Friday, June 20

استشارة عاطفية اخوانجية طحن


بعد طول غياب للشديد الأوي أعود إليكم يا قرائي واصدقائي الأعزاء بفاصل فكاهي وبعده نعاود تجرع هموم الوطن مع بعضينا

الفاصل الفكاهي دا عبارة عن استشارة عاطفية اخوانجية طحن
بطل قصتنا عايز يتأهل، أي يتجوز، بس بخته الأسود خلى الشيطان يوزه ويخلي قلبه القليل الأدب يزوغ على واحدة من برا الجماعة.. مش من الأخوات
وياللهول!! الواد بقى محتاس مش عارف يعمل إيه.. يقطع الحب وسنينه

الواد أمله كان في ربنا كبير، صلى صلاة استخارة وخير اللهم أجعله خير شاف منام مفيش أجمل من كدة.. لكن برضه قال يتأكد ان الشيطان مالعبش في المنام كدا ولا كدا عشان يخليه يعمل العملة السودة دي. راح لواحد من المشايخ وحكى ليه الحلم وقاله إيه رأيك يا سيدنا الشيخ؟ الشيخ قاله على بركة الله يا ابني دا منام زي الفل ومعناه ان الجوازة هتمشي عال العال

الواد طبعا لأنه متكلكع ومتعقد في عيشته بسبب انضمامه للي بالي بالك، مصدقش ان الدنيا هتضحك في وشه بالساهل كدة. قعد يفكر في الفروق اللي بينه وبينها وانه ازاي مستواه الاجتماعي أقل منها وازاي يتجوز من برا الجماعة؟ أصل يعني بنات الجماعة دول هيتجوزهم مين لو هو كت وراح اتجوز من برا؟ مصيبة لباقي الأخوة يستندلوا زيه، يبقى كدا الأخوات مالهمش أي أمل في الجواز

المهم الواد قعد يعقد في روحه وضميره يعذب فيه، فقالك أنا استشير حد من الجماعة وأرسيه ع الدور لعل وعسى يطلع انسان ويزيح الهم من على قلبه ويقوله روح يا ابني اتجوز بالرفاء والبنين

وبعت لإخوانجية أون لاين الرسالة الآتية


أنا طالب في آخر سنة طب بشري، ومع الإخوة والحمد لله، لكنني معجب بطالبة، وأريد التقدم لخطبتها رغم وجود عوائق في الأمر؛ أنها ليست أختًا لكنها محترمة، وأنا معجبٌ بها كثيرًا، كما أنني استخرت الله ورأيت رؤيا جميلة في الأمر، وفسَّرها لي أحد المشايخ أنها تيسيرٌ لأمر زواجي، المشكلة الكبرى أنها أعلى مني اجتماعيًّا وماديًّا، أرجو النصيحة، وجزاكم الله خيرًا


شوفتوا حتة "ليست اختا لكنها محترمة " دي؟ البعدا مفهمينه ان الأخوات بس هما اللي محترمات! يادي النيلة.. يعني إيه "لكن" دي والنبي؟ حد يفهمهالي.. أصل اللي الواحد بيشوفه اليومين دول يودي المرستان! نهار اسود! ولكنها محترمة؟؟ إيه؟ هما واخدين توكيل الاحترام ولا إيه؟
ع العموم كويس ان الواد ده عرف ان ممكن تكون واحدة مش من الأخوات ومحترمة برضه.. مفيش حاجة تمنع يعني

كل دا كوم ورد الشيخ عليه كوم تاني.. شوفوا المسخرة اللي جاية دي بقى


الابن العزيز، السلام عليكم ورحمة الله وبركاته..

فلنكن صرحاء مع أنفسنا؛ فإن نفسك تدلِّس عليك الأمور، وأصعب ما في الموقف هو تغطية الأمر بغطاء الدين، رغم أنه لا يوجد حرَج شرعي فيما تفعله، ولكنك تركت الأَولى، والخيار لك، وسأناقش معك الحديث ".. مالها وجمالها وحسبها ودينها تربت يداك":

أولاً: بالنسبة للدين: فأنا أرى أنه توجد أمور يجب استيفاؤها:

1- الالتزام بالزي الشرعي الذي لا يصف ولا يكشف ولا يشفّ؛ فهل هي كذلك أم لا؟ أجب أنت ولا ترسل لي الإجابة.

2- احترام الإسلام وحبه والاستعداد للتضحية من أجله خلال مسيرة الحياة؛ فهل ناقشتَها في ذلك واطلعت على أفكارها وعواطفها؟ هذا أمر لا بد من فعله.

3- الأخلاق العامة ومراعاة الأعراف؛ من حيث الحشمة والحياء وعدم الاختلاط بدون سبب وترك الابتذال والإسفاف.

4- يجب أن تقيس دينها على أمور محددة وليست عامة، وسؤال لا أجد له إجابة: لماذا لم تتوجه بعواطفك تجاه الملتزمات ومن سيتزوج بناتنا وأخواتنا إذا تركهم الإخوة؟!

ثانيًا: بالنسبة للجمال: الجمال ومقاييسه هي أمور نسبية تختلف من شخص لآخر ومن بيئة لأخرى، والجمال والقبح بعد طول العشرة يتقاربان وتبقى أخلاقها وطباعها وروحها، ويحك ماذا تفعل إذا كانت جميلة وسيئة الأخلاق والطباع أو ليست سيئة لكنها لا تتوافق معك؟ لحظتها ستتنازل عن جزء من شخصيتك وكرامتك حتى تستمر الحياة!!.

اسمع يا بني.. إذا التزم الطرفان بالسكن والمودة والرحمة فسيولد الحب وينمو؛ سواءٌ كانت جميلة أم غير جميلة.

ثالثًا ورابعًا: الحسب والمال.. وأنت تقول إنها أعلى منك في المستوى الاجتماعي والمالي، والفقهاء في جميع المذاهب اشترطوا التقارب والكفاءة؛ فكيف سيكون موقفك مع أهلها؟ ألم تفكر في هذا؟!!

تعليق أخير:
الحلم الذي رأيته هو حديث نفس محض، ولا دخل أبدًا لكونه رؤيا شرعية أو بشير، لماذا لم تضع الاحتمال الأول وتسارع إلى الاحتمال الثاني؟ وكما جاء في حديث الرؤيا "أنها إما حديث نفس وإما من الشيطان وإما من عند الله"، فسارعت للاختيار الثالث لأنه يناسب هواك.

نصيحة أخيرة.. أطلب منك تأجيل التفكير في هذا الأمر والالتفات في هذه اللحظة إلى ما هو أهم منه؛ ألا وهو الانتهاء من دراسة الطب بإتقان.. حضرتك تارك الجراحة والنسا وملتفت إلى الحب والغرام، أرجوك يا ولدي الحبيب اخلص من الدراسة وبعدين نتكلم، والسلام عليكم ورحمة الله


اللي تعرف واحدة مش عارفة تتجوز عليها وع الراجل ده..

شوفتوا بقى الآنسات الاخوانجيات بينضموا للجماعة ليه؟ هو دا طريقك لبيت العدل يا أوختشي.. هتطلعي بعريس مية المية. مش مهم الجمال ولا الفكر ولا العلم ولا الثقافة ولا التدين العام.. تدين عام دا إيه؟ حد فاضي يبقى متدين بجد؟ هما كلمتين في حاجات محددة وتبقي تمام التمام.. تاخدي لقب "أخت" من هنا ومعاه العريس طوالي

الأخوة دول بدل سلموا دقنهم للجماعة يبقوا يستاهلوا اللي يجرالهم.. أوعي ضميرك يأنبك ولا تقولي دا مش متجوزني عن حب ولا الكلام الفاضي دا.. عينك على الهدف يا أوختشي.. دي جماعة بتاعة مصالح، وكل واحد يشوف مصلحته

وبعدين الواد الاخوانجي دا المفروض يزهد في الدنيا ويتلهي على عينه.. احترام إيه وجمال إيه وحب إيه ونيلة إيه على دماغه؟ ما يروح يتلهي في خيبته ويخليه في جماعته و خدمة اهدافها المهلبية.. والجواز من الأخوات دا فرض عين عليه لمؤاخذة.. هو دخول الحمام زي خروجه ولا إيه؟ هنهزر؟ الجماعة والعروسة شروة واحدة ومفيش نقاوة لمؤاخذة.. أهو الراجل قالهاله أهه بالفم المليان.. مين هيتجوز بناتهم لو محدش قام بالعمل الانتحاري ده؟ لازم رجالة الجماعة يفدوها بالروح والدم.. فين الانتماء؟ لا لا لا.. الجماعة باظت يا رجالة وفيه ناس بيتمردوا على التضحية في سبيلها

شوفت بقى يا فتك؟ مبروم على مبروم ما يلفش.. انت عقدتها على نفسك وهما جابولك ضلفها خالص عشان تستريح يا موكوس. عامللي فتك بسلامتك ورايح تقول للراجل صليت صلاة استخارة وسألت شيخ؟ اديك طلعت انت والشيخ بتاعك ما بتفهموش حاجة.. وصلاة الاستخارة بتاعتك أي كلام و"نفسك بتدلس عليك".. خد بالك انه مااستجراش يقول للناس إن صلاة الاستخارة ممكن يتدخل فيها الشيطان.. صلاتك انت بس لوحدك يا فاسق يا ابو عين زايغة ياللي اتجننت في مخك وعايز تتجوز واحدة من برا الجماعة هي اللي فاسدة زيك.. اتلموا بقى عيب عليكم. عامللي روميو ياخويا وعايز تحب وتتجوز زي الناس؟ أهو قفلهالك من كل ناحية يا خفيف.. صلاتك غلط، وتفسير منامك غلط، وانت أصلا كلك على بعضك غلط، وحتى لو شروط التدين والاحترام والاحتشام كلها موجودة في البنت لازم شروط محددة مش موجودة غير في الاخوات الشمبنزيهات.. يا ابني الجمال فاني يا ابني.. انت عايز الجمال تهبب بيه إيه في حياتك السودة؟ ما تاخد واحدة موكوسة زيك بدل ما توكس بنات الناس معاك.. تصدق أنا فرحانة فيك.. اللهم لا شماتة يعني.. لكن بجد تستاهل

صحيح رزق الأخوات ع المجانين

35 comments:

أنا حر said...

بجد اللي بيحصل ده كتير قوي
يعني ايه البنات المحترمة هما بنات الاخوان بس ويعني ايه الجواز يتم عن طريق شيخ الجماعة ؟؟؟
هي الاخوان بقت جمعية لجواز البنات والشباب ولا ايه؟؟
عيب عليكم انكم تتكلموا عن حاجات بعيدة عنكم خالص وهي التدين والاحترام والالتزام لأننا كلنا عارفين مين هما الاخوان بالظبط
تحياتي

رئيس جمهوريه نفسى said...

بصى يا فنتازيا فتوى زى دى مش مستغربة لاحظى الاول اسم الجماعة ( الاخوان المسلمين )
طيب انا مش عضو جماعة هل انا مش مسلم طب وبعدين حكمى اية دلوقتى
الحاجه التانيه انا حسيت بالحسرة اة والله بالحسرة على انسان المفترض انة طالب طب يعنى فى حكم مجتمعنا من النخبة واكيد عبقرى وجاب 100% فى الثانوية العامة ومش عارف يقرر حاجة فى موضوع يمس مستقبلة وبينتظر استشارت الجماعة فى موضوع خاص بية
وشيخ الجماعة الى المفترض انه بيحكم على اسلوب دينى لا شاف البنت ولا عرفها ولا اتكلم معاها ولا شاف شكلها وبيقولة انت ليه ما اتجهتش للملتزمات يعنى حكم وهو قاعد مع نفسة وقال على البنت مش ملتزم
والشيخ بيقولة لماذا لم تتوجه بعواطفك ؟ عايز اعرف الريموت كنترول بتاع العواطف ده نزل امتى علشان اشترى واحد لعواطفى اذا كان الرسول علية الصلاه والسلام قال
(اللهم إن هذا عدلي فيما أملك فتجاوز عما لا أملك وتملك )
فالرسول عليه الصلاه والسلام كان قادر على العدل المادى اما العدل العاطفى والميل وتفضيل واحده على الاخرى لا يملك
--------------------
مجمل الى حصل ده عادى لانى الشباب دول بيتعمل ليهم غسيل مخ علشان يفضلوا يستقوا اراءهم من منبع واحد بس فكر الامام حسن البناء واى فكر يعاديه غلط فبالتالى مش غريب انهم ميعرفوش يقررو فى ظل سياسة الامر والطاعة

صباح الخير يا مصر said...

فانتازيا كمان وكمان
*********************
دون الدخول فى تجريح و تعميم فى الحكم على الاخوات انهم دخولوا الجماعه عشان يتجوزوا و الى آخره من هجوم على فتيات اخترن هذا الطريق ظنا منهم انه الطريق الصواب....لانه فى حالة التعميم ان كل المحجبات او الاخوات لهم هذا الغرض من دخولهم فى الجماعه.....فيكون التعميم من قبلهم ان غير المحجبات خارجات عن الدين و انهم غير متدينات فيكون نفس منطق الاتهام و التهكم من الطرف الاخر
ورأيى.. ان الاختيار للزواج غير مرتبط بان تكون الفتاه محجبه او غير محجبه و لكن لابد من وجود الاساسيات من حيث الالتزام و التحشم و لو غير محجبه وكذا الاخلاق و اسلوب التعامل مع الاخريين و التكافؤ و الى آخره
فخيرا للمرئ ان يكون نجارا يصنع من الخشب الاشياء المفيده....والا يكون خبازا يقذف بالاخشاب داخل النار لحرقها

اشكرك و تحياتى

Egyptian Feminist Chic said...

allah yegazaaeky ya fanta :) :) :) ana 2a3da fee makan 3aam we 3amala ad7ak besoot 3aly... kol elnas betetfarag 3alaya delwa2ty. LOL


I love your view on the whole matter :) truly hilarious!! I gues i guess this can be expected !! it is just another way for them to control the poor guy's life completely....

MerMaid said...

ربنا يشفي

لا بجد الشيخ فظيع

حضرتك تارك الجراحة والنسا وملتفت إلى الحب والغرام، أرجوك يا ولدي الحبيب اخلص من الدراسة وبعدين نتكلم،

خير يا ولاد؟؟؟

Wandering Scarab said...

Fantasia..

This post is hilarious.

So according to those trifling and insignificant retards, only women from the stupid ekhwan group are respectable!?. It's alarming that they want to get married and reproduce. We could be in trouble. I think we should stop feeding the trolls.

Samir Saad said...

ليه الناس محتاجة فتوى قبل كل صغيرة وكبيرة؟ بصراحة الهوس الديني وصل لدرجة الغباء والفشل العقلي. الناس دي هتدفع ثمن غفلة العقول بتخلف العقود القادمة. مش عايز اقول انه مفيش امل من الناس دي.
تحياتي

Hoda said...

عوداً حميداً ، نورت يا قمر البلوجرز كلهم، لا بجد عندك اسلوب ساخر فى سرد الاحداث فظيع ، والله يا فانتا انتى ممكن تكتبى سيناريوهات افلام كوميديه ، حتبقى الافلام دى مسخره طحن ... عسل عسل بجد دمك شربات ...نيجى بقى لموضوع اخينا المحتاس دا لكن العيب بيرجع على الدكتور اللى عامل نفسه مستشار نفسى، بقى والنبى في مستشار يبقى بالهيافه والسطحيه دى فى ردوده، يعنى ايه لو ما كنش الاخوه اللى يتجوزوا الاخوات يبقى مين اللى يتجوزهم يعنى هما شربة زيت خروع مثلا ولا اوفر ياخذ اتنين وعليهم واحده هديه ، ايه الكلام العبيط دا والله الناس دى خلت شكلنا وحش قوى ، وانه مش عارف انه بالتصنيف اللى بيعمله دا أن الاخوات بس اللى محترمين واللى دون ذلك يبقوا مش محترمين دا كده بيعمل فتنه وبيجبر الطرف التانى انه يقول انهم بينضموا بهدف الجواز علشان مش لاقيين او يوصفهم بشمبانزى بيقلد وخلاص ومش فاهم حاجه ودا تطور طبيعى للامور. يبقى الراجل دا لا يصح انه يكون مصدر للفتوى ولا الاستشاره من اى نوع كفايه اصلا تفكيره العنصرى دا اللى بيكره الناس فى بعض ’وبيشجع على الانفصال وعمل تكوينات وتحزبات ونتشيع بقى وتبقى مصيبه وكل واحده تتصنف بقى وهى ماشيه دى ملتزمه ودى محترمه ودى اخوانجيه ودى اخوانجيه بشرطه وهى الحكايه مش ناقصه شد وصراعات كفايه اللى حاصل ، لو عايزين يناقشوا امورهم الخاصه دى يبقى بينهم وبين بعض فى الاماكن المخصصه ليهم مش ينشروها على الملىء فى مواقع يستفزوا بيها الناس ويعملوا فتنه بقى فى الخطوه الجايه، حقيقى اى حد لازم يضحك لما يقرا الكلام دا ويتحسر على الحاله اللى وصلنالها اننا فى ادق شئون حياتنا مش عارفين ناخد قرار بنفسنا ومترددين وخايفين والنبى ازاى البلد دى هتتقدم وشبابها مهزوز وتايه كده .. الله يكون فى عونا

ابو احمد said...

انا ياريتنى اعرف البنت
عشان أقولها اوعى تتجوزى انسان يعتبرك متاع لايحترم انسانيتك ومستعد انه يتجوز عليكى فيه ناس بتعتبر ده سنه واجبه او مستحبه التنفيذ
اختارى انسان يحترم عقله وعقلك
الجواز والحياه المشتركه بشكل عام لاتخلوا من المشاكل لكن لما الاثنين يكونوا بيحترموا ويقدروا بعض المائل والمشاكل بتعدى بسلام
بلاش يابنتى الطيب أحسن

ابو احمد said...

يابنتى ده واحد طالب فتوى فى حاجه لايفتى
فيها الاالانسان نفسه
هيحول حياتى لجحيم يااما تبقى مسخ زى بقيه المسوخ اللى بنشوفها

Desert cat said...

الواد يا عين امه عمل كل العمايل دى علشان عايز يخطب من بره الجماعه
طيب ماهو الشيخ عنده حق الاخوات مين يتجوزهم
اللى متخفيه ورا حتة قماش محدش عارفها شيه عبدالجبار ولا اسماعيل يس حتى مشني يتجوزها؟؟؟
يعنى البنت تكتم نفسها وتزهد فى الدنيا علشان الرس وهو يروح يتجوز من بره الجماعه هو الواد ده صبأ
الويل ثم الويل له
هو يلتفت لدروسه الاول ويدرس طب النسا والجراحه ويتجوز اى مخبر ياذنوا له بيه كبارات الجماعه
بلا قلة ادب عيال

Fantasia said...

الاستاذ العزيز أنا حر

شوفت يا عزيزي؟ ها هو الخطاب التحريضي يظهر بزيه الجديد
يعني مش كفاية ان كلنا مشكوك في دينا وأخلاقنا, لأ كمان مفيش حاجة اسمها بنت محترمة وتصلح لتكون زوجة صالحة إلا من بنات الجماعة وبس! تخيل مدى التشوه! طب إيه الفرق بينهم ومن جماعات التكفيريين عايزة أفهم
قولنا كدا قالولك لأ, جماعة التكفير والهجرة دي مالناش دعوة بيها.. يا عم ما هو اللي عملها كلهم من الاخوان, يقولك كانوا وانشقوا.. انشقوا دي معناها إيه طيب؟ يعني لو شقيت بطيخة, يبقى ناحية منها بطيخة والتانية عنب بناتي مثلا؟ ما هي نفس البطيخة

خالص تحياتي

Fantasia said...

الاستاذ العزيز رئيس جمهورية نفسي

ضحكتني والله.. بقى اللي جايب 100% في الثانوية العامة في مصر يبقى عبقري ومن النخبة كمان؟ يا سيدي ما كله بياخد دلوقتي فوق ال95%, أنا ما سمعتش حد جاب مجموع أقل من كدا من يجي خمس سنين.. دا على كدا الجيل اللي طالع كله عباقرة بقى
حضرتك عارف ان فيه طلبة كتير بياخدوا 102 و104%؟ تخيل مدى العبقرية بقى! دا اينشتاين جنبهم يبقى فاشل.. نسبة مالهاش وجود في العالم أصلا! والله لو قولت الكلام دا لحد في دولة متقدمة هيفتكرها نكتة ومش ممكن يصدقك
والنكتة الأكبر هي ان أكبر معاقل لانتاج شباب الاخوانجية هي كليات الطب والهندسة, اللي المفروض ما بيدخلهاش غير العباقرة دول! طب دا يقول إيه؟ العيال دي أكتر عيال جاهزة لغسيل المخ بتاع الاخوان, لانهم أكتر عيال بيعتمدوا على الحفظ من غير فهم.. شربوا من نظام التعليم الفاشل حتى الثمالة, ونجاحهم الباهر فيه معناه انهم وصلوا لقمة التألقم معاه.. خدوا شهادة "أنا بغبغان" بامتياز مع مرتبة الشرف

أنا مش مستغربة ان الواد في كلية الطب على فكرة.. دي أكتر حاجة منطقية في القصة كلها. كليه الطب دي كانت زمان.. دلوقتي بقت دكان للحصول على لقب دكتور

ريموت كنترول المشاعر بتاعة الاخوانجي في يد الجماعة برضه, زي ريموت التفكير وريموت التدين وريموت الكلام وريموت الأفعال.. الاخوانجي دا عبارة عن آلة, فقد انسانيته يوم انضمامه للجماعة, وإذا حن لها تم تعنيفه كما رأيت وادخاله في القطيع مرة أخرى

خالص تحياتي

Fantasia said...

الاستاذ صباح الخير يا مصر

لا أعلم ما دخل الحجاب فيما نتحدث فيه, وإنما منطقك سليم اذا استبعدنا الأمثلة المستخدمة

لا يوجد وجه واحد للحقيقة.. وممكن رؤية المثال الذي استخدمته حضرتم بوجهة نظر مغايرة.. فمثلا النجار بيقضي على الخضرة والطبيعة ليصنع دولاب أو سرير.. والخباز بيقذف الأخشاب في النار ليصنع طعاما للناس يتقوتون به.. الأحادية في الرؤية والحكم لا تصح

أنا هنا لا أسخر من أشخاص, بل انتقد سلوكيات وأفعال وأفكار خاطئة, وهذا حق أصيل لي كفرد من أفراد هذا المجتمع

موضوع دخول المحجبات في الجماعة دا أنا أول مرة أسمع عنه الصراحة.. يعني حضرتك عايز تقولي ان كل المحجبات ينتمون إلى جماعة الاخوان المحظورة؟.. لو كنت تعتقد هذا فأؤكد لك أنها معلومة عارية تماما عن الصحة, فمعظم قريباتي وزميلاتي وجيراني هن من المحجبات وجميعهن ضد أفكار هذه الجماعة المسمومة وينتقدونها بلذاعة أحد من التي أستخدمها في كتاباتي الساخرة

خالص تحياتي

Fantasia said...

Dear EFC,

Thanks for this comment which brought a wide smile to my face :)Sorry to cause this embarrassment..lol. Reading this blog's posts in public may not be easy. It's my outlet as you see, and here I unleash all my sarcasm as a means of coping with our morbid reality nowadays.

You're absolutely right. They are seeking total control over those miserable guys, and on the other hand, these guys are surrendering and even seeking after it. I believe their upbringing had a major role in making them always expect an outer authority to design their lives. It's so sad

Fantasia said...

العزيزة ميرميد

شوفتي؟ اكتشف إذ فجأتا بعد كل الرغي ده إن الواد لسة بيدرس!.. قالك أنا عشان أقفلهاله خالص أملصله ودانه عشان سايب مذاكرته وقاعد يحب
دا كان ناقص يقوله هات عنوانك عشان آجي بنفسي أبوظلك الجوازة
الصراحة الراجل عمل كل حاجة في سبيل منع المصيبة دي. والله ما جصر

خالص تحياتي

Fantasia said...

Dear Abominatrix,

Glad you liked this post. A few laughs can ease the drama, you know.

We ARE in big trouble already.. now how about them reproducing! I can't imagine what this country would face in as short as 10 years time!

Just as I was thinking that things could not get worse, this idea hit me.. Most of them believe that means of birth control are haram!

على باب الله said...

نفهم من الكلام الكبير ده أنه ناوي يتخصص ( نسا و ولادة ) إن شاء الله
---

Alkomi said...
This comment has been removed by the author.
Fantasia said...

الاستاذ العزيز انوسنت

فيه نسبة منهم بالفعل مافيش فيها أمل. العيال دي زيهم زي اللي عنده استعداد فطري للاصابة بالمرض النفسي, لما بتحطوا في بيئة وظروف تشجع المرض النفسي على الظهور والتحكم فيهم بيتحولوا لمرضى بالفعل. الماسيف هيستريا دايما تصيب المجتمعات المتخلفة واللي فيها جماعات متطرفة زي الاخوان وغيرهم

الواد ده هيبقى زي الدكاترة اللي بيبعتوا أسألة في صميم عملهم لقناة إقرأ والمشايخ الدجالين اللي بيفتوا في كل حاجة. والله قلبي بينفطر لما ألاقي دكتور طالب فتوى يعمل عملية ولا ما يعملهاش, يصارح المريض بمرضه ولا لأ.. وكأن كل اللي اتعلمه رماه في الزبالة. دا فيه دكاترة نسا دلوقتي ما بيرضوش يوصفوا موانع للحمل! تخيل الكارثة اللي بقينا فيها

خالص تحياتي

Fantasia said...

العزيزة حنين

شكرا يا قمر.. انتي اللي شجعتيني أرجع والله.. أنا كنت في حالة اكتئاب بشعة بسبب اللي البلد وصلت له. موضوع الثانوية العامة والحديد دا كمان جه وزاد الطينة بلة. كله زفت.. والبرلمان زفت والمعارضة كمان زفت.. مفيش حاجة عدلة
نفسي في بارقة أمل يا ناس.. أي حاجة تحفزني عشان أشتغل وأكتب
تفتكري لو كتبت أفلام كوميدي الناس هتتعلم منها حاجة؟ ولا هيكركعوا ويطلعوا م الفيلم زي ما دخلوه؟
يعني الواد اللي بعت الرسالة الهوزوء دي والمستشار البتنجان اللي رد عليه الرد المنيل ده هيحوق معاهم فيلم؟ دول لو ضحكوا بيستغفروا ربنا كأنهم ارتكبوا خطيئة
جيل جديد إيه والنبي وشباب إيه اللي هيبني مصر ويشيلها من البلاوي اللي هي غرقانة فيها وهو مش عارف ياخد قرار في حياته الشخصية؟ لأ وكمان تصوراته عن الواقع كلها تشوهات
أووف.. الواحد زهق وجاب آخره الصراحة
مش عايزة أيأس.. لكن بجد ابتديت أفقد الأمل في امكانية التغيير للأفضل

خالص تحياتي

Fantasia said...

الاستاذ العزيز أبو أحمد

حاجة تحزن والله.. أنا قولت أقلب الموضوع فكاهي بدل ما يبقى غم في غم
شباب ممسوح العقل والشخصية وعديم القيمة. فعلا البنت اللي هو معجب بيها دي ربنا بيحبها انها فلتت من جوازة مهببة

بمناسبة موضوع تعدد الزوجات.. هل حضرتك شوفت قناة "المسيار" الفضائية؟ شيء يصيب بالغثيان والاشمئزاز.. دعارة عيني عينك.. لأ وأحلى حاجة فيها إنها دعارة شرعي, الاعلانات فيها تبدأ ببسم الله الرحمن الرحيم والسلام عليكم ورحمة الله, بعد كدا بقى كلام قمة في السفالة والانحطاط.. رجل متزوج يبحث عن سيدة في الثلاثين بيضاء ممتلئة الجسم مطلقة أو أرمل.. المفروض انه هيتجوزها كام يوم يعني والمهر دا تمنها وعادي مراته ما تقدرش تفتح بقها
والستات طبعا برضه حاطين اعلانات بنفس المنظر, لكن المواصفات كلها لها علاقة بقدرة الراجل المادية, واللي الطلبات عليها كتير تاخدهم بالدور
بجد يعني حاجة تخلي اللي بيتفرج تنبتله قرون وهو قاعد
نفسي أفهم عايزين العالم يحترمنا بأنهي وش

خالص تحياتي

Fantasia said...

العزيزة قطة الصحراء

فطستيني م الضحك.. افتكرت فيلم الارهابي لما الأخ علي وعدوه بأخت وزعل أوي انها اتجوزت ووعدوه بواحدة تانية
صحيح تفرق إيه؟
أهو يشيل اللي عليها الدور وخلاص
حسرة عليكم يا شباب مصر

خالص تحياتي

Fantasia said...

الاستاذ العزيز على باب الله

لأ نفهم من الكلام ده انه هيتخصص في أطفال الأنابيب

خالص تحياتي

Fantasia said...

الاستاذ محمد الكومي

يا عم ما انت عارف اني رافعة شعار مدونتي جميلة نظيفة متطورة
أديك عبرت عن نفسك أهوه وفشيت غلك
أمسح التعليق انت بقى
واكتب تعليق تاني

هي حاجة تفقع المرارة بس لازم نتحكم في أعصابنا شوية.. لسة التقيل جاي قدام, الحق من دلوقتي شوفلك مرارة استبن

خالص تحياتي

Alkomi said...

فانتازيا
فعلا سوري كتير عالكومنت

و على فكرة انا ماعرفش ان اليبلوج نظيف جميل متطور صدقيني ماعرفش
و كمان انا مش بكتب كدة الا نادرا خالص برضه

بس بصراحة ده اللي في نفسي و قلته و حاولت امنع نفسي كتير ماعرفتش

يالا

الله يحرق اللي كان السبب

Migo Mishmish said...

منك لله يا شيخه انتي والقطة وبقيه شله الانس يا ناااااااااااس عايزة اشتغل تدويناتكم جميله وانا مش بعرف اخش غير من الشغل. ومش عارفه اكمل شغل غير لما اقول اللي في نفسي
بركة يا جامع. يا ستي احسن انه مش هيتجوز من برة الجماعه. كويس ان عندهم فكر العزل ده علشان ما يعدوش بقيه البني ادمين
ده واد معقد مقضي طول عمره مزنوق. كل حاجة حرام لما فاضل انهم يقولوهم ان يدربوا نفسهم على انهم ما يتنفسوش كتير علشان في كفار بتنفسوا الهوا وميصحش للاخوة انهم يتعاملوا مع الكفار
مش حرام البت. من الوصف باين انها بنت ناس. الواد يا عيني لما حبها والعياذ بالله وحس انه بني ادم راح سيدنا الشيخ الاخوانجي الكبير قاله رؤيتك خرمنت اي كلام في الحمام والظاهر لانها كانت رؤية كويسة انما لو كانت كابوس كان قاله اهو شفت ربنا مخنوق منك والرؤية صحيحه طالما فيها نكد
قام الاخواني الصغير اتلم على طول وعرف ان الرؤية لما تبقى كويسة تبقى من الشيطان. تفتكري لو اتجوز البت ديه هيشغل ايه الصبح اول ما يقوم من النوم. انا وميجو مثلاً بنشغل قناه الموسيقى الكلاسكيكيه لغايه لما نلبس وننزل صحابنا ده هيصحي الغلبانه ديه على شريط عذاب القبر علشان خيالها المريض ما يسرحش في اي حاجة مبهجة وتعرف كدة انها هتعيش حياتها هنا في نكد وبعد ماتموت ان شالله هيجلها عذاب القبر
يا رررررررررررررررررب زهقنا من الغباوة بقه الا متجيش فيهم فره زي بتاعه الفراخ تاخدهم كلهم
يلا اروح اشتغل بقه
Love,
MishMish

عم مينا said...

والله يا فانتازيا
أنا من بعد ما اريت البوست ده ما بقيتش عارف أضحك و لا أعيط

جملة هي مش أخت بس محترمة فكرتني بجملة تانية بيقولها نفس العينة دي من البشر.. فمثلاً تلاقيه بيقولك الدكتور فلان الفلاني ده مسيحي بس كويس هاهاها

Fantasia said...

العزيز محمد الكومي

يا عم فضفض وزيح من على قلبك.. المهم انك استريحت

أنا عارفة اني مش رافعة الشعار على باب المدونة، أصلي مش عايزة أعمل فيها أبلة الناظرة يعني

منور

Fantasia said...

العزيزة مشمش

والنبي انتي شربات.. معلش بنعطلك عن الشغل، بس أهو لازم ننفس مع بعضينا بدل ما نطق بعد الشر

بقى بتسمعوا محطة الموسيقا الكلاسيكية؟ خسئتم!! يا ريت مزيكا شرقية، كان يبقى فيها كلام، لأ كمان مزيكا بتاعة الغرب المنحل! يعني مش مزمار شيطان محلي، لأ شيطان مستورد كمان.. أهي دي مش محتاجة فتوى. وكمان مش عاجبك شريط عذاب القبر؟.. ويحك يا امرأة.. يعني عايزاه يسمعها شرايط عن الجنة ولا عياذ بالله؟

أنا برضه فرحت للبنت اللي فلتت من المصير الاسود ده الصراحة. أهي دي أكيد فعلا محترمة وربنا بيحبها

خالص تحياتي يا قمر

Fantasia said...

العزيز عم مينا

لأ اضحك ارجوك.. مش ناقصة نكد.. كفاية اللي بنشوفه
أنا كتبت البوست ده عشان نفرفش مع بعضينا قبل وصلة النكد اللي جاية

نفسي أفهم انت ازاي وصلتلك "مسيحي بس كويس" دي؟ دا فيه حد فتان غيري بقى

يا سيدي عادي.. مش اخت لكن محترمة، مش محجبة لكن اخلاقها عالية.. عادي.. كلنا في الهم سوا

خالص تحياتي

أشرف حمدي said...

"والفقهاء في جميع المذاهب اشترطوا التقارب والكفاءة؛ "

مثلا يعني ، يعني مثلا تعالوا نعلق على جملة عبيطة من بين مئات الجمل

دي معناها بقى إن النبي محمد نفسه مش ماشي على الشريعة الإسلامية عشان اتجوز خديجة اللي أغني منه بمراحل وأكبر منه في السن

وحلوة قوي قوي حكاية توكيل الإحترام دي
ليست أختا ولكنها محترمة
ياللهول ، يا للعجب العجاب
أهذا صحيح يا إبن أبي فلزعة ؟ ليست أختا ومحترمة
ناقص تقول لي مسيحية ولكنها ليست عاهرة

هي البلد ناقصة هبل ؟
الله يرحمك يا مصر

Fantasia said...

الأستاذ أشرف حمدي

آسفة على التأخر في الرد.. معلش كنت في فترة نقاهة كدة.. ماهو لازم نطلع فاصل كل شوية لحسن نطق.. وأنا الصراحة عايزة أكمل المسيرة

حضرتك عندك حق في كل اللي قولته.. لكن اللي ما يتسموش عمرهم ما فكروا ولا عمرهم قعدوا يفندوا الكلام اللي شيوخهم وقادتهم بيقولوه لأن المبدأ عندهم السمع والطاعة. هيفتح بقه هينطرد من الجنة وقتي

سعيدة بمرورك وأرجو دوام التواصل

خالص تحياتي

مريم said...

البوست تحفة بس المشكلة ان اهلي افتكروا اني اتجننت لما سمعوا صوت ضحكي اصلي من زمان ما ضحكتش من قلبي انتي دمك خفيف و روحك حلوة .
ميرسيه على شوية الضحك دول

Fantasia said...

العزيزة مريم

بتشكريني على إيه؟ أنا معملتش حاجة ولا كنت قاصدة يكون دمي خفيف. دي كوميديا الموقف اللي بيقولوا عليها.. شر البلية ما يضحك

تحياتي