Thursday, February 28

الاخوان الخرعين اللي مش منتحرين

قياديون في الإخوان: لن نخوض الانتخابات الرئاسية المصرية حتى لو حصلنا على الشروط القانونية

القاهرة: عبد الستار إبراهيم وعبده زينة

بينما أكدت جماعة الإخوان المسلمين في مصر أمس أنها لن تخوض الانتخابات الرئاسية «حتى لو حصلت على النصاب القانوني للترشح قبل عام 2011»، موضحة على لسان نائب مرشدها العام، الدكتور محمد حبيب، أن «ما يهم الإخوان في المرحلة الراهنة هو العمل مع الجماهير لتكون قادرة على التغيير، واختيار من تريده لحكم البلاد بإرادتها»، قال أحد أعضاء كتلتها النيابية في البرلمان، النائب صبري عامر: لا نريد الرئاسة ولسنا مستعدين لها معتبرا من يخوضها «انتحارياً».

وحول التخوف من اقتراب الجماعة من تحقيق ثاني شرط من ثلاثة شروط دستورية للدفع بمرشح لها لخوض أي انتخابات رئاسة مقبلة، حال فوزها بـ140 مقعداً في انتخابات المجالس المحلية المقرر لها شهر أبريل (نيسان) المقبل، قال «عامر» إن الإخوان لن يتقدموا لانتخابات رئاسة الجمهورية، و..«لسنا مستعدين لهذا الأمر، ولا نريده،
لأن مَن يتحمل مسؤولية البلد (مصر) في هذا الوضع، يكون منتحراً.... نحن، في هذه الفترة، نقف موقف المعارض المسالم الناصح..».

وعن السبب وراء إعلان الجماعة خوض الانتخابات المحلية إذا كانت لا ترغب في الوصول إلى الحكم، قال «عامر»: «سبب مساهمتنا في الانتخابات المحلية هو لأنه: لا يصح أن نترك الساحة».

ويخوض مرشحو الجماعة الانتخابات تحت لافتة «مرشحون مستقلون». وبدل تعديل دستوري اقترحه الرئيس المصري حسني مبارك عام 2005 وأُقرَّ في استفتاء عام، طرح نظام اختيار رئيس للبلاد من الاستفتاء على اسم واحد يختاره البرلمان، إلى المنافسة في انتخابات عامة من بين أكثر من مرشح. لكن جماعة الإخوان، التي لم توافق على صياغة التعديل في حينه، قالت إنه (التعديل) يضع شروطاً صعبة أمام المرشحين المستقلين الذين قد يرغبون في التقدم للمنافسة على منصب رئيس الدولة. وبحسب التعديل الدستوري فإن الإخوان، الذين فازوا بـ88 مقعداً في مجلس الشعب (المجلس الأول في البرلمان) الحالي يحتاجون، على الأقل، إلى تزكية من 140 من أعضاء المجالس المحلية في 10 محافظات (قد يحصلون عليها في انتخابات أبريل المقبل)، و25 عضواً بمجلس الشورى (المجلس الثاني في البرلمان، ولا يوجد لهم أي نائب فيه، وانتخاباته المقبلة عام 2010)، و65 عضواً في مجلس الشعب (وهو شرط متحقق حتى الآن).

نقلا عن جريدة الشرق الأوسط
.............................................

الله يخيبكوا يا بعدا! لما انتوا مش قد المسئولية وعارفين انكم متقدروش تصلحوا حال البلد ولا زفت, قارفينا ليه معاكم وعمالين تتكلموا عن حال البلد والديموقراطية والاصلاح والاسلام هو الحل والحجاب هو الحل لغاية ما طهقطونا في عيشتنا؟

نعم يا خويا؟ دوركم تقفوا موقف الناصح ولا موقف أحمد حلمي؟ إيه النطاعة دي؟ ناصح ايه؟ هتنصحوا مين ان شاء الله؟ تنصحونا احنا ولا تنصحوا النظام؟

آه يا شوية مرتزقة يا بتوع التلت الورقات.. منكم لله.. بوظتوا السياسة وبوظتوا الدين وبوظتوا سمعة المصريين

لما انتوا معندكوش حاجة تعملوها, ومستصعبين مشاكل البلد أوي وعارفين انكم ما تقدروش تحلوا حاجة.. لأ وكمان بالنسبالكم تحمل مسئولية مصر دا عمل انتحاري!!.. قارفينا ليه وداوشين دماغنا ليل نهار؟ طلعنا احنا اللي شعب وحش واخلاقه فاسدة ومش عارفين دينا ف الأخر؟ وانتوا بقى اولياء الله الصالحين؟ انتوا بقى الخلفاء غير الراشدين؟ تقعدوا توعظوا فينا وتفرقوا بينا بالفلاية بتاعتكم وخلاص؟ دا اللي ربنا قدركوا عليه؟

طب لما مسؤلية مصر صعبة أوي عليكم وعمل انتحاري, وانتوا طبعا خايفين على نفسكوا يا أمامير يا ننوس عين مامتك منك ليه.. أمال مين الانتحاري اللي هيتحمل مسؤلية البلد؟ أروح أنا طيب؟ هتسيبوني طيب؟ ولا هطلعوني كافرة وفاسدة ومنحلة وانتوا قعدين على دكة المتفرجين عشان تنصحوني يا حلوين؟

يخرب بيت كدة.. ويخرب بيت أبو الزمن الاسود اللي خلاكوا تتنططوا على رقبينا. دا ايه الهم دا يا ربي؟ فيه كدة ف الدنيا بالذمة؟ ناس متخاذلة وجبانة وقمة ف الانانية والاستغلال اللي ربنا خلقه, ويقولولك احنا المسلمين ومفيش مسلمين غيرنا.. اوعى يا كافر منك ليه عشان نحكمكم.. يلا ادونا اصواتكم يا بقر ف مجلس الشعب والمحليات والنقابات عشان نلبسكوا السلطانية ف الاخر ونطلعلكوا لسانا. صحيح ان لم تستح فافعل ما شئت. هأقول ايه؟ هي الندالة طبعكم ولا هتشتروه؟ دي ف دمكم لمؤاخذة

ما تتركوا الساحة للي قلبه ع البلد ومستعد ينتحر عشانها يا خرع منك له؟ ما تخلوا عندكوا شوية دم وتبطلوا مزايدة فارغة واستغلال للدين ياللي بتاكلوا على كل الموائد.. إشي تمويل بالجنيه, وإشي تمويل بالريال, وإشي تمويل بالدولار

دول عاملين فورتينة مع النظام كجزء من تسليك حالهم. اسمهم المفروض يكون "الاخوان المنتفعون".. عايزين أي حاجة يطلعوا بيها والسلام. عاملين زي الجراد. تمويل وتبرعات بالجنيه من الداخل, رضا.. تمويل بالريالات, قشطة.. تمويل بالدولارات, معدن.. امتيازات وتسهيلات من الحكومة, وماله.. صفقات واتفاقات مع النظام, عز الطلب.. صفقات مع المعارضة, ما يضرش.. شغل جلا جلا على المنظمات الدولية, يا عيني عليه.. واللستة طويلة, وأهو كله سبوبة ومصلحة

نفسي افهم السيد عاكف دا بيجيب بدله الشيك دي منين؟ هو البعيد بيشتغل ايه؟ يعني بياخد مرتب كام؟ ومنين؟ وف مقابل ايه؟ ف مقابل انه يعمل مؤمرات يعني ولا انه يطلع يغني علينا ف الفضائيات كل شوية؟ بجد عايزة اعرف ازاي الناس مش شايفة ان الجماعة المحظوظة دي عبارة عن عصابة؟ يعني غسيل الاموال اللي بيعملوه ده كله مش ممكن هيغسل كل فلوسهم اللي معروف مصدرها كويس. واضح للأعمى حتى ان الفلوس اكتر بكتير من المصادر المعلن عنها. دول كانوا عاملين مؤتمر صحفي ولا بتاع البيت الابيض. وكلهم لابسين بدل مستوردة ونضارات فيليب شاريول وسبح باحجار كريمة ما شاء الله. طب منين كل ده؟

وبعد كدة يقولولك يا حرام دول بيعتقلونا, دا احنا مدتهدين. طب يا ربت نبقى احنا كمان مضطهدين لو الاضطهاد بيجيب دا كله. حد طايل؟ وف الاخر نسلت ايدينا ونقول "لا يا عم, مسؤلية مين؟ دا احنا حلوين أوي كدة بالصلاة ع النبي.. خلينا نتفرج واللي يعمل حاجة مش عاجبانا نحدفه بالأوطة" دا ايه الهنا اللي انتوا فيه ده؟

المشكلة ان الواحد عنده ضمير ويعرف ربنا بجد.. بالكم لو أنا من بتوع الدجل والهجص والضحك ع الدقون, كان زماني بقيت قائدة الأخوات عندكم. السبوبة اصلها كبيرة أوي والواحد حالته ضنك اليومين دول. ما تشوفولنا شغلانة عندكم بس ما يكونش فيها حاجة تغضب ربنا؟ ولا حتى لو فيها, ما انتوا هتطلعوا فتوى تخليها حلال. انتوا هتغلبوا يعني؟

وسلام كبير أوي لعكفكف شيخ المنصر.. تا تاتا ترارتا تاتا

42 comments:

Samir Saad said...

يا فانتازيا الأخوان مايهمهمش مصر. الناس دي بتجسد فكرة غريبة جدا مش عارف إزاي طرأت على الثقافات وهي فكرة رفع الدين فوق الوطن. وبالرغم من أنه لا مجال للمقارنة بين الأثنين، إلا انهم يبيعون الوطن كل لحظة باسم الدين، بأفعال لو وضعناها في مكانا لأعتبرناها خيانة للوطن. إن من يتخابر مع تنظيمات خارجية ويتلقى منها التمويل فيما هو ضد مصالح البلد هو خائن. ولكن حين يتم تغليف الموضوع بالدين تصير الخيانة أمرا مقدسا.
يقول الدكتور فرج فودة: لو خيروني بين الوطن والدين لاخترت الوطن.
وانا معه اخترت الوطن

تحياتي

Desert cat said...

تؤ تؤ تؤ تؤ
عيب يا فنتا تغلطى فى الاخوان الشرفاء
يا حبيبتى مستنية ايه
من ناس بتاجر بالدين واخده من الدين سبوبة بتسترزق من وراه ... بيشتغلوا على الغلابة والملاحيس اللى لو عدى رمى عليكى السلام يجرى يسال شيخ بدقن وعمة ويقوله هل يجوز يا سيدى ان القى السلام على انثى .... طبعا هما دول غايتهم
... حبيبتى مش سمعتى عن البنت الحامل من احد قيادات الاخوان ومهدى عاكف الشيك اللى بيلبس بدل مستوردة بنفسه هددها يا اما تتكتم يا اما يحط السيخ المحمى فى صروصور ودنها
عمرك يا قلبى ما شوفتى واحد قاعد قال الله وقال الرسول وبيلزق فيكى او مدخل عنيه تحت ملابسك الداخلية
ولما تقولى له ما تحترم نفسك يا عم الشيخ يا مؤمن
تلاقيه قام من مكانه ويقولك اعوذ بالله انتى كافرة انتى فتنة انتى رجس من عمل الشيطان
....
طبعا هما يحكموا مصر بالشكل ده وفى الوقت ده بعد ما اتباعت حتة حتة ... طيب هياخدوها يعملوا بيها ايه صحيح
ما هو كدا فعلا انتحار ... لانهم مش هيلاقوا فيها حاجه ينهبوها ... الا بقى لو الشعب حد عرض يشتريه ... وقتها ممكن يفكروا ويقولا احنا هنكم مصر ... دول همهم مصلحتهم يا جميل مش مصلحة حد تانى

Unknown said...

الأخوان هو في زي الاخوان ولا في نصب و تجارة الاخوان
ده قليل الي قلتيه عليهم انا مشفتش حد عنده قدره انه يتاجر بالدين و ببلده زيهم يقلبوا الحق باطل و الباطل حق علشان مصلحتهم
عارفا لو وصلوا للكرسي الرئاسي هاينسوا انهم مسلمين و احتمال عاكف ينسي الفاتحه بتقول ايه

هما ولا ليهم وطن ولا دين فير المناصب و الفلوس

احنا شعب شرير وحش كافر و هما ربنا يقصف عمرهم بينصحونا علشان يدخلونا الجنه

تحسي انهم خصخصوا الجنه و بيأجروها ايجار جديد

الي علي مزاجهم الجنه و الي مش تبعهم جنهم و ساء سبيلآ

اموت و اعرف مين اداهم الحق ده

مهدي ده بقي حكايه لوحده انا شخصيآ مش بحرتمه بربع جنيه حتي

و عندي ان مصر تبقي تحت الاحتلال 100 سنه ولا تقع تحت حكم الاخوان المتاجرين سنه

بوست جميل يا فانتا زي العاده

انا بكون سعيده جدآ و انا بقرا حاجه ليكي

تحياتي يا قمر

تــــايه ومش تـــايه said...

معرفش يا فانتا انا لو من لاخوان كنت عملت فيكى ايه.
انتى ليه شاغله دماغك بيهم.
كل حد يقول اللى هوا عايزو .وفعلا مصر مش مهيئه علشان يبقى فيها حكم اسلامى .على فكره هما اذكيا جدا .علشان الصعودالسريع .بيحصل بعديه هبوط سريع.
وكلنا شوفنا تركيا ازاى حزب العداله والتنميه وصل للحكم وزاى بياخدو خطوه خطوه.وبشكل ديموقراطى جدا
انا مش بدافع عن الاخوان ولا بحبهم على فكره بس همه مش ناس عبيطه.دى ناس فاهمه هيا بتعمل ايه وكل شئ بالنسبه ليهم مدروس .ولولا التعجيزات الامنيه كانو هيكتسحو الشورى.وكلنا ملاحظين انو قبل المحليات الحكومه شغاله عليهم تمام..

عم مينا said...

يا فانتازيا
الكلام ده كله بس علشان النظام شادد حيله مهاهم اليومين دول علشان الانتخابات المحلية و كل يوم بيقبضوا علي ٤٠ واحد بس الناس دي لو يوم جلهم الفرصة انه يرشحوا واحد للرئاسة مش هيفوتوهاو احتمال كبير يكون من ماليزيا

أنا حر said...

الناس دي بتستهبل ويوم ما يبقى في فرصة للحكم مش هيسيبوها ووقتها هنقول على مصر يا رحمن يا رحيم
حماس قعدت تقول اننا بنقاوم بس وملناش في الحكم ولما جتلهم الفرصة مسبوهاش ابدا
الاخوان دول نفس النظام لا منهم ولا كفاية شرهم قاعدين يقرفونا علشان تبقى الساحة فاضية ليهم وينيموا في الناس لكن وقت ما تيجي الفرصة يبقوا في الحكم
ربنا يستر علينا والله
تحياتي

على باب الله said...

أتعودنا من الأخوة الأعداء دول علي الكذب

و لو قامت إنتخابات للرياسة بكرة الصبح هتلاقيهم داخلينها بأيديهم و أسنانهم

و علي رأي عم مينا يمكن يرشحوا واحد ماليزي

و يكون في برنامجهم الإنتخابي .. أنهم ها يهادوا حماسيين غزة ( أخوانهم الصغننين ) و يدولهم سينا

---

Desert cat said...

معلشى يا فانتا استحملينى هعلق تانى
اصلى لما راجعت البوست تانى ضحكت اوى وهما بيقولوا مش عايزين نسيب الساحة على اساس انه رايح يلعب ماتش كورة وهيروح بعد كدا ... بيخادعوا مين ... احنا ولا انفسهم ولا لقوا من الغلابة والفقرا ورقة رابحة بيستغلوها ويضحكوا عليها وقت اللزوم
طيب شوفى مرشدهم السابق مصطفى مشهور قال ايه بصراحة
" لن نتخلى عن استعادة الخلافة المفقودة
على اساس اننا عايشين فى عصر ابو جهل وابو لهب
نيجى بقى لاعضاء الجماعة اللى هما اساسا معندهمش عقل ولا فكر
يبقى ناس زى دى لا ينتمون لمصر ولكن إنتمائهم للجماعة وأفكار قادتها فقط لا غير ... طيب ناس زى دى عايزين يحكموا ازاى وهما مجرد تاااااابع
الهدف الذى نشأت من أجله هذه الجماعه : هو العمل والدعوة بالجهاد . . ويشهد تاريخها الدموى بأنها تفرض آرائها الإسلامية بالإرهاب و الإجرام... قال وعايزين يحكموا علشان يخلصوا على الشعب ....
عندما ترى شعارهم الذى يظهر فيه سيفين ستعرف حتما طريقة أنتشار هذه الجماعة وطريقة تطبيق عقيدتها وتصفية الخارجين عنها والإغتيالات السياسية التى مارستها
... تفتكرى يا فانتا لما يمسكوا الحكم هيغيروا علم مصر لسيفين واتنين مغميين عنيهم بيرهبونا علشان محدش يجرؤ يبص غير تحت رجله ... ده بعيد عن اتخن شنب فيهم ....
تعرفى يا فانتا ان الجماعة الشرفاء المعتقلين من اجل تراب الوطن ... صرفت على مرشحيها وعددهم 150 فى إنتخابات عام 2005 م ما بين 250 إلى 500 مليون جنية .. دول شرفاء اوى دول حتى مش معاهم فلوس خالص ... نيجى بقى للمعارض اللى هى حكر ليهم واللى سيطرت عليها شركات خيرت الشاطر واللى تخصصت فى إقامة معارض للسلع المعمرة فى النقابات المهنية ؟! نقابتى المهندسين والأطباء ولأن عدد الأعضاء بهما يفوق المليون كان المكسب كبيرا جدا للناشط الإخوانى .. الشريف العفيف ..لاء وكمان المعارض المقامة فى الأندية الخاصة بنقابات المهندسين والأطباء واللى كمان احتكرها رجال أعمال إخوان
بس ده مش كافى ومش هيوفر لهم تمن البدل الشيك بتاعتهم يعنى موضوع المعارض ده علشان الناس تقول يا حرام دول بيتعبوا ويشقوا لكن هما بيعتمدوا على دعم الجماعة على اموال من الخارج

** من دعم خفى من رجال أعمال مصريون ينكرون دائما صلتهم بالجماعة ،
زى كل واحد تلاقيه داخل يشتم ويقولك انا مش اخوان ولا حاجه مع ان يشرفنى انى اكون منهم ... طيب بتنكر انك مش منهم وبتشتم فى الناس ليه ... بتتنكر ليهم يبقى اكيد حاجه مش كويسة يعنى
** البعض الآخر من التنظيم الدولى للجماعة الذى يحدد نسبة كبيرة للتنظيم الأم فى مصر،

** البعض الآخر من خلال إخوان أمريكا والدول الغربية وأستراليا

** هذا بخلاف الاستثمارات الإخوانية فى بعض البنوك الأمريكية هذه البنوك يديرها «يهود» ،
وسلم لى على الانتماء لمصر واحلى تحية للشرفاء والمعتقلين ...

** وهذه الجماعة لا يهمها أقتصاد مصر فقد اتجه الإخوان لشركات توظيف الأموال ودخلوا بأموال التنظيم فى شركات عبداللطيف الشريف واستثمر فيها الإخوان أموالهم بداية من الثمانينيات ، وكان هناك نوع من الاطمئنان على أموالهم لوجود من يحميها وينقل للجماعة كل المخاطر التى من الممكن أن تحيط بشركات الشريف، حيث كان المستشار الاقتصادى لهذه الشركات «إسماعيل الهضيبى» المحامى وهو الأخ الأصغر للمستشار مأمون الهضيبى مرشد الجماعة السابق فكان الإخوان يستثمرون فى شركات توظيف الأموال ما يجنونه من أرباح من إقامة معارض السلع المعمرة فى النقابات المهنية. عندما فطنت الدولة لمخالفات شركات توظيف الأموال وواجهتها سحب الإخوان أموالهم بالكامل من شركات الشريف، وكانوا أحد الأسباب فى توريط الشريف وعدم قدرته على سداد مستحقات المودعين، وعندما طلب من الإخوان جدولة حصولهم على حقوقهم حتى يتمكن من رد أموال باقى المودعين رفضوا ذلك بشدة بعد معلومات أكدها لهم إسماعيل الهضيبى . بعد فضيحة الإخوان - الشريف

** وقام الإخوان المسلمين إافتتاح أسواق لها فى مدينة دبى ودخل الشاطر كشريك لبعض رجال الأعمال الكبار فى دول الخليج، وبالتحديد فى دبى وقطر، وهما حاليا المكانان الرئيسيان اللذان يستثمر فيهما الإخوان أموالهم. وتتم إدارة مال الإخوان عن طريق خيرت الشاطر وحسن مالك أحد قيادات الإخوان الحاليين من خلال المضاربة فى البورصات العالمية وفى مدينة دبى على وجه التحديد عن طريق شركة عالمية لإدارة المحافظ المالية ويضخ سنويا «إخوان مصر» فى هذه الشركة ما يوازى 100 مليون دولار ،ولا تتم المضاربة على إجمالى المبلغ، بل هناك أقسام منه جزء للاستثمار فى المبانى والعقارات وأسهم فى شركات وجزء آخر موضوع فى أحد البنوك الفرنسية الكبرى فى دبى باسم بعض قيادات الإخوان فى الخليج العربى، ويتحكم ألأخوان فى هذه الأموال من توكيل لإدارة الأموال والسحب منها صادر لعدد من الإخوان بعضها معروف إعلاميا ، والبعض الآخر مجهول لكل واحد من حملة التوكيلات الحق فى إدارة الأموال والسحب منها هذا الجزء مودع فى البنوك تحت بند «الإيداع المطمئن» وجزء آخر فى البورصة والباقى يجرى استثماره فى شركات الكمبيوتر والهدايا وشركات الإلكترونيات بصفة عامة.
** وهم يحاولون رفع المستوى المالى لجماعات الإخوان المسلمين فى جميع الدول عن طريق التجارة فأنشأ حسن مالك شركة تهدف إلى استيراد الأثاث من تركيا أطلق عليها اسم «شركة استقبال» حتى أصبح وكيل الجانب التركى فى مصر ويتم من خلالها غسل أموال الإخوان فى عمليات استيراد وتصدير مشروعة.
** وقام أيضا عدد كبير من رجال الأعمال الإخوانيين إلى الاتجاه لليابان، حيث استثمروا جزءا من أموال الجماعة عن طريق شراء آلاف الأسهم فى إحدى الشركات الكبرى المتخصصة فى السيارات والأجهزة الكهربائية فى نفس الوقت. بعدها وجد الإخوان أن الاستثمار فى مجال السيارات يدر ربحا طائلا،
** تبرعات بالملايين من رجال الأعمال للأخوان المسلمين وهم رجل الأعمال صفوان ثابت صاحب شركات جهينة وهو صهر المستشار مأمون الهضيبى، وكذلك عبدالمنعم سعودى وآل سعودى رئيس اتحاد الصناعات السابق وصاحب توكيل شركة نيسان للسيارات فى مصر وآل الحداد أشهر المستثمرين فى مجال مستلزمات مواد البناء وكل ما هو عقارى وأحد الشركاء الرئيسيين فى معرض «إنتربيلد» الذى يقام سنويا فى أرض المعارض لمستلزمات البناء الحديث وغيرهم من رجال الأعمال داعمى الجماعة المحظورة.
** خيرت الشاطر وحسن مالك حتى أصبحا شريكين هو صاحب رأس المال والشاطر يدير الشركة التى أطلقوا عليها اسم «سلسبيل» حتى تم إلقاء القبض عليهم فى القضية المعروفة باسم الشركة، ومن بعدها أبعد الإخوان حسن مالك عن أية مسئولية تنظيمية وجعلوه متفرغا للمشروعات الاقتصادية والصفقات الرابحة
واحلى سلام للاخوان الشرفاء اللى عايزين يطهروا البلد من الفساد ... ربنا يريحنا منهم فى القريب العاجل

Dr. Eyad Harfoush said...

عزيزتي فانتازيا ، تحية احترام و تقدير لكاتبة المقال و للتعليق الذي كتبته قطة الصحراء ، اللهم أكثر من الواعين في هذا البلد قبل فوات الاوان

Empress appy said...

الا هسال سؤال ايهعلاقه حماس بالاخوان وفين الاخوان من الطفله اللى اتقتلت علىالحدود المصريه فى رفح طفله مصريه
بجد لو عرفتى الاجابه اتصلى على 0500 هتاخدى جايزة كلاشينكوف

MerMaid said...

اسمحيلي اضحك الاول علي نقطة

لا يصح ان نترك الساحة

بجد مضحكة جدا

-----------------------------
عمل انتحاري ؟؟
علي اساس ان واحد اسرائيلي مثلا طالع قصادهم في الانتخابات
اصل ايه هو اللي عمل انتحاري ؟
لما الواحد يبقي عنده خطة لبلده و لشعبه علشان يطلع بيه لفوق يبقي عمل انتحاري ؟؟
فعلا الاخوان كدة اثبتوا ان الاهم عندهم مش مصر ولا مصلحتها
الاهم عندهم هو سيادة شخصية وخلاص
علشان يبقي الواحد عنده كارنيه اخوان شبه كارنيه الحزب الوطني كدة
طيب انا مبحبش الحزب الوطني
ومبحبش الاخوان
ومبحبش اي حزب موجود حاليا
الحقيقة الاحزاب كلها تهدف الي مصالح شخصية وليس الي خدمة البلد
كل واحد مزنوق في كلمتين بيعمل حزب
الحقيقة الواحد قرف من اللي بيشوفه كل يوم



تحياتي ليكي يا فانتازيا

Anonymous said...

تايه و مش تايه

يا ترى لو كنت من الاخوان كنت عملت ايه فينا كلنا مش فانتا بس.
الاخوان غير مرغوب فيهم نهائي من فئة كبيرة من الشعب المصري.
مش عاوزين الاخوان مش عاوزييييينهم.
بس قل لي شئ واحد مفيد عملوه الخوان منذ بداية ظهورهم؟؟

أحمد منتصر said...

الإخوان مثال لناس بتفتي ف الدين ومش قادرة تمسك بلد

Fantasia said...

الاستاذ العزيز انوسنت

رفع الدين فوق الوطن هو محاولة للتستر على جريمة الخيانة العظمى. فكما تفضلت حضرتك وأوضحت, فان الجماعات التي تقوم بالتخابر مع تنظيمات وحكومات خارجية وتتلقى منها التمويل, هي فقط من تتبني فكرة جعل الدين (أو الطائفة الدينية) فوق الوطن؛ مع ان الدين يؤكد على فضيلة الانتماء للوطن, بل ويغلظ عقوبة الجواسيس والخونة والمنافقين الذين يبيعون اوطانهم تحت أي مسمى. اذن فلا وجود لفكرة رفع الدين على الوطن في الدين نفسه, وهي فكرة فاسدة منطقيا واخلاقيا

ما التعارض بين الانتماء لدين معين وبين الانتماء للوطن؟ وما هي الحجة التي يمكن ان تبرر خيانة الوطن؟ لا يوجد اي تبرير من أي نوع.. والزج بالدين لتبرير هذا الفحش انما يسيء للدين بينما لا ينفي الجريمة عن اصحابها

وأنا مع مقولة فرج فودة, فقد ضرب هذا المثل مجازا ليعبر عن استحالة وجود تناقض بين دين الفرد ومصلحة الوطن

خالص تحياتي

Fantasia said...

العزيزة قطة الصحراء

اشكرك من قلبي بجد على المعلومات اللي ذكرتيها هنا عن بعض مصادر تمويل جماعة الاخوان. احب اقول ان كل الكلام دا موثق وتم نشره في اكثر من جهة بعد فضح القضايا المشهورة دي وكشف شبكة غسيل الاموال التابعة لتنظيم الاخوان عالميا وعلاقتها بهذه القضايا. فبلاش واحد فتك يضحك الناس عليه ويجي يقول الكلام دا جايبينوا منين

واحب ازيدك من الشعر بيت.. فالبنوك اللي بيتعامل معاها التنظيم, بما فيه الفرع الرئيسي ف مصر, معظمها بالفعل بنوك غير اسلامية. عشان بس الكلام اللي عمالين يضحكوا بيه على الناس, ان الفايدة ربا وبتاع.. لغاية الناس كلها ما هتفلس. طب لما هو ربا, امال انت حاطط معظم فلوسك في بنوك اجنبية ليه؟ دا حتى البنوك الاسلامية اللي انتوا حاطين فيها جزء من الفلوس, موجودة ف جزر الباهاما وسويسرا والمانيا وماليزيا

وكمان يا ستي موضوع المضاربات ف البورصة دا ابتدوه في بورصة الدهب في اوروبا وامريكا, ودلوقتي شغالين في بورصات آسيا كمان. وايام لما شركات توظيف الاموال بتاعتهم ما كانت مغرقة البلد, كانوا بياخدوا اموال المودعين كلها يضاربوا بيها ف بورصة الدهب. وكانت المشاريع المعلن عنها اللي المفروض بيوظفوا فيها الاموال دي معظمها مشاريع وهمية, مجرد يفط واعلانات فقط! حتى مراكز البيع كانت بتبيع منتجات مجهولة المصدر على اساس انها انتاجهم. وبلاوي سودة كتير

موضوع خيرت الشاطر وتاريخه كان منشور بالكامل ف جريدة الفجر. يا ريت مصر كلها كانت قريته, عشان يعرفوا الراجل دا جاب فلوسه منين وكان بيعمل ايه بالظبط

امال انتي فاكرة الاخوان عملوا باراشوت على النقابات ليه؟ ماهي سبوبة ليهم برضه. مش عايزاهم يدوا عقود احتكار للشركات بتاعة حبايبهم يقلبوا بيها اعضاء النقابات؟ امال هيغسلوا فلوسهم القذرة ازاي؟ يا حبيبتي كل شيء مدروس.. دا تنظيم دولي مش اي كلام, يعني مش دماغ الدهل عاكف ولا طابور المرتزقة بتاع مكتب الارشاد, لأ دا تخطيط بتاع شبكة دولية.. مليارات داخلة ومليارات خارجة, ومشاريع داخلية وخارجية, وبورصات, وودايع, ومضاربات, واستثمارات, وجناح عسكري, وتنسيق مع فروع التنظيم ف البلاد التانية.. شغل على كبير

تعليقاتك اسعدتني فعلا. حسيت انا لسه فيه امل وناس بتدور على الحقيقة

كل الشكر والتقدير

Fantasia said...

عزيزتي ايمي

دا أنا اللي سعيدة بيكي وبكل الشباب الواعي اللي زيك يا ايمي

شوفي الاخوان دول زي قطاع الطرق بتوع زمان.. وولاءهم دايما للي يدفع أكتر. ما عندهمش تفاهم ف موضوع المصالح ده. وتاريخهم الاسود شاهد عليهم.. هيدفنوه فين؟

يمكن جيلكم انتم ما شافش فضايحهم من العيار التقيل, وهما مستغلين ضعف ذاكرة الشعب المصري للأسف. لكن التاريخ موجود واحنا مش هنسيبه يموت. واديهم كل يوم والتاني يفضحوا نفسهم. خليهم. أصل الغنايم لما بتكتر الطمع بيعمي عنيهم وغباءهم بيتجلى زي ما انتي شايفة

أنا عايزاكي تقري المقال ده
http://wl5www268.webland.ch/index.php?id=227
لانه بيلخص تاريخ خيانة تنظيم الاخوان واتحاده مع القوى الاستعمارية لتحقيق مصالحه. والله انتوا جيل محظوظ, عشان لولا 11 سبتمبر مش ممكن الكلام دا كان هيطلع للنور. عارفة المثل بتاع مشافوهمش وهما بيسرقوا شافوهم وهما بيتحاسبوا؟ أهو دا اللي حصل. وناس كتير أوي كتبت كتب ونشرت فيها وثائق بتثبت استغلال وكالات الاستخبارات الاجنبية لتنظيم الاخوان, وتحالفهم معاهم في اوقات كتير. والمقال دا هو اقصر تلخيص للوقائع دي

يا حبيبتي دول بتوع ابجني تجدني. شوية الجلا جلا والحنجل والمنجل دول هما مجرد عدة الشغل بتاعتهم. ولو قارنتي ما بين فروع التنظيم في اماكن مختلفة, هتكتشفي حاجة غريبة جدا.. ان فيه بينهم اختلافات جذرية, ومع ذلك مجتمعين تحت شعار المصلحة. طب ليه مش قابلين الاختلافات جوا بلدهم؟ ما هما بيقلبونا برضه وبيلموا النقطة على حسنا

الصنف دا ماعندوش ريحة الضمير للأسف. تخيلي ناس بتاجر بدين ربنا! فيه حاجة ألعن من كدة؟ مش ممكن طبعا نتوقع انهم يكون عندهم رحمة ولا قيم ولا اخلاق ولا أي ضمير الشعوب بالنسبالهم مجرد بهايم بيسحبوها وراهم وهما ماسكين جزرة الدين وعصاية التكفير الفوري

خالص تحياتي

Fantasia said...

تايه

بص يا ابني أنا عذراك, بس عندي أمل تقرا شوية وتعرف الناس دي عبارة عن ايه بالظبط

يا تايه تعجيزات امنية ايه بس؟ انت بتاكل م الكلام دا؟ يا ابني دول بيبلغوا عن بعض قبل الانتخابات عشان الناس تتعاطف معهم وتديهم اصوات بالعند ف الحكومة.. انت لسة بدري عليك

تحياتي

Anonymous said...

ايه معلوماتك الاكيدة دي نفسي افهم بتجيب الكلام دة منين اصلا
وبعدين معلش يعني ابي
بتسال فين الاخوان من الطفلة اللي اتقلت على الحدود طيب وفين الريس والحزب الوطني وفين حضرتك وانا والبلد بحالها
تقصدي ايه يعني
اعتقد ان دم البنت دي في رقبتنا كلنا ورقبة ئيسها الاول ورقبة كل واحد عايش في التوهان ومش عارف ينصر دينه حتى في نفسه ورقبة واحد عمال يشرب شيشة مثلا ومفرط في اقل حاجة
عاوزين ربنا ينصرنا انصروه في انفسم الاول واتمسكوا بحدوده
والله انا معجب بكلامك يا ابلة فانتا بس تقدري تقوليلي رايك لو حزب الاخوان المسيحيين اتعمل هتقفي ضدهم برضه ولا الحساسية اللي عندك من الاخوان المسلمين وربنا يشفي=

Anonymous said...

وراكم وراكم

حزب اخوان مسيحي ايه ال بتقول عليه؟؟
ايه دخل المسيحيين في الموضوع هو كلام و خلاص؟
أي حزب سياسي ديني مرفوض... المتاجرة بأي دين مرفوضة....استغلال أي دين لتحقيق أهداف سياسية و مكاسب شخصية مرفوض.

Fantasia said...

العزيز عم مينا

هو اكيد هيكون من ماليزيا, لانهم عارفين ان المصريين مش طايقينهم ولا طايقين وشوشهم العكرة. فلو فعلا عايزين يوصلوا للحكم لازم يستوردوا مرشح ماليزي, وأكيد ساعتها هينسب لنفسه الانجازات بتاعة مهاتير محمد, بما أن مهاتير محمد علماني

لكن موضوع النظام اللي شادد حيله دا أنا مش معاك فيه. أنا عندي النظام يسيبهم ويتجاهلهم لغاية الانتخابات ما تعدي أحسن. لكن كدا يبقى أكيد فيه اتفاق بين النظام والاخوان, لانهم عارفين ان الاعتقالات الجماعية دي بتزود التعاطف مع البعدا. ومش ممكن الصدف يعني ان قبل كل انتخابات داخلينها الاخوان تحصل حملة اعتقالات! حاجة بقت مكررة وماسخة. ومعروف أوي الهدف من وراها. أنا من زمان عارفة ان الاخوان بيبلغوا عن بعض لاسباب تكتيكية, لكن ليه النظام يستجيب للالاعيب دي؟ ما هو النظام مش غبي يعني.. وبعدين عندهم قانون طواريء يخليهم يقبضوا ع الناس دي ف أي وقت تاني. فيه ريحة مش كويسة ف الموضوع ده

خالص تحياتي

Alexandrian far away said...

مساء الخير
الصراحه لو فيه أمل في البلد دي فهو في بناتها مش أولادها
:-)
شىء يفرح
فانتازيا فعلا قلمك له قوة المطرقه وحدة المشرط ورشاقة الصقر المنقض
قطة الصحراء صدقت حين قلت رب قطة خير من 1000 أسد وتستحقيها
أيمي لسه باقرأ مدونتهاومستمتع جدا
ميرميد تبقى كلماتها لاذعة وأنيقة معا

سامحوني على المقدمه الطويلة نوعا ما

أستاذه فانتازيا
أسمحي لي أن أتعجب من تعجبك
من قال أن الأخوان يسعون لحكم مصر أساسا؟
ومن قال أن الأخوان يسعون لأن يكونوا حزبا سياسيا من البدايه
هل نسيتم كلمات المؤسس؟
الإخوان المسلمين دعوة سلفية، وطريقة سنية، وحقيقة صوفية، وهيئة سياسية، وجماعة رياضية، ورابطة علمية وثقافية وشركة اقتصادية، وفكرة اجتماعية

هي ببساطة مخلوقة هلاميه خفيه شبحيه ماسونيه
لا يريد الأخوان التحول لحزب ولا تولي الحكم لكي لا يجبروا على الخروج من ظل التعمية لضوء التوضيح
ومن ظلام الدروشه إلى ضوء البرنامج السياسي الحقيقي
السياسة هي أداة أخرى من أدوات تلك الحركه مثلها كمثل الدين والهدف هو تحقيق أكبر قدر من النفوذ والثروة لكبار أعضائها وفي النهايه كوطني مصري فغن النضال ضد الأخوان هو نضال من أجل الحفاظ على ما بقي من استقلال مصر وحماية لها من أن يوقعها هذا الطابور الخامس الشيطاني تحت حكم أسيادهم السعوديين الوهابيين

تحياتي ومودتي وأحترامي لصاحبة المدونه ولكل المشاركات

Fantasia said...

العزيز أنا حر

اكيد طبعا مش هيسيبوا فرصة توصلهم للحكم. هو احنا داقين عصافير؟ لكن التصريح دا يوريك نواياهم الحقيقية من حيث الغرض من التواجد على الساحة السياسية. هما عايزين أي حاجة يطلعوا بيها والسلام, أي مكاسب من أي نوع. والسلطة طبعا هدفهم الاساسي.. لكن لا ليهم دعوة بمشاكل البلد ولا مسئولياتها, هو حكم للسبوبة برضه والتحكم ف خلق الله. بالبلدي كدة بيقولوا للناس مش احنا اللي هنحل مشاكل مصر, لما تبقى تتحل نبقى نحكم عشان نلم الغلة

خالص تحياتي

Fantasia said...

الاستاذ العزيز على باب الله

طبعا كلامك صحيح. ومش عايزة اعيد ردي على عم مينا وأنا حر, لكن قعدت أفكر شوية ف حكاية سينا دي ولقيتها للأسف ممكنة جدا لعدة اسباب

أولا قيادات الاخوان غير عموم اعضاء الاخوان وبتجمعهم مصالح مع اطراف خارجية كتير. دي ناس معدية وبتلعب ف مئات الملايين, يعني مش فارق معاهم لا بلد ولا أرض ولا شعب.. دول ممكن يبيعونا جملة أو قطاعي.. وممكن يبيعونا قطع غيار بالحتة لتجار الاعضاء البشرية

ثانيا تاريخ التعاون بين تنظيم الاخوان العالمي واسرائيل. يعني زي لما خدوا دعم من اسرائيل عشان يقوموا بعملية قلب نظام الحكم ف سوريا. وبما أن اسرائيل بتعتمد في اساس مخططها ف المنطقة على تهجير الفلسطينيين في سينا لتصفية القضية الفلسطينية, فأكيد في حالة وصول الاخوان للحكم ف مصر هيحصل تحالف بهدف تنفيذ المخطط ده. لكن بالرغم من ان مخططهم في سوريا فشل, الا اني مش واثقة من النتيجة ف مصر بكل اسف

ثالثا الاخوان دايما بيلعبوا على الطبيعة العاطفية للشعب المصري, والتنظيم العالمي كله قايم على استغلال عاطفية الشعوب وعدم وعيها. وممكن جدا يحصل زي موضوع الحدود اللي حصل قريب وينسوا المصريين ان بلدهم اسمها مصر وان حدودها دي أمن قومي وشيء مقدس. فتلاقي الشعب عندنا من كتر الزن ع الودان اللي أمر م السحر راح قايل وماله لما نجيب الفلسطينيين عندنا عشان يعيشوا ف سلام. وممكن جدا ينسوا ان فيه حاجة اسمها فلسطين وينسوا طنطنة الاخوان عن تحرير فلسطين. ويبقى بدل تحرير فلسطين, نقل فلسطين. ايه يعني الفرق بين تحرير ونقل؟ ما هي الاوطان والارض والحدود بالنسبالهم حبر على ورق, مالهاش أي معنى. لا عندهم حاجة اسمها هوية ولا وطنية ولا جنسية. عادي يعني التاريخ بالنسبالهم لعبة كدة يتغير ف ثانية

رابعا زي ما هما قتلوا السادات عشان راح القدس ممكن جدا يطلعوا القدس دي مجرد مكان مقدس لا ينتمي لبلد بعينها, باعتبار ان كلها أرض الله يعني. وعادي الناس هتصدق, بما ان المرجعية اللي بقينا بناخد منها الاسلام هي الاخوان, فلو الاخوان نفسهم قالوا القدس مش فلسطينية محدش هيفتح بقه

خامسا المناخ الظلامي اللي هتعيش فيه مصر في حالة لا قدر الله وصل الاخوان للحكم, مش هيخلي فيه أي وجود لمعارضة أو حركات سياسية تمنعهم من تنفيذ مخططاتهم ف المنطقة. هي طالبان لما كانت بتضرب الستات اللي عينيهم باينه ف الشوارع وف نفس الوقت بتاجر ف الافيون كان الشعب الافغاني بيفتح بقه؟

شكرا انك خليتني أفكر ف الاحتمال ده, لانه اثار ف عقلي تخوف من مساندة امريكا للاخوان في مصر. الكلام دا طبعا مش جديد وطلعت وثائق من السي آي ايه بتثبت وجود التوجه ده في ملفات معينة من زمان. لكن الجديد هو سياسة امنية امريكية خارجية بتتجه ناحية التحالف مع الاخوان في تمكينهم في مواقعهم, رغم المعارضة الامريكية الكبيرة للتحالف ده, اللي بيسموه التحالف مع الشيطان. لكن حاليا بيحاولوا يقنعوا صناع القرار في امريكا ان التحالف مع الاخوان بيفيد مصلحة امريكا اكتر بكتير من محاربتهم أو مجرد تضييق الخناق عليهم

في حالة تبني امريكا للرؤية دي, يبقى مفيش أمل لمصر ولا الشعوب العربية كلها. صحيح الظواهري ومحمد عطا اخوان, لكن امريكا تبيع ابوها عشان المصالح, ودا اللي السياسة الامنية الجديدة بتحاول تروج ليه. وتاريخ الامريكان مع حساباتهم الغلط يخليني اقلق

خالص تحياتي

Fantasia said...

العزيز الدكتور اياد

اشكرك جزيل الشكر واشاركك الدعاء. كما اود ان اوجه معك الشكر مرة اخرى للعزيزة قطة الصحراء على تعليقها القيم

خالص تحياتي

Fantasia said...

العزيزة ابي

حماس هي الاخوان. باختصار حماس هي فرع الاخوان في فلسطين يا ابي, عشان كدة هما بيقسموا الفلسطينيين لحمساوية وغير حمساوية, زي تمام ما بيقسموا المصريين لاخوان وكفرة

اما الطفلة اللي اتقتلت ع الحدود فهي مصرية, عشان كدة ولا على بالهم. ما تسأليش عن موقفهم.. من امتى كان ليهم موقف من الحاجات اللي ما بتخدمش مصالحهم؟

خالص تحياتي

Fantasia said...

العزيزة ميرميد

انتي كدة جيبتي المفيد. كله نظام شوف مصلحتك يا هندسة. وهنرجع تاني ان سبب انفراد الحزب الوطني بالساحة السياسية واحتكار الاخوان للمعارضة هو غياب الوعي الوطني اللي يقدر يوفر بدايل للنموذجين الاستغلاليين دول. عشان كدة باقي الاحزاب مجرد ديكور لانها بتفتقر للبرنامج الجاد.. واللي منهم عنده برامج جادة بيفتقر للتمويل السخي اللي موجود عند الاخوان والوطني. فتلاقيهم احزاب زي اكشاك السجاير كدة وعلى ما تفرج

الحياة السياسية في مصر مأساة يا ميرميد

خالص تحياتي

Fantasia said...

بسيم

وأنا بسأل معاك نفس السؤال, وبادعوا زوار المدونة الكرام للأشتراك في محاولة ايجاد مثال واحد لعمل مفيد قامت بيه الجماعة المحظورة من أول نشأتها. أما عن الاعمال التآمرية والهدامة فسجلهم غني بيها, وممكن نكتب مجلدات عن مصايب الاخوان في مصر

خالص تحياتي

Fantasia said...

الاستاذ أحمد منتصر

هما بيفتتوا الدين وانت الصادق.. ومن حيث انهم يمسكوا البلد فانا شايفة انهم لو نجحوا يمسكوا لسانهم دا يبقى انجاز كبير في حد ذاته

تحياتي

Fantasia said...

وراكم وراكم

مفيش حاجة اسمها حزب سياسي على اساس ديني. الاختراع دا مالوش غير توصيف واحد بس: عملية نصب

Fantasia said...

الاستاذ العزيز اسكندراني

اشكرك جدا على مدحك للشجاعة والوعي الحريمي اللي موجود في عالم التدوين واللي عكسته تعليقات شابات المدونات هنا. وكلامك عني بقى دا شهادة كبيرة اعتز بيها جدا
الصراحة أنا سعيدة ان الاشادة دي جاية من رجل, انت مابتجيش تزورني ف عالم فانتازيا ليه؟

بس معانا اقلام رجالي تستحق التقدير برضه, الحق يتقال

عجبني جدا وصفك للجماعة اياها بانها مخلوقة هلاميه خفيه شبحيه ماسونية. وصف حقيقي وواقعي ودقيق ويوضح ماهيتهم بالظبط. بس موضوع سعيهم ورا الحكم موجود كحلم بالسلطة, زي ما انا وضحت ف ردي على استاذ أنا حر. اما اتباع فلسفة المؤسس من ورا تأسيس الجماعة دا هما تخطوه من زمان. دلوقتي دي بقت عصابة دولية زي المافيا كدة, ومفيش فلسفة بتحكم خططها غير المصالح.. يعني كلام الشيخ حسن البنا دا اخرهم يبروزوه ويعلقوه ع الحيطة.. لكن كيانهم الجديد ملوش أي اهداف محددة, فهم فعلا كيان هلامي يجمع مجموعة من المرتزقة المتمسحين بالدين من اجل تحقيق مصالحهم عن طريق استخدام احط واحقر الاساليب, ومن ضمن الاساليب دي التخابر والتآمر على بلدهم. ولو مصلحتهم بقت في بيع البلد دي عن طريق حكمها هيحكموها, لكن لازم يتأكدوا ان الامور مواتية عشان ما يحرقوش نفسهم ف انتخابات مش مضمونة أو صراعات مع اطراف هما عارفين انها اقوى منهم ف الوقت الحاضر

خالص تحياتي

Anonymous said...

ويارتى مين بقى اللى قالك ان بدل مهدى عاكف مستوردة وبالالاف
نقرتى البدلة ودخلتى جواها وعرفتى ماركتها
ولا اى بدلة يلبسها واحد اخوانى تبقى بشئ وشويات
ولا هى الكحة فى ايد المش عارفة ايه عجبة

وبعدين رجال الاعمال الاخوان المحاكمين محاكمات عسكرية اللى مش عاجبينك وبتقولوا عليهم بيغسلوا اموال
الدولة برضه لفقتلهم نفس التهمة
ويا سبحان الله
"ويمكرون ويمكر الله والله خير الماكرين"
القضاء برأهم من التهمة مرتين او تلاتة
ولما الحكومة مالقيتش بد ولاقيت ا القضاء المدنى منشف دماغه وكل مرة يبرأهم من نفس التهمة فاحالوهم للمحاكم العسكرية اللى تبعهم اللى هى اصلا معمولة تبع الجيش لمحاكمة العسكريين ...
لان هما دول اللى ضامنين ولاءهم
ياريت تتابعى الله يكرمك وتقرى بس كويس عشان شكلك ماتعرفيش تعملى حاجة الا الشتيمة واللعن
وكأن الاخوان دول هما اللى كفار وانتوا اهل الفردوس اعلى

وبس طول الوقت تتشدقوا بجملة الاخوان بكفروا الناس
والله انتوا اللى بتكفروهم
ونفسى بس واحد منكم يقول امتى واحد من الاخوان قال كلمة كافر على اى حد
بلاش
امتى اى حد من الاخوان كفر مبارك نفسه اللى ظلمهم وظلم المصريين كلهم
حد يجيبلى واقعة الاخوان كفروا فيها حد
ارجووووووكم
اتوسل اليكم
واقعة واحدة بس مش طالبة غيرها

هاتولى اى عنوان فى اى جريدة محترمة قالت ان فلان الفلانى الاخوانى كفر علان العلانى

والف شكر

Fantasia said...

كلامك مش واقعي

الصراحة مش عارفة مين فينا اللي كلامه مش واقعي, بس قصره

أولا بالراحة كدة وهدي نفسك, لأن كلامك دا كله ماينفيش ولا كلمة اتقالت هنا

بصي أنا مش هأديكي درس في معرفة البدل المستوردة من المحلي, بس المرة الجاية لما تقابلي عكفكف, أمانة عليكي تسأليه بدلته منين. ولازم تكوني متأكدة انه مش يتيم ولا دي كحكة, دي مليارات يا حبيبتي وبيستغفل الناس ويقولهم ان دا اللي حوشه من سنين شغله ف السعودية عند أولياء نعمته
اسألي الأول وبعدين تعالي هاجمينا وأعملي ما بدالك.. لكن طول ما أنتي مش عارفة حاجة يبقى مالكيش حق تنتقدي ناس كلامها كله من مصادر موثقة, ماشي؟

تهمة غسيل الاموال يا حبيبتي ثابتة عليهم, التهمة اللي فيها ثغرات هي التخابر مع جهات اجنبية واثبات مصادر التمويل. وتهمة التخابر مع جهات اجنبية دي زي التجسس كدة, خيانة عظمى

مافيش تلفيق ولا حاجة. انتي مين اللي قالك الكلام الفارغ دا؟ هيلفقولهم تهم ليه يا بنتي؟ ما فيه قانون طواريء, وكفاية ان الناس دي معروف انها بتمول جماعة محظورة.. يعني كدة ف السجن وكدة ف السجن, مش محتاجة تلفيق. يا بنتي اقري شوية الله يخليكي بلاش تضحكي الناس عليكي

لعلمك بقى انا ضد محاكمة المدنيين امام محاكم عسكرية, بس ممكن تثبتيلي ان دول مدنيين؟ مش الناس دي بتمول جماعات مسلحة؟ مش ليهم جناح عسكري؟

وحتى لو فرضنا انهم مدنيين, طيب ما كل واحد من دول وراه جيش محاميين بيدفعلهم مرتبات شهرية وهما قاعدين في بيوتهم عشان القضايا اللي زي دي. المحاميين الارزقية دول كل شغلتهم انهم يلعبوا على ثغرات القانون ويخرجوا القضية عن مسارها الأصلي. دا غير المذكرات والاعتراضات والاستئنافات.. هل دا متاح لأي متهم مصري عادي؟ قوليلي

دا غير المظاهرات والضغط الاعلامي والمنظمات الدولية اللي بتدخل في القضايا دي.. طب القضاء هياخد مجراه ازاي في وسط الهيصة دي كلها؟ وبعد ما يحكم كمان يلاقي لسة فيه نقض واستئناف وندخل نفس الدوامة من تاني, وحليني بقى

طب جيش المحاميين دول مين بيدفعلهم؟ ومنين؟ مسألتيش نفسك ولا سؤال من دول؟ انتي مصممة تفضلي مغمضة عينيكي كدة؟

انتي أصلا عارفة ايه الفرق بين القضاء العسكري والمدني والاداري؟ انتي بتتكلمي على اساس ايه؟ مين دول اللي هما ضامنين ولاءهم؟ انتي فاكرة ان المحاكم دي بيحكم فيها ظباط جيش؟ والله شكلك فاكرة كدة وهتضحكي الناس عليكي تاني

انتي اكيد عايشة ف كوكب تاني.. معقولة ما شفتيش ولا واحد كفروه الأخوان؟ دا انتي لازم عايشة في معسكر اخواني تحت الأرض. وهو حتى الظالم من حق حد يكفره يا مؤمنة؟ هو دا الشيء الوحيد اللي يثبتلك انهم بيكفروا الخلق؟ انهم يكفروا مبارك علانية؟ دول بيقولولك مسئولية مصر عمل انتحاري! يعني مبارك كدة دخل الجنة من أوسع ابوابها على ايديهم

ع العموم لو عايزة تشوفي التكفير عيني عينك, مش محتاجة تروحي بعيد. شوفي تعليقات الاخوان عن المسيحيين والعلمانيين واليساريين وأي حد مسلم مش اخواني يختلف معاهم

انتي بتتكلمي بجد ولا بتهزري؟ ما المحاميين الارزقية الاخوانجية كل يوم والتاني يرفعوا قضية على حد يكفروه ويطالبوا بتقطيعه حتت. انتي يا بنتي مش ف الدنيا؟ قال هاتولي جريدة واحدة.. ولما انتي حلوة وبتقري جرايد, ما سمعتيش عن ولا قضية من دول؟

أنا رديت عليكي عشان انتي صعبانة عليا بس, لكن لولا كدة والله كنت ضحكت وسيبتك تقولي الكلمتين اللي زانقينك وخلاص

ألفين شكر يا ستي على ذوقك وادبك

Hoda said...

فانتا حبيبتى ازيك

والله يا فانتا انا اليومين دول وصلت لحالة يأس وزهق وقرف من الدنيا والناس والعيشه على اللى عايشينها ما بقاش ليه نفس لاى حاجه خالص بجد وعندى انهزاميه واحباط شديدين لا بقيت عايزه اسمع سيره لا عن اخوان ولا حكومه ولا زعماء ولا احرار ولا علمانيين ولا بلا ازرق خلاص بجد مفيش فايده حرقت الدم دى كلها ولا ليها فايده المناقشه من اصله طالما احنا خلاص وصلنا للدرجه الميؤس منها دى على كل المستويات انتى عارفه يا فانتا احنا بجد محتاجين لايه محتاجين لحركه جريئه فى بلدنا تكون كده حركه وسطيه جامعه شامله كل الاتجاهات ومافيهاش اى نوع من التطرف لليمين او لليسار فيها يكون كل انسان حر فى معتقداته وافكاره وارائه وما حدش يجبر حد على فعل شىء وماحدش يصادر حرية حد فيها تنوير وفكر وحداثه عايزين ثوره تنويريه بحق وحقيق من جديد فى بلادنا صحوه كده تصحى كل الناس الغفلانه دى بس ازاى وفين وامتى هى دى المعجزه ... انتى تعرفى انا دلوقتى بقيت اشجع مين اوباما !!! اه والله وهو اللى عايزاه يفوز على الوليه هيلارى دى وعلى جثتى لو فازت خلاص انا بعت القضيه وهشجع المستورد وهيكون انتمائى للاخضر

الا صحيح يا اوختشى انتى بتعرفى ازاى ان المخفى اللى بيعلق عندك دا واحده مش واحد عندك اجهزة تصنت ولا الحاسه السادسه؟ يا سلام عليكى يا فانتوسا يا مظبطاهم انتى . اخبار مجلة مصر الجديده ايه اوعى تفتتحيها وما تدعونيش هزعل بجد الا انا عندى كلام كتيييييير اد كده كتماه فى قلبى وعايزه اقوله لو عندك جديد ابقى ابعتيلى

يااللا عايزه حاجه ما تتكسفيش بجد ابقى نادى عليا هتلاقينى متلقحه هناك

على ايميلات بقى سلام

Alexandrian far away said...

الأستاذه العزيزه فانتازيا

لا شكر على واجب
والحقيقه أنا متحيز للمرأة عموما، وكما قال استاذنا المازني فالمرأة هي من طورت اللغة أولا، وهي من طورت الفنون وتحضرت أولا بينما بقي الرجل في همجيته حتى أستدرجته المرأة إستدراجا للحضارة، ولعلها لم تنجز ذلك على الشكل الأكمل بعد

ومن قال لك أنني لا أزورك في عالم فانتازيا؟!!!
أنا زائر منتظم للموقع العربي، ومشكلتي مع النسخه الأنجليزيه هي الأتي: رغم أني أحب اللغه الأنجليزيه جدا إلا أن عملي الحالي يتطلب كثير من القراءة الأنجليزيه في موضوعات اراها مملة وكثير من الترجمه لموضوعات بائخة ركيكة الأفكار وبنهاية اليوم أجدني غير قادر حتى على تحمل مسلسل على أم بي سي أكشن
:-)
لكن أنا أتواجد بمدونتك الرائعة تلك وأستمتع بقراءتها جدا

وأتفق معك طبعا في أن أفكار حسن البنا أصبحت أحفورية مقارنة لما تطورت إليه الجماعه، لكن العجيب هو هذا التقديس الرهيب والمريب من الجماعة لمؤسسها وكأنما هو نبي أخر الزمان
أو نزل برساله جديده مثلا
تحياتي وأحترامي ومودتي
الا ما سمعتش رايك في التدوينه الأخيره

Anonymous said...

ده مقطع من ردك الاخير
"تهمة غسيل الاموال يا حبيبتي ثابتة عليهم, التهمة اللي فيها ثغرات هي التخابر مع جهات اجنبية واثبات مصادر التمويل. وتهمة التخابر مع جهات اجنبية دي زي التجسس كدة, خيانة عظمى
"

ههههههههههههههه
ضحكتينى بشدة وخليتنى اعرف انا بكلم مين

ده انتى لو عندك ذرة متابعة للجرائد والاخبار كنتى هتعرفى ان تهمة غسيل الاموال مش ثابتة عليهم والقضاء برئهم منها مرتين قبل مايحولوهم على المحاكم العسكرية
اما تهمة التخابر والتجسس فدى اول مرة اسمعها
ده حتى الصحف القومية اللى طول النهار تشتم فيهم ماجابتش سيرة التهمة دى
انتى بقى جبتيها منييييين ؟؟
من الواضح ان ليكى مصادرك الخاصة .. والخاصة جدا
;)

وبالتالى انا مش هرد على باقى التهم اللى قلتيها فى ردك الاخير لانى اكتشفت انى مش بتكلم مع حد مثقف ومتباع حقيقى وعايز يتناقش ويناظر

لأ ده حد حفظوه كلمتين وجه يرصهم

;)
;)

Fantasia said...

العزيزة حنين

منوراني دايما يا حبيبتي. ومين سمعك أنا كمان طهقت وقرفت وجبت اخري من اللي بيحصل. هو فيه كدة يا ناس؟ كله زفت زفت, لما جالي اكتئاب مركب

بقيتي بتشجعي اوباما يا حنين؟ يا اختي ألف بركة. ماهي السياسة هنا ما فيش منها رجا. عمرنا ما هنشوف ريحة انتخابات بجد طول ما الوطني والاخوان طابقين على نفس مصر

أنا معاكي أوي بقى ف موضوع ان لازم يكون فيه حركة وسطية شعبية بجد, ما فيهاش لا مصالح ولا تطرف ولا بطيخ. لكن كل ما مشروع زي دا يبدأ بيروحوا مقصصينه على طول, بيموتوه قبل ما يتولد, عشان نفضل ف اليأس والاحباط اللي عايزين يدفنونا فيه

ما تيجي يا حنين نعمل الحركة دي وينوبنا ثواب؟ ما احنا طول ما احنا مستنيين الرجالة يعملوا حاجة مافيش حاجة هتحصل. نعمل حركة الستات هي الحل ايه رأيك؟ وننضف البلد م كل الهم ده

أنا بعرف المخفيين عشان حفظتهم خلاص وحفظت اسلوبهم العشوائي. ماهو أصل الجبن بتاعهم بيخليهم ما يستجروش يدخلوا باساميهم, لكن كلامهم هو هو, حتى لو لبسوا طقية الاخفا هيتفضحوا برضه. كل الاسطوانات اياها اللي حافظينها وصامينها ومعندهمش غيرها خلاص أنا كمان حفظتها, فتلاقيني ساعات اعرف التعليق بيقول ايه من أول جملة, كأني بعمل فورود للشريط

المجلة بقى يا ستي مطلعة عيني. أول مرة أبقى رئيسة تحرير. ما كنتش أعرف ان الموضوع صعب ومتعب أوي كدة. لكن هانت أهوه, كلها كام يوم والعدد الأول هيطلع. ان شاء الله يعجبك. ولو عايزة تعرفي عنها أكتر تعاليلي على الفيسبوك.. ما أنا ببقى هناك, مش تبقي تيجي؟

تحياتي يا قمر

Alexandrian far away said...

أيه موضوع المجله ده
ورئيسة تحرير كمان
ما شاء الله
كفو والله على راي الأماراتيين
مبروك
عاوز شرح تفصيلي ويا ترى حتتوفر ع النت ولا لأ؟
وأزاي ممكن اشترك فيها وكده يعني على أعتبار أني في بلاد الرمال والبلاستيك

تحياتي

Fantasia said...

الاستاذ العزيز اسكندراني

الله ينور عليك. ربنا يكتر من امثالك اللهم آمين
امال ليه اغلبية الرجالة مش شايفة كدة يا استاذنا؟ عمالين يطلعوا ع الستات سمعة انهم عقولهم ترالالي وانهم نوع ادنى من البشر وما يعرفوش يعملوا حاجة غير انهم يبقوا خدامات عند اسيادهم الرجالة. وكلمة حقوق المرأة بقت بتكهربهم معرفش ليه

دا أنا حصلي كل الشرف حقيقي عشان عرفت انك بتنور مدونتي التانية, لازم اروح بقى اعملها عملية تطوير شاملة كدة. معلش أنا بقالي فترة ما نشرتش حاجة جديدة هناك لاني مشغولة جدا, بس هأنشر تدوينة جديدة قريب

معلش أنا مشتركة في
RSS feed
عشان كدة معرفتش انك نشرت حاجة جديدة. أكيد التقصير مني, حقك عليا يا استاذنا, فوريرة هتلاقيني هناك

خالص تحياتي

Fantasia said...

كلامك مش واقعي

مش ممكن يا بنتي البطيخ اللي انتي فيه ده. انتي كوميدية أوي بجد. ما تروحي تشوفيلك دور كومبارس في فيلم كوميدي. دا انتي ما كلفتيش خاطرك تتأكدي من الكلام اللي أنا قلته حتى. يا بنتي اقري حيثيات الحكم, جتك خيبة

لأ وأحلى حاجة انك بتبجحي بعد كل ده! يخرب بيت عقلك يا شيخة. مخ دا ولا كاوتش فرز تالت؟

Fantasia said...

الاستاذ العزيز اسكندراني

اشكرك جدا على تشجيعك الكريم. المجلة اسمها "مصر الجديدة", وهي مجلة الكترونية شهرية. العدد الأول منها هينشر يوم 15 مارس ان شاء الله, واتمنى انه يحوز على اعجاب الجميع

خالص تحياتي

Alexandrian far away said...

أستاذه فانتازيا
العفو يا ستي
وجميل أنها إلكترونيه وليست ورقيه
كده أبقى أضمن أنها توصل لي
لأني هنا بصراحه ساعات باشك أنه فيه قرار رسمي بمنع دخول وتداول أي مطبوعات جاده أو حقيقيه
عموما أنا منتظر صدورها
وأتمنى لكم كل توفيق ونجاح
تحياتي

المـــفـــــــقــــــــوعـــــة مــرارتـهــا said...

برافو عليكي انك بتكتبي اللي بيحصل في كليتك ده
ده مشكلة خطيرة
وإرهاب جامعي