Sunday, May 25

وجون وجون وجووووووووووون



أعزائي زملاء الكفاح الكروي

إنه لمن دواعي سروري وابتهاجي وفرحتي واندهاشي وازبهلالي وظقططتي و احتفالي
أن أشارككم جميعا الفرحة بأول بطولة يبل بيها هذا الفريق البائس ريقنا بعد 4 سنوات عجاف

يااااااااااااااه.. أخيرا النحس اتفك يا جدعان!.. إيه ده؟ يا لهوي

يا جمهور الزمالك العظيم الصبور المهاود.. يا أيها الزملكاوية في الأرض

مبرووووووووووك كاس مصر

مبروك علينا بجد

شكل الاستاد كان يفرح وهو كله أبيض ف أبيض.. اللهم أجعله خير

يا جماعة احنا استحملنا كتير أوي وكلنا جالنا الضغط والسكر والقلب والقاولون العصبي, دا غير المرارة اللي اتفقعت من زمان

بس الحمد لله , طولة البال تهد الجبال

كفارة يا زملكاوية

وأحب أسمع بهذه المناسبة أغنية ياسمين الخيام.. يا رب كتر أفراحنا وعلى قد نيتنا ادينا

آه والنبي دا أحنا غلابة

11 comments:

Hypatia said...

SHE SHE SHEKABALA....HAT ELKASS WE T3ALA


:))

المجد للزمالك فى الاعااااااااالى وعلى الاهلى المذله
نياهاهاهاهاهاهاهاها
ديه البدايه بس احنا كنا عاوزين النحس يتفك وبعد كده حتشوفو انشاءلله الفن والهندسه تانى بدل ما الدوري المصري بقي ازفت دوري فى التاريخ من غير الزمالك

مبروووووووووووك يا فانتا
طبيعي انك تكونى زملكاويه هى ديه الفطره الطيبه

احساس لسه حى said...

فانتازيا

بعد مبروك مع انى اهلاوى همجى

انا كتبت عنك بوست حبيت اقولك علشان محبش اعمل شئ من وراء صاحبه

وللاسف بنتقدك فيه

سلام

Fantasia said...

العزيزة نسرين

مبرووووووك يا قمر.. القلعة البيضاء نورت.. بالكاس طبعا
هههههههه

لأ والله دا من دواعي سروري اننا نلاقي زملكاوية بين المدونين يعني.. أصلهم نادرين انتي عارفة.. بكرة هيحطونا في المتحف ويكتبوا تحتنا "أيوب المصري".. بس بجد أنا مكنتش متخيلة الحضور الزملكاوي هيكون كدا في الاستاد

قعدوا يحبطونا ويقولولنا ماعدتش فيه زملكاوية ف البلد, كأننا انقرضنا بعد الشر.. لكن أهوه.. زملكاوية يسدوا عين الشمس

هي دي البداية على رأيك.. احنا بس الطلعة الاولنية كانت مزرجنة شوية معانا.. بس خلاص بقى هننطلق

شوفتي الدوري السنادي ماسخ ازاي؟ بالذمة فين المنافسة طيب؟ عشان يعرفوا بس ان من غير الزمالك مافيش حاجة اسمها دوري. خلي الأهلي يشبع بيه يا ستي

بييييب بييييب زمالك

Fantasia said...

اللي معندوش احساس

مين؟ سي لطفي؟.. ههههههه

أول مرة أشوف واحد بيقول على نفسه همجي.. لأ دي بجد في الجون

نعم يا اخينا؟ كتبت عني بوست؟ خلدتني في التاريخ خلاص؟

وللأسف ليه يا عديم الاحساس؟ ماهو دا الطبيعي؟ انت كنت عايز بعد الشر يعني انك تمدحني ولا إيه؟ انت عايز تنهي على مستقبلي التدويني يا ابني؟ ماهو هو دا الطبيعي.. واحد عامل مدونة مخصوص للشرشحة والافترا على كل المدونين المحترمين.. متوقع منه إيه؟ دا أنا حتى كنت قلقانة ان دوري اتأخر

يلا خير ما فعلت يا عديم الاحساس. يا ريت بقى توريني جمال خطوتك.. أخيرا دقيت المسمار الأخير في نعش وجودك هنا

انت عملت فيا معروف كبير الصراحة, أصل الناس كلها كلت وشي اكمن مدونتي هي الوحيدة اللي انت لسة ما انطردتش منها.. وكل ما تدخل بتجيلبهم مغص.. فكدا انت مشكور اديت نفسك سكة وطريق.. أصل مشكلة الناس الليبراليين اللي زي حالاتي ان نفسهم طويل ومش بيصادروا على حد مهما تجاوز معاهم. لكن انت بعد مقالتك العصماء, اللي أنا مش محتاجة أقراها لأني عارفة مقدما قد إيه هي حقيرة.. اديتني سبب وجيه اني أقولك غور غير مأسوف عليك

ويا اخواني.. أوعوا حد يدخل عنده الله يكرمكم, ولو حتى من باب الدفاع عني. هو أصلا عمال يشحت حد يدخل عنده من أول ما ابتدى الردح وافتكر نفسه مدون. فيا ريت اللي يحبنا لا يضرب نار ولا يدخل عند عديم الاحساس, مهما كان اللي قاله

أنا مش هأكسر وراك قلة على فكرة.. خسارة فيك الصراحة يعني معلش.. بس ولو اننا كلنا عارفين انك عديم الاحساس والكرامة كمان, سايقة عليك النبي ما توريني طلعتك البهية هنا تاني.. ولا تحت أي اسم من الاسامي اياها.. أنا حتى ما ارضالكش ان بعد نقشك العبقري الناس تشوفك عند واحدة شتمتها.. ولا إيه؟ يلا بقى.. أحلى شلوت من أجدع مداس حريمي في الجمهورية

Desert cat said...

مع انى مالوش فى الكورة
بس سعيده لسعادتك

Unknown said...

مش معقوله فانتا و نسرينا انتو الاتنين زمالكاويه زيي ده ايه الهنا ده

ياسلام علي ماتش امبارح مكنتش مصدقه نفسي و بسأل الي جبني يا جماعه انتوا متأكدين ان حازم امام هو الي ماسك الكاس مش حد من انبي

اخيرآ النجس اتفك و خلاص كده الزمالك محدش هايعرف يقف في وشه عقبال الدوري بقي و ننطلق

مبروك يا فانتا علي الكاس و علي دخولك التاريخ في مدونة الي فاكر ان عندو احساس

رئيس جمهوريه نفسى said...

رغم اهلاويتى الشديده الا ان هذا لا يمنع انى اقول مبروك للزملكاويه يمكن ربنا ينفخ فى صورتكموتتعادلوا معانا ماتش السنه الجايه :D وش بيضحك
المهم رغم اهلاويتى بس استفاقت الزمالك فى الصالح بدل ما الاهلى بقى زى الحزب الوطنى بياخد كل حاجه لحسابه
مبروك مرتين مره للكاس ومره لدخولك التاريخ معانا فى سلسلة الهجوم العظيم

Fantasia said...

العزيزة قطة الصحراء

الله يخليكي يا قمر.. شكرا على شعورك الرقيق

خالص تحياتي

Fantasia said...

العزيزة الزملكاوية إيمي

الله يبارك فيكي يا قمر.. تصدقي أول مرة أعرف انك زملكاوية؟
دا احنا المفروض نعمل جبهة المدونات الزملكاويات بقى.. هههه.. تخيلي.. دا احنا هناكل ضرب
يعني بنات, وبندافع عن حقوق المرأة, وبنشجع الزمالك كمان.. قمة الفسق والفجور
لأ وكمان بقيت زميلة ليكي في دخول التاريخ.. انتم السابقون ونحن اللاحقون يا فندم

خالص تحياتي

Fantasia said...

الاستاذ العزيز رئيس جمهورية نفسي

شفت بقى؟ ميزة التاريخ انه لا يفرق بين أهلاوي وزملكاوي.. هو دا تذويب الفروق الكروية

اشكرك على تهنئتك, وربنا يسمع منك وتكون استفاقة فعلا. مش عايزين حزب وطني في الكورة كمان.. هي ناقصة؟

خالص تحياتي

عم مينا said...

يا فانتازيا والله انا فرحتلكو
رغم اني أهلاوي متعصب
بس آصله بجد حرام الي بيحصل فيكو
و كأشقاء في وطن واحد من حقكُ تفرحه شوية
رغم انه الكأس ده مش هيجبلكه غير وجع الدماغ لانكُ هتلاعبُ الأهلي علي السوبر