Sunday, April 20

يحيا الهلال مع الصليب

سيطر على موقع الحزب لساعات ووضع صورة ملثم بمدفع رشاش
هاكر "سعودي" يطالب حزبا مصريا بإزالة "الصليب" من شعاره

القاهرة – محمد المعتصم

تعرض الموقع الإلكتروني لصحيفة "الوفد" المصرية الناطقة بلسان حزب الوفد المعارض لهجوم إلكتروني من هاكرز وصف نفسه بالهاكر السعودي، وقام بإزالة أكثر من نصف الصفحة الرئيسة، ووضع بدلا منها صورة لرجل ملثم يحمل مدفعا رشاشا مطالبا برفع شعار "الصليب" الموجود أعلى الصفحة.

وتمكنت إدارة الموقع من إعادة السيطرة على الموقع بعد ساعتين من الهجوم الذي جرى الخميس 17-4-2008، إلا أن الهاكرز الذي لم يتبين ما إذا كان سعوديا أم لا، عاد وسيطر على الوضع مساء
قبل أن تحل المشكلة للمرة الثانية، إلا أن صعوبة بالغة واجهت كل من حاول الدخول إلى الموقع، ومن المقرر أن تجري تحقيقات داخلية في الحزب لمعرفة كيف تم الاختراق وما هي أبعاده، خاصة وأن كثيرين داخل الحزب والصحيفة لم يعلموا بخبر الاختراق الإلكتروني.

وحزب الوفد المصري تشكل سنة 1918م، وكان حزب الأغلبية قبل ثورة 23 يوليو/تموز المصرية، التي أنهت عهد الملكية، وحولت البلاد إلى النظام الجمهوري، ولم يعد الحزب إلى نشاطه السياسي إلا في عهد الرئيس أنور السادات، بعد سماحه للتعددية الحزبية، وقد اتخذ لنفسه اسم حزب الوفد الجديد سنة 1978م، ويعد أحد أكبر أحزاب المعارضة في مصر. ويعبر شعاره "الهلال والصليب" عن مسلمي ومسيحيي البلاد

نقلا عن العربية نت

............................................................


لأ وأنت الصادق, بيعبر عن الوحدة بين مسلمي ومسيحي البلاد.. بس البقر مش بيفهم.. هيجيبوا عقل منين؟ ما هو التعصب لا يصيب سوى المتخلف.. والمتخلف مكانه مستشفى المجانين.. مش الانترنت

لأ وماسك مدفع رشاش! قال يعني هو دا اللي هيخوفهم ويخليهم يغيروا شعار الحزب اللي بقاله 90 سنة! دا فتك فتاكة! زمانه فاكر انه حقق نصر مبين.. فتح عكة بسلامته

هي ايه حكاية موضوع شعار الوحدة اللي مجننهم فجأة كدة؟.. مجاهدين النت أعلنوا الحرب على كل اللي حاطط صورة الصليب يا أخونا.. أديكم شايفين أهوه.. مفيش تفاهم.. اللي هيحط شعار الوحدة الوطنية هيتشنير.. أديكم شايفين.. أنا اتكفرت وطلعت فاسدة العقيدة.. والموقع بتاع الوفد حصل عليه هاك.. والدور على مين؟؟

أقولكم؟؟ ايه رأيكم كلنا نحط شعار الوحدة الوطنية على مدوناتنا؟

يلا كلنا نعمل رد ايجابي.. نقول لأ.. نقول لأ بالفعل.. نتصدى للإرهاب الالكتروني اللي عايز يمسح شعار الوحدة من الوجود

وأنا هأحطه على السايد بار عشان أصدرهلهم في وشهم أول ما يدخلوا

دعوة لكل مصري حريص على وحدة هذا الوطن.. حط شعار الوحدة على السايد بار

وحدتنا محدش هيقدر يفتتها

بلدنا بلد كل المصريين

الدين لله والوطن للجميع

فليحيا الهلال مع الصليب


20 comments:

haneen said...

ههههههههههه

يحيا الهلال مع الصليب .. فكرتينى بفيلم سعد زغلول ، هو احنا من امتى يعنى يا فانتا بناخذ على كلام السعوديين المتخلفين دول قوليلهم والنبى يخليهم فى حالهم ويتلهوا على خيبيتهم هما ويبصوا لنفسهم الاول ويسيبونا فى حالنا كفايه اللى احنا فيه مش ناقصاهم هما كمان ، دا احنا بقينا الحيطه المايله لكل الناس الزباله دى والله ... بصى بقى انا كتبت لك امبارح تعليق طويل عريض فيه كل فكاكيك امخخى على النوتس بتاعت المقاله بتاعتك فى مجلة مصر الجديده على الفيس بوك وقال ايه يااختى خير اللهم اجعله خير آجى ابعتها يقوم يقولى التعليق بتاعك كبير اختصروا شويه جيت ارجعله تانى لقيته اختفى روحت راقعه بالصوت الحيانى وقافله الجهاز وقلت عليا النعمه ماانا كاتبه تانى .هههههههه
اصل انا مخى بيبقى جزمه قديمه لما بيتربس زى القفل بالظبط. بس هحاول النهارده اكتبه تانى .. بس رجاء حار بقى ابقى شوفيلنا مكان اوسع وبراح شويه نكتب فيه تعليقاتنا بدال النوتس الخانقه دى

سلام يا قمراية المدونين

Nsreen Bsunee said...

هى الحكايه نقصه بغال من السعوديه مش لما البلد تنضف من الزباله اللى هنا الاول نبقي نفضي للزبالات المجاوره

مسلم نفسه يعيش باالإسلام said...
This comment has been removed by a blog administrator.
haneen said...
This comment has been removed by the author.
karakib said...

الوطن للجميع و الدين لالله

انسانة said...

للاسف هذا التخلف المزرى اصبحت له اصوات
هنا فى مصر

مسلم نفسه يعيش باالإسلام said...
This comment has been removed by a blog administrator.
الفقير الى الله said...

مش عارف اظن نسبة المسلمين في امريكا كويسه يعني ليه مش حاطين لا اله الا الله محمد رسول الله
او حاطين علامة المسجد جنب شعاراتهم
يعني علشان احنا هدفنا نكون زي امريكا فبنعمل زيهم هما يحطوا الاول شعار المسجد واحنا نحط شعار الصليب
وبعدين يا كميلة انت ماسكة الاخوان مولعه فيهم علشان هما حزب بينادي بالاسلام وقاعدة تقولى المفروض ان مينكش فيه حزب بيتكلم بشعارات دينيه طبعا طب مهو كده حزب الوفد بيتكلم بشعارات دينيه
متشتمش ليه في اي بوست انت بتناقضي نفسك
تحياتي

بحبك يامصر said...

وحدة الشعب المصرى مفيش شك فيها سواء احنا اقرنا بده او لاء لان ده واقع موجود فى مصر عمرنا فعلا ما حسينا بالتفرقه بين الناس فى مصر على اساس الدين ولو ده حصل هنا او فى اى مكان هيكون موقف فردى لا يعبر عن موقف شعب وبصراحه انا كنت عملت بوست ولغيته تانى لانه كا على موضوع يمس المسلمين والمسيحيين وهو ان ليه المسيحى فى مصر لو فكر فى الدخول للإسلام مش بيلاقى فرصه لكده وبيقابل مشاكل كتيره من الكنيسه والامن المصرى وبيتم اجباره للرجوع للمسيحيه من تانى والامثله كتيره زى ماريان وتريز بنات الفيوم ووفاء قسطنطين وغيرهم كتير بس بصراحه محبتش انشر الموضوع لان فى يعض الناس بتحب تصطاد وانا شوفت ان مش من مصلحة بلدنا يكون فى حاجات زى كده

اما حكاية انى احط الهلال جمب الصليب فى مدونتى انا افضل اعمل ده كسلوك مش شكل ودعوه من غير ما اعمل بيها انا واثق ان برغم مشاكلنا الكتيره فى اسلوب تفكيرنا الا اننا اكثر تحضرا من الغرب لاننا حتى ولو مش كنا متمسكين بتعاليم دينا بحزافيره الا اننا متربيين عليه وشربين التحضر وكيفية التعامل بسلام مع الاخر وذلك من ما اتعلمناه من ديننا الحنيف الكامل المتكامل
شكرا واسف للاطاله

أنا حر said...

الناس دي متقدرش تفهم معنى الشعار ولا اهميته بالنسبة للمصريين
الاخطر من كده هو ان في مصريين فعلا بقوا مش مؤمنين بالشعار ده وبيرفضوه وده نتيجة انتشار الفكر الوهابي في مصر للاسف
انا هنزل الشعار في مدونتي مش من باب العند انما من باب ايماني بفكرة المواطنة اللي البقر مش فاهمنها
مواضيعك رائعة جدا
تحياتي

ابو احمد said...

تحياتى ليكى وانا هاخد الشعار وانزله عندى لانى شايف ان الوطن بيحاولوا يفتتوه
والواجب على كل محب لهذا البلد ان ينتبه
اما الاخ بتاع امريكا الى علق قبلى
هو عاوز ياخد من امريكا اسوأمافيها براحته

ابو احمد said...

كل سنه وانت طيبه يافنتا
والسنه الجايه يارب تكونى محققه كل احلامك
تحياتى

Fantasia said...

العزيزة حنين

والله حاسة بيكي يا أوختشي. اصلا الفيس بوك ده بقى خنيق موووت. وأنا ضاع مني يجي ميت تعليق بنفس السيناريو اللي حصل معاكي
شكرا يا جميل انك لم تفقدي الأمل وبعتيلي تعليق تاني منور على جروب مصر الجديدة
أما الهاكر السعودي دا فأنا عندي احساس انه مش سعودي ولا حاجة, دا شكله واحد نفسه يبقى سعودي ومش عارف
يا ريت كل الناس اللي على شاكلته يحلوا عننا ويعملوا هجرة جماعية للمملكة.. قاعدين معانا بيهببوا ايه في المجتمع الفاسق بتاع الوحدة الوطنية ده؟ أنا نفسي أفهم, اللي قاعدين بيهروا في نفسهم عشان احنا بلد مافيهاش طائفية واننا شعب بيحب بعضه بغض النظر ع الفروق اللي بيننا.. ما يرحموا نفسهم ويرحمونا ويروحوا يعيشوا في المجتمع اللي هما شايفينه مثالي.. قاعدين معانا ليه؟

تقبلي اعتذاري يا عزيزتي عن التعليق المحذوف لهذا الأحمق منعدم الكرامة والاحساس. أنا ممكن أعمل كومنت مودريشن, لكن بدفع تمن اصراري على شفافية هذه الصفحة. واعتقد اني أقدر أديرها من غير اللجوء للاجراء ده

خالص تحياتي

Fantasia said...

العزيزة نسرين

ومين سمعك يا رينا؟.. أكوام الزبالة عمالة تتراكم ولا حياة لمن تنادي

ربنا يرحمنا من الزبالات الداخلية والخارجية والمستخبية, قادر يا كريم

خالص تحياتي

Fantasia said...

كراكيب

شكرا على المختصر المفيد

خالص تحياتي

Fantasia said...

انسانة

يا ألف خطوة عزيزة.. اسمحيلي أحييكي على مدونتك الرائعة واسمحيلي كمان ادعو كل المدونين الاحرار للاطلاع عليها

صوت التخلف في مصر معروف مصدره. لكن من يستطيع اعلاء صوت التقدم؟ هذا هو السؤال

خالص تحياتي

Fantasia said...

الفقير

لا تعليق

Fantasia said...

الاستاذ بحبك يا مصر

اشكر حسك الوطني الذي الهمك عدم نشر هذا الموضوع على مدونتك
فالموضوع في حد ذاته قابل للنقاش والتحليل, ولكن عدم النضج في التعليق وأقلام المتعصبين كانت لتفسد أي نقاش جاد وتحيله إلى مهزلة نحن في غنى عنها في الوقت الحاضر
أتمنى حين نتطرق لموضوعات كهذه أن نطل على الجانب الآخر ونتناوله أيضا, ف ليس ممكنا أن ننتقد غياب ثقافة حرية الاعتقاد من جانب واحد
وأنا معك في أن ممارسة فعل التسامح وقبول الآخر هي الجوهر, بينما الشعار هو مجرد رمز.. لكنه رمز يعبر عن مدلول ويدعو الآخرين لتبني هذه القيم التي باتت مهددة في مجتمعنا اليوم مع كل أسف

خالص تحياتي

Fantasia said...

العزيز أنا حر

أشكرك على تبني هذه المبادرة. الموضوع طبعا مش عند وانما اعلان عن موقف نحتاج لتدعيمه بكل قوة في المرحلة الحالية التي يمر بها وطننا, وهي مرجلة حرجة بكل تأكيد ولا يمكن تهوين ما يشوب مجتمعنا اليوم من بعض السلوك الطائفي

خالص تحياتي

Fantasia said...

الاستاذ العزيز أبو أحمد

كل عام وانت بخير. سعيدة بتبنيك لهذه المبادرة. هما فعلا بيحاولوا يفتتوا الوطن, لكن علينا أن نتمسك بوحدته ونحميها بكل ما نملك

خالص شكري وتقديري