟؟؟؟؟؟؟؟؟

يااتساذة كلامك بيخالف الفطرة التي فطر الله عليها عباده فاعز مايملك المسيحي ليس مصر ولكن المسيحية واعز مايميلك المسلم هو الاسلام ومن اسلامه حبه لبلاده وكذلك من المسيحية حبهم لبلادهم


ياسيدتي ولاء الناس في الطبيعي يكون اولا لدينهم ثم بلادهم فان تعارضت مصلحة دينهم مع مصلحة بلادهم ايهم يختار ندع هذا للتاريخ لعله يحكي لك


وفي الاخر انا اسف ان كان كلامي فيه بعض التجاوز فانا اعتذر
ولعله اختلاف اراء اتمني ان لايفسد للود قضية
واتمني الاجابة علي التعليق بالعربي
وكل عام وانت بخير
عام هجري سعيد
والسلام

Fantasia said...

الأستاذ الفاضل حسن أرابيسك
والله مش عارفة أشكر حضرتك إزاي حقيقي
يعني أنا بشوف بصيص نور كل ما أقرا تعليق زي تعليق حضرتك
فأنا اللي المفروض أشكرك انك اتحت ليا الفرصة لقرأة الكلام الجميل ده
يا ريتني فاهمة حاجة يا أستاذ ارابيسك
أنا كل ما أقول خلاص فهمت يطلعلي من تحت الأرض اللي يشككوني ف اللي فهمته
يعني كنت فاكرة القيم الانسانية لا يختلف عليها بشر
وبعدين طلعت حمارة لمؤاخذة
وكنت فاكرة ان العقل والمنطق السليم هما اللي المفروض يحكموا بين الحق والباطل
برضه طلعت مش فاهمة حاجة
وكنت فاكرة اني فاهمة شوية حاجات, لكن كل مرة أرجع من أول السطر, ويا دوب أقول ألف ألاقي اللي يقوللي لأ دي مش ألف
أقول 1+1=2
يقولوا لأ 1+1=11
حتى "بسم الله الرحمن الرحيم" شككوني فيها
وبعدين يا ريتني حتى عارفة أستخبى
لو كنت أعرف كنت رحمت نفسي ودماغي وأعصابي
مش عارفة أفضل مش عارفة
ولا عارفة أعرف
ولا عارفة أستخبى
خيبة بعيد عن السامعين
ههههههههه
يا سيدي أنا ممنونة جدا لكلامك الكريم وتوسمك فيا خير
بس ساعات أقول يا ريت الواحد ما كان فهم حاجة
دول فعلا المجانين في نعيم

خالص تحياتي

Fantasia said...

الأخت الغالية حنين
سعيدة ان البوست عجبك بالرغم من نقط الخلاف
أهم حاجة الإتفاق على المبدأ, ولا إيه؟
انتي عارفة ان حتى االاختلاف مع المبدأ مش بيزعجني أبدا ف المطلق
لكن بجد مبدأ وحدة الوطن دا يزعجني جدا الاختلاف عليه
فبما اننا متفقين ف المبدأ
فأهلا وسهلا بأي اختلافات
أنا طبعا شرحت وجهة نظري ف موضوع الحقوق السياسية للمصري المسيحي في تعليقي على بحبك يا مصر
ومش شايفة داعي لاعادة الكلام
فخلليني أحسن أركز على النقط التانية

فيه فرق كبير يا حنين بين حق المواطن في ترشيح نفسه لأي منصب سياسي في بلده
وبين انه بالفعل يحوز على هذا المنصب
يعني المثال اللي حضرتك تفضلتي بيه بتاع المسيحي المتعصب ضد المسلمين اللي هيحكم مصر علشان يخربها
دا ليس له أي مجال ف الواقع
لأن أولا مفيش حد هينتخب واحد متعصب ضد أغلبية افراد شعبه
ثانيا حتى المسيحيين نفسهم مش هيدولوا أصواتهم لإن تحيز الحاكم لهم حتى مش هيفيدهم بحاجة
ثالثا ليس من سلطة الحاكم ف الدولة المدنية تغيير التشريعات أو التدخل في تنفيذها
رابعا الدولة المدنية لا تسمح بتشكيل حكومة طائفية
يعني حتى لو المستحيل ذات نفسه حصل وكان رئيس الدولة المسيحي بيكره المسلمين, مش هيعرف يشكل حكومته من المسيحيين
خامسا يا حنين الراجل دا مش هيقعد ف الحكم يومين على بعض لو عمل 1/1000 من اللي قولتيه
دا كان اتقطع حتت
إذا كان الرئيس المؤمن الله يرحمه, اللي كان حبيب الجماعات الاسلامية, قتلوه وهو على المنصة وسط الحكومة كلها
يبقى الراجل دا هيعملوا فيه إيه؟

بيجي بقى لموضوع الحريه والظهور والانتعاش اللي بنعم بيهم السيحيين في عصر الرئيس مبارك
مع تحفظي الشديد على بعض الكلمات اللي وردت في تعليقك زي "يستجروا" و "يلبسوا صليب ويمشوا بيه فى الشارع"
لان الكلام ده حقيقي بيزعلني
وخصوصا لما يقولوه ناس متسامحين ومؤمنين بالمساواة
يعني انتي تحبي حد يعايرك علشان لابسة ماشاءالله ولا آية الكرسي؟
وهل معنى انك تلبسيهم انك عايشة ف حرية وانتعاش
انا شايفة ان دي مش حقوق بالمرة
وما يصحش نتكلم عنها أصلا
الواقع بيقول ان المسيحيين فيه تمييز بينهم وبين المسلمين
منقدرش نقول اننا كلنا مواطنين بننعم بنفس الحقوق, بالرغم من ان كلنا علينا نفس الواجبات
المسيحيين ليهم حقوق لان مصر بلدهم زي ما هي بلدنا
الحصول على حقوقهم دا واجب وحق ليهم, مش منة ولا صدقة ولا تفضل
كلنا أقباط لان كلنا مصريين, مش علشان الشكل والشعارات.. ولازم نكون من جوانا مؤمنين بده

أحب بس أقول ان الدكتور اسامة الباز مسلم وانه في موقعه بسبب الكفائة, والدكتور بطرس غالي برضه ف موقعه بسبب الكفائة
دا ما يمنعش ان فيه مسيحيين كتير محرومين من مناصب معينة على الرغم كفائتهم

صدقيني أنا مش زعلانة منك.. بالعكس, أنا لازم أشكرك لتوفير الفرصة ليا اني ارد على كل الكلام ده, اللي ممكن حد غير حنين اللي انا عارفاها وبثق ف نواياها يستخدمه لاهداف عكسية

انا بس نفسي شوية نفكر ف العكس يا حنين.. نفسي نفكر لو البلد لا قدر الله وقعت ف إيد الاسلاميين المتطرفين, هيبقى إيه وضع الدستور والدولة المدنية؟ هيبقى إيه وضع المرأة (مسلمة ومسيحية)؟ هيبقى إيه وضع حقوق الانسان؟ هل هنقدر أصلا نعمل حوار زي ده ع النت؟ هل هيكون فيه أي نوع من الحريات؟
ليه سايبين المصيبة اللي تحت عنينا وبنفكر ف البعيد أوي والمستحيل؟
يا حنين والله والله والله مافي أخطر على الاسلام من المسلمين المتطرفين
هما اللي شوهوا صورة الاسلام ف العالم
وهما اللي بيعملوا كل انواع الجرايم باسم الاسلام
هما اللي دخلوا ف الاسلام كهنوت وعملوا نفسهم جلادين
هما اللي مفيش حاجة عندهم اسمها اختلاف او قبول الآخر
اسهل حل للآخر ف نظرهم هو القتل
هما دول الكارثة الحقيقية صديقني, مش مسيحيين مصر الجدعان أخواتنا وحبايبنا
خالص تحياتي

haneen said...

اختى العزيزه فانتا

والنبى انا مش عايزه اعصبك ولا اضايقك ويخرب بيت اللى يزعلك يا شيخه وانتى لسه بتتكلمى عن التعصب والعصبيين تقبلى رأى بصدر رحب وما تقفشيش منى انا بتكلم من وجهة نظرى المتواضعه وعارفه انك تفوقينى بمراحل فوحده واحده على واعتذر اذا كنت ضايقتك واشكرك جداً على ردك المفيد

خالص تحياتى واحترامى

ahmed said...

فانتازيا هانم
............

لتسمحين لي بتجاوزين

أولهما أن أعيد نشر تعليقي على نفس الموضوع الأصلي لإيمي هانم، إذ أظنه هو نفس ما أرود أن أقوله الآن

والثاني

أن أتمنى لك طولة البال ووفرة الثبات العصبي لتتحملي آراءً لا أظنها تستحق كثير مناقشة وطويل حوار، إذ تقوم على نفى الأخر وتحقيره والحط من شأنه متمسحة في أعتاب المقدس والمصان، بينما هي في الأصل نابعة من أغراض السياسة أو ظلمات عدم المعرفة ولا أقول الجهل.

...

إلى تعليقي.. وعذرا مقدما لكونه أطول مما يجب

..

أعبر أولا عن إعجابي الكبير بما تكتبينه

ولكن إعجابي أكبر بتقبلك الصادق لآراء تختلف مع رأيك وقد تعارضه

لا شك أنك إنسانة حظت بمستوى جيد من التعليم والمعرفة الواسعة

ولا شك أنك نشأتي في بيئة حرة تحترم الاختلاف وتحميه وتفرق بين البشر على أساس أعمالهم وسلوكهم ونفعهم أو ضرهم.. لا خفايا صدورهم ومعتقداتهم

لا شك أنك بوجه عام على وفاق نفسي مع الدنيا.. وفي حالة تصالح مع نفسك.. ولا تعاني من أية إحباطات عنيفة.. أو نفس مكسورة.. أو هوية ضائعة.. أو أحلام مشروعة مكبوتة ثم ضائعة للأبد.. أو ظلم بين.. أو جهل مطبق.. الخ الخ

عفوا سيدتي

أنا لا أتحدث عنك تحديدا.. لكني أضرب مثلا لشخص متسامح.. مثلك

المتعصب هو عكس ما ذكرت أعلاه

...

الناس يا سيدتي إذا فرحت اتفقت
إذا نُصِرَت عَفَت
إذا علمت عذرت
إذا فهمت تسامحت
إذا تحررت تناست
إذا تسامت نَسَت
إذا اغتنت وسعت

أما

إذا غضبت فإنها تختلف
وإذا ظُلِمَت انتقمت
وإذا جهلت تشددت
فإذا احتارت أساءت
وإذا انغلقت تعصبت
إذا تهاوت تمسكت
وإذا افتقرت ضَيَّقَت


فانظري إلى أحوالنا.. وقرري من نحن

هل نحن قوم فرحون غير غاضبون.. فنتفق ونحب اختلافنا لا نكرهه

أم نحن قوم منتصرون لا مظلومون.. فنعفو ولا ننتقم

أم نحن عالمون متعلمون لا جهلاء مُجَهِلّون.. فنعذر ولا نتشدد

أم ترانا نحن الفاهمون الراسون لا الحائرون التائهون.. فنتسامح تسامح من يفهم، لا إساءة من يتخبط في الظلمة

أم أننا متحررون ولسنا منغلقون على ذواتنا.. فنتناسى ما قد يسيئنا ولا نتعصب إلا لحق أو مصلحة

أو نكون الصاعدون الناهضون ليس الهاوون المتأخرون.. بحيث ننسى ولا نتمسك بالتوافه من الأمور

هل أحوالنا مستورة بحيث لا يجوع أحد ولا يموت أحد فقرا أو غرقا أو هربا من وطنه.. هل فقرنا بسيط هين لا يذل ولا يهين ولا يسحق النفس ويدمرها.. فكيف إذن نُوَسَّع ولا نُضَيِّق



المجتمعات التي من النوع الأول تجديها متسامحة مع أعمق الاختلافات وأكثرها جذرية.. فلا تشعرين إلا أن الناس كلها على قلب رجل واحد.. لا يبحث الرجل عن موضع الاختلاف فيلبد فيه.. وإنما يتحرى مساحات الاتفاق فيقيم فيها ويسكن ويهنأ

أما النوع الثاني.. فينقبون عن أشباه الاختلافات وأهايف التباينات.. فإذا وجدوا ما يشبهها هللوا وبشروا

النوع الثاني.. عندما يجهل الناس.. وتفتقر.. وتُظلَم.. وتهان في أوطانها.. وتفقد الشعور بالقيمة والكرامة.. عندما تفتقر فتضام وتذل.. فإن هذا المجتمع لو كان كل من فيه من المسلمين أو المسيحيين أو من أي ملة أو دين.. تجديه مختلفا.. صارخا.. مكفرا.. زاعقا.. رافضا.. لو كانوا مسلمين فإنهم يبحثون عمن فيهم من سنة ومن شيعة.. السني المتعصب يكره الشيعي أحيانا بأكثر مما يمقت اللاديني!! والشيعي لا يرى في السني إلا سليل غاصبين ناهبين.. غصبوا الحكم ونهبوا الخلافة.. والمسيحيين يجدون الكاثوليكية والأرثوذكسية سببا جيدا للصراع فضلا عن باقي المذاهب والملل.. وحتى الملحدين يخترعون أسبابا عقائدية أيضا لتبرير النزاع وإضفاء نزعة أخلاقية عليه

الفقر.. يجلب الجهل.. والجهل يخلق التعصب.. التعصب يولد العمى.. العمى يقود للوقوف في المكان.. الوقوف في المكان يجذب ديكتاتورا تغريه وداعة العميان.. الدكتاتورية بها الظلم والقهر والخوف.. الخوف أبو النفاق.. النفاق أبو الخداع.. الخداع لا نهاية له إلا الفشل.. الفشل يزيد الفقر

وهكذا

لكي يكون الله محبة.. ألا يجب أن يتواجد محبون؟.. أين هم؟.. هل يقدر أن يحب من يشعر بالظلم.. والقهر.. هل يحب من لا يجد قوت يومه؟.. هل يحب من لم يقرأ كلمة غير كتابه المقدس وتفاسيره أيا ما كان دينه.. فلم يطلع على فلسفة.. ولم يطرب لشعر وأدب.. ولم يسافر في تاريخ وسياسة.. ولم يفكر في اقتصاد وإدارة.. ولم يقارن بين أحوال الناس في كل مكان.. كيف يحب من لا يعرف؟.. كيف يحب من يرى من خلال نظارة آخر يحكم عقله ويسوس مشاعره


أشكرك على تحضرك.. وأشكر مصر على خيرٍ فيها لا ينقطع إن شاء الله أبدا

......


تحياتي واحترامي فانتازيا هانم

Fantasia said...

طيب, بصراحة ماشي.. لكن من غير زعل ازاي؟ هو انا يعني علشان عاقلة ومثقفة وعلمانية يبقى معنديش احساس؟
وبعدين لما المقال ولا ليه أي لازمة, حضرتك مكلف خاطرك ورادد عليه الرد الطويل العريض دا ليه؟
ما انا قلت انه وجهة نظري الشخصية.. هو انا قلت حاجة تانية؟
ولو حضرتك مش شايف انه بيتكلم عن الطائفية ف دي قراءة حضرتك الخاصة
ع العموم كل الناس شافت اني بتكلم عن اسباب التعصب اللي بيهدد الوحدة الوطنية
يعني ايه بقى دول الخليج فين واحنا فين؟ مال دا ومال الموضوع؟
وهي دول الخليج عملت ايه بالعلماء؟ هي الفلوس اللي بتعمل البني آدم ولا البني آدم هو اللي بيعمل الفلوس؟
حرية ايه وانتخابات ايه اللي موجودة ف الخليج دي؟ هو حضرتك ما تعرفش ان الدول دي نظامها ملكي؟
ولا حضرتك بتتكلم عن خليج المكسيك؟ لأ وشوف المبالغة, مش اتخابات وبس, لأ دي طلعت نزيهة كمان! يا حلاوة
طيب الخليج دا جنة الله ف الأرض يا سيدي.. ها؟ وبعدين؟ إيه المطلوب؟ نروح نطلب اللجوء السياسي؟ ولا نغير جنسيتنا علشان نودع الفقر؟ ولا نبيد المسيحيين علشان الخليج يرضى عننا ويرميلنا شوية فلوس ولا عقود عمل؟ مش فاهمة يعني محاسن الخليج دي إيه علاقتها بالموضوع؟ ولا حضرتك بس معترض علشان انا اتكلمت عن العيلة المالكة واللي جرالنا من وراها؟

أحب بس أقول لحضرتك اني حافظة تاريخ الجماعات الاسلامية كلها عن ظهر قلب. واعتقد ان حضرتك اللي محتاج تعرف شوية أكتر عن الجماعات التانية. واضح انك مش مطلع على فكر من هم من خارج الاخوان.. بدليل استخدام كلمة "ايديولوجيا" في تناول الاختلافات بين الجماعات الاسلامية المختلفة. وهذه الايديولوجيا هي ما كنت اتناوله في مقالي والذي اعتقدت حضرتك انها خلاط.. وبالفعل فان ايديولوجيا الاسلام السياسي هي بوتقة تنصهر فيها جميع الجماعات الاسلامية

يا سيدي الجعفري, بالله عليك.. يعني لما تحب تجيب مثال من المتحولين من اليسار للتيار الاسلامي, متلاقيش غير محمد عمارة اللي بيكفر المسيحيين ويشكك في عقيدتهم وعمال يشعلل الدنيا؟ ياريته كان فضل يساري يا سيدي.. قارن بين كتاباته قبل وبعد الانضمام للاسلام السياسي. انا راضية ذمتك.
وبعدين يا ريت نتحرى الدقة واحنا بنتكلم عن المستقطبين من صفوف اليسار.. يعني يا ريت نوضح انهم انضموا للتيار الاسلامي بعد هزيمة 1967 لو سمحت, مش نقول في نهاية عهد عبد الناصر ودمتم. وخيرت الشاطر معلش يعني استقطابه وتجنيده وبعدين استغلاله لتمويل وغسيل أموال الاخوان دا دليل على ضرب اليسار مش مواجهته بالثقافة والحجة.

خلينا بقى ف المهم, الافكاراللي يتقدم حل واقعي لمشاكل الامة دي, فين؟ قوللي.. حتعمللوا ايه ف المرور؟ هتعمللوا ايه ف الاقتصاد؟ هتجبولنا تمويل من الخليج؟ وللا هتقضوها برضه نظام توظيف أموال ومضاربة ف بورصات الدهب العالمية؟
والعلاقات الدولية والسياسة الخارجية؟ هتضمونا لمجلس التعاون الخليجي طبعا علشان تبشبش معانا.. بس طيب سياسة مصر الخارجية مع باقي دول العالم هتعملوا فيها إيه؟ وهتعملوا ايه ف التخطيط والادارة؟ والداخلية؟ والبيئة؟ والتنمية العمرانية؟ والبحث العلمي؟ والاستثمارات الاجنبية؟ وصناعة السينما؟ والثقافة؟ والآثار؟ عايزة أعرف الحلول الواقعية الشرعية للمواضيع دي من فضلك. نفسي أعرفها
"هؤلاء المسمون بالعلمانين" على فكرة مش جايين من المريخ حضرتك. وبعدين تاني هقوللك اني علمانية مسلمة وموحدة بالله. يا ريت حضرتك اللي ترجع لبن باز وكلامه عن جاليليو وتكفيره لأي حد يقول ان الارض بتلف والشمس ثابتة. ويا ريت برضه تعرف ان العلمانية ملهاش دعوة بالدين من اصله ولا هدفها تكمل الدين. يعني حضرتك دارس اعلام على ما أظن.. ممكن أنا اتهمك انك درست الاعلام وما درستش شريعة علشان انت شايف ان الدين الاسلامي تنقصه تشريعات تسير الاعلام؟
اهو العلمانية كدة.. اللي بيدرس سياسة واقتصاد مش بيدرس الدولة الاسلامية في ظل الخلافة, ولا الاقتصاد الاسلامي.. واللي بيدرس تجارة مش بيدرس البنوك الاسلامية. أهو المناهج دي كلها والعلوم كلها مناهجها علمانية.. ازاي الحال؟
يعني اصول العلوم مالهاش أي علاقة بالدين.. لا جاية تهده ولا جاية تاخد مكانه ولا جاية تكمل اللي ناقصه. يا ريت مفضلشي اعيد الموضوع دا ف كل حوار لينا مع بعض. حتى علشان أحس انك بتقرا كلامي يا أخي.

شوف بقى اللي جاية دي.. "الخلافة ليست وهم بل هي وهم ابتكره العلمانيون لاقناع انفسهم بالخطا
ياسيديتي الفاضلة الم تنظري الي سيرة رسولك صلي الله عليه وسلم عندما مات وتاخر دفنه يوم باكمله اتعلمي لماذا لانه لايجوز ان يدفن الرسول والحاكم والمسلمون بلا خليفة او قائد يحكمهم"
بجد تصفيق حاد.. اشكرك بجد علشان انت اللي حكيت الموضوع دا. أصل أنا لو كنت حكيته مكنشي حد صدقني.. دول كانوا ممكن يكفروني كمان.
بقى احنا نقول إكرام الميت دفنه.. الميت.. أي ميت.. والرسول الكريم يتساب يوم بحاله ف وقت لا كان فيه تلاجات ولا اي حاجة.. علشان المسلمين مالهمشي خليفة؟؟ بذمتك مش حرام؟ أي دين اللي قال كدة؟ وهل الرسول اللي كان حاسس بقرب معاد موته وقال كل وصاياه للمسلمين في حجة الوداع, مكانش قادر يختار خليفة ليه؟ الرسول لم يمت فجأة يا سيدي.. وكان يستطيع ان يضع شروط واضحة وأسس للحكم من بعده. فلماذا لم يفعل؟ وأين هي الخلافة ف الدين الاسلامي؟ أين الخلافة ف القرآن؟ قال الله تعالى "مَا فَرَّطْنَا فِي الْكِتَابِ مِنْ شَيْءٍ" كما قال سبحانه "وَنَزَّلْنَا عَلَيْكَ الْكِتَابَ تِبْيَاناً لِكُلِّ شَيْءٍ", فكيف لا يحتوي القرآن الكريم على أمر بهذه الأهمية؟ أين الخلافة في أحاديث الرسول عليه أفضل الصلاة والسلام؟
"عندما كانت هناك خلافة كنا نسود العالم" نعم, وكنا وراء العالم بقرون أيضا.. فالخلافة استمرت حتى سقوط الدولة العثمانية يا سيدي, وقد عاشت الدول الاسلامية عصور من الظلمات والتخلف والفقر والجهل لا يمكن تصورها ف الوقت الحاضر. اقرأ تاريخ مصر في ظل الدولة العثمانية.. أقرأ عن بشاعة الاستبداد والذل والفساد والجهل وتفشي الشعوذة والمجاعة. ليس كل تاريخ الخلافة وردي يا سيدي. ومن اللغط وعدم الأمانة أن نمحو قرونا من الحكم الظالم والفاسد التي دفع ثمنها أجدادنا من المواطنين الفقراء الضعفاء. فيجب علي أنا أن أدعوك أن تنظر للتاريخ الاسلامي بنظرة حيادية.

ومن ذا الذي يتحدث عن المصادر؟ يا سيدي انك ترفض رفضا تاما الاطلاع على أي مصادر دون مصادركم. فحين أتيت لي بتعريف للعلمانية اعتمدت على تعريف الغزالي, وأعتمدت على النقل من نقله عن مصدر لمستشرق متخصص ف الحضارات الشرقية, ولم يكتب كلمة واحدة عن العلمانية (وهذا طبيعي, فكيف يمكنه هذا وهو لا يفقه فيها شيئا) وانما أكبر انجازاته هي ترجمة القرآن الكريم إلى الانجليزية! انك يا سيدي لم تقرأ حرفا واحدا لكاتب علماني أو أكاديمي متخصص. تخلط بين المستشرق والعلماني ظنا منك أنهم واحد, بينما هذا ليس صحيحا اطلاقا. تخلط بين العلمانية والليبرالية والمركسية, بينما لا توجد أي علاقة بينهم. انتم تدعون ان فهم الدين مقصور على ذو التخصص, بينما الاسلام هو دين الله للبشر أجمعين دون وساطة. وفي نفس الوقت ترفضون اللجوء للمتخصصين في فهم العلوم الطبيعية والانسانية. ما هو تقييمك لهذا الفصام الواضح؟


أنا أرفض شكلا وموضوعا اللغة المستخدمة في خطابك عن الآخر, والتحقير من شأن كل من لهم فكر مستقل والايحاء ان فكرهم مخالفا وشاذا ومعادي للدين. ما هذا؟ "اولئك النفر انهم ليسوا الا بعض المتفذلكين الذين سقطوا في الواقع واصبحت ايامهم معدودة باذن الله في هذه البلاد ليس بالعنف والاكراه ولكن لان الناس اصبحت لاتؤمن الا بان الاسلام هو الحل"
نحن جميعا يا سيدي في هذه الدنيا أيامنا معدودة. من منا مخلد؟ ومن منا معصوم من الخطأ؟
أنت فرح "لان الناس اصبحت لاتؤمن الا بان الاسلام هو الحل", (فهي ليست فرحة بإيمان الناس بالدين الاسلامي نفسه) ولا تأبه بمستقبلهم ولا بخطورة هذه الايديولوجيا المدمرة
كلمة "الا" يا سيدي الفاضل تفيد القصر والحصر.. والقصر على ان الاسلام السياسي وحده هو الحل, هو ف الواقع تغييب للعقول ودعوة للارتخاء والكسل, وتناقض صارخ مع حث الاسلام على طلب العلم, الذي لم يكن متوفر وقت نزول الوحي سوى أقل القليل منه.. ومع ذلك كان الله دوما رحيما بعباده, عالما بما هو أصلح لهم, كريما في هداية العقل البشري لكل ما يخدم البشر ويعمر الأرض. الله الخبير دل الانسان على طريق العلم وطريق العمل وطريق التأمل وطريق السعادة ف الدنيا. لقد تقدم المسلمون حين أدركوا ذلك, ولم يكن السبب في تقدمهم هو الخلافة! لقد أدركوا حكمة الله في خلقه الكون الواسع, وحثه للانسان ان يسعى ويتعلم كل ما ينفعه في حياته. فالله لو اراد الاسلام السياسي حلا واحدا وحيدا لكان قادرا سبحانه على محو كل أشكال التنوع. الله يريدنا أن نتعلم الطب الحديث, لا ان نتداوى بالقرآن كما يزعم الدجالون. الله يريدنا أن نتعلم الزراعة والصناعة والتكنولوجيا والعلوم الاقتصادية الحديثة والطاقة النووية والفلسفة والفنون والهندسة والكيمياء والفيزياء وكل ما ينفع البشر. الله يريدنا علمانيون يا سيدي. الله يريدنا قوم متفكرون, مصلحون, مبدعون.. لا يريدنا أن ننفصل عن زماننا, أو أن نعيد الماضي, أو أن ننبذ الآخر, فهو سبحانه وتعالى من خلق هذا الآخر.
نعم يأمرني الله أن أفضل ماريا صديقتي على الباكستانية.. لأنه أمرني بالولاء لأهلي, حتى وإن كانوا من الكافرين. امرني أن اطيع أهلي في كل ما هو دون عصيانه. أمرني الله أن أكون بارة بأهلي. أمرني ألا أعادي من لم يعاديني. أمرني ألا أبادر بالعدوان. أمرني أن أحب الآخر وأحترمه وأقدره طالما هو يبادرني حبا بحب وأحتراما باحترام وتقديرا بتقدير. أمرني أن أحب وطني وأبدي مصلحته فوق مصلحتي الشخصية. فما بالك بمصلحة الآخرين من خارج وطني, التي هي في هدمه واشاعة الفتنة بين أبناءه؟. أمرني الله بطاعته وطاعة رسوله, وهذه الطاعة تستوجب أن أحب ماريا, ان أكون لها صديقة مخلصة.. لا أغدر ولا أخون العهد ولا اجازي المعروف إلا معروفا.
لا يوجد شيء اسمه البغض في الله .. ولا يوجد شيء اسمه المعاداة في الله
فالحديث الذي ذكرته حضرتك حديث ضعيف, تتراوح رواياته بين متروك ومنكر وضعيف في أحسن رواية له
والعقل لا يقبل أن يقرن الرسول الكريم اسم الجلالة بالمشاعر المكروهة في الاسلام ويروج لها بهذه الطريقة الفجة البعيدة كل البعد عن لغة محمد عليه أفضل السلام

كلام الله محدد.. وكلام الله صحيح.. وكلام الله حق. أنا لا أنكر أيا من هذا.
وكويس ان حضرتك عارف اني عارفة الكلام دا.. على الرغم من ان حضرتك برضه عارف اني علمانية

ازاي بقى تحرف كلام ربنا؟ قال الله تعالى"ياأيها الذين آمنوا لاتتولوا قوما غضب الله عليهم قد يأسوا من الآخرة كما يأس الكفار من أصحاب القبور"
والقوم الذين غضب عليهم الله هم يهود, وهم يهود محددون ايضا
وأظن حضرتك عارف ان المستشار السابق طارق البشري يرى انه يجوز للمسيحي تولي أي منصب سيادي في بلد اسلامي, بما فيهم منصب رئيس الجمهورية. ودا راجل المفروض حضرتك بتفتخر بيه.

كما أن الآية الثانية التي استشهدت حضرتك بها جائت مبتورة, على طريقة "ولا تقربوا الصلاة" وهذا أيضا تحريف
يقول تعالى " يا أيها الذين آمنوا لا تتخذوا عدوي وعدوكم أولياء تلقون إليهم بالمودة وقد كفروا بما جاءكم من الحق يخرجون الرسول وإياكم أن تؤمنوا بالله ربكم إن كنتم خرجتم جهاداً في سبيلي وابتغاء مرضاتي تسرون إليهم بالمودة وأنا أعلم بما أخفيتم وما أعلنتم ومن يفعله منكم فقد ضل سواء السبيل"
وهي آية نزلت في المنافقين.. ولعلك تعرف سبب نزولها جيدا
كما أن الله قد أعاد نفس الأمر الوارد في هذه الآية لتوضيح المعنى المراد. هذه الآيات من سورة الممتحنة يجب أن تقرأ سويا يا سيدي لبيان الهدف منها.
يقول تعالى " يا أيها الذين آمنوا لا تتخذوا عدوي وعدوكم أولياء تلقون إليهم بالمودة وقد كفروا بما جاءكم من الحق يخرجون الرسول وإياكم أن تؤمنوا بالله ربكم إن كنتم خرجتم جهاداً في سبيلي وابتغاء مرضاتي تسرون إليهم بالمودة وأنا أعلم بما أخفيتم وما أعلنتم ومن يفعله منكم فقد ضل سواء السبيل * إن يثقفوكم يكونوا لكم أعداءً ويبسطوا إليكم أيديهم وألسنتهم بالسوء وودوا لو تكفرون * لن تنفعكم أرحامكم ولا أولادكم يوم القيامة يفصل بينكم والله بما تعملون بصير * قد كانت لكم أسوة حسنة في إبراهيم والذين معه إذ قالوا لقومهم إنا برآء منكم ومما تعبدون من دون الله كفرنا بكم وبدا بيننا وبينكم العداوة والبغضاء أبدا حتى تؤمنوا بالله وحده إلا قول إبراهيم لأبيه لأستغفرن لك وما أملك لك من الله من شيء ربنا عليك توكلنا وإليك أنبنا وإليك المصير، ربنا لا تجعلنا فتنة للذين كفروا واغفر لنا ربنا إنك أنت العزيز الحكيم * لقد كان لكم فيهم أسوة حسنة لمن كان يرجو الله واليوم الآخر ومن يتول فإن الله هو الغني الحميد * عسى الله أن يجعل بينكم وبين الذين عاديتم منهم مودة والله قدير والله غفور رحيم * لا ينهاكم الله عن الذين لم يقاتلوكم في الدين ولم يخرجوكم من دياركم أن تبروهم وتقسطوا إليهم إن الله يحب المقسطين، إنما ينهاكم الله عن الذين قاتلوكم في الدين وأخرجوكم من دياركم وظاهروا على إخراجكم أن تولوهم ومن يتولهم فأولئك هم الظالمون"
فما الهدف من قوله تعالى "لا ينهاكم الله عن الذين لم يقاتلوكم في الدين ولم يخرجوكم من دياركم أن تبروهم وتقسطوا إليهم إن الله يحب المقسطين"؟
ولماذا التكرار في " إنما ينهاكم الله عن الذين قاتلوكم في الدين وأخرجوكم من دياركم وظاهروا على إخراجكم أن تولوهم ومن يتولهم فأولئك هم الظالمون" ؟

أما الكلام المرسل والشائعات وترويج الفتن, فاسمح لي أن أترفع عن الانحدار بمستوى الحديث لتناول ادعاءات ليس لها دليل. وأما سؤالك البريء فلا محل له من الاعراب.

اذا كان كلامي بيخالف الفطرة علشان بحب بلدي ومش ببيعها في مقابل ريالات الخليج.. أو علشان بفضل مصلحة بلدي عن مصلحة الاسلام السياسي وأهدافه المعروفة.. أو يمكن علشان مش حاطة إيدي في إيد المتطرفين المخضبة بالدم الطائفي.. فأنا سعيدة وفخورة بمخالفتي للفطرة دي. سبنالكوا الفطرة يا سيدي. اذا كنا سيبنالكوا دين ربنا تبهدلوا فيه زي ما انتوا عايزين, مش هنسيبلكوا الفطرة يعني؟ خدوها بالمرة هو حد يقدر يعترض على تعريفكم للفطرة؟ دا يبقى كافر ابن كافر
مش أنا اللي أقول طظ في مصر وأنا واكلة من خيرها وشاربة من نيلها. ومش أنا اللي ممكن أروح أترمي ف حضن الخليج المتريش بفلوس الامريكان اللي بيقتلوا المسلمين والعرب. ومش أنا اللي ابيع أهلي علشان منظمة دولية تموليها من الخارج وبتخرب البلد. ومش أنا اللي هحط خنجر ف ضهر بلدي, ولا ممكن أتهوش من الارهاب اللفظي أو الفكري.
للأسف حضرتك لغاية دلوقتي ما فهمتش انا مين. أنا لا أنا جاهلة, ولا ثقافتي ضحلة, ولا حقودة, ولا ست على نياتي, ولا بت دماغها فاضية, ولا علمانية كافرة, ولا مسلمة بق من اللي جالهم الاسلام بالوراثة.. أنا صحيح أتولدت مسلمة لكني بنيت عقيدتي خطوة خطوة على فهم واقتناع. عرفت ربنا اللي على حق, من غير شيخ بدقن ما ينقي اللي يقولهولي ويفسرهولي على مزاجه. واثقة من اسلامي, مش مرعوشة وخايفة حد يزحزحلي ايماني اللي مشربنهولي بالمعلقة. واثقة من عقيدتي, مش خايفة من مؤامرات وهمية ولا صراع حضارات. واثقة من رضا ربنا عني, لا محتاجة أحس ان غيري رايح النار علشان أخاف, ولا طمعانة في الجنة وبقدم رشوة مقدما علشان أدخلها. واثقة من اجتهادي في الايمان, مش مستنية الاديان التنية تطلع غلط علشان أعرف ان الاسلام دين حق. واثقة من عدل ربنا ورحمته اللي مالهمشي حدود, وعارفة ان اجتهادي حتى لو غلط له ثواب عنده. بحب ربنا بجد, مش علشان هدف في الدنيا أو في الأخرة. بحب بلدي بجد, مش شعارات ولا ادعاء وبالكلام من غير فعل. بحب الناس, كل الناس, علشان قلبي كله نور, قلبي دافي بالدين الحقيقي, اللي ميسبشي أي مكان لعداوة أو حقد أو كره. بحب عقلي وعمري ما خفت منه ولا من التفكير, لان التفكير واعمال العقل فرض على كل انسان, مش المؤمن بس, لأ وغير المؤمن كمان, لأن الإيمان بيبدأ من العقل علشان يسكن في القلب. بحب كل خلق الله, من كل الأديان ومن كل الجنسيات, لاني متصالحة مع نفسي ومع العالم. بتكلم بكل حرية, لان جوايا حر.
طب لو دي مش هي الفطرة اللي ربنا فطر عليها عباده, تبقى الفطرة إيه؟

تحياتي يا سيد جعفري. واتمنى ان سطوري لا تضيع هباءا. أنا أعلم جيدا ان كلامي لن يغير من آراءك ومعتقداتك شيئا. لكن أرجو أن تقرأ هذه السطور بهدف القرأة للقرأة, وليس بهدف اصتياد الأخطاء أو الهدم أو الدفاع أو الهجوم أو الصراع أو النفي أو الأثبات أو الايديولوجيا أو المواجهة أو الاختلاف. أرجوك فقط اقرأ.. اقرأ كما أمرنا الله في القرآن الكريم.. اقرأ بعقل مفتوح وقلب صاف.. اقرأ لتفهم الآخر وترى روعة الاتفاق.. اقرأ لتعرف ان ما يعتقده الآخر ليس شرا بالضرورة.. اقرأ لتعلم ان الدنيا ليست فقط أبيض وأسود.. اقرأ لتجد المساحات الهائلة من الاحتمالات وتدرك ان الخير له ألوان عديدة.. اقرأ لمتعة الذهن.. اقرأ لنفسك, للانسان بداخلك.. ستعرف وقتها أنه لا وجود لمن نظنهم أعداء لنا في الواقع, وانما نحن من نصنعهم من نسج خيالنا حين نصبح مؤدلجين, متحيزين, متعصبين, كارهين, ناقمين, خائفين.

كل عام وانت بخير وفي طريق الخير
تحياتي

Fantasia said...

حبيبتي حنين
أزعل منك ازاي بس؟ انتي عارفة اني مش زعلانة
انا صريحة جدا واللي ف قلبي على لساني زي مانتي شايفة
وهو لساني دا اللي هيجبلي الكافية انا عارفة
ههههههههه
يا عزيزتي انا كانت ليا ملحوظة صغيرة واحدة وقلتها بكل صراحة
لكن انتي عارفة ان الاختلاف عمره ما زعلني ابدا
وانتي عارفة غلاوتك عندي من غير ما أقول
ولا أقول؟ ههههههه
انما الكلام الكبير بتاع تفوقينى بمراحل دا والنبي بلاش منه
صدقيني انا عمري ما شفت نفسي كدة ولا أحب الناس تشوفني كدة
انا زي كل الناس اللي بتحاول تعرف وتفهم
بجتهد زيي زيهم وبحاول كلنا نوصل لحاجة مفيدة وكويسة
وانتي انسانة جميلة يا حنين وقلبك زي الفل, علشان كدة تلاقيني كان صعبان عليا الاقي كلمتين مش بتوع حنين في تعليقك
ع العموم يا ستي اهو خير, اديكي علقتي تاني وخلتيني أفك شوية من الجد اللي كنت فيه
تحياتي يا قمر

اليعقوبي said...

السلام عليكم
علي فكرة انا اليعقوبي مش الجعفري

واستاذنك لما اجي من الامتحان ارد علي تعليق حضرتك
انا عارف انه استفزازي فقط دعينا نوضح الامور في التعليق القادم
والسلام

Fantasia said...

الأستاذ أحمد
بحق اقد أثلج صدري تعليقكم الكريم
وكلماتكم الطيبة, المتعمقة, المتبحرة في النفس الانسانية
أشكرك سيدي الفاضل على تعليقك الراقي
الذي يعكس فكرا متحضرا واعيا يقطر جمالا وعزوبة وتطرب له العقول
كما أشكرك على تشجيعك لي ودعائك لي بطول البال والثبات
ان الضمير اليقظ لهو جوهرة النفس البشرية
وفي وجوده صلاح للروح وصفاء للقلب
"ونفس وما سواها، فألهمها فجورها وتقواها" صدق الله العظيم

دعني سيدي أحييك على كلماتك وروعة ما تحتويه من معاني واشارات
واسمح لي هنا ان اعيد جزء منها لاستمتع بجمال الفكر وبراعة التعبير

الناس يا سيدتي إذا فرحت اتفقت
إذا نُصِرَت عَفَت
إذا علمت عذرت
إذا فهمت تسامحت
إذا تحررت تناست
إذا تسامت نَسَت
إذا اغتنت وسعت

أما

إذا غضبت فإنها تختلف
وإذا ظُلِمَت انتقمت
وإذا جهلت تشددت
فإذا احتارت أساءت
وإذا انغلقت تعصبت
إذا تهاوت تمسكت
وإذا افتقرت ضَيَّقَت

اننا هنا أمام قصيدة تحليلية رفيعة المستوى
اشكرك على هذا التعليق الراقي والمتميز
فعلا مصر بخير
خالص تحياتي واحترامي

Innocent said...

سأله: نحاربهم في الخلا ولا نحاربهم في بلادهم؟
قال له لو متنا في بلادهم، نتركها خراب لأولادهم
ساعتها يمكن أولادنا يعملوا اللي ما عملوش اجدادهم


يا فانتازيا: حين نخول أمرنا لرعاة الغنم لا نكون أكثر من مجرد خرفان

اليعقوبي said...

السلام عليكم
استاذة فنتزيا
اولا يااستاذة انا اسف ان كان الكلام استفزك بس سامحيني انا كان قصدي ان الكلام يبقي مستفز لاني استفزيت من البوست مش معقولة اي حاجة تحصل في البلد نقول الاسلاميين ده لو المجاري اتسدت هانقول الاسلاميين ولو البلد كلها جالها امساك هانقول كده برضه لدرجة لما حصلت الحكاية بتاعت سفاح المعادي قالوا وقتها الاخوان هما اللي بيروجوا للكلام ده

وهرد علي كلام حضرتك واحدة واحدة عشان منتخلبتش ويبقي الكلام محدد في النقاش

1-مسئلة الفتنة بوجه عام سببها التطرف من بعض المسلمين واللي بيزودوا استفزاز من النصاري اللي في بعض الاوقات بيطالبوا بحقوق غير حقوقهم وبيتدخلوا في امور ليست من شائنهم
يعني العملية فيها استفزاز وتطرف
والامثلة كتير جداااااا من الجانبين والاسلام يااستاذتي الفاضلة لم يترك امر الا وجعل له تشريع ومعاملة يعني معاملة اليهود والنصاري الاسلام محددها ومخليها غير معاملة الملاحدة والمشركين والله لو اتبعنا الاسلام حقا كتشريعا وحكما ومعاملة لنائينا بانفسنا عن هذه المشكلات فليس معني ان البلد تحكم بتشريع اسلامي ان سيتم الاختلاف في الامور الحياتية والسياسية والاجتماعية بين مسلم ومسيحي
بس
مينفعش واحد مسيحي يطالب بحكم او يترشح لئاسة الجمهورية وهذا الامر واضح تماما في الاسلام والفتاوي التي خرجت حديثا بشان ترشيح النصاري للحكم فهي فتاوي شاذة واغلبها لايستند علي دليل قوي
وياسيدتي الفاضلة لما يسمحوا في امريكا وهي رمز الليبرالية والحرية في العالم ان مسلك يمسك عندهم الحكم او ان رئيس وزراء بريطانيا يبقي مسلم نبقي نتفاهم في الحوار بتاعنا في بلدنا


2-مسئلة دول الخليج
انا مش هانقشك فيها لان كان غرضي الاستفزاز فقط لاني حسيت انك استفزيتي لما ادخلت امورا ليست في الموضوع في الحوار بيننا وكذلك فعلت انت في بوستك فاردت فقط ان انقل احساسي اليك بواقع عملي اكثر فاعلية
لاننا مهما حاولنا ان ننقل شعورنا الي الاخرين لن يحسوا به قبل ان يشعروا مثله وانا بعتذر ان كان ضايقك الموضوع ده

3-حكاية بوست مالوش لازمة
برضه نفس اللي فات بس انا عارف ان كل حاجة في الدنيا ليها لازمة مهما كانت حتي لو ذبابة او بعوضة اي شئ في الدنيا ليه لازمة بس الامر محتاج حيادية في عرضك للامر انت القيت باللوم كله علي التيار المتطرف اسلامي كما يحلو لك ان تسميه وكان نصاري مصر ليسوا الا ملائكة واحنا اللي ولاد 000
واحنا السبب
افكرك بمبدا فيزيائي
لكل فعل رد فعل مساوي له في القوة ومضاد له في الاتجاه
مينفعش نحمل الجانب الاكثر علي المسلمين رغم ان الذي يبدا في الاصل هم النصاري
ولكي في الازمة التي حصلت في اسنا قريبا مثال علي هذا رجل مسيحي شد النقاب من علي وش واحدة بدعوي انها سرقته فالمسلمين سخنوا وقامت الدنيا هناك ومقعدتش غير لما الدنيا اتدغدغت

المسيحي اخطا حين تعدي حدوده مع مراة مسلمة ومن المفروض انه كان اتصرف بعقل زيادة عن كده يعين كان وقفها ادام الناس وخلي وحدة مثلا تفتشها او اي حاجة مش يشد النقاب من علي وشها
وبعض المسلمين اخطئوا في ر دفعلهم حين دمروا محلات اناس ليس لهم ذنب ودمروا واجهة الكنيسة وهذا ليس من الاسلام في شئ و يجب ان يحاسبوا فالكل امام القانون سواء


4-الجماعات الاسلامية يااستاذة كلامك بيدل فعلا انك لم تعرفي الكثير عن الجماعات الاسلامية وعلي فكرة انا واحد من النسا لم يكن لي اي اتجاه اطلاقا لحد 3سنين فاتت ومشيت مع جماعات اسلامية قبل الاخوان واخر جماعة مشيت معاها كانت الاخوان
يااستاذة بما انك تعرفي الجماعات كلها طب تعرفي الشيخ حسن البنا وعبدالله عزام وعبدالقادر عودة والشيخ الياس وطبعا تعرفي الشيخ محمد عبد الوهاب

طب ايه الفرق بين الجماعة الاسلامية في مصر والجماعة الاسلامةي في باكستان
والتيار السلفي اؤسس متي وهو تياران داخل ذلك التيار هل تعريفهم
لبه طالبان اسمها طالبان مش قاعادان ولا واقفان واي اجة تانية

يااستاذة لم اتعود طوال حياتي ان اظل امشي والسلام وابقي تابع لايعرف عمن يتبعه شئ فهذ ليست عادتي ولله الحمد فقد عرفت اغلب الجماعات الاسلامية وتاريخها وشيوخها الكتطرفة منها والسوية

وكلمة حضرتك لما بتقولي ان هذه الجماعات انصهرت في بوتقة الاسلام السياسي فقد اخطئت لان من هذه الجماعات من يختلف بل ويهاجم من تسميهم بتيار الاسلام السياسي (الاخوان)
وهناك اختلافات جوهرية بينهم قد تريهم انهم متشابهون فانت هنا اخطئت في تقيمهم واسالي المتخصصين في الجماعات الاسلامية كامثال ضبياء رشوان وعمرو الشوبكي وهم اعتقد انهم الاوضح علي الساحة واقراي تاريخ كل جماعة من اهلها ومن كتابها وبعد ذلك احكمي


5-مسئلة قراتي للعلمانين لااخفيك سرا وانا حتي شاب مليش اي دعوة بالدنيا اللي حواليا وبيعها كنت برضه مبحبش الناس دي ومحاولتش ان اقرالهم وبعد ماالتزمت وبدات اعرف ىالدنيا اللي حواليا بدات اقرا لمقالتهم وارائهم في الصحف والمجلات انما كتب عنهم لم اقرا
وممكن توصفي لي اسم كتاب معين او مصدر اكاديمي يغطي هذه الاتجاهات لعلي ارجع اليها
وليس معني هذا اني لااعرف عنها شئ بل ان لي اصدفاء بل وجيران هكذا واعرف من كلامهم
واعرف الفرق بين اللبيرالين والاشتراكيين والماركسين جيدا واعرف ان الاشتراكيين انفسهم انواع داخل بعضهم البعض مثلما يوجد تنوع لجماعات اسلامية يوجد اتجاهات اشتراكية ومذاهب اشتراكية

واغلب معرفتي بهم من اناس كانوا كذلك واصبحوا اسلاميين ففندوا ماراوه ولي اصحاب كانوا كذلك فمن الله عليهم


6-مسئلة الاستاذ محمد عمارة بتاعة تكفيير النصاري هو الراجل الصراة مقالش حاجة من عنده الراجل قال اللي بيقوله كل علماء المسلمين اسف جدااا
اللي بيقولوا القران
يقول تعالي في سورة المائدة:(لقد كفر الذين قالوا ان الله هو المسيح ابن مريم)
اية 72
ويقول تعالي:(لقد كفر الذين قالوا ان الله ثالث ثلاثة وما من اله الا اله واحد)ايه 73 سورة المائدة

ويقول تعالي :(ان الذين كفروا من اهل الكتاب والمشركين في نار جهنم خالدين فيها اولئك هم شر البرية)
سورة البينة
وممكن حضرتك ترجعي لكتب التفاسير كلها هاتجدي ان الكلام ده صحيح والجل لم يخترع الذرة
يعني ربنا اللي مكفرهم لاالاستاذ محمد عمارة ولا انا ولا اي حد
ومش معني انهم كذلك في عقيدتنا يبقي نقتل فيهم
لااكراه في الدين )(لكم دينكم ولي دين)
مش هانجبر حد علي الدخول في الاسلام
لكننا لن نجامل احد علي حساب عقيدتنا

7-اقسم بالله العظيم انا لم اقصد تحريف القران او اللعب في الايات فقط ذاكرتي خانتني في الجزء بتاع ياايها الذين امنوا لالاتولوا اليهود والنصاري وقد رجعت لها وهي في سورة المائدة
يقول تعالي:(ياايها الذين امنوا لاتتخذوا اليهود والنصاري اولياء بعضهم اولياء بعض ومن يتولهم منكم فانه منهم ان الله لايهدي القوم الظالمين)
واشهد الله علي نيتي فانا حاشاني ان العب كلام ربي فلست من اولئك الذين يكيفون الدين علي اهوائهم


8-مسئلة الاسلام السياسي كما يهوي للعلمانين ان يسموا الاخوان
يااستاذة ليس هناك اسلام سياسي او اسلام اجتماعي قط
ولكن الاسلام مشتمل علي كل مناحي الحياة من اول دخول الفرد لدورة المياه والاداب الواجب اتباعها الي علاقة الرجل بزوجته والاده في البيت الي السياسة وعقد الاحلاف والمعاهدات وعمل علاقات سياسية
وهذا كلام واضح في السيرة النبوية وفي القران تماما ولا يتسع المجال لذكر كل هذا
فالاسلام دين شامل
وكما ذكرتي الاية (مافرطنا في الكتاب من شئ)
ويقول سبحانه :(ومن لم يحكم بما انزل الله )ووصفهم بثلاث اوصاف الفاسقون والظالمون والكافرون وهذا في سورة المائدة

9-الخلافة ان شاء الله اهانزل بوست قريب بعد ماخلص الامتحانات اكون فضيت شوية واشرح واوضح مسئلة الخلافة في القران والسنة بشكل اوضح 0


10-اما مسئلة الايات التي ذكرتيها في سورة الممتحنة فانا لم اقص منها والايات واضحة جدا ومفهوم معناها ومش لازم المنافقين بس اليس النصاري كفروا بما انزل الينا ولو قلت غير هذا فانت اذن لاتعرفي شئ عن عقيدتهم النصاري لايؤمنوا اساسا ان محمد عليه الصلاة والسلام رسول وبالتالي يكذبوا بالقران فاذا كان الناقل مدعي فان المنقول كذب وهذه عقيدتهم


ومنذ فترة في مجمع الاديان حوالي منذ 4او 5 سنوات كان هناك مؤتمر وخرجت وثيقة في النهاية تقول ان يؤمن كل الاديان بالاديان الاخري واعتبارها اديان سماوية رفض ممثل النصاري وممثل اليهود الامضاء علي هذه الوثيقة وتلقائيا رفض ممثل الاسلام وكان احد شيوخ الازهر الامضاء ايضا
والكلام يطول في شرح الاية
بس في اية تانية اوضح يقول تعالي:(لاتجد قوما يؤمنون بالله وباليوم الاخر يودون من حاد الله ورسوله ولو كانوا ابائهم او ابنائهم او اخوانهم اوعشيرتهم)سورة المجادلة اية 22
وهذه الاية ردا علي كلامك بشان جدودك النصاري الذين تحبيهم وتفتخري بهم


11-يااستاذة استاذنك كما قرات لكل المفكرين والادباء والعلمانين اقراي سيرة رسولك صلي الله عليه وسلم
يااستاذة الرسول صلي الله عليه وسلم مات يوم الاثنين 12من ربيع الاول سنة 11من الهجرة ولم يدفن الالما بويع ابو بكر الصديق رضي الله في اليوم التالي
ليه الرسول عليه الصلاة والسلام لم يوصي بخلافة ابو بكر قبل موته لكي ختار المسلمون خليفتهم بانفسهم ويتعلموا ويتعاملوا بانفسهم ولا ينتظروا الرسول صلي الله عليه وسلم ليعالج لهم وليحل لهم كل مشكلاتهم


12بالنسبة للاستاذ خيرت الشاطر وما ذكرتيه عن غسيل الاموال
اين حقوق الانسان التي تقولي حضرتك انك تدافعي عنها
الم يخرج ثلاث احكام قضائية من القضاء المدني ببطلان الدعاوي هذه
الا تري المهازل العسكرية اقصد المحكمة العسكرية وما يحدث فيها من استهبال علني من احالة مدنين لمحاكم عسكرية ولا حقوق الانسان لناس ولناس بس


13-مسئلة الفن والادب والتكنولجيا والتطور وكيف سنعالج هذه المشاكل
يااستاذة ولله الحمد الناس اللي حضرتك بتتكملي عليهم علي اعلي درجات الثقافة والتقدم العلمي مش شوية سباكين وكهربائية هايمسكوا البلد اول حاجة يعملوها يركبوا لمض للناس وكده القصة كبيرة ونحن نعمل في صمت يعني ارض الواقع هي التي ترد علي الجميع فمثلا انظري الي هؤلاء المحالين للمحاكمات العسكرية استاذة جامعات ومنهم رجال اقتصاد ومنهم رجال اعمال ناجحين يعني الاخوان يعملون وعمليون ولهم الكثير من الابحاث لافراد لهم في كل المجالات التي سبق وذكرتيها ومش تكلف او بدافع عنهم لاني منهم ولكن لان هذا واقع يري بالعين ستريهم في النقابات في الجامعات في مراكز البحث في ملاعب الكرة في كل مكان فنحن نؤمن ان الحل ياتي بانتشارنا وسط الناس وتمنية المجتمعات المدنية وليس هدمها وقد تحدث اخطاء كما ان لغير هم اخطاء
لاننا جميعا لسنا ملائكة


في النهاية بس بعتذر لو كلامي في شئ ضايق حضرتك بس زي ماقلت لحضرتك في الاول ان ده شعور وكنت بنقله في تعليقي اللي فات وعلي فكرة لست من اولئك الذين يسمعون ويقراون لكي يتحفزوا ويردوا ولكني تعلمت التحاور مع الاخر وتقبل فكره بالمناقشة والحوار ولست اهاجم لمجرد الهجوم ولكني حين استفز لا اترفنز ولكني استفز من امامي وهذه عادة في

وعامة كل عام وانت بخير ومصر كلها بخير
بمناسبة العام الهجري
هههههههه


واسف جدا علي المخطوطة اللي انا كتبتها والتعليق اللي هايدخل موسوعة جينس بسبب طوله
والسلام

Fantasia said...

شوف يا يعقوبي, أنا عايزاك تعتبرني زي أختك الكبيرة.. دا لو انت مقتنع اني مش كافرة يعني
أنا مصدقتش بجد ان دا ممكن يكون كلامك انت, لاني اسلوبك ف الحوار كان دايما رقيق ومهذب وبعيد عن الاستفزاز او الحدة
الصراحة يعني اسلوب الخطاب دا انا كنت متعودة عليه من الجعفري, ولغاية ما انت قلتلي "انا اليعقوبي" مكنتش مصدقة
حتى لو دا طبعك, فأنا لم أقصد استفزازك أو استفزاز أي شخص على الاطلاق, ف ليه تكلمني كدة وانت عارف اني مقصدش الاساءة لحد؟
معتقدش انك سعيد بالطبع ده.. ولو كنت سعيد بيه فأنصحك من قلبي انك تسيطر عليه. مش كل الناس هتخاف وتكش علشان انت بتتكلم بالدين
ف بلاش تفرد عضلاتك وتستضعف موقف غيرك ظنا منك انك لازم تكون احسن منه
وممكن كمان تقع ف حد قليل الأدب وما تفرقش معاه انت مين. هينوبك ايه ساعتها؟ والله انا بنصحك من قلبي
اصل المشكلة ان الانسان المحترم ف الزمان ده بقى مطمع لكل واحد فاكر انه معاه الحق اللي هيفحم بيه اتخن تخين
الاستفزاز وسرعة الغضب وعدم احترام الغير مينفعوش يابني يبقوا من صفات المسلم.. ولا انت مش عارف كدة؟

يا ابني يا حبيبي انت صعبان عليا صدقني.. قلتلك اقرا للقراية بلاش توجع دماغك وتتعب نفسك ف الرد عليا
ما تفتكرش اني علشان بحب الحوار والمناقشة العقلانية ابقى بستمتع بالمهاترات ولعبة البنج بونج بتاعة كلمة قصاد كلمة والسلام
انا والله عندي مليون حاجة مهمة ف حياتي لاني انسانة منتجة وبقدر قيمة الوقت
الكلام اللي انت قلته دا كله ما ينطبقش عليه غير انه خارج الملف, وحرام نضيع فيه الوقت
انا رديت عليك ف تعليقك الأولاني لانك صعبت عليا.. فارد عضلاتك ع الاخر وانت مش عارف انك داخل حارة سد, ملكشي عيش فيها
حاولت افهمك, مفيش فايدة.. اقولك احنا مش اعداء, مفيش فايدة.. أقولك اقرا وفكر ف كلامي لنفسك, مفيش فايدة

يا حبيبي دا انت مش مهتم تتأكد من كلام ربنا قبل ما تقوله.. يبقى ازاي عايز حد يقتنع بكلامك عن البشر؟
دا انت فخور قوي علشان مش بتقرا حاجة غير التموين بتاع غسيل المخ اللي الجماعة حطينوا ف دماغك.. تقوم تيجي تمتحني بشوية اسئلة (لمؤاخذة) فارغة بتاعة عيال ف ابتدائي؟ يا ابني رحم الله امريء عرف قدر نفسه.. ولا خلينا أقولك اللي تعرفه.. لا يكلف الله نفسا إلا وسعها
يعني بلاش تعمل ف نفسك كدة وتنهك روحك معايا. لان لا أنا مستنية كلامك اللي جي تسمعه عندي ولا هيفيدني ف حاجة, ولا كلامي هيفيدك بحاجة.. ودا واضح من عدم فهمك لكلامي اللي انت برضه كل تركيزك ف الرد عليه
يا ابني يا حبيبي, انا لما قلتلك اشكرك بجد علشان انت اللي حكيت موضوع عدم دفن الرسول بعد موته, مكنشي قصدي اني مش مصدقاك.. هههههههههه.. أنا كنت بقول كويس انها جت منك انت, علشان محدش من الناس العادية هيشكك ف كلامك. لان الناس العادية معظمها ما يعرفش المهزلة اللي تبعت موت النبي عليه الصلاة والسلام. وانت جيت تكحلها قمت عاميها.. يعني زي الدبة اللي قتلت صاحبها بالظبط. كان ممكن الموضوع يعدي وكان الله بالسر عليم لو مكنتش حضرتك اتحمقت قوي لدرجة انك مدتش نفسك فرصة تفهم قصدي.. أهو دلوقتي كل الناس عرفت حكاية الخناقة اللي حصلت على الخلافة اللي حضرتك فرحان بيها أوي.. وازاي جثة الرسول الكريم فضلت من يوم الاثنين لنص ليل يوم الاربع (يعني ليلتين) من دون دفن لغاية ما الخناقة اللي حصلت في سقيفة بني ساعدة تتفض.. ودي كمان مكنتش أي خناقة.. دي كانت نزاع بين المهاجرين والانصار على المنصب اللي مكنشي له وجود من الأساس. وأكيد حضرتك عارف ان الانصار يوميها كانوا عايزين خليفة ليهم لوحدهم.. يعني لو مكنوش لايموها, كان زمان المسلمين بقى عندهم خليفة للمهاجرين وخليفة تاني للانصار.

يا يعقوبي فيه شباب كتير زيك فضلوا يلفوا ويدوروا علشان يلاقوا قشاية يتعلقوا بيها.. فيه منهم اللي كان شايف انه لازم ينتمي لتيار معين, وفيه منهم اللي عافر لحد ما وصل لصوت عقله هو.. بس الموضوع محتاج مجهود من اللي عايز يوصل.. يعني ماينفعشي يا حبيبي تقوللي انك مش بتحب القراية وبعدين تطلب مني ارشحلك كتاب واحد تقراه! العلوم والمعرفة مش كبسولة ولا سندوتش جاهز تروح بلعه وخلاص. لو مش عندك الحافز والنية انك تعرف, عمرك ما هتعرف. وف الحالة دي يبقى احسن حاجة تعملها هي انك متتكلمشي ف اللي متعرفوش.. حتى علشان سمعة الاخوان متنضربش ف السوق. ههههههههههه
يا يعقوبي دا انت لا انت عارف ربنا بيقول إيه ولا عايز إيه.. شوية تقوللي المسيحيين معاملتهم ف الاسلام غير معاملة الكفار ودا معناه ان ربنا مكفرهمش, وشوية تقول "ربنا اللي مكفرهم"!! يا ابني هو ربنا كفرهم ولا مكفرهمش؟ ولا انت مش عارف؟ والله مش عيب انك تقول مش عارف.. لكن العيب انك تصر انك تفضل مش عارف وتوهم نفسك انك عارف وفاهم كل حاجة
الحتة بقى اللي الجماعة باين عليهم نسيوا يقولوهالك, هي ان الاسلام السياسي, او السياسة المتأسلمة, مش مقتصرة على حركة الاخوان المسلمين والحركات الموالية ليها.. يعني الجماعات الاسلامية كلها يا تعقوبي ف الأخر هي تأسلم سياسي.. القاعدة تأسلم سياسي.. طالبان تأسلم سياسي, الجهاد تأسلم سياسي.. يا حبيبي كلهم هدفهم واحد وان اختلفوا ف الاساليب. يا رب تكون فهمت. ع العموم روح لأونكل مهدي عاكف واسأله, هيقوللك اني بتكلم صح. وهيقولك كمان ان الجماعة اعلنت مساندتها للقاعدة لكن الظواهري فضحهم, واضطروا يكدبوه. هيقولك كمان ان السعودية اللي بتصرف عليكوا كانت واحدة من 3 دول فقط ف العالم (مع الامارات وباكستان) اللي اعترفوا بحكومة طالبان
يا حبيبي اسأل الأول قبل ما تتحمق وتطلع نفسك مش فاهم.. لحسن ممكن لو حد ف قيادات الجماعة شم خبر يروح يبلغ عنك بدل ما انت فاضحهم ع النت كدة. مافيش حاجة يا ابني اسمها جماعة اسلامية سوية.. سوية ازاي يعني؟ ما أحنا كلنا مسلمين اسوياء, يبقى هما لازمتهم ايه؟ لزمتهم يفرقوا الناس على اساس التطرف, والتطرف انواع, فيه اللي بيشيل مسدس وسكينة, وفيه اللي رافع شعار السيف من غير ما يستخدمه بايده, لكن بيدفع الناس البسطاء انهم يستخدموه ضد بعض علشان يوصل هو للكرسي. وأدي دقني لو كنت فاهم حاجة

وبعدين انت بتهرب من الاجابة على السؤال الوحيد اللي سألتهولك.. أل إيه الاخوان مش كهربئية.. يا عيني.. يا ريتهم بيفهموا ف الكهربا بدل ما هما مضلمنها ف وش الناس. يا عم انت, الناس اللي انت فخور بيهم قوي, اساتذة الجامعة وبتوع الهندسة والأقتصاد دول, هيحكموا بالعلوم العلمانية اللي اتعلموها ف الجامعة المدنية, ولا بالشريعة؟ يعني الباشا الاستاذ الاخواني بتاع الأقتصاد هيطبق قوانين الاقتصاد اللي ف الشريعة بتاعة الميراث وتحريم الربا, ولا هيطبق علم الاقتصاد العلماني الغربي اللي وضعه بشر وماشي عليه الأقتصاد العالمي؟ لو هيمشي على الشريعة يبقى موضوع انه استاذ جامعة ده مش هيفيدكوا بحاجة.. ولو هيمشي على الاسس العلمية الحديثة ف ادارة الاقتصاد, يبقى لمؤاخذة انتوا بتلبسوا الناس الحلة.. لان ف الحالة دي يبقى مفيش جديد, هو هو اللي بيحصل دلوقتي. بتقوللي القانون يمشي على الجميع, طيب ما دي علمانية يا بابا.. لان ف الحالة دي المصريين كلهم هيبقوا أمام القانون سواء.. مسلم, مسيحي, يهودي, بهائي, بوذي, ملحد, متفرقش.. بدل مواطن مصري, يبقى مواطن مصري قدام القانون. علشان كدة يا حبيبي الناس الكبارة العاقلة الفاهمة اللي ف الجماعة مكنوش موافقين على موضوع وضع برنامج سياسي محدد.. وللاسف ناس متحمسة ومعندهمش نفس الخبرة ورطوهم ف الحكاية دي, وطلع برنامج مسخرة وشكله يكسف.. راحوا أل إيه قايلين ان ده مشروع مبدئي بس, وان لسه فيه مراحل مراجعة!! والنبي دا كلام؟ فيه حد يعلن مسودة برنامج سياسي بالمنظر ده؟ حتى لو كان هيتغير كله؟

والنبي يا يعقوبي يا حبيبي انا تعبت من كلام البطيخ ده. ويا ريته بطيخ يتاكل, لأ دا بطيخ أقرع لمؤاخذة. ف يا سيدي ربنا يباركلك ف دماغك. اديهالهم يغسلوها انشالله يخلوهالك ع الزيرو انت حر. بس بلاش بالله عليك تقولي كلام يضحك وتضيع وقتنا ع الفاضي. يا تجيبلي أونكل عاكف اتكلم معاه, يا تتأكد من الكلام قبل متكرهولي هنا.. لكن يا ابني مش معنى ان انت سلملتلهم دماغك وانت لسة أبيض وبهروك بشوية الجلا جلا والنصب اللي مالوش أساس, يبقى كل الناس هتزبهل زيك.. لان ببساطة فيه ناس تعبت ف تشكيل فكرها وراحت بنفسها تدور الحقيقة فين. الناس دي غير خالص العيال الصغيرة اللي انت بتفحمهم بكلمتين ميعرفوش عنهم حاجة وتنشكح بنفسك.. يا تلعب على قدك يا تجيبلي حد كبير من عندك يكون فاهم اللي انا بقوله. غير كدة خلينا صحاب وحبايب احسن. ولا أيه؟

يا سيدي سنة زي الفل عليك وع المصريين كلهم
ويا ريت تكون بيضت وشنا كدة ف الامتحان ومكتبتش ولا كلمة من برة الشريعة ف ورقة الاجابة

Fantasia said...

عزيزي انوسنت
الكبير كبير يا عمنا, ياللي بتجيب الخلاصة ف كلمتين مش عارفة ازاي
كلامك حكم بجد. يا ريت الناس تعقله قبل فوات الأوان
هما فعلا عايزين يسيبوها خراب لولادنا
واحنا بنقولهم اتفضلوا اهرسوا براحتكم
يا لهوي.. مصيبة لو الواحد عاش ف عصر الخرفان ده

MerMaid said...

حبيبتي فانتازيا

----------------
انا كنت عاوزة اكتب نفس الكلام ده بس من غير الحتة التاريخية بتاعة الخليج لاني معرفش عنها كتير
بس فعلا الكلام ده شاغلني من يوم ستة يناير اللي هو قبل عيد الميلاد
بجد احنا ليه بقينا كدة؟؟ انتقلنا من مرحلة كنا فيها الهلال يحتضن الصليب والدين لله والوطن للجميع
الي مرحلة ترفض و بشدة وجود الاخر
و تحرض علي فناؤه والذهاب به بعيدا
طيب
ده الرسول صلي الله عليه وسلم لما امر المسلمين المستضعفين بالهجرة
امرهم بالهجرة الي الحبشة
و قاللهم ان فيها رجلا نصراني لا يظلم عنده احد ابدا.
وقاللنا برضه
اوصيكم بنصاري مصر خيرا فان لنا فيهم صهرا و نسبا .
و ابن الرسول صلي الله عليه وسلم كانت امه نصرانية ...و احبها الرسول حبا كثيرا...
حتي لو كان الاقباط لا يعترفون بسيدنا محمد
فهذا شانهم هم ...و نحن لنا اتباع اوامر ديننا المتسامحة السمحة
طول عمرنا نقول الاسلام دين السماحة
طيب لو مكناش متسامحين مع اللي مختلف عننا في الدين او اللون او العرق
هنكون متسامحين مع مين ؟؟؟
انا عن نفسي ارفض مبدأ الانتماء الي اي جماعة اسلامية .انا مسلمة
هروح انتمي لجماعة ليه ؟؟؟؟؟
ايه الغرض؟؟؟
معايا المصحف و معايا التفسير ومعايا السنة والاحاديث
ليه بقي هنتمي لجماعة اسلامية؟؟؟
مسمعناش ان ايام الرسول كان فيه جماعات اسلامية
لكن كان فيه دين اسمه الاسلام وكان فيه تعايش
سعدت كثيرا بزيارة عمرو خالد الي حضور مراسم القداس يوم عيد الميلاد
طبعا هيخرجوا يقولوا عمرو خالد ازاي يروح
و عمرو خالد ده كذا كذا وكذا
-----------------------------------
بوست جميل

و احييكي علي طولة بالك و صبرك

مبتجيش ليه؟؟
:))

اليعقوبي said...

ههههههههههههههههههههههه
كلام حضرتك جميل جدا وبالفعل كثرة الرد تهدر الوقت وانا كمان مش فاضي والله ولكني عملت بلوج عشان اتناقش واتحاور مش عشان انغلق علي نفسي والاقي تعليق واحد من الاخوان يدخل يقول لي جزاك الله خيرا موضوع جميل انا اردت ان اعرف العلمانين واقعا وتعاملا علي النت حتي تكتمل الصورة لدي فقط
وقلت لحضرتك انا مش النوع اللي يسمع عشان يرد وبستفز وبترنفز لاني بشر بني ادم وليس العيب في الفعل ولكن العيب قد يترتب علي رد الفعل وانا املك رد فعلي حتي في احلك الامور


وياسيدتي الفاضلة انا مكنتش اعرف انك كبيرة اوي كده عشان تقول لي يابني بس معنديش مشكلة خالص ان ةتكوني في مقام والدتي ده شرف لينا يافندم


اخر حاجة بس انا عمري ما قلت علي مسلم كافر ابدا نهائيا فلست قاضيا لاكفر احد او ان اتهمه بالجهل

توضيح الفرق بين الكافر اي الملحد واليهود والنصاري كلهم عند الله سواء وسورة الاخلاص توضح هذا ولكن تعاملهم يختلف لان اليهود والنصاري يؤمنون بوجود الله اما الملاحدة فينكرون وجوده تماما

الاية اللي ذكرتها خطا صلحتها وتركت لحضرتك ترقيم الايات عشان لو اردت التاكد من صحتها وحدث هذا الخطا لان الايات اتذكرها واقولها ولكن عندما نبهتني جزاك الله خيرا رجعت الي الاية والسورة ووضعهتا امامك برقمها لكي تتاكدي بنفسك والله علي مااقول شهيد

ومع اجمل تحياتي وتقديري
والسلام

اليعقوبي said...

وبعتذر علي اي اساءة كانت في كلامي او اي كلمة جرحت حضرتك او ضايقتك ولكنه الحوار الذي قد ياخذ طابع حاد في بعض الاوقات ولكنه لايفسد للود قضية
والسلام

egyptian feminist chic said...

excellent post as usual Fanta. It takes a lot of guts to express your point of view so well and so clearly. you make some very strong and valid points, and state so many facts that I am sure many people were unaware of. I salute you! there is realy nothing more to add.!

(My computer doesn't have the ability to type in arabic, so my comment is in English)

raaasa said...

I have often thought you show a remarkable aptitude in the field of diplomacy and leadership. Your post underlines these talents
Truly wonderful insights
Bravo

Fantasia said...

عزيزتي ميرميد
معلش طولت ف الغيبة واكمال الرد عندك, بس اديكي جيتي وشوفتي اللي انا فيه
ههههههه
الله ينور عليكي بجد.. مفيش حاجة اسمها جماعة اسلامية, لانهم مش لوحدهم اللي مسلمين
على العموم ارجو ان البوست يكون افادك في ايجاد اجابات على تساؤلاتك
واشكرك على تعليقك الجميل اللي يدل على تحليكي بسماحة الاسلام الصحيح وصفاء قلبك
اسفة على التأخير, هتلاقيني عندك قريب
خالص تحياتي

Fantasia said...

الأخ الفاضل اليعقوبي
يا سيدي يسعدني تقبلك كلامي بصدر رحب
وانا فعلا مفيش عندي اي مشاعر سلبية من ناحيتك
انا يمكن اكون فهماك اكتر ما انت فاهم نفسك, علشان كدة رديت عليك بكل ود
انا مش بتهمك بحاجة لا سمح الله, ولازم تكون مقتنع من جواك اني حتى في هزاري معاك كنت بعتبرك اخويا الصغير فعلا
والله يشرفني انك تعتبرني في مقام والدتك
الشباب اللي زيك ملهمشي ذنب وحرام نحملكوا أكتر من طاقتكم
وان كنت اعتب عليك عدم اعتمادك على ذاتك واجتهادك في تحصيل المعرفة بالقدر الكافي
لكن انا عارفة ان نواياك مش سيئة, وانك عايز اللي تعتقد انه خير
لو مكنتش واثقة من كدة, صدقني كنت رديت عليك بجملة واحدة وخلاص
لاني شوفت الناس التانية اللي ممكن انت فاكر انك بتنتمي ليهم, لكن ف الواقع داخلهم مختلف تمام الاختلاف ونواياهم خبيثة بالفعل
اوعى انت بس تكون خدت على خاطرك من اسلوبي
انا قلت اتكلم معاك بالبلدي كدة علشان نشيل التكليف ونبقى صحاب بجد
انا اصلي اكره اللف والدوران كره العمى
احب اكون صريحة واتكلم على بلاطة
انا شخصيا معنديش أي مانع يبقى ليا أصدقاء من اللي فاكرين نفسهم اخوانجية
اهي عزوة برضه والواحد مننا يحب يبقاله عزوة
وانا اقدر افرق كويس من الاخواني الحقيقي والاخواني المتعاطف
بس عايزة اقولك حاجة اخيرة ننهي بيها الكلام ف موضوع المسيحيين اللي انت مصمم تسميهم نصارى, أل يعني هي دي اللي هتخليك اخواني
ما ينفعشي نقول ربنا بيفرق بين الناس على اساس الدين, لانه العدل.. مش عادل, لأ, العدل نفسه
لو فاكر ان ربنا خلاك مسلم علشان يخليك احسن من غيرك لمجرد انك اتولدت لاب وام مسلمين, يبقى انت بتنفي عن الله صفة العدل
انت مسلم, واسلامك بيستوجب متطلبات كتير قوي
انت مسلم يعني عندك ورقة امتحان مختلفة عن ورقة المسيحي
الدرجات بقى مش انت اللي هتديها لنفسك, ولا الاخوان هما اللي هيدوهالك
ولا يعلمها إلا الله
انت كل اللي عليك انت تبص ف الورقة بتاعتك وتجتهد فيها
ملكشي دعوة بورقة زميلك, ركز ف ورقتك
ملكشي دعوة هو ذاكر منين, ولا ذاكر اصلا ولا لأ, ولا جاوب أو ماجاوبش
اللي هيحاسبنا كلنا هو اللي يعلم, وهو اللي ف ايده كل شيء
ف بلاش تسقط نفسك علشان عمال تبص ف ورق اللي حواليك طول الوقت
أو تقول انهم مخصوم منهم اعمال السنة قبل ما يدخلوا الامتحان
لان ببساطة, حتى لو كلهم سقطوا, مش معنى كدة انك هتنجح
اللهم اني قد بلغت.. اللهم فأشهد

خالص تحياتي

Fantasia said...

العزيزة جدا EFC
اشكرك جزيل الشكر على تشجيعك ومساندتك لي
تعليقك كان بحق مفاجأة سارة, ملأتني بالأمل والاصرار
اعتقد انه يجب ان نتحلى بكثير من الشجاعة حتى نستطيع مواجهة الوضع الراهن وما يحتويه من تحديات صعبة
لم يعد هناك مجال لرفاهية الخوف أو الكسوف أو المجاملة
المواجهة وكشف الجروح هي السبيل الوحيد للخروج من ازماتنا العديدة المتشابكة والمتشعبة
كل ما ارجوه هو الا يداهمنا الوقت قبل ان ننجح ف التصدي لهذا الوباء
تحياتي واحترامي لعقلك الحر

Fantasia said...

عزيزتي raaasa
سعيدة جدا بتشريفك للبلوج لأول مرة
وتعليقك هو شهادة اعتز بها واقدرها كثيرا
كنت دوما أظن ان اسلوبي المباشر والصريح بعيد كل البعد عن فنون الدبلوماسية والزعامة
لكن كلماتك جعلتني اعيد التفكير لعلي اتوصل لما يمكن ات تكون متطلبات هذه المهام في المستقبل
شكرا على زيارتك الجميلة وتشجيعك المخلص

The Alien said...

إحنا بالفعل في عصر الخرفان

أنا متابع ومستمتع جدا بالنقاش
لكن أعذريني في عدم المشاركة
تحياتي

Anonymous said...

السلام على من اتبع الهدى
بعد قرأتى لكل التعليقات الوارده
اكتشفت عده امور اهمها..
ان اللى انتى كتباه دا مجرد للشهره
بمعتى خالف تعرف
ولكى يكون لك شعبيه وحد يدخل يعلقلك
وادينى اهو بعلقلك يمكن الطاقه المكبوته عندك تطلع وبصقفلك كمان برافووو شاطره وان شاء الله هجبلك مصاصه
بصراحه انا وجدت من خلال كلامك ان هو دا الاسلوب اللى انتى بتفكرى بيه انسانه غير ملمه بموضوع تتحدث عنه
هما العلمانييين كلهم زيك كدا؟؟؟بياخذو بظاهر الموضوع دونما التطرق للب الموضوع وحججه واسانيده؟؟؟
كان واضح دا من كلامك وردك على نفسك
والله انا مشفقه عليكى ولا استهزء بك
وبعدين لاحظت انك مش عجبك ولا مدونه كل ما الاقيك معلقه فى مدونه اجدك منتقده الموضوع خلاص ابقى قولى لااصحاب المدونات الكلام اللى انتى عاوزاه عشان يكتبوه!!!!!!!!
وبعدين محدش متفق معاكى غير اصحاب فكرك بس
وبعدين طلعتى كل اللى فى مصر هبل وساذجيين وبيضحك عليهم وبيتعملهم غسيل مخ!!!!!!!الشعب كله اهبل فبيختار بعبط صح؟؟؟؟؟؟؟؟؟
انتى الوحيده وباقى العلمانيين القله انتوا اللى عندكم وعى كامل
لكن باقى الشعب اهبل
الناس عارفين مين الصح الذى يريد العزه لهذه البلد
ومين يريد نشر فكر فقط
يريد تقرأى مبادىء الاسلام وكيف عامل اهل اذمه بالحسنه
حتى فى الحروب الوصايا التى كان يوصى بها الرسول المؤمنين من عدم قتل شيخ ولاطفل ولاامراه وعدم قطع الاشجار
مشكلتك انك بتقراى مش للتعلم ولكن تبحثى عن اى نقطه للهجوم
ولهذا لن تتعلمى لانك لاتبحثى عن العلم
بصراحه دى اول مره ازور المدونه
من
عاشقه الكلام
نسيت اقولك انى بضيع وقتى معاكى لانك مش هتتنصحى ولاهتسمعى اي كلمه لانك مش بتناقشى للتعلم ولكن للمجادله واثبات الذات
دمتى بألف ود

Fantasia said...

غير معرف
يا نهار جبن
ههههههههههه
طب يعني مش عارفة تضربيلك أي اسم
دا انتي ايدك كانت بتترعش وانتي بتكتبي
يالهوي ع الغل
طب والنبي ايه اللي انتي قولتيه ليه فايدة اصلا؟
يا ستي شكرا على اخلاقك الاسلامية العالية وتدينك الخرافي
انا لا ادعيت شيء ولا قولت انا فلتة عصري وأواني ولا ليا جمهور كبير زي ما انتي شايفة
طب انا بقرا وخلاص, عني ما اتعلمت حاجة
مش احسن من اللي مش بيقرا من أصله؟
ولا هو الجهل نعمة اليومين دول؟
يا ستي كلامك مفيهوش حاجة يتدر عليها من اساسه
الله يكرمك ريحتيني وكشفتي وجهك القبيح بنفسك
خليكي اقعدي غللي وكلي ف بعضك كدة
بس حاسبي ليجيلك القلب ولا حاجة
المشرحة مش ناقصة قتلة
هههههههههه
دا انتي عسل والله
على رأي اللمبي
روحي يا شيخة.. ومتجيش تاني
ههههه

Fantasia said...

عزيزي ألين
منورني, وسعيدة بمتابعتك
ولو اني كان نفسي اعرف رأيك ف اللي تابعته
بس عارفة انت مش عايز تعلق ليه
والصراحة عندك حق
انا نفسي اتصدمت مخبيش عليك
لكن سيبك انت, المهم اني ريحت ضميري
خالص تحياتي

Nsreen Bsunee said...

عزيزتى فانتازيا

اولا انا باعتذر لانى مش حاقدر ادخل فى النقاش الخاص بالبوست دلوقتى لانه محتاج تركيز لا املكه الان للاسف

انا جيت بس عشان اسجل اعجابى بيكى ومن حظى السعيد انى اتكعبلت فيكى فى مناقشتين كنتى فيهم متميزه جدا ما يخص مساواه المراه بالرجل عند مروه الزراع وفى ما يخص حب مصر عند ميرمايد

اكرر تحيتى وتقديرى

ولى عوده

تحيه و ود

amro said...

سلامات فنتازيا
يسلم فمك، بوست متميز فعلا
بعتقد ان الحل فى دولة مدنية تحترم حقوق مواطنيها، وتؤسس لحقوق الانسان كقيم اساسية فى وعى الشعب، لما نفرق بين البشر على اساس الدين فى ظل دولة مواطنة نبقى بنخدع نفسنا، مشكلة الدولة انها رغم عدم اعترافها الظاهرى بالتيار المتاسلم الغبى، الا نها تقريبا متحالفة معاه لمصالحها، والتيار دا الحقيقة بينشر قيمه مستخدما الدين كايدلوجيا تبرر له صناعة القبح والارهاب فى حياتنا وبرضو فتش عن المصلحة الاتصادية، الاسلام دين رائع وتقدمى ، وفى فترة ما كان حركة وعى وثوره حقيقية ، مشكلة هئولا انهم لايومنون بان الاشياء تحدث فى ظل سياقات تاريخية يجب ان تقرا فى ظلها، الاسلام دين وليس دولة وليس هناك مايمكن ان يبرر ان منصب سياسيا ما يتحول من دائرة السياسى الى خانة المقدس، مالذى يجعل الخليفة او الرئيس مقدسا، من يحاسبه؟
ولك تحياتى

Anonymous said...

بس يا تيته
انا مش كتبالك اى اسم وخلاص
انتى لوبتدخلى على اى مدونات غير اللى ذيك
هتلاقينى موجوده وبعلق على كل المدونات
لانى مش عامله مدونه اصلا
دى اول حاجه وشىء طبيعى انك سيئه الظن
وكويس انك اتكلمتى باسلوب واحده فى الشارع مش صاحبه فكر ومبادىء وبعدين واضح من ردك اللى مفهوش رد اصلا انك مثقفه عالاخر

هههههههههههههههههههههه
وبعدين ردك كان قوى لدرجه متكلمتيش ولا كلمه علميه او تخص مبادئك الساميه
هههههههههههههههههههههههه
حسيت ان سواق ميكروباص بيتكلم
عامه مكنتش متوقع منك حاجه اقل من كده
كويس اننا عرفناكى وسلالالالالالالالالالالام
يا تيته
من عاشقه الكلام

Fantasia said...

العزيزة نسرين بسيوني
اشكرك جزيل الشكر على هذا الثناء
وشاكرة أيضا لهاتين المدونتين لتعريفي بشخصك الكريم
كما أود أن اعبر عن اعجابي بردك الرائع على نفس الموضوع, والذي يعكس رؤية واقعية ومتوازنة
تعليقي سأرسله على مدونتك ف القريب العاجل
خالص تحياتي ومودتي

Fantasia said...

amro
اسعدني تعليقك سعادة غامرة
وأتفق مع تحليلك ورؤيتك للحل
بالفعل
الاسلام دين رائع وتقدمى ، وفى فترة ما كان حركة وعى وثوره حقيقية
بل أضيف ان الاسلام كان هدفه الاساسي الثورة على البداوة والفكر المتحجر
وكانوا من يتهمون بالهرطقة واتباع الفكر الرديكالي في الغرب من قبل محاكم التفتيش في العصور الوسطى يتهمون بالاسلام, لأنه كان يحض على اعمال العقل حتى في تناول المقدس
ومن يدعون انهم حماة الاسلام اليوم انما هم يمحون انجازاته وينتصرون لما سبقه في ما يعرف ب"الجاهلية" من تخلف وتحجر ورفض للتطور واعمال العقل
فهؤلاء يصح عليهم القول بانهم "كالحمار يحمل أسفارا" بجهلهم المطبق ونظرتهم الضيقة التي أدت أضرت بالاسلام أكثر مما أضر به أعدائه على مر العصور والأزمنة
أتفق معك سيدي الكريم في ضرورة عدم اغفال العامل الاقتصادي
فهناك مكاسب مادية لهؤلاء تعتمد على فقر وضعف من يقعون تحت تأثيرهم
شكرا على تعليقك القيم
خالص تحياتي واحترامي

Fantasia said...

غير معرف
زعبولة القلة رجع تاني
ههههههههههههه
يا بنت الناس انا مش قلتلك كللي ف بعضك وغللي واهري ف روحك زي ما انتي عايزة؟
فيه إيه حرية أكتر من كدة؟
ههههههههه
انتي اللي غاوية بقى تغيظي نفسك زيادة
تقريبا والعلم عند الله انك فاضية وعندك ميول سادية عدوانية تجاه نفسك
يا ماما دي مش عيادة امراض نفسية
يا تقولي حاجة ليها قيمة يا تريحينا من وجع الدماغ ده
يا عاشقة الكلام الفارغ
موتي بحسرتك, ولا ألف زيك يهزوا مني شعرة

بحبك يامصر said...

انا متشكر يا فانتازيا انك اتقبلتى رايى ولو حتى كان مختلف لرأيك لان هنا الافاده
المهم انا مش بناقض نفسى ولا حاجه انا فعلا مش بيفرق معايا ان كان الشخص اللى بتعامل معاه مسيحى او مسلم وعارف ان المسيحى له حقوق فى بلده مصر زيى تمام وعمرى ما انكرتها او حاولت افرق بين المسلم والمسيحى بس الحكايه سعات بتخرج عن نطاق اختيارنا لان ربنا بيحدد لينا طريقة عبادتنا ليه وبينظملنا كمان حياتنا
وبعدين ازاى القرأن والسنه متعرضتش لمسأة الحكم هو ذكر الحدود فى الجرائم دى مش حكم يعنى قطع يد السارق وارجم للزانى والقصاص فى اقتل كل ده مذكور فى القرأن والسنه وياريت متقوليش ان دى حدود مينفعش نحكم بيها دلوقتى احسن اتصدم فيكى للان ربنا سبحانه وتعالى ارتضى للبشريه كافة والى يوم القيامه اى لكل العصور الاسلام دينا واتمه
واسف لانى حاسس انى بطول فى الموضوع

appy said...

بجد جبتى اخر الكلام عجبنى قوى ده

يا ريت الناس اللي بتكرر كلام سمعته، تفكر ولو كام دقيقة هم بيهينوا مين بالظبط. هو يعني الاحتلال مقدرش علينا, نقوم احنا بقى نعمل اللي الاحتلال مقدرشي عليه؟ ده مش غسيل مخ لا مؤاخذة. دول رموا حاجات مش نضيفة في دماغنا.. ده لو لسه عندنا دماغ يعني.
برافو عليكى بس توهتينى شويه فى الاول حرام عليكى بقى

السكندرى said...

الأخت الفاضلة
سلام على من اتبع الهدى

صراحة أنا مش عارف ديانتك بالضبط مسلمة ولا مسيحية حتى أفند كلامك بما يتناسب مع ديانتك

لكن دعينى أولا أبدى إعجابى بأسلوبك السيق فى العرض
والكتابة بغض النظر عن الفكرة التى يدور حولها الموضوع فواضح انكى موهوبة موهبة فطرية اصيلة

ثانيا

هناك أشياء كثيرة أريد ان أرد عليها فى مقالك الذى أختلف معكى فى اشياء كثيرة فيه

لكن سأؤجل ردى التفصيلى إلى مابعد ردك على تعليقى الإجمالى هذا على المقال

أما عن تعليقى الإجمالى عن فكرة المقال
دعينى أقول لك -وأنا رجل أكاديمى وباحث أنظر فى المراجع قبل القراءة-
أن موضوعك عبارة عن مزيج من أفكار متناثرة ليس بينها أى وسيلة ربط وأنت بأسلوبك الرائع مزجتى بينها وأخرجتيها فى هذه الصورة

أختى الفاضلة
الموضوع فيه مغالطات سواء تاريخية أو أيديولوجية كبيرة وفادحة فمثلا انتى تعرضين وجهة نظرك على أنها الحقيقة المطلقة غير مستندة فيها إلى مرجع بل مرجعها الوحيد هى قناعتك الشخصية
لو قارنت كلامك بما هو مكتوب فى الكتب أجد انه مخالف تماما لما ذكر فيها سواء فى كتب المؤيدين أو المعارضين لوجهة النظر العامة التى تطرحيها

لذلك اطلب من حضرتك اولا أن تضعى لنا بعض مراجعك فى المعلومات التى طرحتيها سواء التاريخية أو التى تتعلق بأيديولوجيات الفئة التى تنتقضينها

وأشك أنك تستندين ألى مرجع أصيل
فأنت إما تنقلين كلاما سمعتييه على مر حياتك من أناس علمانيين مثلك
أو تنقلين من كتبهم

وهذا ليس منهجا عادلا فى الكتابة والنقض والتحليل

لأنك مطالبة كمثقفة حينما تعرضين وتفندين رأى أى فكر مخالف
أن تنقضى ما جاء فى أدبياتهم الأصيلة هم وليس ما جاء فى كتب معارضيهم عنهم

يعنى بالبلدى
لما تيجى تنقضى فكر الإخوان(اللى أنتى خلطى بينهم وبين السلف )-وهذا ينم على عدم إطلاع-

ما تنقضيهمش مما جاء عنهم فى كتب العلمانيين مثلا
ولكن انقضى ما جاء فى أدبياتهم وكتبهم الأصيلة التى توضح حقيقتهم الفعلية وليس ما فهمه خطأ من يعارضهم

لذلك
أتمنى أن ترسلى لى مراجعك التى أستقيتى منها معلوماتك
التى عرضتيها فى ذلك الموضوع

والتى أنا متأكد تماما أنها لا تحتوى على أى مرجع أصيل من أدبيات اى فئة ممن تحدثتى عنهم

لذلك
أدعوا كل من اطلع على ذلك المقال
أن يؤجل حكمه عليه
بعد أن نجرى تلك المناظرة بينى وبينها
والفيصل بينى وبينها فى الحكم أن تكون المعلومة التى اعرضها أو تعرضها هى مستقاه من مصدر أصلى ينم عن صاحب الفكر الذى نتناوله بالنقض

تقبلى تحياتى
ومنتظرك على أحر من الجمر

السكندرى said...
This comment has been removed by the author.
السكندرى said...

الأخت الفاضلة
معذرة على العودة قبل الرد على تعليقى الأول

ولكنى نسيت شيئا كنت أود أن أعلق عليه من ضمن حكمى الإجمالى وليس التفصيلى على المقال

هو أنكى يتضح أحيانا عدم عدالتك وتناقضك مع ذاتك فى هذا الطرح الذى تطرحينه

وذلك يتضح فى أمثلة كثيرة أؤجل معظمها وأركز على أوضحها

أنت ممن يدعوا إلى إحترام الفكر الأخر وعدم تناوله بالقذف والسباب
وذلك حينما تكلمتى عن رأى مشايخنا الكرام فى المتبرجات
وتنتقضى فيهم أنهم يصفونهم بأنهم سافرات متبرجات وما شابه ذلك رغم ان ذلك ليس رأيهم بل هو رأى المولى عز وجل وليس رايهم هم

فى ذات الوقت انتى وقعتى فى نفس الخطأ الذى تقولين أنهم وقعوا فيه

وذلك حينما تناولتى قضية المحجبات
فأنتى تناولتيهم بأسلوب أيضاً غير لائق فيه سب ولعن أيضا
حينما قلتى عنهم انهم كالخيام

وهذا تناقض واضح وجلى فى منهجك النقدى والفكرى والتحليلى

فلا أدرى هل حلال لكى ان تشتميهم رغم ان رأيك لهم ليس مدعوم برأى أو نص إلهى من الدين الذى تؤمنين به

وحرام عليهم أن ينتقضوا هم المتبرجات كما يسمونهم
؟؟؟
هذا بالرغم ان هذا ليس رايهم هم بل أنهم ينقلون ما جاء عن الأله الذى يؤمنون به؟؟

تقبلى تحياتى مرة أخرى
وعلى وعد بالعودة إليكى فى وقت لاحق

Fantasia said...

بسم الله الرحمن الرحيم

الأخ الكريم أبو حنين
وجب الترحيب بك أيا كانت وجهة نظرك في أو فيما أكتبه, وأيا كان هدفك من هذه الزيارة الميمونة
يبدو أن مدونتي المتواضعة قد حظت باهتمامك, لدرجة ترك تعليقين على موضوع تطوع بعض الاخوان بالرد التفصيلي على ما جاء فيه
وهذا يسعدني, ويشجعني في المضي قدما في التدوين على هذه المدونة حديثة النشأة
ومن دواعي سروري أيضا اعتراف سيادتكم بوجود بعض المنطق والموهبة وهذه قاعدة عظيمة لأي نقاش بناء

ولكن

بعد قراءة تعليقكم الثاني لاحظت صدور الحكم على المقال قبل بداية المناقشة
كما لاحظت محاولة سيادتكم للزج بي في خانة المتهم, الذي عليه بالأساس أن يبريء ساحته قبل أن يتناول شرح وتوضيح أفكاره

واسمح لي هنا بعدة ملاحظات, أوردها في نقاط علنا نختصر الوقت والجهد في التقريب بين الآراء إذا كان هذا هو الهدف من النقاش, والله أعلم

لا أرى لتحديد الديانة أي علاقة بمناقشة الموضوع المطروح, ألا وهو الفتنة الطائفية التي تمزق الأمة وتضعفها في مواجهة الأعداء الحقيقيين

وقد تفضلت حضرتك وقمت بتصنيفي بالفعل ك"علمانية" وهذا واضح في لغة الخطاب المستخدمة والأحكام المسبقة التي وردت في تعليقاتك. العلمانية ليست ديانة يا سيدي الفاضل, ولا تؤدلج العقل كما تفعل أغلب النظريات الفكرية

وأنا أعلم تماما رأي حضرتك في العلمانيين؛ فلا داعي للتظاهر باحترام آراء من تراهم ضعيفي الايمان المنضمين دائما لصفوف الخونة والعملاء

هذا المقال لا يعبر سوى عن رأي شخصي, وهو مكتوب بالعامية. وقد أعتمدت في جزء كبير منه على اسلوب أدبي في الكتابة, وهكذا فيجب أن يعامل معاملة النص الأدبي, وألا يخضع لمعايير تقييم البحث الاكاديمي

أنا لم أدعي أن هذا المقال هو نتاج بحث, أو يحتوي على معلومات موثقة. ولم أفرض على أحد أن يتبنى وجهة نظري, أو أدعو القراء للأخذ بما ورد فيه على أساس أنه الحقيقة المطلقة

وأوكد هنا أن وجهة النظر المطروحة ليست عامة؛ ولكنها شخصية, ذاتية

لا يعني هذا أن الاحداث التاريخية الواردة ليست صحيحة, أو أن المعلومات المذكورة هي من سبيل الدعاية لتبني ايديولوجية ما. فانا كما قلت وأكرر دائما لا أنتمي لجماعة ما ولست مؤدلجة الفكر

ومما سبق, يتضح أن الهدف من أسئلتكم الكريمة هي استدراجي لمنطقة بعيدة كل البعد عن محتوى المقال وعن فكر صاحبته. ويتأكد هذا في مجموعة من الأحكام المسبقة والادعاءات غير المبررة

الادعاء الأول
انتى تعرضين وجهة نظرك على أنها الحقيقة المطلقة غير مستندة فيها إلى مرجع بل مرجعها الوحيد هى قناعتك الشخصية

الادعاء الثاني
فأنت إما تنقلين كلاما سمعتييه على مر حياتك من أناس علمانيين مثلك. أو تنقلين من كتبهم
.................................
لا أظن أن ما كتب في هذا المقال ممكن أن يكون منقولا بأي حال من الأحوال

الادعاء الثالث
يعنى بالبلدى
لما تيجى تنقضى فكر الإخوان(اللى أنتى خلطى بينهم وبين السلف )-وهذا ينم على عدم إطلاع-
................................
أنا لم أذكر اسم الاخوان ولا مرة واحدة في الموضوع يا سيدي! وكيف بالله عليك أخلط بينهم وبين السلف الذين هم في رحاب ربهم؟ أعتقد أنك كنت تقصد "السلفيين", أي أتباع الفكر السلفي

الادعاء الرابع
ما تنقضيهمش مما جاء عنهم فى كتب العلمانيين مثلا
ولكن انقضى ما جاء فى أدبياتهم وكتبهم الأصيلة التى توضح حقيقتهم الفعلية وليس ما فهمه خطأ من يعارضهم
.................................
نفس الحكم غير المبرر والاستناد على كون العلمانية نظرية أو ايديولوجية. العلمانية يا سيدي تعني الفكر الحر. فما هو تعريف "كتب العلمانيين"؟

الادعاء الخامس
انت ممن يدعوا إلى إحترام الفكر الأخر وعدم تناوله بالقذف والسباب. وذلك حينما تكلمتى عن رأى مشايخنا الكرام فى المتبرجات. وتنتقضى فيهم أنهم يصفونهم بأنهم سافرات متبرجات وما شابه ذلك رغم ان ذلك ليس رأيهم بل هو رأى المولى عز وجل وليس رايهم هم
..................................
أنا لم أذكر أي شيوخ يا سيدي! علام بنيتم هذا الاستنتاج؟ أنا كنت أتحدث عن بنات جيلي الذين يعبن في أمهاتهم وأمهات أمهاتهم. والله لم يقل أن أمي سافرة أو متبرجة, وأنا على يقين من ذلك. أين هو السب والقذف؟

الادعاء السادس (يا كريم
وذلك حينما تناولتى قضية المحجبات, فأنتى تناولتيهم بأسلوب أيضاً غير لائقفيه سب ولعن أيضا. حينما قلتى عنهم انهم كالخيام
................................
أرجو اعادة قراءة الفقرة.. بل المقال. أنا كنت أتحدث عن النساء الملفحات بالسواد, المكفنات وهن أحياء. أتحدث عن الحجاب الوهابي المفروض بالقوة الجبرية في بلد آل سعود. ولا أظن أن هذا يرضي الله في شيء. ولا أظن أن كلمة خيمة, وهي كلمة عربية أصيلة تعني المأوى, تعد سبا أو لعنا

الادعاء السابع
فلا أدرى هل حلال لكى ان تشتميهم رغم ان رأيك لهم ليس مدعوم برأى أو نص إلهى من الدين الذى تؤمنين به. وحرام عليهم أن ينتقضوا هم المتبرجات كما يسمونهم؟؟؟ هذا بالرغم ان هذا ليس رايهم هم بل أنهم ينقلون ما جاء عن الأله الذى يؤمنون به؟؟
...................................هل هذا سؤال أم إجابة؟ أين هي الشتائم التي حللتها لنفسي؟ وما هو الذي حرمته على غيري؟ وما هو الذي نقلوه؟ وهل الإله الذي يؤمنون به غير الإله الذي أؤمن به؟ هل ادعيت لا سمح الله أنني إله كي أحلل وأحرم؟ ما هذا الافتراء بالله عليك؟

وبعد طرح الاسئلة المبنية على معطيات خاطئة, نأتي لمجموعة من الاحكام المسبقة, التي تجعل من يأخذ الاسئلة الواردة مأخذ الجد يبدو كالمعتوه, أو المدان الذي يهرع لاثبات برائته ليرفع السيف عن رقبته. وأنا والحمد لله لست هذا أو ذاك

الحكم الأول
موضوعك عبارة عن مزيج من أفكار متناثرة ليس بينها أى وسيلة ربط
..............
البينة على من ادعى

الحكم الثاني
الموضوع فيه مغالطات سواء تاريخية أو أيديولوجية كبيرة وفادحة.. لو قارنت كلامك بما هو مكتوب فى الكتب أجد انه مخالف تماما لما ذكر فيها سواء فى كتب المؤيدين أو المعارضين لوجهة النظر العامة التى تطرحيها
...................
أمثلة؟

الحكم الثالث
أتمنى أن ترسلى لى مراجعك التى أستقيتى منها معلوماتك التى عرضتيها فى ذلك الموضوع, والتى أنا متأكد تماما أنها لا تحتوى على أى مرجع أصيل من أدبيات اى فئة ممن تحدثتى عنهم
.......................
متأكد تماما؟ لا تعليق

الحكم الرابع
أدعوا كل من اطلع على ذلك المقال. أن يؤجل حكمه عليه بعد أن نجرى تلك المناظرة بينى وبينها
.................
أنا لم أدعو أحدا أن يحكم على مقالي حتى تتم دعوته للتأجيل أو التعجيل بهذا الحكم! يا سيدي لو غرضك الأخير هو دعوتي إلى مناظرة, فأهلا وسهلا. لكن ارجوك احترم عقلي ووجه لي الدعوة بشكل مباشر

وحتى أكون أكثر صراحة ووضوحا, دعني أقول أنني لن أقبل أن تأخذ هذه المناظرة منهج التشكيك في ايمان العلمانيين, ولن أقبل أن يكون دوري في هذه المسرحية هو العلمانية التي تصارع من أجل إثبات تدينها وصحة عقيدتها. فأنا أشفق على أي شخص يظن أنه يستطيع استدراجي أو استغلالي في لعب دور هزلي كهذا. أنا أعلم أن سيادتك تصنف المسلمين إلى "مسلم حق" و"مسلم كدة وكدة". وأعلم أنك تقصر تعريف "المسلم الحق" علي من ينتمي لجماعة الاخوان. ودعني هنا أقتبس من مصدري غير العلماني, الذي هو مدونتكم الكريمة, ما يثبت هذا الكلام:" وأقصد هنا كل من هو مسلم حقا وكل من يعمل فى الحقل الجهادى أمثال حماس فى فلسطين والإخوان فى مصر والأردن وغيرها ومؤخرا إسلاميوا باكستان

كما انني أعتمدت على نفس المصدر في معرفة موقفكم من العلمانيين. فاسمح لي مرة أخرى بالاقتباس:"أما كل من يؤيد تلك السياسات فى المنطقة كالحكام الموالين والعلمانيين والخونة من ابناء جلدتنا فهو معتدل حسب مصطلحاتهم"..وأيضا"بداية التعاون ومد الجسور الفكرية والمادية بين الأمريكان والعلمانيين فى أوطاننا وإظهارهم بصورة مكثفة فى وسائل الإعلام المختلفة يبثون سمومهم الفكرية فى عقول المشاهدين

أعتقد في ضوء ذلك أن مشروع "مناظرة" بيننا لا يمكن أن يكون عقلانيا أو حياديا أو خالي من محاولة إقحام المزيد من الادعاءات والاحكام المسبقة في سبيل إلصاق وجهة نظر سيادتكم بي, باعتباري علمانية. فأفكاري أو معلوماتي أو آرائي لن يغيروا من الأمر شيء. فلا يمكن من وجهة نظرك أن تكون امرأة علمانية على صواب, ولا يمكن أن تكون مسلمة بحق. هذه لن تكون مناظرة يا سيدي, ف"نقد" الفكر (بالدال) يختلف عن "نقض" الوضوء (بالضاد

خالص تحياتي