Thursday, March 27

البليد لما يذاكر, يقرا الكتاب م الآخر


معلش يا جماعة, أنا عارفة ان فيه ناس كتير متحمسة لموضوع الاضراب بتاع 6 أبريل ده. وأكيد انتوا عارفين اني كاتبة ثورية والمفروض أكون أول واحدة أشجع الناس لما يفوقوا ويقرروا يعملوا اضراب. بس الصراحة الموضوع دا يثير الضحك والشفقة أكثر من انه يدعو للتفاؤل أوالمشاركة

أوعوا حد يزعل مني.. أنا مش بقول لحد ما يضربش.. إللي مقتنع بالفكرة يشارك على بركة الله. بس أنا جاتلي عشرميت دعوة عشان أشارك في الإضراب, وكل مرة أقرا الموضوع أضحك وأضرب كف بكف. مش مصدقة ان الناس عندنا لسة مش عارفة تميز بين الجد والهزل. الفكرة من حيث المبدأ عظيمة ومعنديش أي اعتراض عليها, لكنها بتفكرني بحركة سابقة كانت حصلت من حوالي سنتين في نفس الوقت تقريبا.. فاكرينها؟.. بتاعة "خليك بالبيت" اللي كانت متبنياها جريدة الكرامة وعاملالها اعلانات قاااااااااااااد كدة. ورغم كل ده فشلت فشل ذريع. مش بس عشان ما حدش قعد ف البيت غير 20 واحد, تقريبا هما الناس اللي خططوا للموضوع, لكن عشان الفكرة نفسها كانت تضحك ومالهاش معنى. حتى اللي ظهروا في الاعلام عشان يتكلموا عنها فشلوا في انهم يحددوا أي رؤية واضحة ورا الفكرة

اضراب 6 أبريل, اللي هو مش اضراب أصلا, عامل بالظبط زي مشروع خليك بالبيت. مافيش أي أهداف محددة من وراه ولا ايه اللي متوقع بعده. هل هو تهويش؟ هل هو خطوة لاعلان العصيان المدني؟ هل فيه مطالب محددة ممكن تحصل لها استجابة وعلى هذا الاساس هنضرب؟ ايه المطلوب؟ وليه؟ مفيش أي معالم واضحة. حاجة كدة عاملة زي الاضراب اللي عملوه الطلبة في مسرحية مدرسة المشاغبين, لما منصور (اللي قام بدوره النجم الكوميدي يونس شلبي رحمه الله) قعد يجري ويقول "هيييييه.. اضراب بقى.. هيييييه" كأنها فسحة. لانه مش عارف يعني ايه اضراب ولا ايه الهدف منه. ف يللا, أهي هيصة وخلاص

احنا عايزين نعمل حاجة ايجابية من ورا الاضراب ده ولا عايزين الحكومة تضحك علينا وتقول شوفوا العيال الهبلة؟ احنا كدة بنحرق نفسنا ع الفاضي وقدرتنا على التحرك الشعبي هتبان انها هزيلة وغير منظمة وغير فعالة ولا يمكن تسبب أي قلق للنظام, لانه اضراب عيال مش عارفين أصلا يحددوا هما عايزين ايه

شوفوا والنبي الاعلان اللي اتوزع عشان يدعو الناس للاضراب عامل ازاي

يوم إضراب عام في مصر

يوم 6 إبريل

خليك قاعد في البيت
أوعي تنزل
ماتروحشي الشغل
ماتروحشي الجامعه
ماتروحشي المدرسة
ماتفتحشي المحل
ماتفتحشي الصيدليه
ماتروحشي القسم
ماتروحشي المعسكر


ماشي يا عم هتنيل أقعد ف البيت. أهو الواحد يترحم من الزحمة والحر والقرف. بس ليه؟؟؟
شوفوا بقى المسخرة بتاعة المطالب

عايزين مرتبات تعيشنا
عايزين نشتغل
عايزين تعليم لأولدنا
عايزين مواصلات أدمية
عايزين مستشفيات تعالجنا
عايزين دواء لأطفالنا
عايزين قضاء منصف
عايزين أمن وأمان
عايزين حرية وكرامه
عايزين شقق للعرسان
مش عايزين رفع أسعار
مش عايزين محسوبيه
مش عايزين ظباط بلطجية
مش عايزين تعذيب في الإقسام
مش عايزين أتاوات
مش عايزين فساد
مش عايزين رشاوي
مش عايزين إعتقالات
مش عايزين تلفيق قضايا


بالذمة دي مطالب واقعية؟ عمركم شوفتوا اضراب في أي بلد محترمة تكون مطالبه بالمنظر ده؟ دا انتوا كأنكم بتقولوا للحكومة احنا مش عايزين منكم حاجة, احنا بنتلكك عشان نقعد ف البيت وخلاص! حد يعمل اضراب ويقول أنا عايز أغير الكون؟ طب ما أكيد ما حدش هيسأل فيك

يا ناااااس يا هوووه.. الاضرابات في العالم كله بتبقى لسبب محدد, وبيكون فيه مطالب محددة واقتراحات واقعية لتنفيذها. انما مش عايزين البلد يتقلب حالها في يوم وليلة, ويلا صحة على تعليم على اسعار على مرتبات على قضايا على فساد على سمك لبن تمر هندي. دا كدة اسمه استهبال. يبقى احنا مش عايزين حاجة تتغير. طب لو الحكومة ما استجابتش, ودا أكيد اللي هيحصل.. هنعمل ايه؟ هنضرب تاني؟ وبعدين؟ نفضل مضربين على طول لغاية لما نموت م الجوع ولا حد يسأل فينا برضه. هو جنان؟

احنا عايزين نضرب زي العالم المتحضر عشان تحصل استجابة لمطالبنا ولا عايزين نبقى همج وخلاص؟ مش نخطط للموضوع صح الأول قبل ما نقول للناس اعلنوا العصيان المدني؟ أيوة دا اسمه عصيان مدني مش اضراب. الاضراب ده بيقوم بيه فئة معينة وبتنظمه نقابات أو مؤسسات للمطالبة بحقوق الفئة دي. لكن الاضراب العام دا اسمه عصيان مدني. ودا المفروض يكون آخر كارت الشعوب تلوح بيه للنظام مش تبتدي بيه؟ احنا كدة بنحرق نفسنا ع الفاضي. بنوصل للحكومة رسالة مضادة. اننا شعب أي كلام ولا عايزين حاجة ولا نعرف نعمل تحرك صح, مش عايزين غير نجعر ونفضفض ونشد شعرنا ونمسح عليهم السيدة وخلاص

خلونا نتكلم بالعقل شوية.. احنا عايزين ايه؟ عايزين نعاقب الحكومة مثلا؟.. عايزين نريحلنا يوم زيادة في البيت؟.. عايزين نعمل دوشة ع الفاضي؟

ولا عايزين حال البلد يتصلح؟.. عايزين النظام يعرف ان فيه حركة شعبية؟.. عايزين نشارك في صنع القرار؟.. عايزين نضغط ضغط مدروس عشان نوصل لنتيجة تحفزنا اننا نستمر ونطالب بحاجات أكتر واحنا عارفين ان هيكون فيه استجابة, بدل ما نروح نخبط راسنا ف الحيط ويجيلنا احباط ونتكلكع زيادة والحكومة هي اللي تشمت فينا؟

الاضراب له قواعد وأصول.. مش فوضى وأي هرتلة وخلاص. لازم يكون فيه تنظيم جيد. لازم نعرف بالظبط احنا هنشارك ليه, وايه اللي ممكن يتحقق من ورا الاضراب ده. لكن مش نمشي كدة ورا أي حد بيقولنا يللا اضراب ونقول هيييييييييييه

الاضراب دا فاشل مع كل أسف. ومعمول لخدمة مصالح ناس معينة, بيستغلوا الحالة اللي وصلنا ليها عشان يضغطوا هما بينا على النظام ويحققوا مصالحهم. قال يعني هما اللي بيحركوا الشارع. شوفوا والنبي مين اللي بيدعوا للاضراب
حزب العمل المصري- الإخوان المسلمين - حزب الكرامه - حزب الوسط - حركة كفاية - حركة موظفي الضرائب العقاريه - عمال غزل المحلة - حركة إداريي وعمال القطاع التعليمي - نقابة المحامين - حركة أستاذه الجامعات

إلا ما فيه حزب منهم عنده برنامج أو تصور لحل مشاكل البلد أصلا.. احزاب متأسلمة (العمل والاخوان) واحزاب الشرشحة من غير فعل الكرامة والوسط).. كلها احزاب تتبع نظام اخربها واقعد على تلها

وبعدين راحوا على الناس اللي فعلا عملوا اضرابات واعتصامات عشان ليهم مطالب محددة. وكلها مطالب مالية.. لا ليها دعوة بصحة ولا تعليم ولا اقسام ولا كرامة المواطن ولا اي حاجة. وقالولهم احنا هنجيبلكم حقكم بس ما تنسوناش.. وطبعا كله على قفا الشعب اللي هيعمل اضراب عشان يطالب باصلاح الكرة الأرضية, وهو مجرد ورقة في لعبة عشان الاحزاب دي تاخد شعبية بين الناس اللي عايزة مرتباتها تزيد واللي عايزة تدخل الكادر الخاص بتاع المعلمين بالعافية

أيوة اديكوا فهمتوا أهوه.. ايوة البلد حالها لا هيتصلح ولا الاضراب ده هيعمل أي حاجة. هنفضل احنا زي ما احنا. احنا مجرد عرايس ماريونيت بيعلبوا بينا الاخوان والمعارضة الحنجورية عشان يكسبوا شعبية بين الموظفين والعمال والاساتذة اللي الحكومة فعلا ابتدت تستجيب لمطالبهم لما عملوا اضرابات واعتصامات بجد. يعني هو هو اسلوب حرامي الحلة بتاع الناس دي. مش هيبطلوا لعبة انهم يكسبوا على قفانا

يا جماعة الاضراب والاعتصام وحتى العصيان المدني له أصول. لازم يكون فيه حركة شعبية بجد, مالهاش أي غرض أو مصالح أو بتتبنى اجندة خاصة. لو عايزين نسترد حقوقنا يبقى لازم نخطط مظبوط لأي تحرك شعبي, ويكون عندنا مطالب محددة, ورؤية واضحة.. بلاش اسلوب البليد اللي لما افتكر يذاكر قعد يقرا الكتاب م الآخر

29 comments:

MerMaid said...

اخيرا نزلتي موضوع جديد يا فانتا؟
حمد الله ع السلامة
----------------
مش عارفة اقولك ايه
انا مع وضد الاضراب ده او العصيان المدني زي ما بتقولي

اقولك مع ليه
مع لان فعلا كل المطالب اللي بيطالبوا بيها ده محتاجة تتغير وتتصلح و لان فعلا دي الطريقة الوحيدة اللي ممكن يتعمل بيها كدة ..ده غير ان مفيش جبهة او حزب او حركة شعبية موحدة بيجتمع عليها الشعب كله
يعني عندنا هنا الشعب منقسم الي احزاب وفئات مختلفة
يعني لو الاخوان مثلا عملوا اعتصام او اضراب هيبقوا هم بس اللي عاملين كدة
او مثلا حزب زي حزب التجمع
لو عمل اضراب برضه هيبقي لوحده
فاهمة قصدي ايه؟؟
ان مفيش حركة واحدة الشعب مجتمع عليها
علشان كدة كل دول عملوا ده تحت مسمي واحد
اللي هو اضراب 6 ابريل
بس كان المفروض يبقي فيه مهلة اكبر من كدة يمكن الحكومة تكش وتخاف و تحقق المطالب قبل الاضراب
بس طبعا لانه مش هيبقي ليه فايدة زي باقي اخواته اللي سبقوه فمالوش لازمة ان الحكومة تاخد خبر
انتي عاوزة يبقي عندنا اضراب منظم؟وطلبات محددة؟؟
انا شايفة ان الاعتصام ده واقعي شوية وبيعبر عننا كمصريين
لان اولا معندناش حاجة منظمة في حياتنا ابدا
ثاني حاجة ان عندنا كمية بلوي ومشاكل لا حصر لها ولا عدد
لو كل يوم هنعمل اضراب يبقي مش هنخلص بس برضه الاصلاح ميجيش في خطوة واحدة
لازم يبقي فيه زي مانتي بتقولي كدة خطوات مرتبة و منظمة وطلبات محددة يعني مش مرة واحدة كدة
الاعتصام ده هيبقي عامل زي العيل الصغير اللي بيفرقع بومب كله مرة واحدة..هيعمل دوشة عالية و دخانة كتير مرة واحدة
بس البومب هيخلص منه مرة واحدة برضه

مش عارفة ليه انا حاسة ان كل ده هبل في هبل

ع العموم ادينا قاعدين لما نشوف ايه اللي هيحصل
و ان غدا لناظره قريب

تحياتي

Anonymous said...

مع احترامي لرأيك يا فندم
انتي كمان معملتيش حاجة غير توزيع الاتهامات يمين وشمال...ومفييش أي خطوات محددة أو عملية أو بدائل مقترحة

"يا جماعة الاضراب والاعتصام وحتى العصيان المدني له أصول. لازم يكون فيه حركة شعبية بجد, مالهاش أي غرض أو مصالح أو بتتبنى اجندة خاصة. لو عايزين نسترد حقوقنا يبقى لازم نخطط مظبوط لأي تحرك شعبي, ويكون عندنا مطالب محددة, ورؤية واضحة.. بلاش اسلوب البليد اللي لما افتكر يذاكر قعد يقرا الكتاب م الآخر"


طيب إزاي بقى نكون حركة شعبية بجد
ما هي اقتراحاتك في هذا الشأن؟؟

محمد

Hypatia said...

واحشتنى بوستاتك يا فانتا

كان عندي امل فى الاضراب ده
:(

انا بصراحه من رأيي ان كل مصر تعمل اضراب من غير طلبات حاجه كده زى الحداد على مصر وكل البيوت تعلق علم اسود على الشبابيك والبلكونات وكل الناس تقعد فى بيتها تعيط على مصر اللى ماتت
:(

مفيش امل يا فانتا

وجهة نظري said...

أهو إنت جبتي كل المفيد بالظبط، الشعب بقي ماريونيت في إيد اللي مايسووش، كل واحد يشوطة شوية علشان يحقق أغراضة. إضراب ومحدش يروح الشغل، يا ريت، بس الأحزاب دي حتشغل الناس الي حتترفد والا حتاكلهم، ومكانوا إتنيلوا حلوا مشكلة العيش الأول ومستنوش الحكومة الي بيعادوها. حاجة بقت تقرف، وناس بيضحكوا علينا

Unknown said...

ايه يا فانتا فينك كل ده وحشتيني اوي
مبروك عليكي مصر الجديده و يارب تكبر و تنتشر و تغير فعلا

للأسف الفوضي عندنا في كل حاجه حتي اللافكار الكويسه بنضيعها بالفوضي و عدم منطقية التفكير

انا زيك مش مع الاضراب و ماهتمتش اني اشارك فيه لان و بعدين
خلاص ال70 مليون فضلوا في بيتهم حصل ايه بعد كده

تحياتي يا قمر

Anonymous said...

طب فين الحلوووول
ولا هو اى نقد و خلاص

Unknown said...

خيبيتنا بقت بالويبه يا فانتا

حتي الإضراب مش عارفين نعمله صح
نفسي أشوف الشعب المصري مره جاد فيما يفعله

Anonymous said...

طيب ايه بقى الحل
انا مش معى الاضراب وعموما
هشتري حاجتي قبلها واعمل حسابي علشان انا عندي عيال لكن هنفضل برضه كدة ولا ايه بس الحل

Anonymous said...

انا مستغرب جدا من الناس الى المفروض انهم ليهم فى السياسه او حتى المفروض انهم بيفهموا
الغريب ان الحرب على فكرة الاضراب دى من اعداء الاخوان بس
رغم ان الاخوان اساسا مش هما اللى داعيين للاضراب
و لا حتى اعلنوا انهم هيشاركوا
و اللى كتب اسمهم فى الدعوه للاضراب كان عايز اساسا يدبسهم لإنه بعدها بعتلهم يرجوهم انهم يشاركوا

و طبعا اللى نشر فكرة الاضراب بجد هما الناس العاديه
مش الاحزاب و لا الاخوان
الاحزاب اللى فى مصر فاشله .. مافيش حاجه عملوها و بتنجح
انما فكرة الاضراب فعلا الناس العاديه متحمسين جدا جدا
و دلوقتى بسمع ناس بتتكلم عنها فى المواصلات
فبدل الناس المحسوبين على المثقفين تنورنا لو غلطانين و توجهنا
نلاقيهم بيحاربونا
و حجتهم ايه .. قال ايه خايفين الاخوان يكبوا على ام الإضراب
خلاص الخوف و الحقد من الاخوان خلاهم يحاربوا اى محاوله من اى حد الا الاخوان يركبوا
طظ فى الاخوان و ظط فى الاغبياء اللى خوفهم من الاخوان بيعطل محاولات افاقة الشعب

Hoda said...

عزيزتى فانتا
الحقيقه انا مش معاكى خالص فى الكلام اللى انتى بتقوليه دا بقى بعد يا فانتا ما الناس فاقت وقامت من رقادها اللى ولا رقاد اهل الكهف دانحبط معنوياتهم ونقول ناخد على قفانا ماشى ناخد على قفانا بس نبقى اعترضنا وخلاص .دا انا من ساعة ما وعيت على الدنيا ما شفتش المصريين متحمسين لفكره زى الموضوع دا واخيراً كلهم اجتمعوا على حاجه ،طيب دا انا كل اما بقول لواحده ست مالهاش فى اى حاجه وما سمعتشى عن الموضوع دا الاقى يا عينى وشها نور بأبتسامه كده وقالت لى بجد يا ريت طيب والله انا وولادى اول ناس هتشارك فى الموضوع دا الناس مخنوقه يا فانتا عايزين اى محاوله ينفسوا بيها عن غضابهم دا والا هينفجروا بصرف النظر عن مين اللى منظمها ولا عاملها المهم ان الناس اخيراً اخدت خطوه ايجابيه مش مشكله تنجح ولا ما تنجحشى المهم صوتنا يوصل لكل الدنيا ان احنا خلاص بطلنا جبن وخوف واتكلمنا واحتجينا ورفضنا ومين قال ان الاعتصامات او الاضراب او الثورات او حتى العصيان المدنى كما اسميتيه بيكون مرتب ومجهز ومخطط اى ثوره قامت فى الدنيا كانت بدايتها كده اعتراض من الناس وغضب وما يهمنيش المجتمع الغربى يضحك ولا يتهبب هما اساساً ما يهموناش بشىء اساساً ديمقراطيتهم دى كلها وهم دى فرنسا اللى بنقول عليها بلد الحريات وصدرت الثوره الفرنسيه للعالم عزلت موظف كبير عندها ونقلته لوظيفه اداريه اقل لمجرد انه تجرأ وكتب مقاله بينتقد فيها سياسة اسرائيل يعنى اهانه الرسول حريه راى وتعبير وانتقاد سياسة اسرائيل الوحشيه ضد الاطفال عمل اجرامى يستحق عليه العزل هى دى ديمقراطيتهم وحضارتهم وتنظيمهم اللى بتستشهدى بيه . هنا فى مصر فى عهد السادات لما اللحمه غليت وبقت بجنيه!!! السادات خطب فى الشعب وقال لهم ما تاكلوش لحمه واضربوا على شرائها لغاية اما تعفن عند البياعين ويضطروا يرخصوها للغلابه ونفس الحكايه لما الشعب قام بمظاهرات علشان السكر والزيت استجاب لرغباتهم واحنا ياما اتكلمنا لما تعبنا حد حس بينا فين الريس دا اللى ما شوفناه عمل اى حاجه علشان يوقف المهازل اللى بتحصل دى فالح بس كل اما يتكلم يقول الزياده السكانيه هى اللى بتلتهم التنميه زيادة ايه بس يا عم الحج هو بقى فى حد بيتجوز اصلا علشان تكون فى زياده احنا لازم نعترض نتعلم من اللى هيحصل دا ونحاول مره واتنين وتلاته وطالما الشعب اتحرك اخيرا يبقى فى امل يبقى يجب علينا كلنا نشجع الوقفه دى مش نحطم معنويات الناس اللى فاقت إذ فجأتاً وتبقى دى البدايه ... معلشى بقى كان عندى كلمتين وقولتهم لو عايزه تمسحيهم ابقى امسحيهم

خالص تحياتى

Fantasia said...

العزيزة ميرميد

الله يسلمك يا قمر. معلش طولت عليكم المرادي. مشغولة بشكل بشع

والله يا ميرميد أنا مقدرة الحالة اللي الناس وصلتلها.. ومبسوطة انهم اخيرا فاقوا وقرروا يتحركوا

بس على رأيك, دا اسمه هبل
يعني أنا عشان أعترض على حد ظالمني, أقوم ناكشة شعري وأعمله بخخخخخخخ؟
المفروض دا هيخوفه يعني؟ ولا هيخليه يضحك عليا ويعرف ان أنا أخري شوية حركات هبلة فينهب حقوقي زيادة؟

للأسف أنا مصدومة ف الناس.. مش عارفين يميزوا بين ايه اللي ينفع وايه اللي ما ينفعش. وأنا عذراهم والله العظيم.. بس نفسي نتعلم بقى.. كفاية اللي وصلناله

موضوع 6 أبريل دا ولا هيعمل أي حاجة وأبقي قولي فانتا قالت.. ودا هيخلي الناس اللي اتنحررت وشاركت يجيلهم احباط حقيقي. لانهم هيفتكروا انهم عملوا اللي عليهم وبرضه ما جبش نتيجة
هي دي المصيبة

ع العموم أنا مش بقول لحد ما تشاركش, أنا مجرد بقول وجهة نظري

ربنا يعينا جميعا على اللي احنا فيه

خالص تحياتي

Fantasia said...

استاذ محمد

اتهامات ايه اللي وزعتها يمين وشمال؟

يا أخي أنا بقول رأيي.. هو انا قولت لحد ما يعتصمش؟.. اللي شايف الاسلوب دا يجيب نتيجة يتفضل يشارك

انت عايزني أبقى زعيمة شعبية وأقود ثورة مثلا لمجرد اني معترضة على فكرة فاشلة؟ أنا دوري قمت بيه وحطيت اقتراحات والله لو كنت عايز تعرف ايه البديل.. لكن ما تتوقعش مني ان أنا هأشيل طبق فيه أكل فاسد من قدامك واحطلك طبق مكانه. كفاية اني حذرتك من ان الطبق اللي قدامك هيضرك.. المفروض تقوللي شكرا, مش تقوللي طب أكليني انتي

ومع ذلك اللي عايز ياكل يا عم يتفضل بالهنا والشفا.. هو حر

Fantasia said...

العزيزة نسرين

وحشاااني.. انتي فين؟

تصدقي يا رينا ان فكرتك أحسن مليون مرة من الاضراب بتاع كدبة ابريل ده
ع الأقل هيكون له هدف معين.. الناس بتعبر عن احباطها ويأسها
كدة والله نجيب نتيجة, ايه رأيك بقى؟

لكن الهرتلة بتاعة شوية المهرجين بتوع الاحزاب والحركات الوهمية اللي بيقنعوا الناس ان كل مشاكلهم هتتحل لو قعدوا يوم ف البيت هتجيب للناس احباط فوق احباطهم

أيه رأيك تخخطيلنا للاضراب القادم يا نسرين؟ أنا واثقة انك هتعملي اضراب ناجح جدا

خالص تحياتي

Fantasia said...

الاستاذ وجهة نظري

الله ينور عليك.. هما يقولوا للناس اعملوا اضراب ويغرقوهم.. ولو حد اترفد ولا واحد عيان مات عشان الدكتور قاعد ف البيت والصيدلية قافلة ولا هيعملوله حاجة

شيء بقى يقرف فعلا.. كمية استغلال لظروف الناس وانعدام ضمير ما شفتش زيه.. الناس دي متسلطة علينا ولا ايه؟.. بقى عشان انتخابات المحليات البلد واللي فيها يروحوا ف ستين داهية؟؟

طب ما كانوا يعملوا الاضراب ده يوم الانتخابات.. هي فرقت يومين؟ ايه يعني 6 من 8؟ دا لو عند أهلهم دم

سعدت بالمرور على مدونة حضرتك ولي عودة في القريب للتعليق

خالص تحياتي

أنا حر said...

مقتنع بكلامك جدا
اقولك على حاجة غريبة
انا لما شفت الطلبات المكتوبة قلت اكيد اللي كاتب الكلام ده مخبر في امن الدولة عايز يقبض على ناس كتير في وقت واحد
الثورة مش بتقوم كده الثورة لحظة فاصلة في حياة الشعوب مش رحلة الناس متفقه عليها وعلى ميعادها وقال هيفاجئوا الشرطة بوجودهم
قمة التهريج الحقيقي هتلاقيه في اليوم ده ان كل رؤساء الاحزاب وقيادات الاحزاب والمنظمات دي مش هيشاركوا في الاعتصام ده
تحياتي

Anonymous said...

طب نورينا

Alexandrian far away said...

الأستاذه العزيزه فانتازيا
حمد لله على السلامه أولا
ثانيا أسمحي لي بأنحنائه تحية لهذا العقل الواضح الرؤيه في الأمور السياسيه
رغم أنك يمينه ليبراليه
:-)
صحيح كلامك
ده مش أضراب
ده عصيان مدني والعصيان المدني هدفه اسقاط الحكومه
عصيان مدني يعني البلد يقف، وتسقط الحكومه، وتعلن الأحكام العرفيه وينزل الجيش الشوارع عشان يمشي البلد
عصيان مدني يعني على راي الفلاحين حرق زرع وما بعد حرق الزرع جيره
يعني ما ينفعش بعديه تفضل الحكومه حكومه والرئيس رئيس
يعني بندخن على الفيران عشان تطلع
بنوقف حالنا وحال البلد عشان نخنق النظام
بجد الناس فاهمه ده؟
في أواخر التمانينيات كان تحالف من الحركات اليساريه والناصريين بيجهز لعصيان مدني لأسقاط أنور السادات وتعيين فتحي رضوان رحمه الله كبديل وطني مؤقت تجهيزا لجمعيه وطنيه ودستور جديد، وهو أجهض ده طبعا بأحداث سبتمبر الشهيره، كان فيه هدف حقيقي وبرنامج ورؤيه بتقول تاني يوم حنعمل أيه
أيام ما بين ثورة فبراير البرجوازيه وثورة أكتوبر الأشتراكيه في أجتماع لمجلس مندوبين سوفيتات روسيا قال أحد الخطباء أنه لا يوجد حزب في روسيا يمكنه القول أعطونا الحكم بروسيا ونحن جاهزون لتسلمه، وكان رد لينين المشهور: بل هذا الحزب موجود وأسمه حزب العمال الأشتراكي الروسي
هل يوجد حزب بمصر الأن جاهز لتولي السلطه؟
هل يوجد حزب مصري شعبي حقيقي يتبنى مطالب الجماهير ويقودها ويصحح من مسارها؟
للاسف ..لأ
أنا مش مع أحباط الناس
لكن برضه مش مع بيعهم رخيص
نعلمهم يعملوا اضرابات متعدده ونوعيه
وأعتصامات
نربيهم نضاليا
نتعلم منهم ونعلمهم
هما بالأبداع الشعبي وأحنا المثقفين بالوعي التنظيمي والفكري
شويه شويه أعتصام ألف يبقى مليون ومظاهرة الخبز تبقى مظاهره للديموقراطيه
ويبقى فيه تنظيم جاهز يقول غوروا في داهيه يا عصابة مبارك أحنا مساتعدين نستلم السلطه باسم الشعب
ده الفرق بين الثوره والهوجه
وبين الثوري والطفولي فكريا
وبين العصيان المدني وبين هيييييييه أضراب

تحياتي وأحترامي ومودتي

Hani Michel said...

من اطلق الفكره .. هذا امر غير معلن و لن يجرؤ مروجوه الاعلان عن مسؤليتهم لانهم سيقعون تحت طائلة القانون لترويجهم للعصيان المدنى
و لنفس السبب تجاهلته كافة وسائل الاعلام خاصه الحزبيه و المستقله و القنوات الفضائيه - و ستجد التغطيه الاعلاميه مركزه - و لكن مساء 6 ابريل
و بالتالى تم اطلاق الحمله اليكترونيا رغم ان من يقف ورائها لديهم وسائل اخرى للتعبير

انا ضد مبدأ الاضراب بشكل عام فهو ضار بالاقتصاد اكثر من نفعه و من يستطيعون القيام به - فى دول العالم الاول - يضمن لهم العوده لوظائفهم و لا يعانون مشاكل ماديه و بالتالى قد يمتد الاضراب اياما و اسابيع دون ضرر لهم
فى مصر - ان نجح الاضراب - فالحاله الاقتصاديه للمضربين لن تتحمل اكثر من يومين ثلاثه مع تخوفهم من فصلهم من العمل
و بالتالى هى فكره فاشله فى مصر و دول العالم الثالث
و الاجدى منها هى المسيرات السلميه الصامته و الوقفات الاحتجاجيه بعد ساعات العمل
السبب الثانى الذى يجعلنى ضد الاضراب هو ان مهما ان كان الهدف نبيلا فيجب ان يعرف المشاركون من يقف وراءه و من يستفيد منه سياسيا و من يدعمه
انا قد اعانى من الغلاء و ارتفاع الاسعار لكن على استعداد ان اتحمل ذلك ان كان البديل مرفوض ايدولوجيا بالنسبه لى و ارفض ان يستغل احد مواقفى سياسيا لصالحه ان كنت ارفض منهجه و فكره

Hani Michel said...

من اطلق الفكره .. هذا امر غير معلن و لن يجرؤ مروجوه الاعلان عن مسؤليتهم لانهم سيقعون تحت طائلة القانون لترويجهم للعصيان المدنى
و لنفس السبب تجاهلته كافة وسائل الاعلام خاصه الحزبيه و المستقله و القنوات الفضائيه - و ستجد التغطيه الاعلاميه مركزه - و لكن مساء 6 ابريل
و بالتالى تم اطلاق الحمله اليكترونيا رغم ان من يقف ورائها لديهم وسائل اخرى للتعبير

انا ضد مبدأ الاضراب بشكل عام فهو ضار بالاقتصاد اكثر من نفعه و من يستطيعون القيام به - فى دول العالم الاول - يضمن لهم العوده لوظائفهم و لا يعانون مشاكل ماديه و بالتالى قد يمتد الاضراب اياما و اسابيع دون ضرر لهم
فى مصر - ان نجح الاضراب - فالحاله الاقتصاديه للمضربين لن تتحمل اكثر من يومين ثلاثه مع تخوفهم من فصلهم من العمل
و بالتالى هى فكره فاشله فى مصر و دول العالم الثالث
و الاجدى منها هى المسيرات السلميه الصامته و الوقفات الاحتجاجيه بعد ساعات العمل
السبب الثانى الذى يجعلنى ضد الاضراب هو ان مهما ان كان الهدف نبيلا فيجب ان يعرف المشاركون من يقف وراءه و من يستفيد منه سياسيا و من يدعمه
انا قد اعانى من الغلاء و ارتفاع الاسعار لكن على استعداد ان اتحمل ذلك ان كان البديل مرفوض ايدولوجيا بالنسبه لى و ارفض ان يستغل احد مواقفى سياسيا لصالحه ان كنت ارفض منهجه و فكره

Fantasia said...

العزيزة ايمي

يا بنتي انتي هتجنيني؟! انتي جبتي العقل دا منين؟ كل اللي في سنك مضربين.. ما تروحي تضربي معاهم
هههههههه

بجد يا ايمي أنا فخورة بيكي وبقدرتك على تحليل الواقع وانك تشوفيه من غير رتوش

اشكرك على تهنئتك الرقيقة. يا رب المجلة تكون عجبتك

خالص تحياتي

Fantasia said...

جوستي

أنا مش فاهمة انت عايز ايه بالظبط.. ما تضرب يا عم لو عاجبك الاضراب , هو أنا حوشتك؟ هأخرجك برة البيت بالعافية مثلا؟ ما تعمل اللي انت عاوزه. أنا بقول رأيي.. أنا حرة. واحدة بتحب تشتغل وتعمل حاجة مفيدة بدل ما تمشي ورا الكلام الفاضي.. حد له عندي حاجة؟

وأحزاب ايه اللي حطوا اساميها غصب عنها دي؟ حضرتك مابتقراش جرايد؟ ما سمعتش عن دعم الحاجات دي.. اللي ما ينفعش نسميها احزاب أصلا.. للبتاع دا, اللي ما ينفعش نسميه اضراب أصلا؟

Fantasia said...

الاستاذ العزيز حسن الهلالي

هي خيبة.. بس مش الشعب اللي مسئول عنها. البشوات اللي قتلوا الحياة السياسية في مصر هما سبب الوكسة اللي احنا فيها. قضوا على التعليم وعلى الثقافة وعلى السياسة وعلى الاقتصاد وبعدين يقولوا إصلاح!! إصلاح إيه؟ أمال مين اللي خربها؟

خالص تحياتي

Fantasia said...

الست

صدقيني ولا أنا مرتحالك.. فأحسن عقاب ليكي انك تفضلي من غير حل. والأحسن كمان انك تعملي اضراب للأبد, خصوصا عن مدونتي

Fantasia said...

العزيزة حنين

امسحهم دا إيه يا قمر؟ دا أنا أمسح كلامي كله وأسيب كلامك

يا حنين أنا فاهمة تماما اللي انتي بتقوليه, ومتفقة معاكي ان الأمور بقت لا تحتمل. وأنا مش ضد لا الإضراب ولا الإعتصام ولا حتى العصيان المدني من حيث المبدأ.. لكن كيفية التحرك وتحديد أهدافه هما أهم حاجة

وزي ما قولت لميرميد, أنا كل خوفي من الاضراب الفشنك دا إنه هيخلي الناس سلبية بجد. لان دا مش اضراب أصلا. مفيش أي تنظيم للموضوع ومفيش أي هدف أو أي شيء متوقع من وراه

انتي عارفة, لو كل واحد طلع في البلكونة وقعد يصوت ويشد شعره هيكون أحسن.. على الأقل هيرتاح وينفس عن الغضب اللي جواه.. لكن إيه يعني لما يقعد في البيت يوم؟ ايه اللي هيحصل؟ ايه اللي هيتغير؟

أقولك أنا.. حتى لو كل الناس قعدت في البيت
مش فيه ازمة عيش؟ الناس الغلابة اللي عايشة يوم بيوم مش هيلاقوا رغيف يكلوه هما وولادهم في اليوم ده

مش فيه أزمة صحة؟ الناس هتموت عشان مفيش دكتور ولا صيدلية ولا اسعاف

مش فيه ازمة اقتصادية؟ البورصة هتبقى في الارض والناس بيوتها هتتخرب

الاعتصامات والاضرابات لما اتعملت صح, وكل فئة في الشعب حددت أهدافها وطلبت طلبات واضحة ومحددة, جابت نتيجة.. لكن الفوضى مش بتخلق غير الفوضى

أنا نفسي الناس تفوق وتتحرك, لكن مش على طريقة تمخض الجبل فولد فأرا

خالص تحياتي

Fantasia said...

الاستاذ العزيز أنا حر

انت بتقول فيها؟ دي طريقة مخبرين فعلا.. ههههههههه

حياتنا بقى كلها تهريج في تهريج, اشمعنى الاضراب اللي هياخدوه جد يعني؟ لازم يبقى اضراب تهريج هو كمان عشان يتوافق مع الجو العام

خالص تحياتي

Fantasia said...

الاستاذ العزيز اسكندراني

دائما تبهرني بتعليقاتك الرائعة وقدرتك على تلخيص العديد من المواضيع في سطور قليلة

يا سيدي الفاضل موضوع 6 ابريل دا لا يرتقي لمستوى الهوجة ولا الطفولة الفكرية
حرام نسميها هوجة, مش ثورة عرابي البشوات سموها هوجة عشان يقللوا من شأنها؟ يا ريتها هوجة
ثم أنا ضد اننا نقرن التخاريف والأفكار الساذجة بالطفولة.. الطفولة مالهاش دعوة بالهبل

اللي بيحصل دا مزيج من هبل على نصب على تهريج على استغلال رخيص

الشعب عندنا مش أخضر سياسيا.. لأ أبيض.. لا يفقه ألف باء سياسة وعمل سياسي, ودا اللي بيمهد الطريق أمام مجموعات المستغلين والمنتفعين والمدعين والحنجوريين والأفاقين وحرامية الحلة

اتفق معك تماما في أهمية التعاون بين المثقفين وعامة الشعب. ولكن النظام قضى على كل قنوات الاتصال بينهم, ليعزل المثقفين ويطوقهم ويقضي على خطرهم الذي يهدد وجوده وانفراده بالسلطة

أشكرك على هذا التعليق القيم الذي هو بمثابة مقالة مستقلة

وعلى فكرة أنا مش يمنية, أنا انتمي لليبرالية الوسط, وممكن ليسار الوسط عشان نكون أكثر تحديدا

خالص تحياتي

Fantasia said...

الاستاذ هاني

انت جبت قلب الموضوع.. الاضراب دا عامل زي ابن الحرام, الكل بيتبرى منه, مع ان اللي عايز يعرف هيعرف مين وراه وليه.. بس طبعا الكل متعاطف, عشان الكل جايب أخره, فمحدش أصلا بيسأل أبوه مين

وأنا أؤيدك في تفضيل الاعتصامات والمسيرات السلمية ذات الهدف المحدد. لازم يكون فيه تدرج في الفعل عشان يكون فيه وسيلة ضغط, مش نحرق نفسنا مرة واحدة وخلاص

خالص تحياتي

Ahmed Al-Sabbagh said...


الصديقة العزيزة فانتازيا

احيكى على جرائتك الدائمة

ولكن ده راءيى فى الموضوع


أنا ليه هعمل الاضراب ؟؟


لما الفســـاد وقــّـفوه حـارس على وطنى
ولهيب الغلا كوانى .. وحتّ ف بدنى
لما الحرامى سرق منى اللقمة والميه
وسرق هدوءى وسكنى .. حتى من سكنى
لما الحلم حتى اتسرق .. من يومى .. من زمنى
لما النظام نسج - فى عز الشباب - كفنى
أنا قلت هعلن العصيان
فى يوم حزين مـَدنى

انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم


لما سألت عالعيش .. قالوا مفيش
وقالو العيش على الأبونية
وسألت عالزيت .. وعزّيت
لما عرفت إن الزيت بتسعة جنيه
وسألت على حديد البُــنا
قالوا الحديد .. خلاص فى كرش البيه

انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم


لما البشر والحجر
ووادى النيل ببنى أدمينــــه
لما زمان الوطن بايامة وشهورة وسنينه
لما الصغير والكبير
قالوا كفاية مش عايزينــة
كفاية علينا حكم سنين
تخرج الواحـــــد من دينـه

انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم


لما المبيد صبح سرطان
يهرى ف ارضنا .. فى الزرع .. فى مواطن
لما بؤ الميه صبح وسخ داكن
لما خرب الاقتصاد .. واحد على تلـّـــهَ
قاعد وشارب وواكل وساكن
لما الشباب بيصرخ .. فى ذل ومهانة
ولا شغل ولا توظيف ولا شقة ومساكن

انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم

تحياتى
أحمد الصباغ


Amr Elsherbiny said...

حلوة فكرة اللون الاسود دي. ممكن ندعو الناس كلها تلبس اسود في يوم زي الحداد على مصر وتبقى حاجة رمزية مش اقاطع منتجاتنا والعبط ده