Monday, April 28

هنشم النسيم رغم انوفكم


جهنم الحمراء لا تسلق بيض

بقلم حمدى رزق ٢٠/٤/٢٠٠٨

أحب تلوين البيض، أصحو مبكراً مع العصفور، كانت أمي لتوها تنهي التحيات الطيبات، توقد وابور الجاز، تسلق البيض في ماء مالح حتي يتكلس القشر، تتركني غارقاً في صحون الألوان، تخلو الباقة من الأزرق والأسود.. شم النسيم عيد وليس يوم حداد.

خُف الجمل يؤلمه، لو مر علي بيضة مسلوقة واقفة علي حيلها، الجمال لا تكسر البيض، شيوخ الحرام يفقشون البيض، أحدهم علي شبكة "إسلام أون لاين" يحرم تلوين البيض، فتوي البيض تروج علي المواقع الإسلامية، ترسل علي الإيميلات المتاحة والمجموعات البريدية، مع اقتراب الاحتفال بعيد شم النسيم.. كل سنة وأنتم طيبين.

يبغون تحريم شم النسيم، ويتجاوزون في حق المسيحيين، يسمونهم النصاري ويكفّرونهم، ويتغولون في أصل العقيدة المسيحية، يحتالون علي الإنجيل والمسيح (عليه السلام)، و يصدرون المزاعم وصفا لما يعتقدون، لكم دينكم ولي دين.

ويسأل سائل: ببيان حقيقة عيد شم النسيم، وحكم احتفال المسلمين، ولماذا يكون المولد النبوي دائماً يوم الإثنين وعيد شم النسيم دائما يوم الإثنين أيضاً؟.. ويجيب مولانا: لابد من الإشارة إلي أن اليهود المصريين - علي عهد سيدنا موسي عليه السلام - قد أخذوا عن الفراعنة المصريين احتفالهم بهذا العيد، وجعلوه رأساً للسنة العبرية، وأطلقوا عليه اسم "عيد الفصح"، والفصح كلمة عبرية، تعني (الخروج أو العبور)، وعندما دخلت المسيحية مصر عرف ما يسمي بـعيد (يوم القيامة)، والذي يرمز إلي قيام المسيح من قبره - كما يزعمون (نصا من أصل الفتوي).

ويكمل: ويلاحظ أن يوم شم النسيم يعتبر عيداً رسمياً في بعض البلاد الإسلامية، تعطل فيه الدوائر الرسمية! كما يلاحظ أيضاً أن النصاري كانوا ولايزالون يحتفلون بعيد الفصح (عيد القيامة) في يوم الأحد، ويليه مباشرة عيد شم النسيم يوم الإثنين، ومن مظاهر الاحتفال بعيد شم النسيم أكل السمك والبيض، ومن العادات تلوين البيض بالأحمر، وربما كانوا يرمزون بذلك إلي دم المسيح (المصلوب)، حسب اعتقادهم الباطل المناقض للقرآن الكريم، وإجماع المسلمين المنعقد علي عدم قتل المسيح وعدم صلبه، وأنه رفع إلي السماء (نصا من أصل الفتوي).

وعلي أي حال فلا يجوز للمسلم مشاركة النصاري وغيرهم في الاحتفال بشم النسيم، وغيره من الأعياد الخاصة بالكفار(!!!) كما لا يجوز تلوين البيض في أعيادهم، ولا التهنئة للكفار بأعيادهم، وإظهار السرور بها، كما لا يجوز تعطيل الأعمال من أجلها، لأن هذا من مشابهة أعداء الله المحرمة، ومن التعاون معهم علي الباطل.

كما يجدر التنبيه إلي أن اليوم الموافق لميلاد النبي -صلي الله عليه وسلم- لا يأتي دائماً يوم الإثنين بل يختلف باختلاف الأعوام، ولكن يوم شم النسيم يأتي دائماً يوم الإثنين، لأن النصاري يعدلون في موعد صومهم كل عام حتي يتوافق مع مجيء (شم النسيم) يوم الإثنين، وأخيراً: ننصح السائل الكريم بعدم الاحتفال بمثل هذه المناسبات التي ما أنزل الله بها من سلطان.. والله أعلم (صادرة في ٢٨ ربيع الأول ١٤٢٢ - مركز الفتوي بإشراف د.عبدالله الفقيه).

حبل الحرام يخنق المجتمع، أينما تولوا وجوهكم ثمة من يصليكم بالحرام، اللهيب يلفح الوجوه، لهيب الوابور يصطلي تحت حلة البيض، لون اللهب البنفسجي جميل، يشع دفئا، جهنم الحمراء لا تسلق بيضا.. تشوي الوجوه.


...................................


علماء الأزهر يرفضون «منشورات» تحريم الاحتفال بـ«شم النسيم»

كتب أحمد البحيري ـ محمود المنشاوي ٢٧/٤/٢٠٠٨

الاحتفال بـ(شم النسيم) ليس له معني ديني.. إنما هو عادة جميلة للعودة إلي الطبيعة.. والاستمتاع بإبداع الخالق»، بهذه الكلمات أعرب عدد من علماء الأزهر وشيوخه عن رفضهم المنشورات التي وزعها بعض السلفيين، يحرمون فيها مشاركة المسلمين في الاحتفال بشم النسيم، مستندين إلي فتوي منسوبة للشيخ عطية صقر، رئيس لجنة الفتوي الأسبق بالأزهر.

ودعا العلماء المسلمين للخروج إلي المتنزهات غداً، وتهنئة الإخوة الأقباط بعيد القيامة الذي يواكب اليوم، في المقابل مازالت المنشورات الرافضة لشم النسيم توزع في المنوفية.

وقال الدكتور محمد رأفت عثمان، عضو مجمع البحوث الإسلامية ومجمع فقهاء الشريعة بأمريكا: «الاحتفال بشم النسيم - كما هو واضح من التسمية - احتفال بالمناظر الطبيعية الجميلة، التي تجيء بعد فصل الشتاء، فتزهر الأشجار والورود،

وليس لهذا اليوم أي معني ديني إطلاقا، حتي يقول البعض إنه بدعة أو محرم أو مكروه، وإنما هو فكرة اخترعها المصريون القدامي إظهارا للابتهاج والسرور بالطبيعة التي خلقها المولي عز وجل».

وأضاف: القواعد الشرعية تقول إن «الأصل في الأمور الإباحة ما لم يرد نص بالتحريم» ، كما أن الأمور لا تكون من البدع إلا إذا اتخذت صبغة دينية.

كما رفضت الدكتورة سعاد صالح، أستاذ الفقه المقارن بجامعة الأزهر، القول بتحريم الاحتفال بشم النسيم، وقالت: «هذا الرأي يخضع لفكر سلفي متشدد، لأن الرسول صلي الله عليه وسلم،

كان رمزاً للتسامح مع غير المسلمين، فكان يزور جاره النصراني أثناء مرضه، وقام لجنازة يهودي حينما مرت عليه، وكل هذه التصرفات من الرسول تجعلنا نرفض كل الآراء المتشددة، خاصة إذا ترتب عليها إحداث فتنة وشقاق بين طوائف الأمة».

وأضافت: نحن نرحب بكل مناسبة للإخوة الأقباط، ومن باب الإحسان والمروءة أن نجاملهم في مناسباتهم ونتبادل معهم التهنئة في أعيادنا وأعيادهم.

ودعا الشيخ عبدالحميد الأطرش، رئيس لجنة الفتوي بالأزهر، المسلمين إلي الاحتفال بعيد شم النسيم، والخروج للمتنزهات والأماكن العامة غداً، مع الالتزام بآداب الإسلام، وتقديم التهنئة للإخوة الأقباط.

نقلا عن جريدة المصري اليوم

......................................

هو إيه النظام؟.. عيد الحب حرام.. شم النسيم حرام.. حتى المولد النبوي حرام.. حرمت عليكم عيشتكم يا بعدا! سودتوا حياتنا وقرفتونا في عيشتنا.. هو يعني من كتر الفرحة اللي احنا فيها مستكترين علينا شوية أعياد؟ ما تتنيلوا ماتحتفلوش ولا تتهببوا على عينكم, مالكم انتوا ومال الناس اللي عايزة تحتفل وتعيد؟ مالكم ومال اللي بيحبوا أهلهم وصحابهم وجيرانهم وزمايلهم وبيفرحوا لفرحهم ويهنوهم بأعيادهم؟ مالكم انتوا ومال المصريين اللي فخورين بمصريتهم ومتمسكين بأصولهم وحضارتهم وبيحتفلوا بأعياد أجدادهم اللي بنوا أول حضارة في التاريخ؟ مالكم انتوا ومال المسلمين اللي بجد, اللي يعرفوا دينهم بجد, واللي ماشيين على هدى نبيهم الكريم اللي أخلاقه كلها سماحة وبتدعو لحب الناس وحب الحياة؟

خليكم انتم ورا شيوخكم ودجالينكم.. أقعدوا غلوا واحقدوا واكرهوا نفسكم قبل ما تكرهوا غيركم. خليكم في عمى قلوبكم وعمى ضمايركم. امشوا ورا جهلكم وتعصبكم وتخلفكم. لكن سيبونا في حالنا. سيبونا نحب بعض. سيبونا نحب بلدنا وتراثنا واخواتنا. سيبونا نفرح.. سيبونا نشم شوية هوا بدل ما انتوا كاتمين على نفاسنا ومسممين حياتنا. سيبونا نحافظ على وحدة بلادنا. سيبونا نعيش يا أموات

كل سنة وكل المصريين الجدعان ولاد البلد بألف خير

شموا النسيم ولا يهمكم

ادوها فسيخ ورنجة وبصل أخضر وبيض ملون

افرحوا وحبوا واتفسحوا وغنوا واملوا الدنيا أمل يا مصريين

10 comments:

أحمد منتصر said...

على رأيك يا فانتا سيبونا ف حالنا ربنا ينتقم منكم :)

عاشور الناجي said...

سيبيهم يكشفوا عن حقيقتهم المتخلفة و كرههم لكل حاجة حلوة المشكلة مافيش مستشفيات أمراض عقلية بالعدد الكافي تلمهم ده البارح لقيت واحد يدعوا لهدم أبوا الهول لو سكتوا يا فانطا هيهدموه فعلا زي تماثيل بوذا في أفغانستان

Migo Mishmish said...

كل سنه والناس كلها طيبة
بس انا منبسطتش امبارح
كان عندنا في البيت ملوحه تخبل ومقدرتش احط حاجة في بقى علشان الجونين
معلش شم النسيم الجاي هأكل وأكله ملوحه وبصل اخضر ان شالله علشان يطلع مصري اصيل.
انتي عارفه انهم لقوا حفريات او بقايا سمك مملح (تقريباً ملوحة)في الجزء الخاص بالعمال اللي كانوا شغالين في الهرم يعني الموضوع قديم قوي
الناس بقه بتوع كل حاجة حرام دول عالم مخنوقه ومكنش ليهم صحاب في المدرسه وهما صغرين ولما دخلوا ثانوي صحابهم كانوا بتقريقوا عليهم وبيضربوهم بعد المدرسه علشان كدة بقى عندهم كره للمجتمع وقرروا انهم ينكدوا عالناس زي هما ما عاشوا طفوله مكندة
وبعدين اللي بيدعوا للتفرقه ما بين المصريين ماهماش مصرين لان المصرين زي ماقلنا فوي بيكالوا ملوحه من زماااااااااااان قوي
دول الغجر اعوان العرعر بتوع الغنم اللي ما يعرفوش حاجة عن شم النسيم والزرع والخضرة
معلش تعليقي شديد بس الحاجات ديه لازم الواحد يتعامل معاها بحزم علشان الهطل مايكترش
اللي مش عايز يحتفل بشم النسيم احسن خليه مرزوع في البيت وخليه يقفل الشباك ومايدخلش الشمس ولا يسمع العصافير خليه كدة عامل زي المعددة
على الاقل الشوارع تنضف
Love,
MishMish

EmY said...

حبيبة قلبي يا فانتا مش عارفا هايتهموكي بايه تاني بعد فساد العقيده بس ولا يهمك

انا احتفلت بعيد القيامه المجيد و هنيت كل اصحابي المسيحين بيه هو ايه الي حرم اني اهني المسيحين باعيادهم ولا دي بقت بدعه هي كمان

و مالو شم النسيم رجس من عمل الشيطان ولا ايه

عالم بتموت في الكآبه

تحياتي يا قمر

Egyptian Feminist Chic said...

i know i am a little late (couldn't help it)... but,


kol sana wenty tayeba ya fanta, we kol sana we kol elmasreyeen tayebeen :)

elly bey2oool mate7tefloosh, akeed wakhed elkalam dah men wa7ed mesh masry, we bey7qed 3ala elmasreyeen.... ba2eet mosalsal elqada2 3ala haweyetna... rabena yakhodhom , 3awzeen yesamemo 3eeshet elnas...

Fantasia said...

أحمد منتصر

هو حد فيهم عنده دم؟ يا ريتهم عندهم ذرة إحساس ولا بيختشوا من ندالتهم

خالص تحياتي

Fantasia said...

عاشور الناجي

إلهي اللي عايز يهد الهرم يتطربق سطح بيته فوق نافوخه, قادر يا كريم. هما البعدا دول عايزين إيه مننا بالظبط؟ أنا برضه شوفت كلام المدهولين اللي عايزين يهدوا أبو الهول, مش عارفة تاعب أهلهم في إيه؟ يكونش كان جوز أمهم؟ دا إيه الوكسة دي؟ وبعدين اشمعنا الأهرامات وأبو الهول؟ يعني دي مقابر ودا كان حارس المقابر, لا كان حد بيعبدهم ولا بيدبحلهم قرابين. لكن هما عايزين يهدموا رمز مصر. عايزين يقضوا على الهوية المصرية. الحقد والغل مشعلل قلبهم عشان الصحرا بتاعة الجاز عمر ما كان فيها حضارة. خليهم ياكلوا في نفسهم, جتهم البلا

خالص تحياتي

Fantasia said...

العزيزة مشمش

ألف هنا وشفا ع اللي أكل الملوحة, وانتي بقى ان شاء الله السنة الجاية تاخدي بتارك وتاكلي منها الطاق طاقين

عاجبني قوي التحليل النفسي بتاع الناس الخنيقة إياها. وأنا معاكي إننا لازم نتعامل بحزم أكتر مع الكلام الأهبل بتاعهم. صحيح هو هفلطة وتخريف, لكن للأسف فيه ناس بتسمعه, ماهو رزق الهبل ع المجانين, والمجانين كتروا اليومين دول

ياختي يروحوا يشوفوا الخيبة اللي هما فيها ويتوكسوا, هي كانت ناقصاهم؟ مش فالحين غير يصطادوا في المية العكرة اللي زي وشهم.

قصره.. معلش, كل الأشكال دي هتترمي في زبالة التاريخ ولو تم ذكرهم هيكون في باب الشتيمة والتريقة, لكن يبقى شم النسيم وتبقى الحضارة المصرية شاهد على عظمة هذا الوطن. كل سنة وانتي طيبة يا قمر

خالص تحياتي

Fantasia said...

العزيزة إيمي

والله انك جدعة يا إيمي كعادتك دايما. بنت مصرية بحق وحقيق. يا بنتي انتي بتديني بارقة أمل في الشباب, لكن للأسف بيجوا الغربان ياخدوا البارقة ويطيروا. يا ريت ألاقي كام واحدة زيك يطمنوني على مستقبل البلد

شم النسيم يا ستي طلع قليل الأدب ومنحرف. هما دول ناس يعرفوا يعني إيه نسيم أصلا؟ دول آخرهم يشموا صوابع رجليهم

سيبك.. أكتر من كدة ويزيح ربنا

خالص تحياتي

Fantasia said...

العزيزة EFC

ولا يهمك. خليهم ياكلوا في نفسهم, إحنا مش هنسكت. مفيش مصري بجد هيفرط في هويته ولا يكره أهله عشان بسلامتهم بتوع الجاز مش عاجبهم مصر. يروحوا بقى يخبطوا راسهم في أقرب نخلة عندهم

مسلسل القضاء على الهوية المصرية مش هيطول.. أديهم بيكشفوا نفسهم. خلي زبالتهم كلها تطلع وريحتها تفوح عشان تفوق الغفلانين

خالص تحياتي