Sunday, February 24

اقلعلك عين وتقلعيلي عين.. ونعيش عور احنا الاتنين


أنا اتفرجت على فيلم عنترة ابن شداد يجي خمسين مرة, ودا يرجع لعشق والدي لهذا الفيلم. من صغري وانا بتفرج ع الفيلم باشوف عنترة, اللي عرفت بعد كدة انه ممثل واسمه فريد شوقي بس كان داهن جسمه اسود. وكنت معجبة جدا بشجاعته وحبه لعبلة. بس اللي كان مجنني ف الفيلم هو شيبوب. شيبوب كان أخو عنتر ف الفيلم وكان بيحب يعزف ع الربابة ويغني.. لغاية هنا مافيش مشكلة. لكن اللي كان محيرني أوي ان شيبوب رغم انه واد رومانسي وحبيب زي عنتر, إلا انه لما كان يحب يغازل واحدة يخش عليها بجملة غزل غريبة جدا. كانت لما واحدة تعجبه يروح داخل عليها برقة وخفة دم كدة و يقولها بكل ثقة: "تيجي اقلعلك عين و انتي تقلعيلي عين ونعيش عور احنا الاتنين؟"! غريبة دي.. مش كدة؟

طبعا البنت كانت تسمع الكلمتين دول وتبصله كدة كأنها بتقوله "يا سم" وتطنشه. طبيعي يعني, امال هو فاكر ايه؟ فيه واحد يغازل واحدة كدة؟ بس ليه شيبوب الرومانسي اللي بيحب المغنى وبيألف اغاني جميلة وفيها حرفية عالية, يقول كلام زي الدبش كدة؟ يعني شوف مثلا لما حب يبشر عبلة (اللي استعبدوها عشان مارضيتش تتجوز الامير) ان عنتر حبيبها جاي وجايب معاه الجمال الحمر, قال ايه؟ "ألا يا حامل الجرة.. جميع اخبارنا سارة.. وجايبين الجمال حمرة.. لاحبابنا واهالينا". معقولة شيبوب الفنان ده, يقول اقلعلك عين وانتي تقلعيلي عين؟ .. هو الصراحة كان دمه خفيف ما انكرش, بس لو حد قالي كدة اكيد يعني هاقوله انت اهبل ولا شكلك كدة؟

المهم تروح السنين وتيجي السنين, واذ فجأتن ألاقيلك عمك شيبوب بتاع اقلعلك عين ونعيش عور احنا الاتنين دا موجود فعلا ف الدنيا. قابلته وجها لوجه, ومش مرة واحدة.. لأ.. كذا مرة. انا الاول ما كنتش فاهمة. كنت الاقي واحد كدة بيجر شكلي من غير داعي وبيستفزني من غير سبب. يا عم هو حد داسلك على ديل؟ انت بتعمل كدة ليه؟.. وبعدين ولاد الحلال رسوني ع الدور.. قالولي دا فلان دا شكله معجب بيكي وعايز يلفت نظرك! رحت أنا قولت "آه.. على طريقة شيبوب يعني".. طبعا ما حدش فهم أنا قصدي ايه. بس أنا ساعتها عرفت ان السلوك اللي يبان غير مبرر لازم يكون وراه سبب

زي بالظبط الناس اللي بتيجي تجر شكل البنات ف المدونات الحريمي.. تلاقي واحد هوايته التعليق على مدونات البنات. والبنت من دول يا عيني تلاقي واحد لا تعرفه ولا يعرفها وعمال يتبلى عليها ويقولها كلام هي ما قالتوش, أو يفسر كلامها تفسير غريب كدة عن طريق رأس الرجاء الصالح عشان يطلعها غلطانة وخلاص. أو تلاقي واحد مثلا عايز يسأل سؤال بس الجلالة واخداه, فيروح مخبط ويقوللها "تلاقيكي مش عارفة كذا". المفروض طبعا بعقلية شيبوب انها هتنهار بقى ويحصلها عملية استنفار وتستموت في انها تثبت انها عارفة الشيء الفلاني. دا على اساس ان أي واحدة هي عبارة عن عيلة بضفاير بتلعب الأولى ف الشارع

المهم الموضوع دا ابتدا معايا أنا شخصيا من أول ما ابتديت ادون خالص واكتشفت أنه متكرر على معظم مدونات البنات. زي مثلا انك تكتبي تعليق عادي خالص عند حد, فتلاقي واحد داخل يعلق على تعليقك انتي ويطلع فيه القطط الفاطسة عشان يجر شكلك. وبعدين تلاقيه داخل عندك على مدونتك وسايبلك تعليق غريب كدة, تقريبا على كلام تاني انتي ماكتبتيهوش. أنا لما حصلت الحكاية دي معايا ما حطتش ف بالي ف الأول, بس لما الموضوع اتكرر, قولت لأ بأة. هي موضة ولا إيه؟ لما أروح أشوف كدة هما بيردوا على المدونات الرجالي ازاي. وخير اللهم اجعله خير الاقيهم بيتكلموا مع الرجالة بمنتهى الأدب والاحترام. حتى لما يختلفوا معاهم يختلفوا بأسلوب تاني خالص. ولو اتريقوا أو قالوا حاجة ماتصحش, برضه بيبقى ف حدود.. مفيش نظام الاتهامات والتخبيط والتلكيك وقلة الأدب اللي بتحصل لما بيكتبوا لواحدة ست.. أو بمعنى أوضح بنت. ما هو أنا لو قولت اني متجوزة وعندي عيال مثلا, المعاملة هتختلف. لان المدونة اللي قايلة انها متجوزة بيحترموها حتى لو اختلفوا فعلا معاها, ولو حتى قالت ريان يا فجل يقولوها "يا سلام. ايه العظمة دي؟" طب ما اللي بيعاكسني ده عمره ما هيعرف أنا متجوزة ولا لأ.. يبقى ليه الاسلوب بيتغير حسب الحالة الاجتماعية للست يعني؟

بس ان عرف السبب بطل العجب.. افتكرت طريقة شيبوب ف المغازلة. خصوصا لما كذا واحد منهم كان مصر بعد كل الخناق والبهدلة اللي بهدلهالي انه يقابلني!.. نعم؟ بقى انت مطلعني اسوأ واحدة ف الدنيا, وبعدين عايزنا نتقابل ونبقى صحاب؟ طب مش خايف على نفسك من الفتنة يا أخي؟ مش خايف من أصحاب السوء اللي زي حالاتي لحسن يفسدوا اخلاقك؟ عايز تعرفني ليه انشاء الله؟ طب وازاي يعني نبقى صحاب بعد ما قليت ادبك عليا وغلطت فيا وف عقيدتي وف اخلاقي كمان؟ يعني ما ينفعشي يا كابتن. لو اللي بيتكلم مجنون ف المستمع عاقل. ولما تلاقيني واحدة محترمة ومهذبة وصريحة وأقولك عيب ما يصحش وكلامك غلط, المفروض تفهم اني واحدة بنت بلد وحرة ومش على راسي بطحة. يعني بالذوق كدة يا تحسن اسلوبك ف الكلام يا انت ف حالك وانا حالي وتفارقني من سكات. لكن الالحاح الرهيب انك تيجي برضه وتقل ادبك.. سوري يعني, دي مش شهامة ولا رجولة ولا ممكن الاسلوب دا هيوصلك لحاجة يا ابو الكباتن

النظام التصادمي بتاع شيبوب دا ممكن كان ينفع من ألف سنة ف الصحرا, لما كانت القبايل بتهجم على بعض ويروحوا خاطفين ستات القبيلة بالعافية. لكن دلوقتي ما ينفعش نظام تدبحلي القطة فاخاف واكش واحس برجولتك. لأ دلوقتي الموضوع مش بالعضلات ولا طول اللسان, الموضوع بالعقل. والبنت زيها زيك. انسانة. ما ينفعشي تيجي تقتحم بيتها وتشيلها على كتفك وتجري. وما ينفعش تستعرض عضلاتك عليها عشان ترهبها. السيناريو القديم اللي في دماغك بتاع "دي طلعت ولا نزلت اخرها بنت", يا ريت تشيله من دماغك خالص وترميه على باب المدونة وانت داخل. انا بنت صحيح بس بمليون راجل بعون الله. وما اسمحش حد يغلط فيا ولا يقل ادبه عليا ولا يتبلي عليا بالكدب. هي مش سبهللة

وبدل ما اقلعلك عين وانت تقلعلي عين, ما نعيش مفتحين احنا الاتنين يا عم! هو لازم التصادم الدموي دا؟ ما الكلمة الطيبة صدقة وعربون محبة برضه. يعني ما نتفاهم احسن ونحترم بعض. ازاي اتنين خزأوا عنين بعض هيعرفوا يتفاهموا يعني؟ واحد قلعلي عيني, هاستفيد ايه انا لما اقلعله عينه ولا عينيه الاتنين حتى؟ سيبك من حكاية اننا نتعايش مع بعض خالص.. لأ برضه مش خالصين, لان البادي أظلم. ولاني عمري ما هابتدي واروح لحد اقلع عينه, ف كدة مش عدل. لازم شوية كياسة.. شوية حساسة.. شوية مفهومية. خصوصا انها مش هترسي على اننا نعيش عور احنا الاتنين. لأ, هتاخد شلوت يطيرك فوق برج القاهرة. وانت عارف بقى اللي فوق برج القاهرة. يعني انت اللي مش هتنفع بعدها

الله يرحمك يا شيبوب, بوظت دماغ الرجالة. ما كنت اتعلم من اخوك عنتر. بلاش يا عم تبقى شجاع وقوي زيه, كنت اتعلم من شعره وجمال الفاظه. الله يسامحك يا عم.. فضلت انت بعنيك الاتنين وشغلتلنا مكن تقوير عينين. قال نعيش عور احنا الاتنين! لأ يا عم.. يفتح الله

31 comments:

Rania Lelah said...

اعتقد انى اول تعليق الا ما كنش خانى نظرى
عموما يا قمرايه
كلامك عين العقل لان الرجاله نصهم مش هعمم يعنى
شايفين ان الانثى مش بتيجى غير بالشدة و الرخامه و فى ناس اعوذ بالله كمان بيقولوا ان احنا بنيجى بالتقل
ازى ؟ متعرفييش
المهم
لو يعرفوا ان الانثى عبارة عن كتله مشاعر و احاسيس اكيد كانوا هيتغيروا
و هيغريوا من معاملتهمو طريقتهم معانا
مرسيى لك على انك عرضتى الموضوع دة
تحياتى
اعتقد انى معدتش التعليق الاول :((

أحمد منتصر said...

أنا كنت كده زمان زي شيبوب بس الحمد لله تاتا تاتا بتحسن :)

Wael said...

بقا اول زيارة اتخبطت ف موضوع يتعلق بشيبوب !!!

بس فعلا هو امثال " شيبوب " كتروا اوى لدرجة مستفزة وطريقتهم اقرب للهمجيه منها الى النقاش او حتى الغزل العفيف لو اراد , بس برضو احقاقا للحق فيه امثال " الستات اللى بيعاكسهم شيبوب " اكثر من شيبوب نفسه , وبالذات فى بنات الشعب المصرى , وده مش عيب بالعكس .

الواحد من دول قبل ما يفكر حتى يعمل " شيبوب " بيلاقى البنت اللى قصاده عملت رد الفعل المعاكس علطول .

ومع ذلك اعتقد ان فيه ناس بينفع معاها نظام شيبوب , بل مبينفعش معاهم غير نظام سيبوب ان اردنا الدقه .
الموضوع كبييير كبييير كبيير الصراحه , ويستحق النقاش

سلام , واوعا حد يفتكر انى بعمل دور شيبوب , ولا عنتر حتى , انا قولت اهو .

Hypatia said...

ازيك يا فانتا
يااااااااااا انا الحوار ده حصل معايا مرتين مره منهم فى تدوينه عبدالناصر بس انا دخلت شمال طوالى عشان انا كنت فهمت خلاص النوعيه ديه
والمره التانيه كانت مع حد من المتاسلمين اللى معتبرين نفسهم ظل الله على الارض دول الهى يولع فيهم يارب
بصي احنا خلاص فاهمين وعارفين اننا معرضين لاى شئ فى المجتمع السيبري او فى ارض الواقع والحمدلله انا باعرف ادافع عن روحي فى اى ظروف وبادخل شمال على طول معنديش خلق للمرضي العاطفيين دول
:)
البوست اللى فات هايل هايل ربنا يحرس كريم ويحفظك لينا يارب يا نصفانا ورافعه راسنا
:)

Hoda said...

هااااااى فانتا

ايه يا نسرين هو انا كل ما اروح فى حته الاقيكى مش كده خفى شويه
:)

يا سلام عليكى يا فانتوسا يا شرزه يا خطيره انتى ايوه كده وريهم العين الحمرا صنف يخاف ما يختشيش صحيح وريهم شراسة جمعية المرأه المتوحشه...هههههه
دى اللى هنعملها انشاء الله احنا ومجموعة البنات الصيع تباعنا بس ما تشغليش بالك انتى.. ركزى مع اخوانا البعده دول . طبعاً انا برضه اتعرضت لنفس المواقف اللى ذكرتيها دى واتعملى قعر مجلس على مدونه لدرجة انهم حاولوا انهم يشككونى فى نفسى ويقولوا ان حنين دى راجل مش بنت اه والله مع انى والله بت خالص بنت جداً طب داانا وانا كده من ايام الآنسه حنفى على رأى اسماعيل ياسين شوفتى الوكسه اللى احنا فيها وعلى رأى الست زينات صدقى طيب عايزينى اثبت لكم انى ست ازاى يوووه الله يفضحكم ... ولاولسه فى اكتر من كده بس اللى يستحمل ويواصل
قلبى معاكى يا اوووختشى

روابط said...

شيبوب مين ؟ وبتاع مين ..كل البوست ده ومفهمتش منه اى حاجة , عالعموم خيرها فى غيرها

Anonymous said...

اهو اي هبل والسلام
كويس انك مش بتهاجمي الاخوان المرة دي
خدي نفسك يا اختشي
بس قوليلي
انت بتلاقي حد يعجب بيكي
اشك
اصلي دبوس
ههههههههههههههههههههههههههه

Alexandrian far away said...

هاهاهاهاهاها
صباح الفل والياسمين يا أستاذه فانتازيا
جميل والله أني اضحك على الريق كده وأنا بأتصبح بمدونتك
الصراحه ليكي حق موضوع شيبوب ده ملحوظه قويه، أنا كمان بأموت في الفيلم ده على فكره
المهم موضوعك بيفتح موضوع الردود على التدوينات، بصراحه المدونات الإناث واكلينها والعه
من غير زعل
أولا فيه مدونات تحسي أنهم صوابعهم بتوجعهم دايما
يعني بالكتير يكتبوا سطرين تلاته من نوع مثلا: مش أنا شربت شاي بلبن النهارده الصبح والكوبايه لسعت صباعي الصغنن

بس كده
ثم تنهمر التعليقات ماشاء اللهكأمطار الشتاء
خمسين ستين تعليق وتعليق مضاد عن الشاي واللبن والتفل بتاع الشاي والكوبايات والمعالق والبرادات والكنكات والفناجين، والكركديه واليانسون
مجزرة تعليقات
ماعلينا
تامر حسني بيحضر حفلته مئات الألوف
مش مشكله يعني
ربنا يسامحهم ويسامح ألي عرب الأنترنت من أصله
النوع التاني هو المدونه القويه صاحبة الموقف طبعا سواء أكان موقف له معنى أو مالوش لكن أهو موقف وخلاص
ويبدأ موضوع شيبوب أو جر الشكل ده
لكن أسمحي لي بملحوظه ع السريع، من مراقبتي لجيل العشرينيات- ألي بدأوا يقولوا لي عمو وحأطلع عينيهم ع الموضوع ده- أنه في حالة من العنف والضراوه في التعامل بين البنات والأولاد عموما، فيه درجه من طولة اللسان وطولة الأيد داخل أطار ودية العلاقه
يعني هي تدخل عليه الكافيتريا وتبدأ الحوار: أزيك يا ببس، أنت مستكنيص هنا من بدري يا مزه؟
هو: أيوه مستني غلاستك عشان خلقتك الروشه دي وحشاني
هي: يخرب بيت النفخ بتاعك، بيس يا مان عادي التأخير يعني ما تحجرش الجمجمه
هو: طيب يا مزتي ريحي المقعده بقى وخلينا نقول كلمتين دماغ ع السريع كده

هي: بس ايه الحلاوه دي ياض؟ أنت مستحمي بمربى قبل ما تيجي؟
يعني ..تقريبا
ممكن الموضوع يشمل زغدات وشلاليت وبوكسات ع الماشي
من باب الموده والمحبه والرومانسيه الملهلبه في نغاشيش قلوبهم
فعلا موضوع التظبيط بقلع العين ده عجيب شويه، الرجوله الفياضه الفائضه المتفجرة من المدونين بتخليهم بيحسوا باكلان في قفاهم أول ما يقابلوا أمرأه قويه وذكيه ولها موقف،
الويل لها
لابد من أخضاعها لفرط تدفق فيضان رجولة المدون الفخيم
- زي الأخ مخفي الأسم المعلق فوق تعليقي-
فيكون الهجوم هو الحل لأخضاع المدينة الحصينة التي هي المدونه ذات الشخصيه
عادي يعني
ربنا يشفي
هو الشافي المعافي
وأسمحي لي بتحيه للاخ مخفي الأسم
يسقط الأخوان المسلمين عملاء السعوديه
طظ في مهدي عاكف

صباح الفل

Migo Mishmish said...

صباح الفل يا فانتا
انا بس حبيت اعلق على البوست بتاعك النهاردة علشان موقف حصل معايا الصبح وانا نازلة الشغل
انا نازلة من البيت الصبح الساعه تمانيه ونص كدة وحياتك يا ختي لا بلبس محزق ولا قصير ولا نيله علشان بس ما بحبش نظرة الجوع اللي في عين شباب مصر العيانين بتوع وسط البلد والنهاردة كمان كنت لابسه شال على الهدوم علشان الدنيا برد
المهم لا قيت واحد بيصلح العجله بتاعته وبعدين لما بصلي قام (لا مؤاخدة) مسك .....بتاعه وبهزهولي طب والنبي اعمل مع واحد زي ده ايه
اللي بيحصل ده بقيه اللي بيحصل في الشوارع يا فانتا. قله الاحترام بقيت السمه الاساسيه للمجتمع وخصوصاً ثقافه البدو اللي هبطت على المجتمع والنظرة الدونيه للمراه
الرجاله بيبصوا للمراه على انها شيء وعلى هذا الاساس مسموح لهم استخدامها او التمتع بيها في اي وقت
Love,
MishMish

Unknown said...

فانتا العزيزه

العنف في معاملة صنف الحريم حتي في الغزل ما هو إلا الوجه الآخر لثقافة إحتقار المرأه وإخفائها تحت الكفن المسمي بالحجاب والنقاب والذي منه
ثقافة البدو الخشن العدواني القاسي اللي بتنتقل وتنتشر وتتوغل في بلادنا ببركة وكلائهم الوحيدين: الأخوان والسلفيين ليمتد

وليمتد هنا بمعني الإمتداد مش الشركه المحدوده!!! ه

بحبك يامصر said...

الاخت العزيزه فانتازيا
لو سمحتى انا هكلمك فى كذا نقطه
1:زعلك منى فى تعليقى على موضوع الفاشيون قادمون
2:اعتذار منى على عدم قدرتى على متبعة مدونتك اللى انا حريص جدا على متابعتها بإستمرار
3:هعلق بقه على البوست ده

اول شئ انى فعلا مقصدش انك تزعلى لانى مهجمتش شخصك او حتى مبادئك انا كل اللى اتكلمت عنه انك لما بتهاجمى حد بتهجميه بشراسه وبسخريه جامده جدا طبعا انتى مش بتحسى (خايف تمسكى فى كللمة مش بتحسى وتتهمينى انى بشتمك)باللى بتهاجميه اد ايه الكلام بيوجعه وفكرة التعميم انتى فعلا بتقعى فيها ومن غير ما تحسى والتوضيح اللى بين قوسين مقصود لانى بحس انك بتمسكى على كلمه اللى بيناقشك بيقولها وتبدأى تجيبى اسانيد وادله على ضعف موقفه يعنى مثلا
انا قلتلك انك واخده خط الهجوم على الاخوان والكلام ده معجبكيش والدليل على كلامى الصور اللى فى هامش المدونه واللى عند كل المدونون بتقول فكرهم وسبب عملهم للمدونه كلها ضد الاخوان بسقطاطهم ..ولما تيجى تهجمى الاهلى فى صورة جماهير متعصبه تجيبى فديو لجماهير سواء بتحتفل بهدف او بتشاغب فعلا وتعمل مشكله لاى سبب وتدللى على صحة كلامك

تانى نقطه انى فعلا بيكون نفسى اتابع مدونتك باستمرار لكن ظروف الحياه بتمنعنى وحرصى على متابعة مدونتك ده راجع لانى فعلا بستفاد منك وكمان لانى واثق من حبك لمصر وفعلا انا حاطط مدونتك عندى فى مدونات صديقه وكاتب بتحب مصر قصادها لانى واثق فى حبك لبلدك

ثالث نقطه وهى تعليقى على البوست انا اسف لو قلت ان اللى بيعمل الكلام ده ناس هايفه للاسف حياتهم فاضيه مفيش شئ يملها
واسف جدا للاطاله

تــــايه ومش تـــايه said...

فانتا انا مش بقالى كتير متابع هنا بس فهمت انتى تقصدى مين بس انا معتقدش كدا يمكن انتى فهمتيه غلط .ومتفهمنيش غلط .احنا اتفقنا انك هتستحملى غلاستى.على العموم النوعيه دى موجوده بينا عادى .

على باب الله said...

بوست جميل بجد ( كالعادة طبعا ) .. و جميل قوي ربط شيبوب باللي بيحصل فعلاً في الحياة
-----

العنف في معاملة المرأة للأسف يراه ناس كتير علي أنه نوع من الرجولة
علي طريقة أشكمهم و ادبح القطة .. إلخ

و يراه البعض حق مشروع لهم ... بما أن المرأة هي أقل في المرتبة الإنسانية من الرجل

و البعض الآخر العنف جزء أساسي في حياته , في أسرته و تعليمه و بيئته ..فطبيعي أنه يبقي هو كمان عنيف

أنا ساعات بنزل الشارع ألاقي في ناس فعلاً ماشية بتخانق دبان وشها

----

أما عن موضوع الغزل العنيف وفق طريقة شيبوب

فأعتقد أن أجمل ما قيل في وصف هذا الأسلوب العنيف في الغزل هو يوسف أدريس لما قال ( ما معناه ) .. أن

" الرجل الشرقي لا يعرف كيف يفتح الباب إلي قلب المرأة

فهو لا يجيد فن صناعة المفاتيح , و لكنه مُقتحم جيد .. فتجده يكسر الباب بكتفه و يقتحمه إقتحاماً

"

---

خالص تحياتي

أنا حر said...

نظرا ان مفيش حاجة معينة يقدر يعملها الولد علشان يعرف البنت انه معجب بيها انا بحب النظام الامريكي جدا في النقطة دي
اول حاجة الواحد بيتكلم مع البنت ويعزمها على حاجة تشربها في المكان اللي هما موجودين فيه
لو وافقت ينتقل للمرحلة اللي بعد كده
اللي هي تبادل ارقام التليفونات وبعد كده المرحلة الثالثة اللي هي يتصل بيها وترضى تخرج معاه في اي مكان هادئ
أخر خطوة بقى انها ترتبط بيه وطبعا لو وقعت اي حاجة من الحاجات دي في النص يبقى البنت مش معجبة بالولد
تفتكروا في طريقة محددة تريحنا وتريح البنات ومش تضايق اي حد فينا زي الطريقة الامريكية؟؟؟
تحياتي

Anonymous said...

طب إيه رأيك بقى إن كلمة
تيجي اقلعلك عين وتقلعيلي عين.. ونعيش عور احنا الاتنين
هي قمة الرومانسية
تخيلي كده واحد بيقول لحبيبته إن مستعد يقلع عينه عشان يعيش معاها لأ و هايعيش معاها حتى لو كانت عورة تخيلي الحب السامي واحد بيقول لحبيبته إنه هايقلع عينه و يقلعلها عينها عشان هم بس اللي في العالم اللي يفهموا جمال بعض
كده و لا إيه
:D

Fantasia said...

العزيزة رانيا

أول تعليق يا فندم, تمام
احلى استفتاح

والله احنا ما مودينا ف داهية غير موضوع المشاعر والاحاسيس ده. ما ننشف شوية عشان يعرفوا ان لحمنا مر.. اصل اللي عنده احساس انهاردة بيعتبروه ضعيف ومحدش بيعمله حساب. أنا الصراحة مستعدة ادوس على مشاعري بالجزمة لو هي اللي هتجيبلي وجع القلب

خالص تحياتي يا قمر

Fantasia said...

الاستاذ احمد منتصر

طب الحمد لله انك بتتحسن, عقبال ما نباركلك لما تخلص من لعنة شيبوب دي نهائيا

تحياتي

Fantasia said...

الاستاذ وائل

أهلا وسهلا يا فندم. معلش لو اعرف ان حضرتك هتشرفني كنت كتبت عن حد تاني غير شيبوب, بس أهي فرصة نعرف رأيك ف الموضوع

فيه بنات فعلا بتحب نظام شيبوب, أنا معاك
بس البنت اللي من النوع دا بيبان عليها
مش ممكن واحدة زي حلاتي مثلا ينفع معاها نظام شيبوب ده
عشان كدة باستغرب من عدم التمييز اللي عند اتباع عمك شيبوب دول
بيصعبوا عليا وأنا باديهم درس الادب, بس هما اللي عملوا ف نفسهم كدة, اعملهم ايه؟ مش يشوفوا هما بيتكلموا مع مين الاول؟
ولا الرجولة بقت هز كتاف اليومين دول؟

هو الموضوع كبير فعل

ف انتظار تعليقاتك القادمة

خالص تحياتي

Fantasia said...

العزيزة نسرين

لأ مش مرتين بس يا نسرين.. على يدي.. دا انتي يا حبيبتي المفروض يعملولك تمثال على صبرك مع العينات دي بجد

ربنا يصبرنا يا نسرين, هنعمل ايه؟ لازم نستحمل تلاقيح الجتت عشان احنا بنات جدعان. بس انتي وحنين الصراحة بتقفوا معايا وقفة رجالة يعني.. ولا بلاش رجالة, والله انتوا أحسن من رجالة كتير.. وقفة شهامة وجدعنة. ما هي الشهامة والجدعنة بقت موجودة عند الستات أكتر منها عند الرجالة ف الزمان ده

الله يخليكي يا نسرين, اخجلتيني فعلا. وكنت عايزة اشوف تعليقك ع الموضوع اللي فات, فكويس انك علقتي عليه. ان شاء الله زي ما وعدت حسن هتكون فيه تدوينة خصوصي زي فصول محو الأمية كدة, عشان الناس الكبار اللي عندهم نفس أسئلة كريم

خالص تحياتي

Fantasia said...

العزيزة حنين

انتي فين يا أوختشي؟ كدة سايباني مع الوحوش الادمية دي؟ هههههههه

بس حلوة فانتوسا أوي منك يا حنين.. بجد شربات

ولا يهمك يا حبيبتي وراكي ستات تاكل الحديد. وبعدين حد يكره انه يطلع راجل يا بنتي؟ وماله؟ اللي عايز يفتكرك راجل هو حر, بلا وجع دماغ

اما اخوننا البعدا فأنا مربيالهم الرعب اهه من غير حاجة. كل ما يفلسوا يتسعروا ويشتموا ويهبهبوا كدة زي ما بتشوفي. لأ واحلى حاجة وسط الشتيمة يكتبولك قال الله وقال الرسول! شوفتي سفالة وانحطاط أكتر من كدة؟ الناس دي معندهاش دم؟ طب معندهاش دين؟
يعني معندهمشي أخلاق وعرفنا.. لكن كمان يردحوا بالقرآن؟ هي وصلت لكدة؟

هما باين عليهم صدقوا انهم اشتروا الاسلام وخدوا التوكيل بتاعه, فعمالين يبهدلوا فيه ومش هاممهم.. منهم لله. هيروحوا من ربنا فين؟

اشكرك على مساندتك يا عزيزتي. وأي حد يزعلك قولي جزر.. قصدي فانتا بس

خالص تحياتي

Fantasia said...

حازم سويلم

معلش المرة الجاية هأكتب تدوينة سهلة شوية. على رأيك خيرها ف غيرها

تحياتي

Fantasia said...

الاستاذ العزيز اسكندراني

صباح الفل ومساء الورد يا استاذ
بجد هلكتني من الضحك على مدونات الشاي بحليب والشاي بالنعناع
:)
بجد انا كتير بتكعبل في مدونات من النوع ده, وباستغرب ع اللي داخلين يعلقوا يعني.. الصراحة يتحسدوا ع الفضى اللي هما فيه
أما موضوع فيضان الرجولة المتفجرة على المدونات, فحدث ولا حرج
أنا اكتشفت ان عدد الرجالة اللي بيعانوا من عدم ثقة ف النفس أكتر من تقديري بكتيييير
أنا لازم أعيد كتابة مدونة عالم فانتازيا من أول وجديد بالشكل ده. الواقع طلع اسوأ بمراحل
ومش عايز البنت تكلم الواد كدة ازاي طيب؟ أنا قرايبي البنات الصغيرين اللي لسة ف الجامعة كانوا بيحلفولي ان معدش فيه رجالة وانا اللي ما كنتش مصدقة. الجيل بتاعهم دا ضايع ضايع يعني
بس الزغد بتاعهم دا زغد أخوي يعني, مسال,م مفيهوش اصابات. ملوش علاقة بالعنف. دا نوع من الدلع, بس دلع غير اللي كان على ايامنا

الأخ المخفي دا باين عليه من جمهوري البعيد ومكسوف يقول
سيبك منه, زمانه مانمش طول الليل من وجع المرارة
شوف أنا لسة بقول ايه؟ سبحان الله! يا ريتني كنت جبت سيرة ألف جنيه.. هههههه
عمالة أقول احنا مش بنات بضفاير بنلعب الأولى ف الشارع, والبعيد مصمم يعاملني على اني بضفاير وبلعب الأولى ف الشارع. فاكر لما هيقوللي انه بيشك ان حد بيعجب بيا هأنهار زي هاني شاكر كدة ههههههههه
لأ ولا النكتة الحمضانة اللي بقالها ميت سنة برة التلاجة بتاعة الدبوس دي.. نظام اعدادي خالص يعني
يخرب بيت اعلانات ميلودي يا شيخ

يلا ما علينا, وكل يوم من دا.. عشان محدش يقوللي مفيش شيبوب. أهه جالكم بشحمه وشحمه برضه ههههههه

نورتني بجد, وشكرا على الاصطباحة اللي بعتها للمخفي. واحب بالمناسبة دي اهديلك اغنية "لهاليبوا يا ولا" لنعيمة عاكف

خالص تحياتي

Fantasia said...

العزيزة مشمش

ماتزعليش نفسك يا مشمشة, الرجالة اصلهم يا عيني مش عارفين يعني ايه رجولة, فتلاقيهم عمالين يلوشوا زي ما انتي بتشوفي كدة. الراجل اللي قابلتيه الصبح دا (يا عيني عليكي يا أوختشي, قلبي عندك) مش عارف يثبت لنفسه انه راجل. قالك انا اعمل ارهاب جنسي للستات ممكن احس برجولتي شوية. يا حرام مريض, ومرضه وصل لدرجة وحشة وحالته اتأخرت أوي من غير ما حد يساعده

طب تصدقي بقى الموضوع دا لسة حاصل مع بنت الجيران بتوعنا اللي عندها عشر سنين؟ يا حرام وهي راجعة من المدرسة لقيت واحد كبير ف السن, مش صغير يعني, هدا بالعربية جنبها وراح مناديلها. البت يا حرام خافت وطلعت تجري, لاقيته ماشي معاها برضه. وقفت وبتبصله لقيته فتح سوستة البنطلون, سوري يعني. شوفتي سفالة وحقارة أكتر من كدة؟ ويقولوا التحرش بالاطفال دا حاجة نادرة

البنت يا ولداه جريت وهي بتترعش وقعدت تعيط كأنها هي اللي عملت حاجة غلط. ومش قادرة أقولك مامتها كانت عاملة ازاي لما شافتها كدة. كان نفسها تروح تقطع الراجل دا بسنانها. بس فين بقى؟ أهو عمل عملته وطار

المجتمع بقى زفت والاخلاق انعدمت والضمير بقى كائن منقرض. نقول ايه بس؟ نفسي أفهم اللي قاعدين يصدعوا دماغنا بالمواعظ دول سايبين الناس دي وماسكين فينا احنا ليه

معلش يا مشمش. عديها.. كلب جربان وشوفتيه ف سكتك للشغل, جاته الأرف

تحياتي وأسفي

Fantasia said...

العزيز حسن الهلالي

لأ امتداد ايه, فال الله ولا فالك. دول ليمتد ف عقولهم وانت الصادق

العنف هو لغة الضعيف والعاجز, لانه لا يمتلك ادوات اخرى يعبر بها عن نفسه. فمثلا موضوع فرض الحجاب والنقاب بالقوة على النساء, وارهابهم في كل مكان, وتوعدهم بالعذاب في الدنيا على يد الرجال الجياع والمهاويس جنسيا, وبجهنم في الاخرة, ليس سوى افلاس رجالي.. افلاس في ادعاء التحضر والمدنية و عجز عن الارتقاء الانساني والبعد عن النزعة الحيوانية التي تنظر للمرأة نظرة جنسية بحتة.. اضف الى ذلك عجز الرجل الضعيف أمام نفسه وانكساره أمام ذاته, فينصرف الى من هو اضعف منه ليقهره ويخضعه لسلطته بالقوة

أنا شخصيا لا أرى في عنف الرجال سوى الضعف والعجز وقلة الحيلة.. خصوصا أمام امرأة ثابتة, تملك من قوة الشخصية ومن الثقة بالنفس ومن ادوات المعرفة ما يؤهلها لكي تكون ندا للرجال, بل لكي تتفوق عليهم, رغم كل دوائر الحصار والقهر والقمع المفروضة عليها. هذه القوة توقظ الشعور بالعجز داخل الرجل المهزوز, وتجعله يتألم ويثور.. لكنه بدلا من أن يثور على ضعفه, يثور على المرأة التي ايقظت داخله هذا الاحساس بالعجز.. فيكرهها ويلعنها ويعاملها بعنف ويسقط كل فشله عليها.. بل وانه يفقد البصيرة تماما, ليصبح عدو نفسه.. فبدلا من ان يستفيد ايجابيا من وجود تنافس, يمكن جدا ان يكون تنافسا شريفا وان يفيده هو في اعمار عقله, تجده يسعى لتهشيم رأس هذه المرأة و وأد رؤوس كل النساء حتى لا تتمكن احداهن من منافسته في يوم من الايام

واقع للأسف نعيش فيه

خالص تحياتي

Fantasia said...

الاستاذ بحبك يا مصر

اشكرك على تعليقك واسمح لي أن اعلق على نقاطك الثلاث

اولا, ارجو ان تقتنع يا سيدي انني لا اهاجم شخوص, بل انتقد افكار وموقف عام معلن من قبل جماعة الاخوان. اذن فمن الطبيعي حين انتقد الموقف الرسمي المعلن من قبل الجماعة المحظورة, ان اتحدث عنهم كجماعة. فانا لا اهاجم, بل انشر خبر أو صور أو تصريحات رسمية للجماعة واقوم بالتعليق عليه. أي ان ما انشره هنا كله بالاسانيد والادلة, وكله معلن ومصدق عليه من قبل الجماعة نفسها. أنا لم اهاجم احدا يا سيدي, افراد الجماعة هم من يتهجمون علي, ولم أرك تعترض على ذلك ولو لمرة واحدة

اما بخصوص نادي الاهلي, فانا لم انشر صورا للمشجعين, لقد نشرت فيديو لمجموعة الالترا اهلاوية, وعليه شعارهم, ويقومون فيه باشعال النار في الملاعب. هل هذا تشجيع بالله عليك؟ اين هو التعميم؟

انت تدلل على تعميمي بمثال من كلامك انت. انت تعتقد انني اعمم الاحكام, فتتعامل معي على هذا الاساس, فتشير الى كلامك المبني على هذا الموقف المسبق لتثبت به انني اقوم بالتعميم! فهل هذا عدلا؟ آتي الي بدليل من كلامي انا يا سيدي اذا كنت حقا ترى فيه ما تقول


ثانيا, اشكرك على ثقتك الغالية في حبي لمصر. وكن متأكدا انني احب المصريين ايضا, ولا يوجد بيني وبين أي فئة منهم أي عداوة أو موقف شخصي. أنا ابذل اقصى جهدي في ضبط النفس والالتزام بالحيادية في طرح الموضوعات. وبالرغم من كل ما اتعرض له من هجوم فانا ثابتة على موقفي واصر على اكمال مسيرتي بنفس الروح التي لم تمسسها أي ضغوط أو اهانات قد اتعرض لها, فانا والحمد لله اجيد الفصل بين الخاص والعام

ثالثا, اتفق معك على سطحية وتفاهة من يقومون بهذه الافعال على المدونات. وارجو ان تتحسن لغة الحوار على المدونات المصرية عامة, حتى نعكس صورة حضارية عن مجتمعنا

خالص تحياتي

Fantasia said...

تايه

كويس انك اعترفت ان النوعية دي موجودة. لكن صدقني انا مش بتكلم على شخص واحد, انا بتكلم عن كذا واحد. واذا كنت قدرت تحدد واحد منهم, فدا شيء طبيعي لان تعليقاتهم فاضحاهم. طب انا ذنبي ايه؟

تحياتي

Fantasia said...

الاستاذ العزيز على باب الله

شهادتك الغالية في حقي فعلا بتديني حافز كبير على الاستمرار رغم كل الاحباطات. فشكرا جزيلا على كلماتك الجميلة

اما بخصوص الاشابيب (جمع شيبوب), فهم فعلا لا يجيدون الطرق على الابواب ولا استخدام المفاتيح ولا حتى فك الكوالين.. فهم كالحرامي الغشيم, الذي يريد في عجالة ان ينعم بغنيمته, فتكون النتيجة انه يوقظ الجيران على الضوضاء ويمسك متلبس

هم يقتحمون الابواب بالاكتاف والشلاليت والبلطة أيضا اذا لزم الامر, فلا الباب ولا من هم خلف الابواب يعنون لهم شيئا. كل ما يهمهم هو العيش في وهم الرجولة الزائفة التي تعني في قاموسهم الخشونة والعنف

واتفق معك يا سيدي على ان وضع المرأة في مجتمعنا هو ما يشجعهم على سلك هذا السلوك

خالص تحياتي

Fantasia said...

الاستاذ العزيز أنا حر

أعتقد ان فيه طريقة احسن من الطريقة الامريكاني وتنفع عندنا أكتر, وهي الطريقة المصري بتاعة زمان. يعني مثلا, لو واحد اعجب بواحدة, يخليه راجل كدة ويروح يعرفها بنفسه. لقاها متجاوبة, كان بها.. لقاها مش متجاوبة, يسيبها ف حالها ويا دار ما دخلك شر.. أو ممكن يوسط حد بينهم عشان يتعرف عليها

ايه رأيك؟

Fantasia said...

الاستاذ يحي المصري

اهلا وسهلا ومرحبا.. والله هي وجهة نظر, ولو انها دموية وصعبة أوي

بس ايه الجمال في ان اتنين يكونوا عور يعني؟ وبعدين لو حصلت بينهم مشاكل وسابوا بعض مستقبلهم هيتدمر هما الاتنين. دا غير ان موضوع العين اللي راحت ومش راجعة تاني دا هيعمل عداوة جامدة. ليه خساير الحرب دي؟ ما التفاهم حلو. هو يعني اللي بعنيهم الاتنين وحشين ف ايه؟

اتمنى دوام التواصل

خالص تحياتي

طارق هلال said...

اوعى يكون قصدك عليا ولا حاجة
أنا مش كده فعلا
بس ... يمكن على راسى بطحة؟؟؟

Fantasia said...

Arabic ID,

هل راسك بطحة؟
:)
دا أنا كاتبة الموضوع دا مخصوص عشانك
هههههههه
بهزر طبعا.. يا عم لأ, ايه اللي يخليك تفكر كدة؟
طب انت ممكن بتتناقش معايا ف افكار, حتى لو ساعات بتحتد عليا شوية
لكن الناس اياهم دول مفيش عندهم أي حاجة يقولوها, كله جر شكل والسلام
بس لو على راسك بطحة, انصحك تتخلص منها. يعني حاول تخلي مناقشاتك هادية, بلاش نظام الهجوم هو خير وسيلة للدفاع. وبلاش نظام التجريح ف شخص اللي كاتب افكار معينة. من حقك تعبر عن اعتراضك أو تحفظك على نقط معينة, لكن التجريح مش هيفيد حد ومش من حق حد

تحياتي